1. ¿Kenke timotemachiaj toTeotsij iTlajtol kipia miak chikaualistli? (Xikita nopa achtoui tlaixkopinkayotl).

NOCHI tiitekipanojkauaj Jehová timotemachiaj “iTlajtol toTeko yoltok uan kipia tlauel miak chikaualistli” (Heb. 4:12). Tlen Biblia kiijtoua techpaleuijtok tojuantij uan sekinok ma tijpatlakaj tonemilis. Miakej katli amo kitekipanouayayaj Jehová tlachtekiyayaj, kitekiuiyayaj drogas o momekatiyayaj. Sekinok maske tlauel kinixmatiyayaj o tlauel tlatominpiayayaj, amo yolpakiyayaj (Ecl. 2:3-11). Yolik, katli amo kuali monejnemiltiyayaj kipatlatiajkej ininnemilis pampa kinpaleuik ichikaualis toTeotsij iTlajtol. Uelis tlauel techpaktia tijpouasej nopa tlaxeloli “Biblia kinpaleuik kuali ma monejnemiltikaj” tlen uala ipan pilamochtsi Tlen Tematiltia, kampa kiijtoua kenijkatsa miakej kipatlatokej ininnemilis. Uan maske tijtekipanouaj Jehová, nojua moneki tijkauasej Biblia ma techyakana, kiampa kuali timouampojchijtosej iuaya toTeotsij.

2. ¿Tlake tlamantli uelkej kichijkej nopa achtoui Cristo itokilijkauaj pampa kinpaleuik toTeotsij iTlajtol?

² Amo san nama maseualmej kipatlaj ininnemilis kema momachtiaj Biblia. Ipan achtoui siglo, Cristo itokilijkauaj katli kintlapejpenijtoyaj ma yakaj iluikak nojkia kipatlakej ininnemilis  (xijpoua 1 Corintios 6:9-11). Apóstol Pablo kiijtok ajkia inijuantij amo kalakiskiaj ipan toTeotsij iTlanauatijkayo, uan teipa kiijtok: “Achtouia sekij inmojuantij initstoyaj keja nopa”. ToTeotsij iTlajtol uan itonal kinpaleuik ma kipatlakaj ininnemilis. Sekij maske ya eliyayaj Cristo itokilijkauaj nojua tlajtlakolchijkej uan yeka ayokmo kuali mouikakej iuaya Jehová. Biblia kiijtoua se Cristo itokilijka katli kitlapejpenijtoyaj yas iluikak kikixtijkej tlen tlanechikoli. Teipa moyolkuepki uan kipatlak inemilis, yeka sampa kiselijkej ipan tlanechikoli (1 Cor. 5:1-5; 2 Cor. 2:5-8). Nelia tlauel techyolchikaua tikitasej kenijkatsa toTeotsij iTlajtol kinpaleuijtok tlauel miakej toikniuaj ma kipatlatiakaj ininnemilis.

3. ¿Tlake tikixtomasej ipan ni tlamachtili?

³ Jehová techmakatok iTlajtol tlen kipia miak chikaualistli, yeka moneki tijtekiuisej (2 Tim. 2:15). Ipan ni tlamachtili tikitasej kenijkatsa nopa chikaualistli tlen kipia toTeotsij iTlajtol uelis techpaleuis 1) ipan tonemilis, 2) ipan tlajtolmoyaualistli uan 3) kema titlamachtisej ipan tlanechikoli. Ni tlamachtili techpaleuis nojua tlauel ma tijtlaskamatilikaj uan ma tikiknelikaj toTata Jehová, katli techmachtia pampa kineki kuali ma tiitstokaj (Is. 48:17).

4. 1) ¿Tlake moneki tijchiuasej tlaj tijnekij toTeotsij iTlajtol ma techpaleui? 2) ¿Tlake mitspaleuia tijpias tonali uan kiampa tijpouas Biblia?

