1. ¿Tlake kamanaltik Jesús ininuaya itokilijkauaj kema nechka kimiktiskiaj?

IPAN nopa youali kema nechka kimiktiskiaj, Jesús itstoya ininuaya itokilijkauaj uan kiijtok tlen nopa tlaiknelili nechka 30 imiakpa. Xitlauak kiniljuik: “Ximoiknelikaj se ika seyok” (Juan 15:12, 17). Nopa tlaiknelili tlen kinextiskiaj kichiuaskia sekinok ma kimatikaj nelia eliyayaj itokilijkauaj (Juan 13:34, 35). Nopa tlaiknelili tlen Jesús kiijtok amo eliyaya san se tlamantli tlen nimantsi tijyolmatij, eli se kuali tlamantli tlen tlauel ipati uan tlen kinextia se akajya maske amo tleno kiselia. Ya kiijtok: “Se tlen motemaktilis uan mikis ipampa iuampoyouaj, yajaya más teiknelia que nochi tlakamej. Initstokej innouampoyouaj tlaj inkichiuaj tlen niinmechnauatia” (Juan 15:13, 14).

2. 1) ¿Kenijkatsa kinixmatij toTeotsij itekipanojkauaj? 2) ¿Tlake tlajtlanili tijnankilisej?

² Ipan ni tonali, toTeotsij itekipanojkauaj kinixmatij pampa nelia moikneliaj ika nochi ininyolo maske amo tleno kiseliaj uan pampa nochipa sansejko itstokej (1 Juan 3:10, 11). Tijchiuaj kampeka nochipa tijnextisej nopa tlaiknelili maske kampa ueli tieuaj, maske tikamanaltij seyok tlajtoli o amo sanse techiskaltijkej.  Maske tijchiuaj nopa, uelis timotlajtlaniaj: “¿Kenke ipan ni tonali tlauel moneki timoiknelisej? ¿Kenijkatsa Jehová uan Jesús techyolchikauaj ika tlaiknelili? Uan, ¿kenijkatsa uelis tijchiuasej kej Jesús uan tijnextisej tlaiknelili tlen teyolchikaua?” (1 Cor. 8:1).

3. ¿Kenijkatsa kiyolmatij miakej maseualmej ipan ni tonali?

³ Ipan ni tonali tlauel ouij tiitstokej uan “san tijpanoj tlaouijkayotl uan kuesoli”, yeka miakej nochipa san mokuesojtokej (Sal. 90:10; 2 Tim. 3:1-5). Sekij ayokmo kinekij itstosej. Uelis sejse xiuitl se 800,000 maseualmej ininselti momiktiaj, ni kiijtosneki ipan 40 segundos se maseuali momiktia. Uan tlauel techyolkokoua tijmatisej miakej toikniuaj katli tlauel mokuesouayayaj nojkia momiktijtokej.

4. ¿Ajkia inijuantij katli kitekipanouayayaj toTeotsij kiijtojkej kinekiyayaj mikisej?

⁴ Biblia kiijtoua miakej toTeotsij itekipanojkauaj katli uejkajkia itstoyaj nojkia tlauel mokuesojkej uan yeka kinejkej mikisej. Kiampa kipanok Job, katli kiijtok kikuesiuilijtoya itstos uan kinekiyaya mikis. Pampa tlauel tlaijiyouijtoya, kiijtok: “Nelia nikijia noyolis pampa axtleno ipati” (Job 7:16; 14:13). Uan kema Jonás kiitak amo panotoya tlen ya moiljuiyaya, kiijtok: “Yeka ama, toTeko, nimitstlajtlania xinechmikti na. Más kuali para nimikis uan axniitstos” (Jon. 4:3). Nojkia, tlajtolpanextijketl Elías tlauel amo kuali kiyolmatki uan kinekiyaya mikis. “Kiiljuik toTeko: ‘¡Ya kuali noTeko! ¡Xinechkixtili noyolis! ¡Pampa na axmás nikuali que notatauaj!’” (1 Rey. 19:4). Jehová tlauel kinpatiitayaya nopa tlakamej uan kinekiyaya ma itstokaj. Amo kintlatsakuiltik pampa kej nopa kiyolmatiyayaj, ya kinyoltlalik ika tlaiknelili uan kinpaleuik sampa ma kinekikaj itstosej uan nojua ma kitekipanojtokaj.

