1. Xikixtoma kenijkatsa kinita Jehová katli moechkapantlaliaj.

JEHOVÁ tlauel kiniknelia katli moechkapantlaliaj. San katli nelia moechkapantlaliaj uelis kuali mouampojchiuasej iuaya uan ya tlauel kinpatiitas. Uan katli moueyimatij “axkineki kinitas” yon se kentsi (Sal. 138:6). Tojuantij tijnekij tijyolpakiltisej Jehová uan tijnekij ma techikneli, yeka tlauel moneki timoechkapantlalisej.

2. ¿Tlake tikitasej ipan ni tlamachtili?

² Ipan ni tlamachtili tikitasej kenijkatsa monankilia eyi tlajtlanili. 1) ¿Tlake kiijtosneki timoechkapantlalisej? 2) ¿Kenke moneki tijnextisej nopa kuali tlamantli? 3) ¿Tlake tlamantli kinextis tlaj nelia timoechkapantlaliaj? Kej tikitasej, kema timoechkapantlaliaj tijyolpakiltiaj Jehová uan nojkia techpaleuia ipan tonemilis (Prov. 27:11; Is. 48:17).

3. ¿Tlake kiijtosneki timoechkapantlalisej?

³ Kema se akajya moechkapantlalia kinextia se kuali tlamantli, uan kinextia amo moueyimati yon moiljuia san ya tlauel ipati. Biblia kiijtoua katli moechkapantlalia kikuamachilia san Jehová tlauel ueyi, uan nojkia kimati sekinok uelij kichiuaj se tlenijki tlen ya amo ueli (Filip. 2:3, 4).

4, 5. ¿Kenke amo uelis tikijtosej se akajya kena o amo moechkapantlalia san pampa kichiua se keski tlamantli?

⁴ Sekij maseualmej nesi moechkapantlaliaj. Uelis nesi kipiaj kuali ininyolo uan kinitaj sekinok ika tlatlepanitakayotl pampa kiampa kiniskaltijkej o kiampa elij kampa euaj. Maske nesi nopa, ipan ininyolo tlauel moueyimatij. Se tonali, nopa maseualmej kinextisej kenijkatsa tlauel moueyimatij (Luc. 6:45).

⁵ Nojkia, maseualmej katli xitlauak kiijtouaj tlen moiljuiaj uan amo majmauij kichiuasej se tlenijki, amo kiijtosneki  moueyimatij (Juan 1:46, 47). Katli kiampa elij moneki momokuitlauisej uan kiampa amo motemachisej san ipan inijuantij pampa kuali kichiuaj se keski tlamantli. Maske amo nochi sanse tielij, nochi moneki tijchiuasej kampeka ika nochi toyolo timoechkapantlalisej.

6. Kema tijpouaj tlen kiijtoua 1 Corintios 15:10, ¿tlake tijyekouaj tlen Pablo?

⁶ Ma tikitakaj kenijkatsa eliyaya apóstol Pablo. Jehová kitekiuik uan kampa ueli kipeualtik miak yajyankuik tlanechikoli. Uan tlen nochi apóstoles, uelis san ya tlauel kichijki miak tlamantli. Maske kipixki miak tekitl, Pablo amo moiljuik san ya tlauel ipati uan nopa sekinok amo. Pablo tlauel moechkapantlalik kema kiijtok: “Na [...] tlen más pilsiltsi tlen nochi itlayolmelajkauaj [o apóstoles] uan axkinamiki para nechtokaxtisej niitlayolmelajka toTeko keja kinnotsaj nopa sekinok, pampa nikintlaijiyouiltik tlen itstokej ipan [itlanechikol] toueyiTeko” (1 Cor. 15:9). Teipa, kiijtok Jehová kiitayaya kej iuampo pampa kitlasojtlatoya uan amo pampa eliyaya tlauel ipati o pampa kipixtoya miak tekitl (xijpoua 1 Corintios 15:10). Kema kintlajkuiljuilik toikniuaj tlen Corinto, kuali kinnextilik kenijkatsa kinamikiyaya moechkapantlalisej, uan nojua tlauel kinextik nopa pampa sekij tlen nopa toikniuaj kiijilnamikiyayaj (2 Cor. 10:10).

