1, 2. Kej kiijtoua 1 Timoteo 6:20, ¿tlake monekiyaya kichiuas Timoteo?

KEMA se akajya kipia se tlamantli tlen tlauel ipati, kemantika kimaka seyok maseuali pampa kineki ma kimokuitlaui. Uelis nopa maseuali kineki ma kiajokui tomij ipan banco uan kej nopa amo kipolos yon kiichtekilisej. Ika ni tlamantli kuali tijkuamachiliaj tlake kiijtosneki kema se akajya temaka se tlamantli tlen tlauel ipati pampa kineki ma kimokuitlauikaj.

² (Xijpoua 1 Timoteo 6:20). Apóstol Pablo kiilnamikilik Timoteo kiselijtoya se tlamantli tlen tlauel ipati: kimatiyaya tlake mosentlalijtoya kichiuas toTeotsij ipan Tlaltipaktli. Jehová nojkia kimakak Timoteo se tekitl tlen tlauel ipati: kimoyauas iTlajtol uan kinpaleuis sekinok nojkia ma elikaj Cristo itokilijkauaj (2 Tim. 4:2, 5). Pablo kiiljuik Timoteo monekiyaya kimokuitlauis tlen kimakatoyaj. Ipan ni tonali Jehová nojkia techmakatok se tlamantli tlen tlauel ipati. ¿Tlake eli uan kenke moneki tijmokuitlauisej?

3, 4. Xikijto kenke nopa tlamachtili tlen kipia Biblia tlauel ipati.

³ Pampa Jehová tlauel techiknelia, techmakatok tlamachtili tlen eltok ipan Biblia. Ni tlamantli eli tlauel ipati pampa techpaleuia ma timouampojchiuakaj iuaya Jehová uan nelnelia ma tiyolpakikaj. Kema tijmatij tlen melauak uan tijchiuaj ipan tonemilis, techpaleuia ayokmo ma tijneltokakaj tlamachtili tlen amo melauak uan amo ma tijchiuakaj tlen amo kuali (1 Cor. 6:9-11).

⁴ Nopa tlamachtili tlen eltok ipan Biblia nojkia tlauel ipati pampa Jehová san kinnextilia maseualmej katli amo moueyimatij uan katli kipiaj “kuali ininyolo” (Hech. 13:48). Tojuantij kuali kimatij toTeotsij kitekimakatok nopa “tlalnamijkatlatekipanojketl” uan kiampa uelis tijselisej nopa kuali tlamachtili  (Mat. 11:25; 24:45). Toselti amo uelis tijmachilisej tlamachtili tlen uala ipan Biblia. Uan san ni tlamantli eli tlauel ipati (Prov. 3:13, 15).

5. ¿Tlake seyok tlamantli techmakatok Jehová?

⁵ Jehová nojkia techmakatok se tlamantli tlen tlauel ipati: techkaua ma tikinmachtikaj maseualmej tlen ya uan tlen mosentlalijtok kichiuas (Mat. 24:14). Nopa tlamachtili tlen tijmoyauaj eli tlauel ipati, pampa tikinpaleuiaj maseualmej ma mouampojchiuakaj ika Jehová uan nojkia ma motemachikaj uelis itstosej nochipa (1 Tim. 4:16). Maske sekij tlauel tlajtolmoyauaj uan sekij amo, nochi tijchiuaj nopa tekitl tlen tlauel ipati ipan ni tonali (1 Tim. 2:3, 4). ¡Tlauel tiyolpakij pampa ueli tijchiuaj ni tekitl! (1 Cor. 3:9).

6. ¿Tlake kinpanok se keski Cristo itokilijkauaj katli amo momokuitlauijkej?

⁶ Ipan nopa tonali kema Timoteo itstoya, se keski Cristo itokilijkauaj amo kipatiitakej tekitisej ika Jehová. Se neskayotl, Demas kitlauelkajki Pablo uan ayokmo kinejki tlatekipanos iuaya pampa tlauel kiiknelik “tlamantli tlen ni Tlaltipaktli” (2 Tim. 4:10). Figelo uan Hermógenes ayokmo kinejkej tlajtolmoyauasej, uelis pampa majmajkej nojkia ma kintlatsakuiltikaj kej kichijkej ika Pablo (2 Tim. 1:15). Himeneo, Alejandro uan Fileto kitlauelkajkej tlen melauak uan mochijkej apóstatas (1 Tim. 1:19, 20; 2 Tim. 2:16-18). Kej tikitakej, maske achtouia inijuantij kuali tlaneltokayayaj, teipa ayokmo kipatiitakej nopa tlamachtili tlen nelia melauak.

