1, 2. ¿Tlake tikixnamikij Jehová itekipanojkauaj?

NOCHI toTeotsij itekipanojkauaj kichijtokej kampeka amo kema kitlauelkauasej toTeotsij, kej Abel uan nochi katli kitekipanojtiualauij. Apóstol Pablo kiniljuik Cristo itokilijkauaj maske ‘sekinok kintlaijiyouiltiyayaj’, inijuantij ‘mokajkej temachmej’ uan kiijiyouijkej nochi pampa kinekiyayaj kuali itstosej iixpa Jehová (Heb. 10:32-34). Pablo kiijtok Cristo itokilijkauaj nojkia kichiuaj kampeka sanse kej greciaeuanij katli kinekiyayaj tlatlanisej, kej katli motlalouayayaj uan katli tlateuiyayaj (Heb. 12:1, 4). Ipan ni tonali, tojuantij nojkia kejuak timotlalouaj pampa tijnekij tijtlanisej nopa nemilistli. Maske tijchijtokej kampeka, onka se keski tlamantli tlen uelis techtsakuilis uan uelis kichiuas ayokmo ma tiyolpakikaj kema tijtekipanosej Jehová uan amo ma tijselikaj nochi tlen kiijtojtok techmakas.

² Satanás yaya katli tlauel techteuia uan nojkia kiampa kichiuaj katli kinnauatia, yeka tijmatij tlauel ouij tikijiyouisej (Efes. 6: 12). Moneki tlauel timomokuitlauisej, kiampa amo tijchiuasej tlen maseualmej kichiuaj, kej kema momekatiaj, tlachichinaj, moiuintiaj o kitekiuiaj drogas. Nojkia moneki tijchiuasej kampeka amo timotekipachosej o timokuesosej uan amo tijchiuasej tlen techyoltilana (2 Cor. 10:3-6; Col. 3:5-9).

3. ¿Kenijkatsa techpaleuia uan techmachtia Jehová pampa kineki ma titlatlanikaj?

³ ¿Uelis titlatlanisej uan tikixnamikisej nochi nopa tlaouijkayotl? Maske tiouijtisej, kena uelis titlatlanisej. Pablo kiijtok yaya kejuak eliskia se boxeador kema kiijkuilok: “Keja se tlen kipia iteki para tlateuis tlamiyakapa uan kichiua ika nochi ichikaualis, na nojkia nitekiti ika nochi noyolo kema nijchiua iteki toTeko” (1 Cor. 9:26). Moneki kejuak tijteuisej nochi nopa tlaouijkayotl kema tikixnamikisej. ¿Kenijkatsa techpaleuia uan techmachtia Jehová pampa kineki ma titlatlanikaj? Kichiua ika Biblia, amatlajkuiloli, tlanechikoli uan uejueyi tlanechikolistli. ¿Tijchiuaj nochi tlen Jehová techmachtia ika nopa tlamantli? Tlaj amo tijchiuaskiaj, uajka amo tijchiuaskiaj kampeka kema tikixnamikisej tlaouijkayotl uan amo ueliskia titlatlanisej, tieliskiaj kej se tlateuijketl katli amo tlateuia “ika nochi ichikaualis”.

4. ¿Tlake moneki tijchiuasej tlaj tijnekij tijtlanisej “tlen axkuali”?

⁴ Moneki nochipa kuali titlachixtosej, pampa Satanás o se tlaouijkayotl uelis kejuak techteuisej kema amo kuali titlaneltokatosej. Biblia techtlajtolmaka uan techyolchikaua ika ni tlajtoli: “Ma axinmechtlani tlen axkuali. Pero inmojuantij xijtlanikaj tlen axkuali ika tlen kuali” (Rom. 12:21). Ni kiijtosneki tlaj nochipa tijchijtosej kampeka amo tijchiuasej tlen amo kuali, uelis titlatlanisej. Uan tlaj amo timomokuitlauiaj uan ayokmo tijchiuaj kampeka, uajka Satanás o tlen techyoltilana uelis techtlanisej. Yeka, nochipa ma tijchijtokaj kampeka uan nojua kejuak ma titlateuijtokaj (1 Ped. 5:9).

5. 1) ¿Tlake moneki tikilnamikisej tlaj tijnekij titlatlanisej? 2) ¿Tlen ajkia inijuantij tikixtomasej ipan ni tlamachtili?

