1. ¿Kenke tlauel yolpakij Jehová itlajtoltemakauaj? (Xikita nopa achtoui tlaixkopinkayotl).

JEHOVÁ itlajtoltemakauaj tlauel yolpakij. Kema yauij tlanechikoli, ipan uejueyi tlanechikolistli uan kema sansejko moyolpakiltiaj, kakisti kenijkatsa uetskaj uan kenijkatsa tlauel yolpakij. ¿Kenke tlauel yolpakij? Pampa kiixmatij, kitekipanouaj uan kichiuaj kampeka kichiuasej kej Jehová, toTeotsij katli tlauel yolpaki (Sal. 16:11; 1 Tim. 1:11, TNM). Jehová yaya kichiua ma tiyolpakikaj, uan yeka techmaka miak tlamantli pampa kineki ma tiyolpaktokaj (Deut. 12:7; Ecl. 3:12, 13).

2, 3. 1) ¿Tlake kiijtosneki tiyolpakisej? 2) ¿Tlake tlamantli uelis kichiuas ayokmo ma tiyolpakikaj?

² ¿Uan tojuantij? ¿Nelia tiyolpakij? ¿Tlake uelis tijchiuasej uan kiampa nojua tlauel tiyolpakisej? Tiyolpakis kiijtosneki kuali tijyolmatis, tipakis ika tlamantli tlen tijpixtok ipan monemilis o nochipa tiixuetskatos. Biblia kiijtoua tlaj nelia tijnekij tiyolpakisej moneki timouampojchiuasej iuaya Jehová. Maske tijnekij tiyolpakisej, kemantika uelis tijmatisej ouij. ¿Kenke?

³ Onka miak tlamantli tlen ueliskia kichiuas ayokmo  ma tiyolpakikaj, kej kema ayokmo tijpiaj tekitl, kema tikixpolouaj nopa amatl kampa nesi timosenkajtokej o kema kikixtiaj ipan tlanechikoli o miki se akajya katli tikikneliaj. Nojkia ayokmo tiyolpakij kema tijpiaj kuesoli ininuaya tochampoyouaj, kema techpinajtiaj katli ininuaya titekitij o katli ininuaya timomachtiaj, kema techtlaijiyouiltiaj o kema techtsakuaj pampa tijtekipanouaj Jehová. Uan nojkia kiampa pano kema tlauel timokokouaj o kema tijpiaj se kokolistli tlen ayokmo kipia pajtli o kema timokuesouaj miak tonali. Uan Jesucristo, katli tlauel yolpaki, kineki techyoltlalis uan techpaleuis ma tiyolpakikaj (Mat. 11:28-30; 1 Tim. 6:15). Kema tlamachtik ipan se tepetl, Jesús kiijtok miak tlamantli tlen uelis techpaleuis ma tiyolpakikaj maske tijpiasej tlaouijkayotl tlen tlauel techyolkokos.

4, 5. ¿Tlake moneki tijchiuasej tlaj tijnekij nochipa tiyolpaktosej?

⁴ Tlen Jesús achtoui kiijtok, tlauel ipati. Ya kiijtok: “Pakij katli kimatij moneki momachtisej toTeotsij iTlajtol, pampa inijuantij itstosej ipan toTeotsij iTlanauatijkayo” (Mat. 5:3, TNM). ¿Kenijkatsa tijnextiaj tijmatij moneki tikixmatisej toTeotsij uan tijkauasej ma techyakana? Tijnextiaj kema timomachtiaj Biblia, kema tijneltokaj itlanauatiljuaj uan kema timosentlaliaj tijtekipanosej. Tlaj kiampa tijchiuasej, tlauel tiyolpakisej uan nojua tlauel timotemachisej Jehová nelia kiaxitis nochi tlen techtenkauilijtok. Nojkia tlen toTeotsij techtenkauilijtok ipan Biblia techmakas chikaualistli uan kiampa uelis tikijiyouisej nochi kuesoli tlen tijpiasej (Tito 2:13).