⁴ Tlaj tijnekij toTeotsij iTlajtol ma techpaleui ipan tonemilis, moneki nochipa tijpouasej, uan tlaj tiuelij mojmostla ma tijpouakaj (Jos. 1:8). Maske kemantika tlauel timotekiuijtokej o tijpiaj sekinok tekitl tlen moneki tijchiuasej, moneki tijpouasej Biblia uan amo tijkauasej yon se tlamantli ma techtsakuili (xijpoua Efesios 5:15, 16). Uelis tijpouasej Biblia ijnalok, tlajkotona o tlayoua. Uelis tikijtosej kej se toTeotsij itekipanojka kiijtok: “¡Tlauel nikiknelia moley! San tlen ya nimoyoliljuijtinemi se tonal” (Sal. 119:97).

5, 6. 1) ¿Kenke tlauel ipati timoyoliljuisej ipan tlen tijpouaj? 2) ¿Tlake techpaleuis kuali ma timoyoliljuikaj? 3) ¿Kenijkatsa mitspaleuijtok ipan monemilis pampa tijpoua uan timoyoliljuia ipan tlen kiijtoua Biblia?

⁵ Amo moneki san tijpouasej Biblia, nojkia moneki timonejneuilisej o timoyoliljuisej ipan tlen tijpouaj (Sal. 1:1-3). Tlaj kiampa tijchiuasej, uajka uelis tijchiuasej ipan tonemilis nochi tlen timomachtisej ipan toTeotsij iTlajtol. Maske tijpouasej ipan amatl o ipan se tlableta o computadora, moneki tijchiuasej kampeka ma asi ipan toyolo nochi tlen tijpouaj.

⁶ ¿Tlake techpaleuis kuali ma timoyoliljuikaj ipan tlen tijpouaj? Miakej toikniuaj kipouaj se kentsi tlen kiijtoua Biblia, uan teipa motlajtlaniaj: “¿Tlake nechmachtia tlen Jehová? ¿Nijchiua ipan nonemilis tlen  kiijtoua ni texto? ¿Tlake tlamantli nojua poliui nijpatlas ipan nonemilis?”. Tlaj timomaijtosej kema timoyoliljuisej ipan toTeotsij iTlajtol, Jehová techpaleuis ma tijnekikaj tijchiuasej tlen techtlajtolmaka. Tlaj kej nopa tijchiuasej, uajka nopa chikaualistli tlen kipia iTlajtol tlauel techpaleuis ipan tonemilis (2 Cor. 10:4, 5).

7. ¿Tlake moneki tijchiuasej tlaj tijnekij kuali tijtekiuisej toTeotsij iTlajtol?

⁷ ¿Tlake moneki tijchiuasej kema titlajtolmoyauasej? Moneki nochipa tijtekiuisej Biblia ipan tlajtolmoyaualistli uan kema tikinmachtisej sekinok, kiampa kuali tijtekiuijtosej toTeotsij iTlajtol. Se toikni kiijtok: “Tlaj titlajtolmoyauaskia iuaya Jehová, ¿san ta tikamanaltiskia, o tijkauaskia yaya ma kamanalti?”. Toikni kinekiyaya kiijtos kema tikinpouiliaj maseualmej se texto ipan Biblia, eliskia kejuak tijkauaskiaj Jehová ma kamanalti. Yeka, moneki kuali tijtlapejpenisej tlake textos tijpouasej, pampa tlen kiijtoua Biblia tlauel kinpaleuis maseualmej uan amo tlen tojuantij tikiniljuisej (1 Tes. 2:13). Ma timotlajtlanikaj: “Kema nitlajtolmoyaua, ¿nijchiua kampeka nochipa nikinpouilis maseualmej tlen Biblia kiijtoua?”.

8. ¿Kenke kema timonojnotsaj ininuaya maseualmej amo moneki san tikinpouilisej tlen kiijtoua Biblia?

