1, 2. ¿Kenijkatsa mouika Eclesiastés 11:6 ika tlajtolmoyaualistli?

IPAN SE keski altepemej, maseualmej tlauel kinpaktia kikakisej nopa kuali tlamachtili tlen toTeotsij uan tlauel kinpaleuijtok. Maske kiampa pano, ipan sekinok altepemej amo kinekij kimatisej tlen Jehová o tlen Biblia kiijtoua. Yeka, maske ipan ni tonali sekij kuali techtlakakiliaj uan sekij amo, Jehová nojua kineki ma titlajtolmoyauakaj.

² Kema asis nopa tonali tlen Jehová kiixtlalijtok, ayokmo titlajtolmoyauasej uan “teipa ualas itlamia nochi tlen onka” (Mat. 24:14, 36). Pampa ayamo asi nopa tonali, ¿kenijkatsa uelis ‘tijsenuikilisej tijtokasej toxinachʼ? * (Xijpoua Eclesiastés 11:6).

3. ¿Tlake tikitasej ipan ni tlamachtili?

³ Ipan nopa achtoui tlamachtili tikitakej naui tlamantli tlen techpaleuis kuali ma titlajtolmoyauakaj (Mat. 4:19). Nama ipan ni tlamachtili, tikitasej eyi tlamantli tlen techpaleuis nojua ma tijnekikaj titlajtolmoyauasej, maske tikixnamiktosej tlen ueli tlamantli. Tikitasej kenke tlauel ipati 1) timosentlalijtosej, 2) tijpiasej toyolo uan 3) kuali titlaneltokasej.

4. ¿Kenke moneki timosentlalijtosej ipan nopa tekitl tlen Jehová techmakatok?

⁴ Jesús kiijtojtoya tlake panoskia ipan itlamia tonali uan kenijkatsa eliskiaj maseualmej. Nojkia kiijtok ni ueliskia kichiuas  itokilijkauaj amo ma mosentlalijtokaj. Yeka, Jesús kiijtok: “Xitlachixtokaj” (Mat. 24:42). Ipan ni tonali, nojkia uelis techyoltilanas tlen maseualmej kichiuayayaj kema Noé itstoya (Mat. 24:37-39; 2 Ped. 2:5). Yeka, moneki timosentlalijtosej ipan nopa tekitl tlen Jehová techmakatok.

5. Kej kiijtoua Hechos 1:6-8, ¿kanke tlamiskia tlajtolmoyaualistli?

⁵ Ipan ni tonali, moneki tlauel timosentlalijtosej titlajtolmoyauasej. Jesús kiijtok teipa kema mikiskia, momoyauaskia ni tekitl ipan nochi Tlaltipaktli (Juan 14:12). Kema Jesús mijki, se keski itokilijkauaj sampa pejkej michtlajtlamaj. Teipa kema moyolkuik, kichijki ma kinkixtikaj tlauel miakej michimej uan ipan nopa tonali kiniljuik itokilijkauaj tlajtolmoyaualistli eli tlauel ipati uan amo sekinok tlamantli (Juan 21:15-17). Kema Jesús nechka yaskia iluikak, kiniljuik itokilijkauaj amo san tlajtolmoyauaskiaj ipan Israel (xijpoua Hechos 1:6-8). Teipa, kema panotoya se keski xiuitl, Jesús kinextilik apóstol Juan kejuak ipan se temiktli tlen panoskia ipan nopa “tonal tlen iaxka toueyiTeko”. * Maske Juan kiitak miak tlamantli, nojkia kiitak se iluikaejketl tlen kimoyauayaya nopa kuali tlamachtili uan kiuikayaya ipan sekinok altepemej uan kampa kamanaltiyayaj sekinok tlajtoli (Apoc. 1:10; 14:6). Nopa kinextia Jehová kineki ma timosentlalikaj tlauel titlajtolmoyauasej ipan ni tonali.