⁵ Tlaj kuali timouikasej iuaya Jehová, nojkia techpaleuis ma tiyolpaktokaj. Apóstol Pablo kiijtok: “Nochipa xipaktokaj ipan toueyiTeko [Jehová]. Sampa niinmechiljuia, xipaktokaj” (Filip. 4:4). Tlaj tijnekij kuali timouampojchiuasej iuaya Jehová, moneki tijpiasej tlalnamikilistli. ToTeotsij iTlajtol kiijtoua: “Ueyi pakilistli kipia se tlakatl tlen kipantia tlalnamikilistli uan mochiua tlalnamiki”. Uan nojkia kiijtoua: “Tlalnamikistli eltok keja se kuali kuauitl tlen temaka se yolistli tlen nelia yejyektsi. Intla timochiuas titlalnamiki uan axtikiyokakauas motlalnamikilis, tijpias miak pakilistli ipan moyolis” (Prov. 3:13, 18).

6. ¿Tlake techpaleuis nojua ma tiyolpaktokaj?

⁶ Uajka, tlaj tijnekij nojua tiyolpaktosej, moneki nochipa tijneltokasej tlen timomachtiaj ipan Biblia. Jesús kinextik ni tlauel ipati kema kiijtok: “Xijchiuakaj uan inmechmakas miak pakilistli” (Juan 13:17; xijpoua Santiago 1:25). Moneki tijchiuasej ni tlaj tijnekij tikixmatisej toTeotsij uan tlaj tijnekij nochipa tiyolpaktosej. Uan, ¿kenijkatsa uelis tiyolpakisej tlaj onka miak tlamantli tlen ueliskia kichiuas ayokmo ma tiyolpakikaj? Ma tikitakaj tlake sekinok tlamantli kiijtok Jesús kema tlamachtik ipan nopa tepetl.

7. ¿Kenke yolpakij katli mokuesouaj?

⁷ “Xipakikaj inmojuantij tlen inmokuesouaj, pampa toTeko inmechyoltlalis” (Mat. 5:4). Uelis sekij maseualmej motlajtlaniaj: “¿Kenijkatsa uelis yolpakisej katli mokuesouaj?”. Kema Jesús kiijtok ni tlajtoli, amo kamanaltiyaya tlen maseualmej katli mokuesouaj ika tlen ueli tlamantli. Pampa maseualmej katli mosisiniaj nojkia mokuesouaj kema kiitaj pano tlamantli tlen “nelia fiero” (2 Tim. 3:1). Tlen kichiuaj amo kinpaleuia ma kinechkauikaj Jehová, yeka amo yolpakij. Uajka, kema Jesús kiijtok ni tlajtoli kamanaltiyaya tlen maseualmej katli kimatij moneki kiixmatisej toTeotsij uan yeka mokuesouaj kema kiitaj kenijkatsa miakej  amo kinechkauiaj toTeotsij. Kikuamachiliaj inijuantij tlajtlakolejkej uan nojkia kimatij nopa tlajtlakoli kichiua ma pano tlamantli tlen amo kuali ipan Tlaltipaktli. Jehová kintlachilia maseualmej katli kuali ininyolo, kinyolchikaua ika Biblia uan kinpaleuia ma yolpakikaj ipan ni tonali uan nojkia ma motemachikaj teipa nochipa itstosej ika pakilistli (xijpoua Ezequiel 5:11; 9:4).

8. Xikixtoma kenijkatsa techpaleuia ma tiyolpakikaj kema amo nima tikualanij.

⁸ “Xipakikaj inmojuantij tlen axinmoueyimatij [o tlen amo nima kualanij] ininixtla sekinok. ToTeko inmechaxkatis nochi Tlaltipaktli” (Mat. 5:5). ¿Kenke kichiua ma tiyolpakikaj kema amo nima tikualanij? Sekij maseualmej tlauel yoltetikej eliyayaj, nochipa kualaniyayaj uan mosisiniyayaj. Uan pampa momachtijkej tlen Biblia kiijtoua, kinpaleuik ma kipatlakaj ininnemilis uan kejuak mokentijkej se yankuik ininyoyo. Nama teikneliaj, tetlasojtlaj, kuali tenojnotsaj, amo moueyimatij, amo nima kualanij uan kipiaj ininyolo (Col. 3:9-12). Yeka, kuali mouikaj ininuaya sekinok maseualmej uan tlauel yolpakij. Uan Biblia kiijtoua katli kiampa monejnemiltiaj, “moaxkatisej nopa tlali” (Sal. 37:8-10, 29).