5. ¿Kenke tlauel moneki ma tikiniknelikaj toikniuaj?

⁵ Maske miakej toikniuaj nojua kiijiyouijtokej, sekij moneki kiixnamikisej kuesoli tlen tlauel ouij uan moneki ma tikinyolchikauakaj uan ma tikiniknelikaj. Sekij kintlatsakuiltiaj uan kinpinajtiaj. Sekinok kinijilnamikij kampa tekitij uan moneki kiijiyouijtosej nopa. O uelis tlauel siajtokej pampa tekitij miak horas o tlauel ouij kampa tekitij. Uan sekinok kipiaj kuesoli ika ininchampoyouaj pampa uelis ininsiua o ininueue amo kitekipanoua toTeotsij uan yeka tlauel kintlaijiljuia. Pampa kinpano ni uan sekinok kuesoli, miakej toikniuaj tlauel siajtokej uan mokuesouaj. ¿Tlake kinpaleuis nojua ma kiijiyouijtokaj?

6. ¿Kenijkatsa kinyolchikaua Jehová itekipanojkauaj?

⁶ Jehová kinyolchikaua itekipanojkauaj kema kiniljuia nochipa kiniknelijtos. Uelis israeleuanij tlauel kuali kiyolmatkej kema kikajkej Jehová kiniljuik: “Niinmechita para nelia miak inmopati. Niinmechtlepanita uan miak niinmechiknelia. Amo ximajmauikaj pampa na niitstok inmouaya” (Is. 43:4, 5). Ta uelis timotemachis Jehová tlauel mitsiknelia uan tlauel mitspatiita. * Jehová kintenkauilijtok itekipanojkauaj: “ToTeko tlen kipia nochi chikaualistli ualajtok para itstos inmouaya. Yajaya inmechmakixtis. Yajaya nelia yolpakis ika inmojuantij” (Sof. 3:16, 17).

7. ¿Kenijkatsa sanse nopa tlaiknelijkayotl tlen Jehová kinextia ika tlen se tenaj kipialia ipilkone? (Xikita nopa achtoui tlaixkopinkayotl).

 ⁷ Maske kinpanos tlen ueli tlaouijkayotl, toTeotsij kiijtojtok kinpaleuis itekipanojkauaj uan kinyolchikauas. Ipan pilamochtsi Isaías kiijtoua kinmokuitlauis kej “se siuatl tlen kichichitia ikone, kikuapauia imako uan kinajnaua pampa tlauel kiiknelia”. Jehová kiijtoua: “Nikinyoltlalis notlakauaj keja se tenantsi kiyoltlalia ipilkone” (Is. 66:12, 13). Ni texto kichiua ma timoiljuikaj kenijkatsa se tenaj kinaua ipilkone o mauiltia iuaya. Kiampa, Jehová kiixnextia kenijkatsa tlauel kiniknelia itekipanojkauaj. Nochipa ma tikilnamikikaj ya nelia tlauel techpatiita (Jer. 31:3).

8, 9. ¿Kenijkatsa techpaleuia Jesús itlaiknelijkayo?

⁸ Onka seyok tlamantli tlen kichiua ma timotemachikaj Jehová nelia tlauel techiknelia. Juan 3:16 kiijtoua: “ToTeko nelia miak kiniknelia nochi tlakamej ipan ni Tlaltipaktli uan yeka kititlanki iKone iyojtsi para mikis ininpampa. Uan keja nopa nochi tlen kineltokasej, axpoliuisej, pero kipiasej yolistli tlen yankuik para nochipa”. Uan Jesús nojkia kinextik tlauel techiknelia kema temakak inemilis. ToTeotsij iTlajtol kiijtoua yon se tlaouijkayotl uan yon se tlamantli uelis techuejkatlalis tlen itlaiknelijkayo Cristo (Rom. 8:35, 38, 39).

