1. ¿Kenijkatsa kiyolmatij ichampoyouaj kema se akajya kikixtiaj tlen tlanechikoli?

KEMA se akajya kikixtiaj tlen tlanechikoli, ichampoyouaj tlauel moyolkokouaj. Se tosiuaikni katli itoka Hilda * kiijtoua: “Noueue mijki kema tijpixtoyaj 41 xiuitl kema timosenkajtoyaj. Maske nimokuesok, nojua tlauel kiampa nijyolmatki kema notelpoka kikixtijkej tlen tlanechikoli, uan kintlauelkajki isiua uan ikoneuaj”.

2, 3. Kej kiijtoua Salmo 78:40, 41, ¿kenijkatsa kiyolmati Jehová kema se itekipanojka kitlauelkaua?

² Ma timoiljuikaj kenijkatsa Jehová tlauel moyolkokok kema tlauel miakej iluikaeuanij, katli eliyayaj ichampoyouaj, kitlauelkajkej (Jud. 6). ¿Uan kenijkatsa kiyolmatki kema israeleuanij, katli tlauel kinikneliyaya, miakpa kiixpanokej? (Xijpoua Salmo 78:40, 41). Tlaj se katli tikiknelia kitlauelkaua Jehová, amo san ta mitsyolkokoua, xikilnamikto Jehová nojkia mokuesoua. Ya kuali kikuamachilia tlen tijyolmati, yeka mitspaleuis uan mitsyolchikauas.

³ Ipan ni tlamachtili tikitasej tlake moneki tijchiuasej tlaj tijnekij Jehová ma techpaleui kema se tlen katli tikikneliaj kitlauelkaua. Nojkia, tikitasej kenijkatsa tikinpaleuisej toikniuaj tlaj se tlen ichampoyouaj kikixtiaj tlen tlanechikoli. Achtoui ma tikitakaj tlen amo kinamiki timoiljuisej.

4. ¿Kenijkatsa kiyolmatij miakej tetajmej kema se ininkone kitlauelkaua Jehová?

⁴ Kema ikone se tetaj kitlauelkaua Jehová, uelis motlatsintokia tlake nojua monektoskia kichiuas uan kiampa kipaleuijtoskia ikone amo ma kitlauelkaua toTeotsij. Se toikni katli itoka Luke, kiijtoua: “Kema nokone kikixtijkej tlen  tlanechikoli nimoiljuiyaya notlajtlakol. Kemantika tlauel amo kuali nitlatekimikiyaya, nimochokiliyaya uan nechkokouayaya noyoltsi”. Nojkia kiampa kipanok se tosiuaikni katli itoka Elizabeth. Ya kiijtoua: “Nimoiljuiyaya, ¿tlake amo nijchijki? Nijmatiyaya amo kuali nijpaleuijtoya nokone nojua kuali ma tlaneltoka”.

5. ¿Ajkia itlajtlakol kema se akajya kitlauelkaua Jehová?

⁵ Nochipa ma tikilnamiktokaj Jehová techkaua ma tijtlapejpenikaj tlen tijnekij tijchiuasej. Yeka, sejse itekipanojka moneki kitlapejpenis tlaj kitekipanos o amo. Sekij telpokamej maske amo kuali kiniskaltijkej, kitlapejpenijkej nochipa kitekipanosej Jehová uan nojua kiampa kichijtokej. Sekij tetajmej kichijkej kampeka kinmachtisej ininkoneuaj tlen Biblia kema nojua eliyayaj pilsiltsitsij. Maske kiampa kichijkej, kema motelpokachijkej ayokmo kitekipanojkej Jehová. Kej tikitaj, sejse moneki kitlapejpenis tlaj kitekipanos Jehová o amo (Jos. 24:15). Yeka, tetajmej, tlaj se tlen inmokone kitlauelkaua Jehová, amo ximotlajtlakoltikaj.

6. ¿Kenijkatsa kiyolmati se telpokatl kema se tlen itatauaj kitlauelkaua Jehová?

⁶ Kemantika se tetaj o se tenaj kitlapejpenia ayokmo kitekipanos Jehová uan kintlauelkaua ininchampoyouaj (Sal. 27:10). Ni tlauel kinyolkokoua ikoneuaj pampa inijuantij kichiuayaya kampeka kuali monejnemiltisej kej ya kichiuayaya. Esther kiijtoua: “Tlauel nimokuesok kema notata kikixtijkej tlen tlanechikoli. Nochipa nimochokiliyaya pampa kitlapejpenijtoya ayokmo kitekipanos Jehová, uan amo nesiyaya tlaj kiampa kichiuaskia. Tlauel nikiknelia notata. Yeka, kema kikixtijkej tlen tlanechikoli, tlauel nechtekipachouayaya, uan nopa kichiuayaya kemantika tlauel ma nimomajmati maske amo tleno kipanotoya, san tlemach nimoiljuiyaya”.

