1, 2. 1) ¿Kenke tikijtouaj Armagedón eli se kuali tlamantli? 2) ¿Tlake tlajtlanili tijnankilisej ipan ni tlamachtili?

KEMA miakej maseualmej kikakij nopa tlajtoli Armagedón, moiljuiaj ipan tlamantli tlen amo kuali, kej se ueyi tlauilankayotl kampa kimajkauasej miak bombas o se tlenijki tlen kisosolos nochi Tlaltipaktli. Biblia amo tlamachtia nopa, pampa kiijtoua Armagedón eli se kuali tlamantli tlen kichiuas ma tiitstokaj ika pakilistli (Apoc. 1:3). Ipan tlauilankayotl Armagedón momanauisej miakej maseualmej. ¿Kenijkatsa panos nopa?

² Biblia kiijtoua ipan Armagedón kintsontlamiltisej nochi tekichiuanij uan maseualmej katli amo kualmej, uan kinmanauisej san katli kuali ininyolo, kiampa ayokmo aka kisosolos Tlaltipaktli (Apoc. 11:18). Tlaj tijnekij kuali tijkuamachilisej ni tlamantli, ma tijnankilikaj naui tlajtlanili: ¿Tlake eli nopa Armagedón? ¿Tlake panos kema nechka peuas Armagedón? ¿Tlake moneki tijchiuasej tlaj tijnekij timomanauisej? ¿Uan tlake uelis tijchiuasej tlaj amo tijnekij tijtlauelkauasej toTeotsij?

3. 1) ¿Tlake kiijtosneki Armagedón? 2) Kema tikitaj tlen kiijtoua Apocalipsis 16:14, 16, ¿kenke tijmatij san kiixnextia se tlenijki?

³ (Xijpoua Apocalipsis 16:14, 16). Nopa tlajtoli Armagedón san sempatsi nesi ipan Biblia uan mokixtijtok tlen se tlajtoli ika hebreo tlen kiijtosneki “tepetl tlen Meguido” (Apoc. 16:16). Meguido eliyaya se altepetl tlen uejkajkia eltoya ipan Israel (Jos. 17:11). Armagedón amo kiijtosneki se altepetl. Eli kema “tlanauatianij ininuaya ininsoldados” tlen nochi Tlaltipaktli mosentilisej uan kiijixnamikisej Jehová (Apoc. 16:14). Ipan ni tlamachtili nojkia tijtekiuisej nopa tlajtoli Armagedón kema tikijtosej tlen nopa ueyi tlauilankayotl tlen mochiuas teipa kema ya kinsentilijtosej nochi “tlanauatianij ininuaya ininsoldados” tlen nochi Tlaltipaktli. ¿Kenke tikijtouaj Armagedón  san kiixnextia se tlenijki? Se, pampa nopa tepetl Meguido amo nelia eltok. Ome, pampa nopa tlamayamitl tlen kiyaualoua altepetl Meguido amo ueyi, yeka amo kinkuis nochi “tlanauatianij” tlen ni Tlaltipaktli, yon ininsoldados yon tlen ika tlateuisej. Uan eyi, kej tikitasej ipan ni tlamachtili, nopa tlauilankayotl Armagedón peuas kema “tlanauatianij” kinteuisej toTeotsij itekipanojkauaj, katli itstokej kampa ueli ipan nochi Tlaltipaktli.

4. ¿Kenke Jehová kamanaltik tlen Meguido kema kiijtok tlen nopa ueyi tlauilankayotl tlen kichiuaskia?