⁵ Tlaj tijnekij titlatlanisej, moneki tikilnamikisej tijchiuaj kampeka pampa tijnekij tiitstosej kuali iixpa Jehová. Hebreos 11:6 kiijtoua: “Tlen kineki monechkauis kampa toTeko, moneki kineltokas para toTeko itstok, uan para yajaya kintlaxtlauia tlakamej tlen nelia kitemouaj ika tlen kuali”. Uajka, tlaj tijnekij Jehová ma techteochiua, moneki tijchiuasej se ueyi kampeka (Hech. 15:17). Biblia kiijtoua miakej tlakamej uan siuamej kichijkej kampeka ika nochi ininyolo, kej Jacob, Raquel, José uan Pablo. Inijuantij kipixkej miak tlaouijkayotl, uan kichijkej kampeka kiixnamikisej kej kinamiki, yeka Jehová kinteochijki. Tlen kichijkej kinextia Jehová nojkia techteochiuas tlaj nochipa tijchiuasej kampeka kema tikixnamikisej se tlaouijkayotl. Ma tikitakaj kenijkatsa nojkia uelis tijchiuasej kej inijuantij.

6. 1) ¿Kenke Jacob moteuik iuaya se iluikaejketl? 2) ¿Tlake panok pampa kichijki kampeka? (Xikita nopa achtoui tlaixkopinkayotl).

⁶ Jacob nochipa kichijki kampeka amo kema kitlauelkauas Jehová. ¿Kenke nochipa kichijki kampeka? Pampa tlauel kiikneliyaya Jehová uan tlauel kipatiitayaya mouampojchijtos iuaya. Motemachiyaya Jehová kichiuaskia tlen kiiljuijtoya uan kinteochiuaskia ichampoyouaj (Gén. 28:3, 4). Kema Jacob kipixtoya nechka 100 xiuitl, moteuik iuaya se iluikaejketl pampa kinekiyaya Jehová ma kiteochiua (xijpoua Génesis 32:24-28). ¿Tlauel kipixtoya miak chikaualistli uan yeka uelki moteuik iuaya nopa iluikaejketl? Maske amo kipixtoya miak chikaualistli, ya kinextik kichiuaskia  se ueyi kampeka pampa kinekiyaya ma kiteochiuakaj. Pampa kichijki kampeka, Jehová kiteochijki uan kitokaxtlalik Israel, tlen kiijtosneki “Se Tlen Moteuia Ika toTeko”. Jehová kuali kiitak Jacob uan kiteochijki, uan tojuantij nojkia ya nopa tijnekij.

7. 1) ¿Tlake tlaouijkayotl kiixnamijki Raquel? 2) ¿Tlake kichijki Raquel, uan kenijkatsa Jehová kiteochijki?

⁷ Raquel, katli eliyaya Jacob isiua, nojkia kinekiyaya kiitas kenijkatsa Jehová kichiuaskia tlen kiiljuijtoya iueue. Ya nojkia kiixnamijki se tlaouijkayotl, pampa amo ueliyaya konepia. Ipan nopa tonali, siuamej tlauel moyolkokouayayaj kema amo ueliyayaj konepiaj. ¿Tlake kichijki Raquel? Nochipa motemachik ipan Jehová, yeka ajachika momaijtouayaya pampa kinekiyaya toTeotsij ma kipaleui. Jehová kitlakakilik uan kiteochijki kema kikajki ma kinpia ikoneuaj. Se tonali, Raquel kiijtok kejuak tlateuijtoya ika nochi iyolo uan kiijtok tlatlantoya (Gén. 30:8, 20-24).

8. 1) ¿Tlake tlaouijkayotl kiixnamijki José? 2) ¿Tlake techmachtia tlen kichijki José?

⁸ Jacob uan Raquel nochipa kinextijkej kuali tlaneltokayayaj uan uelis nopa kipaleuik ininkone José ma kiixnamiki miak tlaouijkayotl. Kema kipixtoya 17 xiuitl, kiixnamijki se ueyi kuesoli. Iikniuaj tlauel kikualankaitayayaj, yeka kinamakakej kej se tlatekipanojketl. Teipa José kitsajkej miak xiuitl ne Egipto  maske amo tleno kichijtoya (Gén. 37:23-28; 39:7-9, 20, 21). Maske tlauel tlaijiyouik, ya amo moyolkokok yon amo kinejki momakuepas. ¿Kenke amo kiampa kichijki? Pampa tlauel kipatiitayaya kuali mouikas iuaya Jehová uan yeka san ipan nopa tlamantli mosentlalik ika nochi iyolo (Lev. 19:18; Rom. 12:17-21). Tlen kichijki José techmachtia moneki nojua tijchijtosej kampeka maske titlaijiyouijkej kema timoskaltijkej o maske timoiljuiskiaj nopa kuesoli tlen tijpiaj amo kema tlamis. Tlaj nochipa tijchijtosej kampeka, Jehová techteochiuas (xijpoua Génesis 39:21-23).