7. ¿Kenijkatsa kinextik moechkapantlaliyaya se toikni katli tlauel kiixmatiyayaj?

⁷ Miakej toikniuaj tlauel kinyolchikajtok tlen kipanok toikni Karl Klein, katli elki se tlen Katli kinyakanaj Jehová itlajtoltemakauaj. Kema kiijkuilok tlen kipanok, toikni kinextik moechkapantlaliyaya pampa kiijtok nochi kuesoli tlen kipixki uan sekinok tlamantli tlen monejki kiixnamikis ipan miak xiuitl. Ma tikitakaj se keski tlamantli. Ipan 1920, kipeualtik  tlajtolmoyaua kajkalpa, uan ipan nopa achtoui kali tlauel majmajki uan yeka ipan se ome xiuitl ayokmo tlajtolmoyajki. Teipa, kema tlatekipanouayaya Betel, tlauel kualanki ipan se keski tonali pampa se toikni kitlajtolmakak. Uan nojkia pejki tlauel mokuesoua ipan miak tonali. Teipa pejki sampa kuali kiyolmati. Maske kipanok nochi nopa tlamantli, nojkia kipixki miak tlateochiualistli tlen kichijki tlauel ma yolpaki. Nopa toikni kinextik nelia moechkapantlaliyaya pampa maske miakej kiixmatiyayaj amo pinajki kiijtos nochi tlamantli tlen kipanok. Miakej toikniuaj kiilnamikij toikni Klein ika miak tlaiknelili uan nojkia kenijkatsa xitlauak kiijtok tlen kipanok. *

8. ¿Kenijkatsa techpaleuia 1 Pedro 5:6 ma tijmatikaj Jehová kipaktia kema timoechkapantlaliaj?

⁸ ¿Kenke tlauel moneki timoechkapantlalisej? Pampa kej kiijtok apóstol Pedro, kiampa tijyolpakiltiaj Jehová (xijpoua 1 Pedro 5:6). Nopa amochtli “Ven, sé mi seguidor” kiijtoua: “Kema se maseuali tlauel moueyimati, eli kejuak kipixtoskia se tlamantli tlen tlauel kitlanauia. Pampa moueyimati, toTeotsij amo kitekiuia yon se kentsi maske ueli kichiua miak tlamantli. Uan kema se maseuali moechkapantlalia, toTeotsij tlauel kitekiuia maske nopa maseuali nesi amo tleno ipati”. Uan nojkia kiijtoua toTeotsij “tlauel techteochiuas tlaj nojkia tijnextisej nopa kuali tlamantli”. * Nochi tojuantij tijmatij tlauel ipati tijyolpakiltisej toTeotsij Jehová (Prov. 23:15).

9. ¿Kenke maseualmej kinpaktia itstosej ininuaya maseualmej katli moechkapantlaliaj?

⁹ Kema timoechkapantlaliaj amo san Jehová tijyolpakiltiaj, nojkia tojuantij tlauel techpaleuia. Nopa kuali tlamantli tlauel kinpaktia sekinok maseualmej. Tlaj tijnekij kuali tijkuamachilisej ni, ma timoiljuikaj ininuaya ajkia tijnekij tiitstosej (Mat. 7:12). Tojuantij amo techpaktia timouikasej ininuaya maseualmej katli kinekij kichiuasej san tlen inijuantij kinekij uan amo kinpaktia ma kiniljuikaj tlake uelis kichiuasej. Uan tlauel kuali tijyolmatij timouikasej ininuaya katli kinextiaj kikuamachiliaj tlen tijyolmatij, katli teikneliaj, tetlasojtlaj uan moechkapantlaliaj (1 Ped. 3:8). Uajka, tlaj tojuantij kiampa tijchiuaj, sekinok nojkia kuali kiyolmatisej itstosej touaya tlaj timoechkapantlaliaj.

10. ¿Kenke kema timoechkapantlaliaj techpaleuia ma tikixnamikikaj tlaouijkayotl?