⁴ ¿Kenke Jehová kamanaltik tlen Meguido kema kiijtok tlen nopa ueyi tlauilankayotl tlen kichiuaskia? Pampa ipan Meguido uan ipan tlamayamitl tlen Jezreel mochijki miak tlauilankayotl. Uan miakpa Jehová nojkia tlateuik. Ma tikitakaj se neskayotl: “kampa peua nopa atl tlen altepetl Meguido”, Jehová kipaleuik Barac ma kintlani Sísara itlateuijkauaj. Barac uan Débora kitlaskamatkej Jehová pampa kinpaleuik ma tlatlanikaj. Ipan se uikatl kiijtojkej: “Nochi sitlalimej ipan iluikaktli techpaleuijkej [...] tijtlanisej Sísara. [...] Nopa atlajtli Cisón tlejkok miak uan nochi kinuikak” (Juec. 5:19-21).

5. ¿Kenke Armagedón amo elis sanse kej kema Barac tlateuik?

⁵ Barac uan Débora kitlamiltijkej nopa uikatl ika ni tlajtoli: “ToTeko, nochi mokualankaitakauaj ma mikikaj, pero tlakamej tlen mitsueyichiuaj ma elikaj keja nopa Tonati kema kisa ika nochi ichikaualis” (Juec. 5:31). Ipan Armagedón, Jehová ikualankaitakauaj nojkia mikisej uan momanauisej san katli kiikneliaj. Uan ipan Armagedón amo panos se tlamantli tlen panok kema Barac tlateuik. Ipan nopa tonali, toTeotsij itekipanojkauaj amo tlateuisej. Yon kiuikasej tepostli tlen ika momanauisej. San monekis amo majmauisej uan motemachisej ipan Jehová uan ipan iluikaeuanij (Is. 30:15; Apoc. 19:11-15).

6. ¿Tlake tlamantli uelis kitekiuis Jehová kema kintsontlamiltis ikualankaitakauaj ipan Armagedón?

⁶ ¿Kenijkatsa Jehová kintsontlamiltis ikualankaitakauaj ipan Armagedón? Uelis kitekiuis miak tlamantli, kej kichiuas chikauak ma mojmolini tlali, ma uetsi tesiuitl uan tlitl tlen iluikak (Job 38:22, 23; Ezeq. 38:19-22). Nojkia uelis kichiuas ikualankaitakauaj ma moteuikaj inijuantij (2 Crón. 20:17, 22, 23). Uan uelis kinnauatis iluikaeuanij ma kinmiktikaj nochi katli amo kualmej (Is. 37:36). Maske amo tijmatij kenijkatsa kintsontlamiltis, kena tijmatij Jehová tlatlanis. Nochi ikualankaitakauaj mikisej uan momakixtisej san katli xitlauakej (Prov. 3:25, 26).

7, 8. 1) Kej kiijtoua 1 Tesalonicenses 5:1-6, ¿tlake kiijtosej tlanauatianij? 2) ¿Kenke elis se istlakatili tlen tlauel amo kuali?

⁷ Kiijtosej onka “tlaseuilistli uan ya itstokej ika kuali” kema nechka peuas nopa “tonal tlen iaxka” Jehová (xijpoua 1 Tesalonicenses 5:1-6). Kema 1 Tesalonicenses 5:2 kiijtoua nopa “tonal tlen iaxka toueyiTeko”, kiijtosneki nopa “ueyi tlaijiyouilistli” (Apoc. 7:14). ¿Kenijkatsa tijmatisej nechka peuas nopa tlaijiyouilistli? Biblia kiijtoua kiijtosej se tlenijki tlen kinextis kema peuas.

⁸ Tlanauatianij tlen Tlaltipaktli kiijtosej onka “tlaseuilistli uan ya itstokej ika kuali”. ¿Kenke kiampa kiijtosej? ¿Nojkia mokalakisej katli tlayakanaj ipan religiones tlen amo melauak? Uelis kena. Tlen kiijtosej elis se istlakatili tlen amo kuali ajakamej kimoyauasej. Nopa istlakatili nelia tlauel amo kuali, pampa maske maseualmej moiljuisej tlauel kuali itstosej, peuas se ueyi tlaijiyouilistli tlen amo kema panotok. Kena, nimantsi “kinasis se ueyi tlatsakuiltili. Nimantsi ualas keja se siuatl kema peua itlakuajkualol para tlatlakatiltis”. ¿Tlake kinpanos  toTeotsij itekipanojkauaj katli amo kitlauelkajtosej? Inijuantij nojkia amo kimatij tlake tonali peuas nopa ueyi tlaijiyouilistli, uan maske mosentlachilisej kema peuas, inijuantij kuali mokualchijchijtosej.