⁸ Kema timonojnotsasej ininuaya maseualmej, amo moneki san tikinpouilisej textos. ¿Kenke? Pampa amo nochi kikuamachiliaj tlen Biblia kiijtoua. Ipan achtoui siglo, miakej nojkia amo kikuamachiliyayaj toTeotsij iTlajtol (Rom. 10:2). Yeka amo kinamiki timoiljuisej se akajya kena kikuamachilis se texto tlen tijpouilisej. Moneki tikiljuisej tlake tlajtoli tlauel ipati, tikompauisej se tlajtoli tlen tijnekij ma kiilnamikto uan kuali tikixtomilisej tlake kiijtosneki. Tlaj kiampa tijchiuasej, uajka tlen kiijtoua  toTeotsij iTlajtol mokauas ipan inintsonteko maseualmej uan asis ipan ininyolo (xijpoua Lucas 24:32).

9. ¿Tlake uelis tijchiuasej uan kiampa tijpaleuisej se akajya ma kipatiita tlen Biblia kiijtoua? Xikijto se neskayotl.

⁹ Kema tikinpouilisej maseualmej se texto, moneki tijchiuasej kampeka tikinpaleuisej ma kipatiitakaj Biblia. Ueliskia tikijtosej: “Ma tikitakaj tlen toTeotsij kiijtoua”. Uan tlaj tikamanaltisej iuaya se akajya katli amo tlaneltoka ipan Jesús, ueliskia tikiljuisej: “Xikita tlen kiijtoua ni tlatsejtseloltik tlajkuiloli”. O tlaj timonojnotsaj iuaya se akajya katli amo kipaktia religión, ueliskia tikiljuisej: “¿Tijkaktok tlen kiijtoua ni tlajkuiloli tlen uejkajkia moijkuilok?”. Moneki tijpatlatiasej tlen tikijtosej pampa amo nochi maseualmej elij sanse yon kinpaktia sanse tlamantli (1 Cor. 9:22, 23).

10. 1) Xikijto tlen kipanok se toikni. 2) Kampa ta titlajtolmoyaua, ¿kenijkatsa kinpaleuijtok maseualmej nopa chikaualistli tlen kipia toTeotsij iTlajtol?

¹⁰ Miakej toikniuaj kiitstokej tlauel ipati kinpouilisej maseualmej tlen toTeotsij iTlajtol kiijtoua. Ma tikitakaj tlen kipanok se toikni. Ya kipaxalouayaya se tlakatl katli miak xiuitl kiselijtoya pilamochtsitsij. Se tonali, kiuikilik nopa pilamochtsi Tlen Tematiltia katli yankuik kistoya uan amo san kikauilik, nojkia kipouilik se texto tlen ualayaya ipan nopa pilamochtsi. Kipouilik 2 Corintios 1:3, 4, kampa kiijtoua toTeotsij “techtlasojtla” uan nojkia “techyoltlalia ipan nochi nopa tlaouijkayotl katli techpanotiuala”. Nopa tlakatl tlauel kipaktik nopa texto, yeka kiiljuik toikni sampa ma kipouili. Teipa, kiiljuik isiua uan ya kipixtoyaj kuesoli uan monekiyaya ma kinyolchikauakaj, uan kiijtok kinekiyaya kimatis sekinok tlamantli tlen tlamachtia Biblia. Tlaj nochipa tijtekiuisej Biblia kema titlajtolmoyauasej, nopa chikaualistli tlen kipia toTeotsij iTlajtol uelis kinpaleuis maseualmej ipan ininnemilis (Hech. 19:20).

11. ¿Tlake tlamantli tlauel moneki ma kichiuakaj katli tlamachtiaj?

¹¹ Nochi tlauel tiyolpakij kema timosentiliaj ipan tlanechikoli uan ipan uejueyi tlanechikolistli pampa nopaya tijueyichiuaj Jehová. Uan nojkia pampa tijkakij tlamachtili tlen tlauel techpaleuia ipan tonemilis. Toikniuaj katli nopaya tlamachtiaj tlauel yolpakij, uan kimatij moneki kuali tlamachtisej (Sant. 3:1). Yeka, nochi inintlamachtil kikixtiaj ipan Biblia. Tlaj ta nojkia titlamachtia ipan tlanechikoli o ipan uejueyi tlanechikolistli, ¿tijchiua kampeka tijtekiuis nopa chikaualistli tlen kipia toTeotsij iTlajtol uan kiampa tikinpaleuis katli mitstlakakiliaj?