6. ¿Tlake moneki tijchiuasej tlaj tijnekij timosentlalisej titlajtolmoyauasej?

⁶ Tlaj nochipa timoyoliljuiaj kenijkatsa Jehová tlauel techpaleuia, techpaleuis timosentlalisej titlajtolmoyauasej. Se neskayotl, ya techmakatok miak amatlajkuiloli, audios, videos uan JW Broadcasting. Nojkia, ipan jw.org uelis tijpantisej miak tlamachtili ipan kipano mil tlajtoli (Mat. 24:45-47). Ipan  ni tonali maseualmej kejuak moxelojtokej pampa amo kipaleuiaj sanse tlanauatijketl, amo sanse tlaneltokaj uan pampa sekij tlatominpiaj uan sekij amo. Maske kiampa pano, pampa tijtekipanouaj Jehová tojuantij tlauel timoikneliaj uan sansejko tiitstokej. Se neskayotl, ipan viernes 19, abril 2019 nochi Jehová itlajtoltemakauaj kiitakej nopa video tlen nopa texto tlen mojmostla tijpouaj. Uan ika tlayoua, mosentilijkej 20,919,041 maseualmej kema moilnamijki Cristo imikilis. Tlauel tiyolpakij pampa tikitaj mochijtok ni tlamantli ipan ni tonali uan pampa ueli titlapaleuiaj. Yeka, tlaj timoyoliljuiaj ipan nochi ni tlamantli, techpaleuis nojua ma timosentlalijtokaj titlajtolmoyauasej.

7. ¿Kenijkatsa techpaleuia tlaj tijchiuasej kej Jesús?

⁷ Tlaj tijchiuaj kej Jesús kichijki, nojkia techpaleuis timosentlalijtosej titlajtolmoyauasej. Ya amo kikajki yon se tlamantli ma kitsakuili nojua tlajtolmoyauas (Juan 18:37). Amo kichijki tlen Satanás kinekiyaya kema kiiljuik kimakaskia “tlen ininaxka nochi tlanauatianij ipan nochi tlaltinij ipan Tlaltipaktli uan nochi ininricojyo” uan nojkia kema maseualmej kinejkej “kitlalisej keja inintlanauatijka” (Mat. 4:8, 9; Juan 6:15). Jesús amo mosentlalik tlapijpias uan amo majmajki kema maseualmej kitlatsakuiltijkej (Luc. 9:58; Juan 8:59). Yeka, ¿tlake techpaleuis kema tikixnamikisej se tlamantli tlen kichiuas ouij ma titlaneltokakaj? Kej Pablo kiijtok, moneki timosentlalijtosej tijchiuasej kej Jesús uan kiampa nojua titlajtolmoyauasej uan amo tijkauasej toteki (Heb. 12:3).

8. ¿Tlake kiijtosneki tijpiasej toyolo, uan kenke tlauel ipati ipan ni tonali?

⁸ Tijnextiaj tijpiaj toyolo kema tijchiaj ma tlami o ma mopatla se tlamantli. Yeka, moneki tijpiasej toyolo tlaj tijnekij ma tlami tlen amo kuali o tlaj tijnekij ma asi tlen tlauel tijchiaj. Tlajtolpanextijketl Habacuc kinekiyaya ma tlami nopa tlasisinijkayotl ipan Judá (Hab. 1:2). Jesús itokilijkauaj moiljuiyayaj nima monextiskia “itlanauatilis toTeko uan nimantsi” kinmakixtiskiaj tlen Roma (Luc. 19:11). Tojuantij nojkia tlauel tijnekij ma asi nopa tonali kema toTeotsij iTlanauatijkayo kitlamiltis tlen amo kuali, uan kiampa “nochi kichiuasej san tlen xitlauak” (2 Ped. 3:13). Maske tlauel tijchiaj, moneki tijpiasej toyolo uan tijchiasej nopa tonali tlen Jehová kiixtlalijtok. Ma tikitakaj kenijkatsa Jehová techpaleuia ma tijpiakaj toyolo.