9. ¿Kenijkatsa Jehová kitsontlamiltijtias tlen Satanás kinauatia?

⁹ Jehová amo san ipan se tonal kitsontlamiltis nochi katli Satanás kinauatia, kej kichijki kema itstoya Noé. Achtoui kitsontlamiltis Ueyi Babilonia, tlen kiijtosneki nochi religiones tlen amo melauak. Teipa, ipan Armagedón, kintsontlamiltis nochi katli Satanás kinnauatia, kej katli itstokej ipan política, tlateuianij uan katli san kinekij tlapijpiasej. Ma tikitakaj kenijkatsa panos ni ome tlamantli.

10. Kej kiijtoua Apocalipsis 17:1, 6 uan 18:24, ¿kenke Jehová kitsontlamiltis Ueyi Babilonia?

¹⁰ “Tlatsakuiltilistli tlen kiasis [...] momekatijkasiuatl” (xijpoua Apocalipsis 17:1, 6; 18:24). Nopa Ueyi Babilonia tlauel kisokiuijtok toTeotsij itoka. Kiijtojtok miak istlakatili uan tlachijtok kej se momekatijkasiuatl pampa kinpaleuijtok tlanauatianij tlen Tlaltipaktli. Ika itlanauatijkayo, religión tlen amo melauak kintlaijiyouiltijtok maseualmej uan tlauel kintominkixtilijtok. Uan kinmiktijtok tlauel miakej maseualmej, kej toTeotsij itekipanojkauaj (Apoc. 19:2). ¿Kenijkatsa Jehová kitsontlamiltis Ueyi Babilonia?

11. ¿Ajkia kinixnextia nopa “fiero tlapiali chichiltik”, uan kenijkatsa toTeotsij kitekiuis ma kitsontlamilti Ueyi Babilonia?

¹¹ Ika “matlaktli ikuakua” tlen se “fiero tlapiali chichiltik” Jehová kitsontlamiltis nopa momekatijkasiuatl. Nopa tlapiali kiixnextia nopa Organización de las Naciones Unidas, uan nopa matlaktli ikuakua kinixnextia nochi tlanauatianij katli kipaleuiaj ipan ni tonali. Kema toTeotsij kiitas kinamiki, nopa tlanauatianij kiteuisej Babilonia o religiones tlen amo melauak. “Kitlamikokosej uan kikauasej sosoltik uan xolotik” pampa kikixtilisej nochi itomij uan tematiltisej kenijkatsa kichijtok tlen amo kuali (Apoc. 17:3, 16). Nima kitsontlamiltisej, kejuak san ipan se tonali, yeka mosentlachilisej  nochi katli kipaleuiyayaj. Uan nojua tlauel mosentlachilisej pampa kiijtouayaya: “Nimoseuijtok keja se siuatlanauatijketl. Axniitstok keja se kauali tlen teikneltsi. Uan axkema ualas se tonal kema nitlaijiyouis” (Apoc. 18:7, 8).

12. ¿Tlake amo kinkauas Jehová ma kichiuakaj altepemej, uan kenke amo kinkauas?

¹² ToTeotsij amo kinkauas nopa altepemej ma kintsontlamiltikaj itekipanojkauaj, pampa inijuantij kiueyichiuaj itoka uan kiskej tlen Ueyi Babilonia kej kinnauatijkej (Hech. 15:16, 17; Apoc. 18:4). Uan nojkia, itekipanojkauaj kichijtokej kampeka kinpaleuisej sekinok ma kisakaj tlen Ueyi Babilonia. Yeka, amo kiselisej “nopa fiero tlaijiyouilistli”. Maske amo kinpanos nopa, ika nochi tlen panos monekis kinextisej tlaj kuali tlaneltokaj o amo.

