XIMOILJUI tijtlachilia se video kampa nesi se akajya katli tlauel kiixmatij, uelis eli se akajya katli mitspaktia kej tlatsotsona. Ipan nopa video achtoui nesi kema eliyaya pilsiltsi, kema kimachtiyayaj tlatsotsonas uan kema miak horas momachtiyaya tlatsotsonas. Teipa nesi kema tlatsotsonayaya kampa itstoyaj miakej, kema yajki ipan miak altepemej uan kema kiixmatkej miakej maseualmej ipan nochi Tlaltipaktli. Teipa, nesi kema ueuejtixtiajki uan mijki.

Maske tlen nesi ipan video nelia panok, nopa maseuali ayokmo itstok. Nochi maseualmej mikij maske ixtlamatij, kuali mauiltiaj o tlauel kinixmatij. Uan maske nopa maseuali katli tlatsotsonayaya kichijki miak tlamantli, uelis timoiljuiskia tlake sekinok tlamantli kichijtoskia tlaj amo ueuejtixtoskia yon miktoskia.

Maske amo tijnekiskiaj, nochi timikij (Eclesiastés 9:5). Maske tijnekiskiaj timochololtisej tlen mikilistli uan ayokmo tiueuejtiasej, amo tiuelij. Nochi uelis timikisej tlaj tlauel timokokosej o tlaj techpanos se tlamantli tlen amo timoiljuijtoyaj. Biblia kiijtoua tielij kej “se ayauitl tlen nesi se tlalochtli ika ijnalok uan nimantsi sampa kema tijtlachilis, ayok nesi” (Santiago 4:14).

Miakej maseualmej moiljuiaj san tlapik tiitstokej, yeka kiijtouaj: “Ma titlakuakaj uan ma titlaikaj nochi tlen tijnekij, pampa mostla timikisej” (1 Corintios 15:32). Kiampa kiijtouaj maseualmej pampa kimatij se tonali timikisej. Yeka nochi timotlajtlaniaj kenke tiitstokej, uan nojua kiampa timoiljuiaj kema techpano se tlamantli tlen tlauel techyolkokoua. Ma tikitakaj kenijkatsa uelis tijnankilisej ni tlajtlanili.

Miakej maseualmej moiljuiaj ixtlamatinij uelis techpaleuisej. Ixtlamatinij uan tepajtianij kichijtokej nojua ma tiitstokaj se keski xiuitl, uan sekinok nojua kitemoliaj kenijkatsa kichiuasej nojua ma tiitstokaj miak xiuitl. Maske kinekij kichiuasej ni tlamantli, onka sekinok tlajtlanili tlen amo kimatij kenijkatsa kinankilisej, kej kenke tiueuejtiaj uan timikij, uan tlaj asis se tonali kema ayokmo timikisej. Ipan sekinok tlamachtili tikitasej ni tlamantli, uan nojkia tijnankilisej ni tlajtlanili: ¿kenke tiitstokej?