9. ¿Kenijkatsa uelis tijchiuasej kej Jacob, Raquel uan José?

⁹ Tojuantij uelis nojkia tikixnamikij miak tlaouijkayotl. Uelis titlaijiyouiaj pampa techchiuiliaj tlen amo kuali, techkualankaitaj, techpinajtiaj o uelis se akajya techtlaijiljuia pampa techkokolia. Tlaj kiampa techpano, amo ma timotekipachokaj. Ma tikilnamikikaj tlake kinpaleuik Jacob, Raquel uan José nojua ma kitekipanojtokaj Jehová ika pakilistli. Inijuantij tlauel kipatiitayayaj kuali mouampojchijtosej iuaya Jehová, uan yeka kinpaleuik uan kinteochijki. Uan inijuantij nochipa kichijkej kampeka uan kichiuayayaj tlen kiijtouayayaj kema momaijtouayayaj. Tojuantij tiitstokej ipan itlamia tonali, yeka tlauel moneki kuali timotemachisej ipan nochi tlen toTeotsij techmakas teipa. ¿Nelia tijchiuasej kampeka pampa tijnekij kuali tiitstosej iixpa Jehová?

10, 11. 1) ¿Kenke moneki tijchijtosej kampeka tlaj tijnekij toTeotsij ma techteochiua? 2) ¿Tlake techpaleuis ma tijtlapejpenikaj tijchiuasej tlen kuali?

¹⁰ ¿Kenke moneki tijchijtosej kampeka tlaj tijnekij toTeotsij ma techteochiua? Pampa tikixnamikij miak tlaouijkayotl. Miakej toikniuaj kichiuaj kampeka pampa amo kinekij kichiuasej tlen kinyoltilana. Sekij pampa kinekij tlajtolmoyauasej ika pakilistli, uan sekinok pampa mokokouaj o mokuesouaj pampa moiljuiaj ininselti itstokej. Nojkia, sekinok toikniuaj tlauel ouij kimatij kitlapojpoljuisej se akajya katli kinyolkokok. Tlaj miak xiuitl tijtekipanojtokej Jehová o amo, nochi moneki tijchijtosej kampeka tikixnamikisej se tlaouijkayotl katli uelis kichiuas amo kuali ma tijtekipanokaj toTeotsij. Moneki tikilnamikisej Jehová kinteochiua katli amo kema kitlauelkauaj.

¹¹ Tijmatij ouij tijtokilisej Cristo uan tijtlapejpenisej tijchiuasej tlen kuali, uan nojua tlauel ouij tijmatij pampa uelis tijchijtokej kampeka amo tijchiuasej tlen techyoltilana (Jer. 17:9). Tlaj kiampa techpano, ma tikiljuikaj Jehová ma techmaka itonal. Tlamaijtoli uan toTeotsij itonal techpaleuisej ma tijchiuakaj tlen kuali, kiampa Jehová techteochiuas. Yeka, ma timosentlalikaj tijchiuasej tlen tikiljuiaj Jehová kema timomaijtouaj, uan ma tijchiuakaj kampeka mojmostla timomachtisej Biblia toselti uan ininuaya tochampoyouaj (xijpoua Salmo 119:32).

12, 13. ¿Tlake kinpaleuik omej toikniuaj amo kichiuasej tlen kinyoltilanayaya?

¹² Miakej toikniuaj amo kichiuaj tlen kinyoltilana pampa tlauel kinpaleuijtok Biblia, amatlajkuiloli uan toTeotsij itonal. Se telpokatl kipojki nopa tlamachtili “¿Cómo puede usted resistirse a los malos deseos?”, tlen kiski ipan ¡Despertad!, diciembre 8, 2003. ¿Kenijkatsa kipaleuik? Ya kiijtoua: “Nijchijtoya kampeka amo nimoiljuis ipan tlamantli tlen sokiyo o tlen amo kuali. Kema nijpojki ‘miakej tlauel ouij kimatij ayokmo moiljuisej ipan nopa tlamantli tlen sokiyo’, achi kuali nijyolmatki pampa amo san na nechpanoyaya, miakej nojkia kichiuayayaj kampeka”. Nojkia tlauel kipaleuik nopa tlamachtili  “¿Aprueba Dios los estilos de vida alternativos?”, tlen kiski ipan ¡Despertad!, octubre 8, 2003. Nopaya kiitak sekij Cristo itokilijkauaj nochipa kichijtokej kampeka, pampa nopa tlamantli tlen sokiyo kejuak eliskia “se uitstli ipan [inin]tlakayo” (2 Cor. 12:7). Kimatki inijuantij kichiuayayaj kampeka kuali monejnemiltisej uan motemachiyayaj teipa ayokmo moiljuiskiaj tlen amo kuali. Teipa, nopa telpokatl kiijtok: “Nama nijmati, mojmostla uelis nijnextis amo nijtlauelkaua Jehová. Uan tlauel nijtlaskamatilia pampa ika itlanechikol techmachtia tlake uelis techpaleuis amo tijchiuasej kej maseualmej”.