⁹ Kema tikixnamikij tlaouijkayotl tlen techsiauiltia, tlen kichiua amo kuali ma tijyolmatikaj o amo kuali ma titlaneltokakaj, tlauel techpaleuis ma tikijiyouikaj nochi tlaj tikilnamikisej Cristo techiknelia (xijpoua 2 Corintios 5:14, 15). Nopa tlaiknelijkayotl kichiua ma tijnekikaj tiitstosej uan techyololinia nojua ma tijtekipanojtokaj Jehová. Uelis techpaleuis ma tikijiyouikaj nochi maske techtlasojsoljuilis se tlenijki, maske techtlatsakuiltisej, timoyolkokosej o timokuesojtosej.

10, 11. ¿Ajkia kinamiki kinyolchikauas katli mokuesojtokej? Xikixtoma.

¹⁰ Jehová nojkia techyolchikaua ika miak tlaiknelili ipan tlanechikoli. Kema tikinikneliaj toikniuaj, tijnextiaj nojkia tikikneliaj toTeotsij. Tijchiuaj kampeka toikniuaj ma kimatikaj Jehová tlauel kinpatiita uan kiniknelia (1 Juan 4:19-21). Apóstol Pablo kiniljuik toikniuaj: “Noja más ximoyolchikauakaj ipan toTeko uan ximofuerzajmakakaj  se ika sekinok keja ya nijmati para inkichijtiauij” (1 Tes. 5:11). Nochi tojuantij, uan amo san ueuejtlakamej, uelis tikinyolchikauasej uan tikinyoltlalisej toikniuaj sanse kej kichiuaj Jehová uan Jesús (xijpoua Romanos 15:1, 2).

¹¹ Sekij toikniuaj katli tlauel mokuesouaj uelis moneki ma kinita se tepajtijketl (Luc. 5:31). Maske ueuejtlakamej uan nochi toikniuaj kimatij inijuantij amo elij tepajtianij, kena kimatij moneki kineltokasej ni tlanauatili: “Xikinyolchikauakaj inijuantij tlen nimantsi mopinauaj uan axkipiaj tetili [katli mokuesouaj]. Xikinpaleuikaj tlen aya nelkuali kineltokaj toTeko. Uan xijpiakaj inmoyolo ika nochi tlakamej” (1 Tes. 5:14). Tlauel moneki tikinnextilisej tikinikneliaj katli mokuesojtokej o motekipachojtokej, tijnextisej techyolkokoua tlen kinpano uan tijpiasej toyolo ininuaya, uan moneki ma tikinnojnotsakaj ika miak tlaiknelili uan kiampa uelis tikinyoltlalisej. Ma timotlajtlanikaj: “¿Nikinyoltlalia uan nikinyolchikaua sekinok? ¿Tlake uelis nijchiuas uan kiampa kuali nikinpaleuis toikniuaj?”.

12. Xikijto kenijkatsa kipaleuik se toikni pampa toikniuaj kinextijkej tlauel kiikneliaj.

¹² ¿Kenijkatsa kinpaleuis katli motekipachojtokej tlaj tikinnextilisej tikinikneliaj? Se tosiuaikni tlen Europa kiijtoua: “Maske kemantika nijneki nimomiktis, onka miak tlamantli tlen nechpaleuia. Toikniuaj tlen tlanechikoli nechpaleuijtokej nojua ma nijneki niitstos. Inijuantij nochipa nechyolchikauaj uan kinextiaj nechikneliaj. San se keskij kimatij nijpia depresión (nimokuesoua miak tonali), uan nochi inijuantij nechpaleuiaj ipan tlen ueli tonali. Se toikni iuaya isiua nechmokuitlauiaj kejuak eliskiaj notatauaj. Nechpaleuiaj ipan tlen ueli hora, maske kemantika tlayoua”. Maske amo nochi uelis kiampa titepaleuisej, onka miak tlamantli tlen nochi uelis tijchiuasej uan kiampa tikinpaleuisej katli tlauel mokuesouaj o motekipachouaj. *

13. ¿Tlake moneki tijchiuasej tlaj tijnekij tikinyolchikauasej toikniuaj?