13. 1) ¿Ajkia eli Gog? 2) Kej kiijtoua Ezequiel 38:2, 8, 9, ¿tlake panos kema Gog kinekis kinteuis toTeotsij itekipanojkauaj?

¹³ Kema Gog tlateuis (xijpoua Ezequiel 38:2, 8, 9). Kema nochi religiones tlen amo melauak kintsontlamiltijtosej, Jehová itlanechikol elis kejuak se kuauitl tlen nojua ijkatos maske panok se chikauak ajakatl. Ipan nopa tonali Satanás tlauel kualantos. Yeka, kintekiuis amo kuali ajakamej ma kinsentilikaj altepemej uan kiampa ma kinteuikaj Jehová itekipanojkauaj (Apoc. 16:13, 14). Nochi nopa altepemej kintokaxtiaj kej tlali Gog tlen “tlali Magog”. Kema altepemej kinteuisej toTeotsij itekipanojkauaj, peuas nopa tlauilankayotl Armagedón (Apoc. 16:16).

14. ¿Tlake kiitas Gog?

¹⁴ Gog motemachis ipan itlateuijkauaj pampa tlauel miakej elisej (2 Crón. 32:8). Uan tojuantij timotemachisej ipan toTeotsij Jehová. Ni tlamantli amo kikuamachilisej altepemej. Uan kiilnamikisej tlen kipanok Ueyi Babilonia, maske kipixtoya chikaualistli, ininteotsitsij amo kinmanauijkej kema nopa “tlapiali” uan “matlaktli ikuakua” kitsontlamiltijkej (Apoc. 17:16). Yeka, Gog moiljuis nimantsi tlatlanis. Kej mixtli kitsakua se ueyi altepetl, kinteuis  Jehová itekipanojkauaj (Ezeq. 38:16). Kema kichiuas nopa, nimantsi kiitas masik kejuak ipan se tlaketstli. Kej kipanok faraón ipan ueyi atl Rojo, Gog kiitas moteuijtok iuaya Jehová (Éx. 14:1-4; Ezeq. 38:3, 4, 18, 21-23).

15. ¿Tlake kichiuas Jesús ipan Armagedón?

¹⁵ Cristo uan iiluikatlateuijkauaj kinmanauisej toTeotsij itekipanojkauaj uan kintsontlamiltisej Gog itlateuijkauaj (Apoc. 19:11, 14, 15). ¿Uan tlake kipanos Jehová ikualankaitaka, Satanás, katli kinkajkayajki altepemej pampa kinekiyaya ma kinteuikaj toTeotsij itekipanojkauaj ipan Armagedón? Jesús kinkuamajkauas ya uan iajakauaj kejuak ipan se ostotl, uan nopaya tsaktosej mil xiuitl (Apoc. 20:1-3).

16. 1) ¿Tlake moneki tijchiuasej tlaj tijnekij tijnextisej tikixmatij toTeotsij? 2) ¿Tlake kinpanos ipan Armagedón katli kiixmatij toTeotsij?

¹⁶ Tlaj namanok o ya uejkajtok tijtekipanojtokej Jehová, nochi moneki tijnextisej kuali tikixmatij toTeotsij uan tijneltokasej “itlajtol toTeko Jesucristo” uan kiampa timomanauisej kema panos Armagedón (2 Tes. 1:7-9). Tikixmatij toTeotsij kema tijmatij tlake kipaktia uan tlake amo, uan tlake tlanauatili kitlalijtok. Uan tijnextiaj tikixmatij kema tikikneliaj, tijneltokaj uan san ya tijueyichiuaj (1 Juan 2:3-5; 5:3). Kema se akajya kinextia kiixmati toTeotsij, kiselia se ueyi tlateochiualistli pampa “toTeko [nojkia] kiixmati”, uan yeka uelis momanauis ipan Armagedón (1 Cor. 8:3). ¿Kenke tikijtouaj nopa? Pampa tlaj “toTeko kiixmati”, kiijtosneki kuali kiita nopa maseuali.