9. 1) ¿Kenijkatsa “moaxkatisej nopa tlali” katli amo nima kualanij? 2) ¿Kenke uelis yolpakisej katli ‘kitemouaj kejatsa kichiuasej tlen xitlauak’?

⁹ ¿Kenijkatsa “moaxkatisej nopa tlali” katli amo nima kualanij? Jesús itokilijkauaj katli elij tlapejpenilmej “moaxkatisej nopa tlali” kema elisej sacerdotes uan tlanauatisej ipan Tlaltipaktli (Apoc. [Rev.] 20:6). Uan tlauel miakej maseualmej katli amo yasej iluikak “moaxkatisej nopa tlali” kema ayokmo elisej tlajtlakolejkej uan itstosej nochipa ika pakilistli uan ika tlaseuilistli. Jesús nojua kiijtok tlen nopa maseualmej: “Xipakikaj inmojuantij tlen ika nochi inmoyolo inkitemouaj kejatsa inkichiuasej tlen xitlauak” (Mat. 5:6). Katli kinekij kichiuasej tlen xitlauak nojua uelis kiampa kichiuasej kema itstosej ipan yankuik Tlaltipaktli (2 Ped. 3:13). Kema toTeotsij kitsontlamiltis nochi tlen amo kuali, katli kuajkualmej tlauel yolpakisej uan amo kema sampa moyolkokosej pampa ayokmo onkas tlamantli tlen amo kuali yon tlamantli tlen amo xitlauak (Sal. 37:17).

10. ¿Tlake kiijtosneki titetlasojtlas?

¹⁰ “Xipakikaj inmojuantij tlen intetlasojtlaj uan intepaleuiaj, pampa toTeko nojkia inmechtlasojtlas uan inmechpaleuis” (Mat. 5:7). Se tlajtoli hebreo tlen eli sanse ika nopa tlajtoli “intetlasojtlaj” kiijtosneki “tijyolmatis o tijnextis nelnelia tikiknelia se akajya” uan nojkia “titeiknelis uan tijnekis titepaleuis”. Uan nopa tlajtoli griego nojkia kiijtosneki tikiniknelisej sekinok. Ipan Biblia, titetlasojtlas amo san kiijtosneki mitsyolkokos tlen kinpano sekinok. Kiijtosneki tijchiuas se tlamantli tlen ika tikinpaleuis.

11. ¿Tlake techmachtia nopa tlapoualistli tlen nopa kuali tlakatl samariaejketl?

¹¹ (Xijpoua Lucas 10:30-37). Nopa tlapoualistli kampa kiijtoua tlen se kuali tlakatl samariaejketl techpaleuia ma tijkuamachilikaj tlake kiijtosneki tikintlasojtlasej sekinok. Kema nopa samariaejketl kiitak nopa tlakatl katli kiteuijtoyaj, kitlasojtlak uan kipaleuik. Kema tlanki kiijtoua nopa tlapoualistli, Jesús kiijtok: “Xia ta uan keja nopa nojkia xijchiua”. Yeka, ma timotlajtlanikaj: “¿Nijchiua kej nopa samariaejketl? ¿Nojkia nitetlasojtla? Kema nikita sekinok tlaijiyouiaj, ¿nijnextia nikintlasojtla? ¿Uelis nijchiuas sekinok tlamantli uan kiampa nikinpaleuis? ¿Ueliskia nikinpaleuis toikniuaj katli ya uejueyij, toikniuaj katli miktok ininnamik uan telpokamej katli inintatauaj amo kitekipanouaj Jehová? ¿Uelis nikinyolchikauas toikniuaj katli mokuesouaj miak tonali?” (1 Tes. 5:14; Sant. 1:27).

12. ¿Kenke kichiua ma tiyolpakikaj kema titetlasojtlaj?

 ¹² ¿Kenke kichiua ma tiyolpakikaj kema titetlasojtlaj? Kema tikinpaleuiaj sekinok, tikitaj nelia “más pakilistli kiselia tlen temaka se tlenijki, uan axkeja tlen kiselia”. Uan nojkia tijmatij kiampa tijyolpakiltiaj Jehová (Hech. 20:35; xijpoua Hebreos 13:16). Kema David kiilnamijki katli tetlasojtla, kiijtok: “ToTeko kimokuitlauis para axaka kimiktis. Uan toTeko kiteochiuas tlamiakapa” (Sal. 41:1, 2). Tlaj tikintlasojtlasej sekinok, Jehová nojkia techtlasojtlas uan nopa kichiuas nochipa ma tiyolpaktokaj (Sant. 2:13).