¹³ Kuali ma titetlakakilikaj (Sant. 1:19). Kema tijtlakakiliaj se akajya uan tijnextiaj tijyolmatij tlen kipano, tijnextiaj tikikneliaj. Tlaj tijnekij tijyolchikauasej se akajya, ma tijchiuakaj kampeka timoiljuisej kenijkatsa tijyolmatiskiaj tojuantij tlaj techpanoskia tlen ya kipanotok, uan kuali ma timoiljuikaj kenijkatsa tijtlatsintokisej se tlenijki uan kiampa tijkuamachilisej tlen kiyolmati. Tlen nesi ipan toixayak moneki kinextis tikikneliaj uan techtekipachoua tlen kipano. Tlaj toikni kineki kiijtos nochi tlamantli kema techixtomilis tlen kipano, uajka ma tijpiakaj toyolo uan ma tijkauakaj ma kiijto nochi. Uelis kuali tijkuamachilisej tlaj tijpiaj toyolo uan tlaj kuali tijtlakakiliaj. Nopa nojkia kichiuas ma motemachi ipan tojuantij uan kuali kitlakakilis tlen tikiljuisej. Kema tijnextiaj techtekipachoua tlen kinpano, inijuantij tlauel moyolchikauaj.

14. ¿Kenke amo kinamiki titetlajtolsenkauasej?

¹⁴ Amo ma titetlajtolsenkauakaj. Tlaj se toikni katli mokuesoua moiljuis san tijtlajtolsenkauaj, nojua tlauel moyolkokos. Uan maske tijchiuaskiaj ika nochi toyolo, amo ueliskia tijyolchikauasej. Biblia kiijtoua: “Itstokej sekij tlakamej tlen tekokouaj ika inintlajtol keja eliskia se machete tlen tlateki. Pero inintlajtol tlalnamikinij eltok keja se pajtli tlen teyolchikaua uan teseseltia” (Prov. 12:18). Maske tojuantij amo aka tijnekij tijyolkokosej, kena kiampa  tijchiuasej tlaj amo kuali timoiljuiaj tlake tikijtosej. Tlaj tijnekij tijyolchikauasej se akajya ika miak tlaiknelili, moneki tijchiuasej kampeka tijyolmatisej tlen ya kiyolmati (Mat. 7:12).

15. ¿Tlake tlamantli uelis tijtekiuisej uan kiampa tikinyolchikauasej sekinok?

¹⁵ Ma tijtekiuikaj toTeotsij iTlajtol (xijpoua Romanos 15:4, 5). Biblia nelia tlauel ipati uan tlauel teyolchikaua pampa techmakatok “toTeko tlen techyolchikaua uan tlen techpaleuia ma tikijiyouikaj tlen techpanotiuala”. Nojkia tijpiaj Índice de las publicaciones Watch Tower uan Tlen ika momachtiaj Jehová itlajtoltemakauaj, tlen uelis techpaleuis ma tijpantikaj textos uan amatlajkuiloli kampa kiijtoua kenijkatsa tikinyolchikauasej toikniuaj.

16. ¿Tlake kuajkuali tlamantli moneki tijnextisej kema tijyolchikauaj se akajya katli mokuesojtok?