7. ¿Ika tlake tlamantli kineki techkajkayauas Satanás?

⁷ Satanás kitekiuia miak tlamantli tlen uelis kichiuas ma tijkauakaj tlen Jehová techmakatok. ¿Tlake tlamantli kitekiuia? Satanás kitekiuia tlen ika timoyolpakiltiaj, radio, periódico uan sekinok tlamantli kampa kiijtouaj ma tijchiuakaj uan ma timoiljuikaj tlen amo kuali. Ni tlamantli uelis kichiuas ma tijkauakaj tlen melauak. Nojkia kichiua ma techtetsopakaj sekinok o ma techtlatsakuiltikaj, uan kiampa timajmauisej uan ayokmo titlajtolmoyauasej. Uan nojkia kitekiuia tlamachtili tlen amo melauak, kej tlen kiijtouaj apóstatas, uan kiampa ayokmo tijpatiitasej tlen melauak uan tijkauasej (1 Tim. 6:20, 21).

8. ¿Tlake techmachtia tlen kipanok Daniel?

⁸ Tlaj amo timomokuitlauiaj, uelis yolik tijkauasej tlen melauak. Ma tikitakaj tlen kipanok Daniel, * ya tlauel kipaktiyaya mauiltis ika videojuegos. Ya kiijtoua: “Pejki nimauiltia ika videojuegos kema nijpixtoya 10 xiuitl. Achtoui pejki nimauiltia ika tlamantli tlen amo kenijki eliyaya. Uan ika yolik pejki  nimauiltia ika videojuegos kampa nesiyayaj moteuiaj o kampa nesiyayaj amo kuali ajakamej”. Teipa, Daniel mojmostla mauiltiyaya se 15 horas. Ya nojua kiijtok: “Nijmatiyaya amo kinamikiyaya nimauiltis ika nopa tlamantli uan amo tlauel nijchiuas, pampa ni tlamantli kichiuayaya ayokmo ma nimouampojchiua ika Jehová. Uan pampa ayokmo nechyolkokouayaya tlen nikitayaya, ayokmo kenijki nijmatiyaya tlaj amo nijchiuayaya tlen Biblia tetlajtolmaka”. Ni tlamantli kinextia tlen ika timoyolpakiltiaj uelis kichiuas ika yolik ayokmo ma tijpatiitakaj tlen melauak. Tlaj ni tlamantli techpanoskia uelis tijkauasej tlen Jehová techmakatok.

9. Kej kiijtoua 1 Timoteo 1:18, 19, ¿ika tlake tlamantli Pablo kiixnextik Timoteo?

⁹ (Xijpoua 1 Timoteo 1:18, 19). Pablo kiijtok Timoteo eliyaya kej se tlateuijketl, yeka kiiljuik: “Ximoneltlali uan xitlateui chikauak”. Maske kiampa kiiljuik, amo nelnelia moteuiskia ininuaya sekinok, ya moteuiskia ininuaya Satanás uan iajakauaj. ¿Kenijkatsa tojuantij nojkia tielij kej tlateuianij? Uan ¿tlake kuajkuali tlamantli moneki kinextisej nochi Cristo itlateuijkauaj? Ika tlen Pablo kiixnextik techmachtia makuili tlamantli tlen moneki tijchiuasej tlaj amo tijnekij tijkauasej tlen melauak. Ma tikitakaj nopa tlamantli.

10. ¿Tlake kiijtosneki tijueyichiuasej toTeotsij ika nochi toyolo, uan kenke tlauel moneki?

¹⁰ San toTeotsij ma tijueyichiuakaj ika nochi toyolo. Se kuali tlateuijketl amo kema tetlauelkaua. Kichiua kampeka kimanauis se akajya tlen kiiknelia o se tlamantli tlen tlauel kipatiita. Pablo kiiljuik Timoteo ma kiueyichiua toTeotsij ika nochi iyolo, ni kiijtosneki monekiyaya kinextis tlauel kiiknelia uan amo kema kitlauelkauaskia (1 Tim. 4:7). Tlaj tijchiuaj kampeka tijnextisej ni kuajkuali tlamantli, techpaleuis amo kema ma tijkauakaj tlen melauak (1 Tim. 4:8-10; 6:6).

11. ¿Kenke moneki timonauatisej?