¹⁰ Kema timoechkapantlaliaj nojkia techpaleuia ma tikixnamikikaj tlaouijkayotl. Uan  amo kenijki kema tikitaj se keski tlamantli amo xitlauak mochiua o amo kej kinamiki. Se tonali, tlanauatijketl Salomón kiijtok: “Nikinitstok tekipanouanij tlen yauij kauajtipa uan inintlayakankauaj nejnemij ininikxipa keja eliskiaj tekipanouanij” (Ecl. 10:7). Amo nochipa kinpatiitaj maseualmej katli kuali kichiuaj se tlenijki, uan kemantika tlauel kinuejkapantlaliaj katli amo tlauel kuali kichiuaj ininteki. Salomón kikuamachilik monekiyaya kimajtos pano tlamantli tlen amo kuali uan amo kualanis san pampa amo mochiua tlen xitlauak (Ecl. 6:9). Tlaj timoechkapantlaliaj, nojkia tijmajtosej ipan ni tonali mochiuas miak tlamantli tlen amo kuali uan amo uelis tiitstosej kej tojuantij tijnekiskiaj.

11. ¿Tlake kinamiki tijchiuasej kema techtlajtolmakasej?

¹¹ Mojmostla techpano miak tlamantli kampa uelis tijnextisej timoechkapantlaliaj. Ma tikitakaj se keski. Kema techtlajtolmakaj. Moneki nochipa tikilnamikisej tlaj se akajya kikixtik tonali pampa kinejki techtlalnamiktis, uelis kiampa kichijki pampa nelia tlauel timokuapolojkej maske timoiljuiaj amo tleno tijchijtokej. Kema kiampa panos, uelis achtoui amo tijnekisej tijtlakakilisej. Nojkia, uelis tikijilnamikij nopa maseuali katli techtlajtolmaka o timoiljuiaj amo kuali techtlajtolmakak. Tlaj nelia timoechkapantlaliaj, uajka tijpatlasej totlalnamikilis.

12. Kej kiijtoua Proverbios 27:5, 6, ¿kenke moneki tijtlaskamatilisej katli techtlajtolmaka? Xikijto se neskayotl.

¹² Katli moechkapantlaliaj kitlaskamatij kema se akajya kintlajtolmaka. Ma tikitakaj se neskayotl. Ximoiljui tiitstok ipan tlanechikoli uan tikamanaltitok ininuaya toikniuaj. Teipa, se toikni ichtakatsi mitsiljuia ipan motlankoch tlatskitok se kentsi tlakualistli. Maske tipinaua, tijtlaskamatilia pampa mitsiljuik. Uan uelis tijnektoskia se akajya nimantsi ma mitsiljuijtoskia. Uajka, kema se toikni amo majmaui uan techtlajtolmaka kema kinamiki, moneki timoechkapantlalisej uan tijtlaskamatilisej. Amo ma tijkualankaitakaj yon ma timoiljuikaj techkualankaita. Ma tikitakaj kej se touampo katli techiknelia (xijpoua Proverbios 27:5, 6; Gál. 4:16).

13. ¿Kenijkatsa tijnextiaj timoechkapantlaliaj kema sekinok kintekimakaj?

¹³ Kema sekinok toikniuaj kintekimakaj ipan tlanechikoli. Se ueuejtlakatl katli itoka Jason, kiijtoua: “Kema nikita sekinok toikniuaj kintekimakaj, kemantika nimoiljuia kenke amo na nechmakakej nopa tekitl”. ¿Ipa kiampa tijyolmajtokej? Amo kenijki tlaj tijnekij  tlauel tijtekipanosej Jehová (1 Tim. 3:1). Maske tijnekij nopa, moneki tijmokuitlauisej totlalnamikilis, pampa tlaj amo timomokuitlauiskiaj ueliskia ipan toyolo peuas timoueyimatisej. Se toikni ueliskia moiljuis san ya tlauel kuali kichiua se tekitl. O se tosiuaikni ueliskia moiljuis san iueue tlauel kuali kichiuaskia se keski tekitl tlen kipia seyok toikni. Tlaj nelnelia timoechkapantlaliaj, uajka amo kiampa timoiljuisej.

14. ¿Tlake techmachtia kema tikitaj tlake kichijki Moisés kema sekinok kintekimakakej?