12. Kema se akajya tlamachtia, ¿kenijkatsa uelis kinextis Biblia nelia tlauel ipati?

¹² Kema titlamachtis, xijchiua kampeka nochipa tijtekiuis Biblia (Juan 7:16). Kema tikixtomas se keski versículos o tijtekiuis se neskayotl o se tlapoualistli, xijchiua kej kinamiki. Kiampa toikniuaj mosentlalisej ipan tlen kiijtoua Biblia uan amo ipan tlen ta tikijtoua. Nojkia xikilnamiki: amo eli sanse tijpouas Biblia uan titlamachtis ika Biblia. Tlaj tijpouas tlauel miak textos, toikniuaj amo kiilnamikisej nochi tlen tijpojki. Yeka moneki kuali tijtlapejpenis tlake textos tijtekiuis uan amo xijpojtiuetsi. Nojkia moneki kuali tijpouas, kuali tikixtomas, tikixnextis uan tikijtos kenijkatsa uelis kinpaleuis (Neh. 8:8). Tlaj tikixtomas se tlamachtili tlen Jehová itlanechikol kichijchijtok, achtoui kuali xijpoua nopa amatl uan xijpoua nopa textos tlen nopaya uala, nojkia xikita kenijkatsa uelis tikixtomas nopa tlamachtili ika nopa textos. Teipa, xijtlapejpeni tlake textos tijpouas kema tikixtomas nopa tlamachtili  (ipan amochtli Benefíciese de la Escuela del Ministerio Teocrático, ipan tlamachtili 21, 22 uan 23, kiijtoua sekinok tlamantli tlen uelis tijchiuas kema titlamachtis). Uan tlauel moneki tikiljuis Jehová ma mitspaleui uan kiampa kuali tikixtomas nopa kuajkuali tlamachtili tlen eltok ipan iTlajtol (xijpoua Esdras 7:10; Proverbios 3:13, 14).

13. 1) ¿Kenijkatsa kipaleuik se tosiuaikni kej moixtonki Biblia ipan se tlanechikoli? 2) ¿Kenijkatsa mitspaleuijtok tlen moixtoma ika Biblia ipan tlanechikoli?

¹³ Ma tikitakaj kenijkatsa kej moixtonki Biblia ipan se tlanechikoli tlauel kipaleuik se tosiuaikni katli eua Australia. Kema eliyaya siuapil kipanok miak tlamantli tlen amo kuali. Teipa pejki momachtia Biblia uan kimaktilik Jehová inemilis. Maske panotoya miak xiuitl ika moatsonpoliuiltijtoya, nojua moiljuiyaya Jehová amo kiikneliyaya. Se tonali, ipan tlanechikoli kikajki se texto tlen asik ipan iyolo. Pejki moyoliljuia ipan nopa texto uan nojkia kipojki sekinok textos, nopa kipaleuik ma motemachi Jehová tlauel kiikneliyaya. * ¿Ta nojkia tijkaktok se texto ipan se tlanechikoli o ipan se ueyi tlanechikolistli tlen tlauel mitspaleuijtok ipan monemilis? (Neh. 8:12).

14. ¿Kenijkatsa uelis tijnextisej tlauel tijpatiitaj toTeotsij iTlajtol?

¹⁴ Tlauel tijtlaskamatiliaj toTeotsij Jehová pampa techmakatok iTlajtol uan pampa kichijtok ma uejkaua nochipa, kej uejkajkia kitenkajki kichiuaskia (1 Ped. 1:24, 25). Yeka, moneki nochipa ma tijpouakaj, ma tijchiuakaj tlen techtlajtolmaka uan ma tijtekiuikaj kema tikinpaleuisej sekinok. Tlaj kiampa tijchiuasej, tijnextisej tlauel tikikneliaj uan tijpatiitaj toTeotsij iTlajtol. Uan nojkia tijnextisej tlauel tikikneliaj toTeotsij Jehová, katli kichijki ma moijkuilo Biblia.