¹¹ Ma tijchiuakaj kampeka timonauatisej. Tlaj se tlateuijketl kineki kichiuas tlen kiiljuiaj, moneki monauatis. Timoteo elki se kuali Cristo itlateuijka pampa kichijki tlen Pablo kiiljuik, yeka amo kichijki tlen kiyoltilanki, kinextik kuajkuali tlamantli uan kuali mouikak ininuaya toikniuaj (2 Tim. 2:22). Timoteo kiampa kichijki pampa monauatiyaya. Ni kuali tlamantli nojkia techpaleuis tlaj amo tijnekij tijchiuasej tlen amo kuali (Rom. 7:21-25). Nojkia, tlaj kuali timonauatiaj techpaleuis ayokmo ma tijchiuakaj tlen achtouia tijchiuayayaj uan ma tijchiuakaj tlen kuali (Efes. 4:22, 24). Uan uelis monekis timochiualtisej tiasej tlanechikoli, tlaj ipan nopa tonali tlauel titekitikej (Heb. 10:24, 25).

12. ¿Tlake techpaleuis nojua kuali titlamachtisej?

¹² Tlaj se tlateuijketl kineki kuali kitekiuis tlen ika tlateuis, moneki momachtis kenijkatsa kitekiuis. Tojuantij nojkia kiampa moneki tijchiuasej, moneki kuali tijmatisej kenijkatsa tijtekiuisej toTeotsij iTlajtol (2 Tim. 2:15). Maske tlanechikoli techpaleuia ma tijmatikaj kenijkatsa tijtekiuisej Biblia, moneki tijkixtisej tonali uan kiampa toselti timomachtisej. Kiampa uelis tikinpaleuisej maseualmej nojkia ma kimatikaj tlen nelnelia tlamachtia Biblia. Yeka, moneki tikilnamikisej tlaj tijpouaj Biblia, techpaleuis kuali ma titlaneltokakaj. Amo moneki san tijpouasej, moneki timoyoliljuisej ipan tlen tijpouaj, uan tlaj amo tijkuamachiliaj se tlamantli, ma tijtemokaj ipan amatlajkuiloli, kiampa uelis tikinixtomilisej sekinok (1 Tim. 4:13-15). Kiampa, kema tikinmachtisej maseualmej uelis kuali tijtekiuisej Biblia. Nojkia, amo san moneki  tikinpouilisej, moneki tikinpaleuisej kuali ma kimachilikaj uan ma kiitakaj kenijkatsa kinpaleuia. Yeka tlaj tijchiuaj kampeka kuali timomachtisej Biblia, techpaleuis kuali ma titlamachtikaj (2 Tim. 3:16, 17).  

13. Kej kiijtoua Hebreos 5:14, ¿kenke moneki kuali tijtekiuisej totlalnamikilis?

¹³ Kuali ma tijtekiuikaj totlalnamikilis. Se kuali tlateuijketl, moneki nochipa kuali tlachixtos, kiampa amo kipanos tlen amo kuali. Tojuantij nojkia moneki tijmatisej tlake tlamantli uelis kichiuas ayokmo kuali ma titlaneltokakaj uan kiampa amo tijchiuasej (Prov. 22:3; xijpoua Hebreos 5:14). Se neskayotl, moneki kuali tikitasej ika tlake timoyolpakiltiaj. Kemantika ipan televisión o ipan películas nesij momekatiaj. Tojuantij amo tikitaj ni tlamantli pampa ueliskia ika yolik kichiuas ayokmo ma timouampojchiuakaj iuaya Jehová. Tijmatij toTeotsij amo kuali kiita kema maseualmej momekatiaj uan katli kiampa kichiuaj ayokmo yolpakij uan ayokmo kuali itstokej ininuaya sekinok (Efes. 5:5, 6).  

14. ¿Kenijkatsa kipaleuik Daniel itlalnamikilis?

¹⁴ Daniel, katli tikijtojkej achtoui, ika yolik kiitak amo kinamikiyaya mauiltis ika nopa videojuegos kampa nesiyaya tlasisinijkayotl o kampa nesiyayaj amo kuali ajakamej. Kitemok tlamachtili tlen kipaleuiskia ipan Watchtower Library uan kiampa ayokmo mauiltiskia ika nopa tlamantli. ¿Tlake panok pampa kiampa kichijki? Ayokmo mauiltik ika videojuegos tlen amo kuali, ayokmo mauiltik ika sekinok ipan Internet yon ayokmo mouampojchijki ininuaya. Ya kiijtoua: “Ayokmo nimauiltia ika videojuegos, nama nia ininuaya toikniuaj sejkanok timauiltiaj o tijchiuaj sekinok tlamantli”. Nama Daniel eli precursor uan ueuejtlakatl.