9. ¿Kenijkatsa tijmatij Jehová kipia iyolo?

⁹ Jehová kuali kinextia tlake kiijtosneki tijpiasej toyolo. Ya kikajki ma pano tonali uan kiampa Noé tlajtolmoyauaskia uan kichiuaskia nopa akali (2 Ped. 2:5; 1 Ped. 3:20). Uan kitlakakilik Abraham kema miakpa kiiljuik kenke kinekiyaya kintsontlamiltis maseualmej tlen Sodoma uan Gomorra (Gén. 18:20-33). Nojkia, kipixki ueyi iyolo ika israeleuanij maske miakpa kiixpanokej (Neh. 9:30, 31). Ipan ni tonali Jehová nojkia kinextia kipia iyolo, pampa kikaua ma pano tonali uan kiampa maseualmej katli kinekij mouampojchiuasej iuaya, uelis moyolkuepasej (Juan 6:44; 1 Tim. 2:3, 4; 2 Ped. 3:9). Tlauel techpaleuis ma tijpiakaj toyolo tlaj tijchiuaj kampeka nojkia tijchiuasej kej ya kema titlajtolmoyauaj uan tikinmachtiaj sekinok. Jehová nojkia techpaleuia ma tijpiakaj toyolo ika se neskayotl, ma tikitakaj.

10. Kej kiijtoua Santiago 5:7, 8, ¿tlake techmachtia tlen kichiua se milchijketl?

¹⁰ (Xijpoua Santiago 5:7, 8). Tlauel techpaleuis ma tijpiakaj toyolo tlaj timoiljuiaj tlen kichiua se akajya katli motlatojtokia. Se keski  xiuitl nima moskaltiaj uan sekij, kej katli temakaj inintlajka, amo. Kema israeleuanij motlatojtokiyayaj monekiyaya kichiasej tlajko xiuitl, pampa tokayayaj kema peuayaya uetsi atl, ipejya octubre, uan pixkayayaj kema nechka tlamiskia uetsis atl, ipejya abril (Mar. 4:28). Tijnextiaj titlalnamikij tlaj tijpiaj toyolo kej katli milchiuaj, maske kemantika ouij tijmatisej.

11. ¿Kenijkatsa techpaleuis tlaj tijpiaj toyolo ipan tlajtolmoyaualistli?

¹¹ Pampa titlajtlakolejkej, amo techpaktia tijchiasej se tlamantli tlen tlauel tijnekij tikitasej. Tlaj se akajya motlatojtokia uan kineki ma temaka itlajka, moneki nochipa kimokuitlauijtos: moneki tlaxauas, tokas, kitlameuijtos uan kiaxochiltis. Kiampa pano ika maseualmej katli tikinpaleuiaj ma mochiuakaj Cristo itokilijkauaj, moneki panos tonali uan kiampa ayokmo kichiuasej tlen momajtoyaj kichiuaj yon techikoitasej. Tlaj tijpiaj toyolo nojkia techpaleuis amo ma timoyolkokokaj kema maseualmej amo kinekisej techtlakakilisej. Nojkia moneki ma tijpiakaj toyolo kema kuali techtlakakiliaj, pampa amo uelis tijchiualtisej se akajya nima kuali ma tlaneltoka. Kemantika Jesús itokilijkauaj nojkia ouij kimatkej kikuamachilisej tlen ya kinmachtiyaya (Juan 14:9). Nochipa ma tikilnamikikaj ni: maske tojuantij kejuak tijtokaj nopa xinachtli uan tikatekiaj, san Jehová kichiua ma moskalti (1 Cor. 3:6).

12. ¿Kenijkatsa tijnextiaj tijpiaj toyolo kema tikinkamanaljuiaj tochampoyouaj?