¹⁶ Kuali ma titenojnotsakaj uan ma titeiknelikaj. Jehová “yajaya tlen techtlasojtla uan ajachika techyoltlalia”, uan tlauel kiniknelia katli kitekipanouaj (xijpoua 2 Corintios 1:3-6; Luc. 1:78; Rom. 15:13). Pablo kinextik ni kuajkuali tlamantli pampa kichijki kej Jehová. Ya kiijkuilok: “Kema tiitstoyaj inmouaya, tiinmechkamauijkej ika yamanik tlajtoli. Tiinmechchiuilijkej keja se tenaj tlen kiniskaltia ikoneuaj ika miak teiknelili. Uan pampa tiinmechikneliaj miak, axtijnekiyayaj san tiinmechiljuisej iTlajtol toTeko tlen kuali, pero nojkia timiktoskiaj inmopampa inmojuantij, pampa nelia tiinmechikneliaj” (1 Tes. 2:7, 8). Tlaj titeikneliaj kej toTeotsij, se toikni uelis kiitas ika tojuantij kenijkatsa toTeotsij kinankilia tlen kitlajtlanik kema momaijtok.

17. ¿Kenijkatsa moneki tikinitasej toikniuaj tlaj tijnekij tikinyolchikauasej ika miak tlaiknelili?

¹⁷ Amo ma timoiljuikaj uelis kichiuasej nochi. Moneki tikinitasej toikniuaj kej kinamiki. Uelis teipa timoyolkokoskiaj tlaj timoiljuiskiaj toikniuaj amo kema mokuapolosej, yeka amo kinamikiskia timoiljuisej uelis kichiuasej nochi (Ecl. 7:21, 22). Ma tikilnamikikaj Jehová nojkia techita kej kinamiki uan amo moiljuia amo kema timokuapolosej. Tlaj tijchiuasej kej ya, uajka uelis tikijiyouisej tlen sekinok kichiuasej (Efes. 4:2, 32). Amo tijnekij ma moiljuikaj amo kichiuaj kampeka o tikijtosej amo elij sanse kej sekinok toikniuaj, tlaj kiampa tijchiuaskiaj, uajka nojua tlauel amo kuali kiyolmatiskiaj. Kinamiki nochipa tikiniljuisej tlauel kuali tlen yajatij kichiuaj. Nopa kinyolchikauas uan kinpaleuis ma kitekipanokaj Jehová ika pakilistli (Gál. 6:4).

18. ¿Kenke tijnekij tikinyolchikauasej toikniuaj ika miak tlaiknelili?

¹⁸ Jehová kinpatiita nochi itekipanojkauaj. Uan Jesús nojkia kiampa kinita uan yeka temakak inemilis (Gál. 2:20). Tikinikneliaj toikniuaj ika nochi toyolo uan tijnekij tikinmokuitlauisej ika miak tlaiknelili. Tlaj tijnekij titeyolchikauasej, “uajka ma tijchiuakaj senkistok nochi tlen moneki para tiitstosej ika yejyektsi [...] [uan] ma timopaleuikaj se ika seyok para ma tiitstokaj más titemachmej ipan toTeko” (Rom. 14:19). Tlauel tijnekij tiitstosej ipan Xochimili, kampa yon se tlamantli kichiuas ma timokuesokaj. Ayokmo onkas kokolistli, tlauilankayotl, mikilistli, ayokmo aka techtlatsakuiltis yon tijpiasej kuesoli ininuaya tochampoyouaj uan ayokmo aka techyolkokos. Kema tlamis mil xiuitl, nochi maseualmej elisej xitlauakej. Jehová kinitas kej ikoneuaj nochi katli amo tlaixpanosej, “nochi tiitstosej timalakantokej tlen nopa tlatelchiuali, uan nochi elis tlauel yejyektsi” (Rom. 8:21). Nojua ma tijnextijtokaj nopa tlaiknelili tlen teyolchikaua uan ma tikinpaleuikaj sekinok nojkia ma itstokaj ipan nopa yejyektsi Xochimili tlen toTeotsij kitenkajtok.