15. ¿Kenke amo moneki tijtlakakilisej tlen kiijtouaj apóstatas?

¹⁵ Sanse kej Timoteo, moneki tijmatisej nopa tlamachtili tlen kimoyauaj apóstatas uelis kichiuas ayokmo kuali ma titlaneltokakaj (1 Tim. 4:1, 7; 2 Tim. 2:16). Kemantika, apóstatas kiijtouaj se keski tlamantli tlen amo melauak tlen toikniuaj o kiistlakauiaj toTeotsij itlanechikol. Nochi ni tlamantli uelis kichiuas ayokmo kuali ma titlaneltokakaj. Yeka, amo ma tikintlakakilikaj pampa “axkiijtouaj tlen melauak” uan ‘san  kinpaktia tlanajnankilisej uan tekamaijixnamikisej’ (1 Tim. 6:4, 5). Inijuantij kinekij ma tijneltokakaj nopa istlakatili uan ayokmo ma timotemachikaj ipan toikniuaj.

16. ¿Ipan tlake tlamantli moneki timosentlalisej?

¹⁶ Ma timosentlalijtokaj. Tlaj Timoteo kinekiyaya elis se kuali Cristo itlateuijka, monekiyaya mosentlalis tlajtolmoyauas uan amo mosentlaliskia tlapijpias o ipan sekinok tlamantli tlen amo ipati (2 Tim. 2:3, 4). Sanse kej Timoteo, amo moneki tijnekisej tijpiasej tlamantli tlen uelis kichiuas ayokmo ma timosentlalijtokaj tijtekipanosej toTeotsij. Tlaj ‘tijnekisej tijpiasej miak tomij’, kichiuas ayokmo ma timouampojchiuakaj iuaya Jehová, ayokmo ma tijpatiitakaj iTlajtol uan ayokmo ma tijnekikaj titlajtolmoyauasej (Mat. 13:22). Yeka, moneki amo timosentlalisej titlapijpiasej, uan ma tijtekiuikaj totonal uan tochikaualis uan kiampa tikachtouitlalisej toTeotsij iTlanauatijkayo (Mat. 6:22-25, 33).

17, 18. ¿Tlake uelis tijchiuasej uan kiampa nojua kuali titlaneltokasej?

¹⁷ Ma timokualchijchiuakaj, kiampa tijmatisej tlake tijchiuasej. Se tlateuijketl moneki kimatis tlake kichiuas kema kinekisej kiteuisej. Tlaj tijnekij tijmokuitlauisej tlen Jehová techmakatok, moneki nima tijmatisej tlake tijchiuasej kema se tlamantli uelis technempolos. ¿Tlake techpaleuis kiampa ma tijchiuakaj? Moneki timoiljuisej tlake tijchiuasej kema tikixnamikisej tlen amo kuali.

¹⁸ Se neskayotl, kema se akajya kineki kitsontekis se ueyi kuauitl, achtoui moneki kiitas kanke uelis yas. ¿Kenke? Pampa kema nopa kuauitl uetsis, nopa tlakatl uelis motlalos uan kiampa amo tleno ipantis. Sanse kej nopa tlakatl, tojuantij nojkia moneki kejuak tikitasej kanke timotlalosej tlaj kema ipan Internet, ipan se película o ipan televisión, nesi tlen kitlaliaj apóstatas, momekatiaj o moteuiaj. Tlaj timokualchijchiuaj, nima tijmatisej tlake tijchiuasej uan kiampa nojua kuali titlaneltokasej uan kuali tiitstosej iixpa Jehová (Sal. 101:3; 1 Tim. 4:12).

19. ¿Tlake tlateochiualistli tijselisej tlaj tijmokuitlauiaj tlen Jehová techmakatok?

¹⁹ Nochi Cristo itokilijkauaj moneki tijmokuitlauisej tlen Jehová techmakatok: 1) kichijtok ma tijmatikaj tlen melauak uan 2) ma tikinmachtikaj sekinok. Tlaj kiampa tijchiuaj, amo techyolkokos totlalnamikilis, kuali tijyolmatisej uan tiyolpakisej kema tikinpaleuisej sekinok ma kiixmatikaj Jehová. Uan ma timotemachikaj Jehová techpaleuis tijmokuitlauisej tlen techmakatok (1 Tim. 6:12, 19).