¿Kenke tijnekij tiitstosej nochipa? Biblia kiijtoua toTeotsij kitlalijtok ipan toyolo ma tijnekikaj tiitstosej nochipa (Eclesiastés 3:11). Nojkia kiijtoua “yajaya teiknelijkayotl” (1 Juan 4:8). Nama ximoiljui, ¿kichiuaskia toTeotsij ma tijnekikaj tiitstosej nochipa tlaj kimajtoskia amo kema ueliskia kiampa tiitstosej?

Amo aka kineki mikis. Biblia kiijtoua mikilistli eli kejuak tokualankaitaka (1 Corintios 15:26). Amo aka ueli mochololtia, sekij mikij maske nojua konemej uan sekij kema ya uejueyij, mikilistli nochi techasi. Miakej maseualmej amo kinekij moiljuisej se tonali mikisej pampa majmauij. ¿Timoiljuia asis se tonali kema ayokmo timikisej?

¿Tijmatiyaya toTeotsij amo kinekiyaya ma timikikaj? Ipan Biblia, ipan amochtli Génesis kinextia toTeotsij kinekiyaya ma tiitstokaj nochipa ipan Tlaltipaktli. Jehová * tlauel kuali kichijchijki Tlaltipaktli, kiitak kuali ma elto nochi tlamantli. Teipa, kichijchijki Adán, nopa achtoui tlakatl, uan kitlalik ipan xochimili Edén. Jehová kiitak “nochi tlen kichijtoya [...] eltoya kuali” (Génesis 1:26, 31).

Adán amo eliyaya tlajtlakole, toTeotsij kichijchijki  kej itlachialis (Deuteronomio 32:4). Isiua Eva nojkia kipiayaya kuali itlakayo uan kuali itlalnamikilis. Jehová kiniljuik: “Xikinpiakaj [miakej] inmokoneuaj para inijuantij itstosej kampa ueli ipan nochi Tlaltipaktli para ma tlanauatikaj. Nojkia nimechtlalia xikinnauatikaj nochi michimej, totomej uan nochi tlen nemij ipan Tlaltipaktli” (Génesis 1:28).

Monekiyaya panos miak xiuitl, kiampa Adán uan Eva ueliskiaj kitemitisej Tlaltipaktli. Eva monekiyaya kinpias ikoneuaj uan ikoneuaj nojkia kinpiaskiaj ininkoneuaj, kiampa mochiuaskia tlen toTeotsij mosentlalijtoya (Isaías 45:18). Tlaj inijuantij amo kiitaskiaj kenijkatsa moaxitiskia tlen toTeotsij kiijtojtoya uan amo uejkauaskiaj itstosej ininuaya ininkoneuaj o amo kinixmatiskiaj ininixuiuaj, ¿timoiljuia kinamikiyaya tlen Jehová kinnauatik?

Ximoiljui kema toTeotsij kiiljuik Adán ma kintokaxtlali tlapialmej. Monejki panos miak xiuitl (Génesis 2:19). Achtoui monekiyaya kuali kinixmatis, kiampa ueliskia kuali kinmokuitlauis, yeka tlauel uejkajki.

Uajka, nopa ome tlanauatili tlen toTeotsij kinmakak Adán uan Eva, kema kiniljuik ma kinmokuitlauikaj tlapialmej uan ma kitemitikaj Tlaltipaktli, kinextia toTeotsij kinchijchijki pampa kinekiyaya ma itstokaj miak xiuitl. Uan Adán kena itstoya miak xiuitl.

Biblia kiijtoua kema ayamo tlauel uetsiyaya atl, maseualmej itstoyaj miak xiuitl uan amo kej nama tiitstokej. Génesis 5:5 kiijtoua: “Mijki Adán kema kipixki 930 xiuitl”. Nojkia kiijtoua chikuasej maseualmej itstoyaj kipano 900 xiuitl kej: Set, Enós, Cainán (Quenán), Jared, Matusalén uan Noé katli kipixtoya 600 xiuitl kema tlauel uetski atl (Génesis 5:6-27; 7:6; 9:29). ¿Kenke itstoyaj miak xiuitl?

Ni maseualmej tlakatkej kema ayamo panotoya miak xiuitl ika Adán uan Eva tlajtlakolchijtoyaj, uelis yeka itstoyaj miak xiuitl, ¿kenke kiampa tikijtouaj? Uan, ¿kenijkatsa kitlamiltisej mikilistli? Tlaj tijneki tijmatis kenijkatsa monankilia ni tlajtlanili, achtoui moneki tijmatis kenke tiueuejtiaj uan timikij.