Apóstol Pablo kiijtok Jehová * “yaya katli techtlasojtla uan tlatoktsitsij techyoltlalia. Yaya techyoltlalia ipan nochi nopa tlaouijkayotl katli techpanotiuala” (2 Cor. 1:3, 4, Icamanal Toteco, [NHWBI]). Ika ni tlajtoli, Biblia kinextia toTeotsij uelis techpaleuis, uan maske tlauel ouij nopa kuesoli tlen tijpiasej, toTata Jehová uelis techyoltlalis o techyolchikauas.

Tlaj tijnekij toTeotsij ma techyolchikaua, moneki tijchiuasej se tlamantli. Ximoiljui ni: se tepajtijketl amo uelis mitspaleuis tlaj amo kema tia timopajtia. Yeka Biblia techiljuia: “Ximonechkauikaj kampa toTeko uan yajaya inmechnechkauis” (Sant. 4:8).

¿Kenijkatsa tijmatij toTeotsij nelia technechkauis? Pampa ya miakpa techiljuia kineki techpaleuis (xikita nopa  recuadro ipan iamayo 4). Nojkia  pampa itekipanojkauaj katli uejkajkia itstoyaj kiijtojkej kenijkatsa kinyolchikajki, uan ipan ni tonali nojkia kiampa kiijtouaj itekipanojkauaj.

Kej miakej maseualmej kinpano, tlanauatijketl David kipixki miak tlaouijkayotl uan nojkia kinejki toTeotsij ma kipaleui. Yeka kiiljuik: “Xijkaki notlajtol kema nimitstlajtlania tlapaleuili”. ¿Kipaleuik toTeotsij? Kena, pampa teipa David kiijtok: “ToTeko [...] nechpaleuijtok, yeka ipan noyolo nijpia miak pakilistli” (Sal. 28:2, 7).

Jehová kinejki Jesús ma kipaleui kema kinyolchikauaskia maseualmej. Kiiljuik ma kinpaleui katli “tlauel mokuesouaj” uan ma kinyolchikaua katli “chokaj” (Is. 61:1, 2). Kej toTeotsij kiijtojtoya, Jesús nochipa kinpaleuik uan kinyolchikajki katli tlaijiyouiyayaj (Mat. 11:28-30).

Jesús kinyolchikauayaya maseualmej kema kuali kintlajtolmakayaya, kema kinnojnotsayaya ika tlaiknelili, uan kemantika kema kinchikauayaya. Se tonali, se tlakatl tlen kipixtoya lepra kiiljuik: “Intla tijneki, uelis tinechchikauas”. Jesús kitlasojtlak uan kiiljuik: “Kena, nijneki. Ximochikaua” (Mar. 1:40, 41). Uan nopa tlakatl mochikajki.

Maske ipan ni tonali Jesús amo ueli techyolchikaua pampa amo itstok ipan Tlaltipaktli, Jehová, “katli techtlasojtla uan tlatoktsitsij techyoltlalia”, nojua kinpaleuia katli tlaijiyouiaj (2 Cor. 1:3, NHWBI). Ma tikitakaj kenijkatsa techpaleuia.

• Biblia. “Nochi tlen kiijkuilojkej uejkajkia, kiijkuilojkej para techmachtis para uelis tikijiyouisej tlen techpanotiuala. Nojkia ijkuilijtok iTlajtol para techyolchikauas para ma tijchiakaj nochi tlen techiljuia para tijselisej teipa” (Rom. 15:4).

• ToTeotsij itonal. ¿Kenke teipa kema Jesús mijki nochi itokilijkauaj itstoyaj ika tlaseuilistli? Pampa nochi kitlepanitayayaj Jehová uan “pampa itonal toTeko kinyolchikauayaya” (Hech. 9:31). ToTeotsij itonal tlauel kipia miak chikaualistli, yeka uelis kiyolchikauas se maseuali maske kipia uejueyi tlaouijkayotl.

• Tlamaijtoli. Biblia kiijtoua: “Ayok ximotekipachokaj ika niyon se tlamantli”. Uan teipa techtlajtolmaka: “Xijtlajtlanikaj ma inmechmaka nochi tlen moneki uan [...] toTeko inmechmakas tlaseuilistli [...]. Uan nopa tlaseuilistli kiyaualtsakuas inmoyolo uan inmotlalnamikilis” (Filip. 4:6, 7).

• ToTeotsij itekipanojkauaj. Inijuantij nelia uelis techyolchikauasej kema tijpiasej se kuesoli, pampa inijuantij touampoyouaj. Apóstol Pablo kiijtok sekij Cristo itokilijkauaj ‘nelia kiyolchikajkej miak’ kema kipixki “tlaouijkayotl uan tlaijiyouilistli” (Col. 4:11; 1 Tes. 3:7).

¿Timoiljuia ni naui tlamantli nelia uelis mitsyolchikauas? Ma tikitakaj tlen kinpanok nopa maseualmej katli tikijtojkej ipan nopa achtoui tlamachtili. Kej inijuantij, ta nojkia uelis tikitas kenijkatsa toTeotsij kichiua tlen kiijtojtok: “Nikinyoltlalis notlakauaj keja se tenantsi kiyoltlalia ipilkone” (Is. 66:13).