¹⁴ Ma tikitakaj tlake kichijki Moisés kema sekinok kintekimakakej uan nojkia tlake techmachtia. Ya kinauatijtoyaj ma kinyakana israeleuanij, uan tlauel kipatiitayaya nopa tekitl. ¿Tlake kichijki kema Jehová kinkajki sekinok israeleuanij ma kipaleuikaj ipan iteki? Moisés amo moyolkokok (Núm. 11:24-29). Uan nojkia moechkapantlalik kema kinkajki sekinok tlakamej ma kipaleuikaj kintlajtolsenkauas israeleuanij (Éx. 18:13-24). Pampa itstoyaj miakej tetlajtolsenkauanij, nimantsi kinpaleuiyayaj israeleuanij uan ayokmo mochiayayaj miak tonali. Moisés kinekiyaya israeleuanij kuali ma itstokaj, yeka amo mosentlalik ipan nopa tekitl tlen ayokmo kipixtoya. Tlen kichijki nelia tlauel techpaleuia. Nochipa ma tikilnamikikaj Jehová tlauel techtekiuis tlaj timoechkapantlaliaj uan amo pampa kuali tijchiuaj se tlenijki. Salmo 138:6 kiijtoua maske “toTeko tlauel ueyi”, kinita katli moechkapantlaliaj.

15. ¿Kenijkatsa kipatlatokej ininnemilis se keskij toikniuaj?

¹⁵ Kema mopatla se keski tlamantli ipan tonemilis. Ipan se keski xiuitl tlen panotok, miakej toikniuaj kinmakatokej seyok tekitl maske miak xiuitl kichijtoyaj ininteki. Ipan 2014, miakej superintendentes de distrito uan ininsiuajuaj kinmakakej seyok tekitl. Ipan nopa xiuitl, toikniuaj katli tepaxalouaj chijchikuasej metstli kiniljuijkej kema kiaxitiskiaj 70 xiuitl, ayokmo kichiuaskiaj nopa tekitl. Nojkia,  toikniuaj katli kiaxitiaj 80 xiuitl, ayokmo tlatekipanouaj kej katli kinyakanaj ueuejtlakamej. Uan miakej betelitas kiniljuijkej nama tlatekipanoskiaj kej precursores. Uan sekinok ayokmo senkistok tlatekipanouaj pampa tlauel mokokouaj, moneki kinmokuitlauisej ininchampoyouaj o kichiuasej sekinok tlamantli.

16. ¿Kenijkatsa se keskij toikniuaj kinextijtokej moechkapantlaliaj?

¹⁶ Nopa toikniuaj tlauel ouij kimatkej kipatlasej se keski tlamantli. Tlauel kipatiitayayaj tlen kichiuayayaj. Miakej tlauel miak xiuitl kiampa tlatekipanojtoyaj. Maske sekij tlauel mokuesojkej, teipa momatkej kej nama itstokej. ¿Tlake kinpaleuik? Nopa tlaiknelijkayotl tlen kipialiaj Jehová. Inijuantij kuali kimajtoyaj ininnemilis kimaktilijtoyaj Jehová uan amo se tekitl tlen kiselijtoyaj (Col. 3:23). Pampa moechkapantlaliaj, tlauel yolpakij kitekipanojtosej Jehová ipan tlen ueli tekitl. Nopa toikniuaj kikauaj imako Jehová nochi ininkuesoljuaj pampa kimatij ya kitekipachoua tlen kinpano (1 Ped. 5:6, 7).

17. ¿Kenke tijtlaskamatiliaj toTeotsij pampa techiljuia ipan iTlajtol ma timoechkapantlalikaj?

¹⁷ Tlauel tijtlaskamatiliaj toTeotsij pampa techiljuia ipan iTlajtol ma timoechkapantlalikaj. Ni yejyektsi kuali tlamantli techpaleuia tojuantij uan nojkia sekinok. Kema timoechkapantlaliaj, techpaleuia ma tikitakaj tlaouijkayotl kej kinamiki, uan nojkia techpaleuia nojua ma timonechkauikaj ika Jehová. Tlauel tiyolpakij pampa maske Jehová tlauel ueyi uan itstok uejkapa, ya tlauel kiniknelia uan kinpatiita nochi itekipanojkauaj katli moechkapantlaliaj (Is. 57:15).