¹² Uelis nojkia ouij tijmatij tijpiasej toyolo kema tikinkamanaljuiaj tochampoyouaj. ¿Tlake uelis techpaleuis? Tlen kiijtoua Eclesiastés 3:1, 7, nopaya kiijtoua: “Onka tonali [kema] timokamatsakuas uan onka tonali [kema tikamanaltis]”. Maske kej timonejnemiltiaj uelis kinpaleuis tochampoyouaj nojkia ma momachtikaj Biblia, kema tikitaj kinamiki, tijchiuaj kampeka tikinkamanaljuisej tlen Biblia tlamachtia (1 Ped. 3:1, 2).  Titlajtolmoyauaj ika miak pakilistli uan tijpiaj toyolo ika nochi maseualmej, nojkia ininuaya tochampoyouaj.

13, 14. Xikijto ajkia inijuantij kinextijkej kipiaj ininyolo, uan kenijkatsa uelis tijchiuasej kej inijuantij.

¹³ ToTeotsij itekipanojkauaj katli itstoyaj uejkajkia kinextijkej kipiaj ininyolo, uan nojkia ipan ni tonali kiampa kinextijtokej. Se neskayotl, maske Habacuc tlauel kinekiyaya ma tlami tlasisinijkayotl kiijtok: “Nitlachixtos tlachke toTeko nechiljuis. Nijchias kejatsa nechnankilis” (Hab. 2:1). Nojkia, maske apóstol Pablo kinekiyaya kitlamiltis iteki, nojua kiniljuiyaya “nochi tlakamej iTlajtol” toTeko (Hech. 20:24).

¹⁴ Nama ma tikitakaj tlake kipanok se toikni iuaya isiua katli yajkej Kampa momachtiaj ipan Galaad. Toikniuaj kintitlankej ma tlajtolmoyauatij ipan se altepetl kampa amo itstoyaj miakej toikniuaj, uan ipan nopa altepetl amo tlaneltokayayaj ipan Jesús, yeka amo miakej kinejkej momachtisej Biblia ininuaya. Nopa sekinok toikniuaj katli ininuaya yajkej momachtiaj ipan Galaad uan sejkanok tlatekipanouayayaj, nochipa kiniljuiyayaj tlauel kuali kintlakakiliyayaj uan miakej tlen kinmachtiyayaj moatsonpoliuiltijtoyaj. Maske nopa toikni iuaya isiua amo kinmachtiyayaj miakej, kipixkej ininyolo uan nojua tlauel tlajtolmoyauayayaj. Kema panok chikueyi xiuitl, se katli kimachtiyayaj moatsonpoliuiltik. ¿Tlake kichijkej toTeotsij itekipanojkauaj katli uekajkia itstoyaj uan toikniuaj ipan ni tonali? Maske ouij, nochipa tlajtolmoyajkej uan Jehová kinteochijki pampa kipixkej ininyolo. Yeka, ma tijchiuakaj kej katli kuali tlaneltokaj ‘uan kipiaj ininyolo para kichiasej hasta kiselisej nochi tlen toTeko kintenkauilijtokʼ (Heb. 6:10-12).

15. ¿Kenke tlaj kuali titlaneltokaj techpaleuis ma tijnekikaj titlajtolmoyauasej?

¹⁵ Pampa tijneltokaj nopa tlamachtili tlen tijmoyauaj, tijnekij tlauel miakej maseualmej ma kimatikaj. Timotemachiaj Jehová kichiuas nochi tlen kiijtojtok ipan Biblia (Sal. 119:42; Is. 40:8). Ipan ni tonali tikitstokej moaxitijtok se keski tlajtolpanextili tlen Biblia kiijtoua. Nojkia, tikitstokej maseualmej kipatlaj miak tlamantli ipan ininnemilis pampa momachtijtokej Biblia. Ni tlamantli kinextia nochi moneki kitlakakilisej nopa kuali tlamachtili tlen toTeotsij iTlanauatijkayo.

16. 1) Kej kiijtoua Salmo 46:1-3, ¿kenke pampa titlaneltokaj ipan Jehová techpaleuia ma tijnekikaj titlajtolmoyauasej? 2) ¿uan kenijkatsa techpaleuia timotemachisej ipan Jesús?

