¿Kenijkatsa tlamis mikilistli?
MASKE kema Adán uan Eva tlajtlakolchijkej techpanoltilijkej tlajtlakoli uan mikilistli, toTeotsij amo kipatlatok tlen mosentlalijtok kichiuas ipan Tlaltipaktli. Ipan Biblia, toTeotsij miakpa kiijtojtok amo kipatlatok tlen mosentlalijtoya kichiuas.
-
“Tlakamej tlen itstokej xitlauakej iixpa toTeko moaxkatisej nopa tlali tlen yajaya kinmakas, uan nepa itstosej para nochipa” (Salmo 37:29).
-
“Uan yajaya toTeko tlen más kipia tlanauatili kitlamiltis miki[li]stli para nochipa uan kinuachilis ininixayo nochi tlakamej” (Isaías 25:8).
-
“Uan ikualankaitaka tlen hasta más teipa Cristo kitlamiltis elis miki[li]stli. Uan kema yajaya kixoleuas mikilistli, axaka más mikis” (1 Corintios 15:26).
-
“Uan toTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli” (Apocalipsis [Revelación] 21:4).
¿Tlake kichiuas toTeotsij uan kiampa kitlamiltis mikilistli? Kej ya tikitakej, Biblia kiijtoua “tlen itstokej xitlauakej [...] itstosej para nochipa” ipan Tlaltipaktli. Uan nojkia kiijtoua “ipan nochi ni Tlaltipaktli axonka niyon se tlakatl tlen nochipa kichiua tlen kuali uan axkema tlajtlakolchiua” (Eclesiastés 7:20). Uajka, ¿toTeotsij amo kichiuas tlen kiijtoua itlanauatiljuaj uan kiampa uelis tiitstosej nochipa? Amo, ya amo kema kichiuaskia nopa, pampa ya “axueli istlakati” (Tito 1:2). Uajka, ¿tlake kichiuas toTeotsij uan kiampa kiaxitis tlen mosentlalijtoya kichiuas ipan Tlaltipaktli?
TOTEOTSIJ “KITLAMILTIS MIKI[LI]STLI PARA NOCHIPA” (ISAÍAS 25:8).
MONEJKI SE TLAXTLAUILI UAN KIAMPA TLAMIS MIKILISTLI
Jehová tlauel techiknelia, yeka tlaxtlajki tlen monekiyaya uan kiampa ueliskia techmakixtis tlen mikilistli. Ipan Biblia nopa tlajtoli tlaxtlauili motekiuia kema se akajya kiixtlaua se tlamantli tlen kinempolo o kema tlaxtlaua pampa kiampa kiijtoua tlanauatili. Ipati nopa tlaxtlauili moneki elis sanse ika nopa tlamantli tlen polijki o tlen nenpolijki. Uan pampa nochi titlajtlakolejkej, kinamiki timikisej. Yeka, Biblia kiijtoua: “Niyon se tlen inijuantij axuelis momakixtis tlen itlajtlakoljuaj, niyon axuelis kimakixtisej se ininikni. Axaka uelis kitlaxtlauis toTeko Dios para ma kimakixtis. Pampa toyolis eltok se tlamantli tlen miak ipati. Axonka niyon se tomij ipan nochi Tlaltipaktli tlen ika uelis moixtlauas” (Salmo 49:7, 8).
Kema se maseuali miki san kiixtlaua itlajtlakoljuaj. Amo ueli momanauia yon kiixtlaua itlajtlakoljuaj seyok maseuali (Romanos 6:7). Yeka, monekiyaya se akajya katli amo tlajtlakole ma temaktili inemilis, amo pampa kiixtlauaskia itlajtlakoljuaj, temaktiliskia inemilis pampa kiixtlauaskia totlajtlakoljuaj (Hebreos 10:1-4).
Ya nopa tlen kichijki toTeotsij. Kititlanki iKone katli itstoya iluikak ma tlakatiki ipan Tlaltipaktli kej se maseuali katli amo tlajtlakole (1 Pedro 2:22). Jesús kiijtok: “Niualajtok [...] para nitemaktilis noyolis keja se tlaxtlauili para nikintojtomas [miakej] tlakamej tlen inintlajtlakoljuaj” (Marcos 10:45). Mijki pampa kiampa ueliskia kitlamiltis mikilistli uan tiitstosej nochipa (Juan 3:16).
¿KEMA TLAMIS MIKILISTLI?
Ipan ni tonali tlauel ouij kej tiitstokej, nopa kinextia tiitstokej ipan “itlamia tonali” kej kiijtojtoya Biblia (2 Timoteo 3:1). Kema tlamis itlamia tonali kintlajtolsenkauasej uan kintsontlamiltisej maseualmej katli amo kualmej (2 Pedro 3:3, 7). Uan maseualmej katli kiikneliaj toTeotsij amo kintsontlamiltisej uan “kipiasej yolistli tlen yankuik para nochipa” (Mateo 25:46).
Jesús kiijtok: “Niualajtok [...] para nitemaktilis noyolis keja se tlaxtlauili para nikintojtomas [miakej] tlakamej tlen inintlajtlakoljuaj” (Marcos 10:45).
Nojkia, miakej maseualmej katli moyolkuisej uelis itstosej nochipa. Jesús uelis kinyolkuis katli miktokej. Kema yajki ipan altepetl Naín, Jesús kitlasojtlak se siuatl katli ayokmo kipixtoya iueue, yeka kiyolkuik iyojtsi ikone nopa siuatl (Lucas 7:11-15). Nojkia, apóstol Pablo kiijtok: “Nijneltoka toTeko kinyolitia tlakamej tlen ya miktokej, tlen kuajkualmej uan tlen axkuajkualmej” (Hechos 24:15).
Tlauel miakej maseualmej uelis itstosej nochipa. Biblia kiijtoua: “Tlakamej tlen itstokej xitlauakej iixpa toTeko moaxkatisej nopa tlali tlen yajaya kinmakas, uan nepa itstosej para nochipa” (Salmo 37:29). Kema kiampa panos, ika miak pakilistli kiijtosej tlen kiijtok apóstol Pablo kipia se 2,000 xiuitl: “Uajka ¿kejatsa uelis techtlanis miki[li]stli? ¿Kejatsa uelis techkokos? Ayok tleno uelis techchiuilis” (1 Corintios 15:55). Kiampa toTeotsij kitsontlamiltis tokualankaitaka.