13, 14. ¿Kenke yolpakij katli yoltlapajpaktikej?

¹³ Jesús kiijtok: “Xipakikaj inmojuantij tlen inyoltlapajpaktikej, pampa inkiitasej toTeko” (Mat. 5:8). Tlaj tijnekij toyolo ma elto tlapajpaktik, tlen timoiljuisej uan tlen tijnekisej tijchiuasej nojkia moneki ma elto tlapajpaktik. Nojkia tlauel moneki ma tiitstokaj titlapajpaktikej tlaj tijnekij Jehová ma kiseli tlen tijchiuaj kema tijtekipanouaj (xijpoua 2 Corintios 4:2; 1 Tim. 1:5).

¹⁴ Maseualmej katli amo kichiuaj tlen amo kuali, yolpakij pampa Jehová kuali kinita. ToTeotsij kiijtok: “Pakilistli para nochi tlakamej tlen kichikueniaj ininyoyo” (Rev. 22:14). ¿Tlake kiijtosneki “kichikueniaj ininyoyo”? Katli kintlapejpenijtokej yasej iluikak kiijtosneki Jehová kinita tlapajpaktikej uan kichiuas nochipa ma itstokaj ika pakilistli ipan iluikak. Uan katli motemachiaj itstosej ipan Tlaltipaktli kiijtosneki toTeotsij kinkaua ma mouampojchiuakaj iuaya pampa kinita xitlauakej. Biblia kiijtoua: “Kichikuenijtokej ininyoyo ika ieso nopa Pilborregojtsi, uan yeka kichijtokej chipauak ininyoyo” (Rev. 7:9, 13, 14).

15, 16. ¿Kenijkatsa kejuak kiitaj Jehová katli kuali ininyolo?

¹⁵ ToTeotsij kiijtok: “Niyon se tlakatl axuelis kiitas noixayak uan itstos” (Éx. 33:20). Uajka, ¿kenke Jesús kiijtok katli ‘yoltlapajpaktikej’ kiitasej toTeotsij? Nopa tlajtoli griego tlen motlajtolkuepa “kiitas” kiijtosneki “timoiljuis, tijmatis uan tikixmatis se tlamantli”. Katli ‘kiitaj’ Jehová kiijtosneki kuali kiixmatij uan kipatiitaj nopa kuajkuali tlamantli tlen kinextia (Efes. 1:18). Jesús nochipa kichiuayaya kej iTata. Yeka, kiijtok: “Yajaya tlen nechitstok, ya kiitstok noTata” (Juan 14:7-9).

¹⁶ ¿Kenijkatsa nojkia uelis kejuak tikitasej toTeotsij? Moneki nochipa timoyoliljuisej kenijkatsa techpaleuia (Job 42:5). Uan nojkia uelis kejuak tikitasej tlaj timoyoliljuisej ipan nochi tlateochiualistli tlen toTeotsij kitenkajtok kinmakas katli kichiuaj kampeka itstosej tlapajpaktikej uan katli amo kema kitlauelkauaj. Uan katli kintlapejpenijtokej nelia kiitaj Jehová kema moyolkuij uan yauij iluikak (1 Juan 3:2).

17. ¿Kenke yolpakij katli kichiuaj kampeka itstosej ika tlaseuilistli?

¹⁷ Jesús nojkia kiijtok: “Xipakikaj inmojuantij tlen inkiyoltlaliaj kualantli” (Mat. 5:9). Katli kichiuaj kampeka itstosej ika tlaseuilistli nelia uelis yolpakisej. Santiago kiijkuilok: “Kampa ni tlakamej yauij onka tlaseuilistli pampa tlayoltlaliaj uan kichiuaj tlen kuali” (Sant. 3:18). Tlaj timokualanijtokej iuaya se toikni ipan tlanechikoli o se tlen tochampoyouaj, ma tikiljuikaj Jehová ma techpaleui tijsenkauasej nopa kuesoli. Jesús kinextik tlauel ipati achtoui tojuantij ma tijchiuakaj kampeka tijsenkauasej se kuesoli kema kiijtok: “Uajka intla timoketsa kampa itlaixpa para tijmakas toTeko se tlakajkaualistli uan ipan nopa tlalochtli tikilnamikis para moikni kualani mouaya, uajka amo xijmaka nopa tlakajkaualistli. Xijkaua motlakajkaualis ipan tlaixpamitl uan xia achtoui para ta uan moikni ma ximotlapojpoljuikaj uan ximoyoltlalikaj ika tlen panok. Uan uajka, kena, ximokuepa para tijmakas toTeko nopa tlakajkaualistli” (Mat. 5:23, 24).