¹⁶ Nojkia titlaneltokaj ipan Jehová, katli techmaka nopa tlamachtili tlen tijmoyauaj, uan nojkia ipan Jesús, katli kitekimakatok kej Tlanauatijketl ipan iTlanauatijkayo (Juan 14:1). Maske tikixnamikisej miak tlamantli, Jehová nochipa elis “totlamanauijkaj” uan techmokuitlauis (xijpoua Salmo 46:1-3). Uan nojkia temachtli tijmatij Jesús kiyakana tlajtolmoyaualistli ika nopa tlanauatili tlen Jehová kimakatok (Mat. 28:18-20).

17. Xikijto se neskayotl tlen kinextia kenke nojua moneki titlajtolmoyauasej.

¹⁷ Pampa titlaneltokaj, timotemachiaj Jehová kiteochiuas tlen tijchiuaj, uan kichiuas kej amo kema timoiljuitokej (Ecl. 11:6). Se neskayotl, sejse tonali, tlauel miakej maseualmej panoj kampa tijtlalijtokej amatlajkuiloli ipan carritos. ¡Tlen tijchiuaj tlauel techpaleuijtok! Nopa pilamochtsi Kej tijTekipanouaj toTeotsij noviembre 2014 kiijtoua se ichpokatl katli momachtiyaya ipan universidad, kinejki kiijkuilos se tlamantli tlen Jehová iTlajtoltemakauaj. Maske amo kipantik nopa  kali kampa timosentiliaj, kiitak nechka kampa momachtiyaya toikniuaj kitlalijtoyaj amatlajkuiloli. Nopaya kipantik tlen kinekiyaya kimatis uan kitlamiltik tlen kiijkuiloskia. Teipa, moatsonpoliuiltik uan nama eli precursora. Ni tlamantli techpaleuia nojua ma tijnekikaj titlajtolmoyauasej, pampa kinextia nojua itstokej maseualmej katli kinekij kikakisej nopa kuali tlamachtili tlen toTeotsij iTlanauatijkayo.   

18. ¿Kenijkatsa tijmatij ayokmo titlajtolmoyauasej ipan nopa tonali tlen Jehová kiixtlalijtok?

¹⁸ Timotemachiaj ayokmo titlajtolmoyauasej ipan nopa tonali kema toTeotsij kiixtlalijtok. Ma timoiljuikaj tlake panok kema Noé itstoya. Jehová kinextik kichiua tlen kiijtoua kema kinamiki. Ya kiijtok poliuiyaya se 120 xiuitl kema uetsiskia tlauel miak atl. Teipa, Jehová kiiljuik Noé ma kichiua se akali, uan ya uejkajki kichiua se cuarenta o cincuenta xiuitl. Ya tlauel tlajtolmoyajki maske maseualmej amo kitlakakilijkej, uan tlanki kema Jehová kiiljuik ma kinkalaki nopa tlapialmej. Uan ipan nopa tonali kema Jehová kiixtlalijtoya, “kitsajki ipuerta” nopa akali (Gén. 6:3; 7:1, 2, 16).

19. ¿Tlake tijselisej tlaj timosentlalijtokej tikinmachtisej maseualmej?

¹⁹ Jehová nechka kiijtos ayokmo ma titlajtolmoyauakaj. Ipan nopa tonali tlen kiixtlalijtok, Jehová kitlamiltis tlen amo kuali uan kiualikas iTlanauatijkayo kampa nochi kichiuasej san tlen xitlauak. Yeka, tlauel moneki ma tijchiuakaj kej Noé, Habacuc uan toikniuaj katli tlauel mosentlalijtokej kinmachtisej sekinok. Nochipa ma timosentlalijtokaj, ma tijpiakaj toyolo uan kuali ma titlaneltokakaj ipan Jehová uan ipan tlen kiijtojtok techmakas.