Moyolkuisej katli miktokej
Mikilistli techasi nochi timaseualmej, amo aka ueli mochololtia. Uajka, ¿amo kema sampa tikinitasej katli miktokej? ¿Ayokmo aka kinilnamiki? ¿Uelis se tonali sampa itstosej?
XIMOILJUI IPAN TLEN BIBLIA KIIJTOUA
TOTEOTSIJ AMO KINILKAJTOK KATLI MIKTOKEJ
“Nochi tlakamej tlen miktokej uan tlen kintlalpachojtokej, [...] pankisasej” (Juan 5:28, 29).
ToTeotsij kinilnamiktok katli miktokej. Maseualmej katli itstokej ipan itlalnamikilis sampa moyolkuisej.
KATLI MIKTOKEJ MOYOLKUISEJ IPAN TLALTIPAKTLI
“ToTeko kinyolitia tlakamej tlen ya miktokej, tlen kuajkualmej uan tlen axkuajkualmej” (Hechos 24:15).
Tlauel miakej maseualmej moyolkuisej uan itstosej nochipa ika tlaseuilistli.
TIMOTEMACHIAJ NELIA MOYOLKUISEJ KATLI MIKTOKEJ
ToTeotsij “kimati keski imiaka sitlalimej onka uan sejse kintokaxtlalijtok” (Salmo 147:4).
Tlaj toTeotsij ueli kinnojnotsa sejse sitlalimej ika inintoka, uajka kena kinilnamikis katli kineki kinyolkuis.