18, 19. ¿Kenke Jehová itekipanojkauaj yolpakij kema kintlaijiyouiltiaj?

¹⁸ “Xipakikaj kema sekinok inmechpinajtiaj uan inmechtlaijiyouiltiaj uan inmechistlakauiaj pampa innechneltokaj”. ¿Kenke kiampa kiijtok Jesús? Ya nojua kiijtok: “Xipakikaj uan amo ximokuesokaj pampa toTeko ueyi inmechtlaxtlauis nepa iluikak. Kej nopa tlakamej nojkia kintlatsakuiltijkej iteokamanalojkauaj toTeko uejkajkia” (Mat. 5:11, 12). Kema apóstoles kinuijuitejkej uan kiniljuijkej ayokmo ma tlajtolmoyauakaj, inijuantij “kiskej ipan nopa ueyi tlasentilistli tlen tekiuejmej yolpaktokej”. Maske inijuantij amo kinpaktiyaya ma kinuijuitekikaj, kena yolpajkej “pampa toTeko kinkauilijtoya tlaijiyouisej ipampa kineltokaj itekiuejkayo Jesús” (Hech 5:41).

¹⁹ Ipan ni tonali, toikniuaj nojkia yolpakij kema kintlaijiyouiltiaj pampa kitekipanouaj Jehová o kema kipiaj uejueyi kuesoli (xijpoua Santiago 1:2-4). Sanse kej apóstoles, tojuantij nojkia amo techpaktia titlaijiyouisej. Uan tijmatij tlaj amo tijtlauelkauasej Jehová, ya uelis techpaleuis ma tikijiyouikaj nopa tlaouijkayotl uan nojua ma tiyolpaktokaj. Ma timoiljuikaj tlen panok ipan agosto 1994, kema tlanauatianij kititlankej toikni Henryk Dornik uan iikni kampa kinchiualtiyayaj ma tekitikaj. Katli kinkualankaitayayaj kiijtojkej: “Amo ueli tijchiuaj ma kichiuakaj se tlamantli. Nesi yolpakij kema tikintlaijiyouiltiaj”. Toikni Dornik kiijtok: “Maske na amo nechpaktiyaya ma nechtlaijiyouiltikaj, kena niyolpakiyaya pampa nijmajtoya na nitlaijiyouiyaya pampa amo nijnekiyaya nijtlauelkauas Jehová”. Uan nojkia kiijtok: “Tlauel nechpaleuiyaya kema nimomaijtouayaya, pampa kichijki nojua ma nimonechkaui ika Jehová. ¡Ya nelia tlauel nechpaleuik!”.

20. ¿Kenke tlauel tiyolpakij tijtekipanosej Jehová?

²⁰ Kema Jehová kuali techita, tojuantij tlauel tiyolpakij maske sekinok techtlaijiyouiltiaj pampa tijtekipanouaj toTeotsij, maske tochampoyouaj techkualankaitaj, timokokouaj o ya tiueuejtixtokej (1 Tim. 1:11, TNM). Nojkia tlauel tiyolpakij pampa timotemachiaj toTeotsij, katli “axueli istlakati”, kichiuas nochi tlen kitenkajtok (Tito 1:2). Nelia san timosentlachilisej kema tikitasej kenijkatsa Jehová kiaxitis nochi tlen kitenkajtok, uan nochi kuesoli tlen nama tijpiaj, kejuak amo uejueyi tikitasej. Nama amo uelis timoiljuisej ipan nochi tlateochiualistli tlen Jehová techmakas ipan Xochimili. Nopaya, nelia tlauel tiyolpakisej. Uan nochipa tiitstosej ika tlaseuilistli (Sal. 37:11).