¹³ Se tosiuaikni katli eua Estados Unidos, kiijkuilok: “Tlauel niinmechtlaskamatilia pampa nochipa intechmakaj tlamachtili tlen tlauel techpaleuia kema moneki. Kemantika nimoiljuia na nechijkuiljuilijkej nopa tlamachtili. Miak xiuitl nijchijtok kampeka amo nijchiuas se tlamantli tlen nechyoltilana, pampa Jehová amo kipaktia. Kemantika ayokmo nijneki nijchiuas kampeka. Maske nijmati Jehová tetlasojtla uan tetlapojpoljuia, amo kuali nijyolmati pampa nochipa nijneki nijchiuas tlen nechyoltilana. Nimoiljuia amo kinamiki ma nechpaleui. Nochipa nechpanotok ni tlamantli, yeka amo kuali nijyolmati”. Teipa kipojki nopa tlamachtili “¿Está su corazón dispuesto a conocer a Jehová?”, tlen kiski ipan La Atalaya, marzo 15, 2013. ¿Kenijkatsa kiyolmatki? Ya kiijtok: “Nijmatki Jehová nelia kineki nechpaleuis”.

14. 1) ¿Tlake kimatiyaya Pablo? 2) ¿Tlake techpaleuis kejuak tijtlanisej tlen techyoltilana?

¹⁴ (Xijpoua Romanos 7:21-25). Maske Pablo kimatiyaya tlauel ouij amo kichiuas tlen kiyoltilanayaya, ya kimatiyaya tlaj momaijtoskia, motemachiskia Jehová kipaleuiskia uan tlaneltokaskia ipan Jesús imikilis, uajka amo kema kichiuaskia tlen kiyoltilanayaya. Uan tojuantij, ¿uelis kejuak tijtlanisej tlen techyoltilana? Tlaj tijchiuasej kej Pablo, titlaneltokasej ipan Jesús imikilis uan timotemachisej ipan Jehová ika nochi toyolo, uajka uelis titlatlanisej.

15. ¿Kenijkatsa Jehová techpaleuia amo ma tijtlauelkauakaj uan ma tikijiyouikaj se tlaouijkayotl?

¹⁵ Kemantika Jehová kikaua ma tijnextilikaj tlaj nelia techtekipachoua se tlenijki. ¿Tlake tijchiuaskiaj tlaj se tlen tochampoyouaj mokokos o se akajya kichiuilis tlen amo kuali? Uan tlaj tojuantij techpanoskia, ¿tlake tijchiuaskiaj? Tlaj timotemachiaj ipan Jehová ika nochi toyolo, uajka tikiljuisej ma techpaleui amo tijtlauelkauasej uan ma techpaleui tijtekipanosej ika pakilistli uan kuali timouikasej iuaya (Filip. 4:13). Tlen kinpanok toTeotsij itekipanojkauaj katli uejkajkia itstoyaj uan tlen kinpano toikniuaj ipan ni tonali, kinextia kema timomaijtouaj uan tikiljuiaj Jehová ma techpaleui, yaya nelia techyolchikaua uan techpaleuia ma tikijiyouikaj se tlaouijkayotl.

16, 17. ¿Tlake timosentlalijtok tijchiuas?

¹⁶ Satanás tlauel kinekiskia ma timokuesokaj uan ayokmo ma tijchiuakaj kampeka kema tikixnamikisej se tlaouijkayotl. Yeka moneki timosentlalisej nochipa tijchiuasej san “tlen kuali” (1 Tes. 5:21). Tojuantij uelis tijtlanisej Satanás, amo tijchiuasej tlen amo kuali katli maseualmej kichiuaj yon tijchiuasej tlen techyoltilana. Uelis titlatlanisej tlaj ika nochi toyolo timotemachisej Jehová techyolchikauas uan techpaleuis (2 Cor. 4:7-9; Gál. 6:9).

¹⁷ Uajka, nojua ma tijchijtokaj kampeka. Uelis timotemachisej Jehová nelia techmakas miak “tlateochiualistli hasta tlauel mokauas” (Mal. 3:10).