17. ¿Tlake kiijtosneki tijneltokasej “itlajtol toTeko Jesucristo”?

¹⁷ “Itlajtol toTeko Jesucristo” eli nochi tlen melauak tlen ya tlamachtik, tlen ijkuilijtok ipan Biblia. Tijnextiaj tijneltokaj kema tijchiuaj ipan tonemilis. Nopa kiijtosneki san timosentlaliaj tijtekipanosej Jehová, tijtlepanitasej itlanauatiljuaj uan titematiltisej nopa kuali tlamachtili tlen toTeotsij iTlanauatijkayo (Mat. 6:33; 24:14). Nojkia kiijtosneki tikinpaleuisej katli kintlapejpenijtokej yasej iluikak, iikniuaj Jesucristo,  kema kichiuaj nopa tekitl tlen kinmakatokej (Mat. 25:31-40).

18. ¿Kenijkatsa katli toTeotsij kintlapejpenijtok kinteochiuasej nopa sekinok maseualmej?

¹⁸ Katli toTeotsij kintlapejpenijtok nechka kinteochiuasej nopa “sekinok tlakamej” o maseualmej pampa nochipa kintlasojtlakej (Juan 10:16). ¿Kenijkatsa kichiuasej? Kema nechka peuas Armagedón, nochi nopa 144,000 itstosej iluikak uan ayokmo kema mikisej. Inijuantij nojkia elisej tlen nopa iluikatlateuianij tlen kitsontlamiltisej Gog uan kinmanauisej nopa “onpano miak tlakamej” o maseualmej, katli amo mosisiniaj kej pilborregojtsitsij (Apoc. 2:26, 27; 7:9, 10). Nopa onpano miakej maseualmej kiitasej kej se ueyi tlateochiualistli pampa kinpaleuijkej katli Jehová kintlapejpenik kema nojua itstoyaj ipan Tlaltipaktli.

19, 20. Maske onka tlaouijkayotl, ¿tlake techpaleuis ma tikijiyouikaj nochi ipan ni tonali kema ayamo peua Armagedón?

¹⁹ Katli tijtekipanouaj Jehová tikixnamikij miak tlaouijkayotl pampa tiitstokej ipan tonali tlen tlauel ouij. Maske kiampa pano, uelis tikijiyouisej nochi uan tiitstosej ika pakilistli (Sant. 1:2-4). Tlauel techpaleuis tlaj nochipa timomaijtojtosej ika nochi toyolo (Luc. 21:36). Nojkia, tlauel moneki mojmostla timomachtisej Biblia uan timoyoliljuisej ipan tlen kiijtoua, kej ipan tlajtolpanextili tlen moaxitijtia ipan ni tonali (Sal. 77:12). Tlaj tijchiuasej nochi ni uan tlaj tlauel titlajtolmoyauasej, totlaneltokilis moskaltis uan nochipa tikilnamiktosej tlen nechka tijselisej.

²⁰ Ma timoiljuikaj kenijkatsa tlauel tiyolpaktosej pampa Ueyi Babilonia kitsontlamiltijtosej uan pampa ya panok Armagedón. Uan kenijkatsa nojua tlauel tiyolpakisej pampa toTeotsij itoka senkistok moueyichijtos uan Jehová kinextijtos san ya kinamiki tlanauatis (Ezeq. 38:23). Kej tikitstokej, katli kiixmatisej toTeotsij, kineltokasej Jesús uan kiijiyouisej nochi, kiitasej Armagedón kej se kuali tlamantli (Mat. 24:13).