7. ¿Kenijkatsa kiyolmati Jehová kema kiita se telpokatl inana o itata kinkixtijtokej tlen tlanechikoli?

⁷ Telpokatl, tlauel techyolkokoua tlaj se tlen motatauaj kikixtijtokej tlen tlanechikoli. Uan nojkia xikilnamikto, Jehová tlauel kuali kikuamachilia tlen tijyolmati. Ya tlauel mitsiknelia uan yolpaki kema kiita nojua tijtekipanoua uan amo tijtlauelkaua, uan tojuantij nojkia kiampa tijyolmatij. Nojkia, amo motlajtlakol tlaj se tlen motatauaj kitlapejpenik ayokmo kitekipanos toTeotsij. Kej achtouia tikijtojkej, Jehová techkaua ma tijtlapejpenikaj tlaj tijtekipanosej o amo. Uan nochi katli timotemaktilijtokej uan timoatsonpoliuiltijtokej, “tijpiaj toteki para tijmokuitlauisej tlen tojuantij tonemilis” (Gál. 6:5).

8. ¿Tlake uelis kichiuasej ichampoyouaj katli kikixtijtokej tlaj ayamo tlakuepilia? (Nojkia xikita recuadro “ Sampa xijtekipano Jehová”).

⁸ Kema se katli tikikneliaj kikixtiaj tlen tlanechikoli, amo kenijki tlaj timoiljuiaj se tonali sampa kitekipanos Jehová. ¿Tlake uelis tijchiuasej kema ayamo tlakuepilia? Ma tijchiuakaj kampeka nojua kuali titlaneltokasej. Tlaj kiampa tijchiuasej tikinpaleuisej tochampoyouaj uan uelis nojkia katli kikixtijtokej. Nojkia, nopa techpaleuis tikijiyouisej tlen techpano uan amo tlauel timokuesosej. Ma tikitakaj se keski tlamantli tlen techpaleuis nojua kuali titlaneltokatosej.

9. ¿Tlake mitspaleuis nojua kuali titlaneltokatos? (Nojkia xikita recuadro “ Textos tlen mitspaleuis tlaj se katli tikiknelia kitlauelkajtok Jehová”).

⁹ Nochipa kuali ximomachti. Tlauel ipati tijchiuasej kampeka nojua kuali timouampojchijtosej ika Jehová uan ininuaya tochampoyouaj. ¿Tlake uelis techpaleuis? Tlaj tijnekij kuali titlaneltokasej, moneki mojmostla tijpouasej Biblia, timoyoliljuisej tlen tijpouaj uan tiasej tlanechikoli. Ma timoiljuikaj tlen kipanok Joanna. Itata uan isiuaikni ayokmo kitekipanojkej Jehová. Ya kiijtoua: “Tlauel kuali nijyolmati kema nijpoua ipan Biblia tlen kinpanok Abigail, Ester, Job, José uan Jesús. Tlen kichijkej tlauel nechpaleuia nimoiljuis kej kinamiki se keski tlamantli, uan ayokmo tlauel nimoyolkokoua ika tlen panok. Nojkia tlauel nechpaleuia nopa uikatl tlen kisa ipan JW Broadcasting”.

10. Kej kiijtoua Salmo 32:6-8, ¿tlake mitspaleuis kema tlauel timoyolkuesoua?

¹⁰ Kema tlauel timoyolkuesojtos, ximomaijto ika Jehová uan kejuak xijtlapo moyolo, uan xikiljui ma mitspaleui tikitas kej kinamiki se keski tlamantli, ma mitsmaka tlalnamikilistli uan ma mitspaleui tijmatis tlake moneki tijchiuas (xijpoua Salmo 32:6-8). Maske uelis ouij tijmatis tikiljuis tlen tijyolmati, ya kuali mitskuamachilia. Jehová tlauel mitsiknelia uan kineki xikiljui nochi tlen tijyolmati (Éx. 34:6; Sal. 62:7, 8).

11. Kej kiijtoua Hebreos 12:11, ¿kenke moneki timotemachisej Jehová tlauel kuali tetlalnamiktia? (Nojkia xikita recuadro “ Jehová kinextia tlauel teiknelia kema se akajya kikixtiaj”).

¹¹ Xijtlepanita tlen ueuejtlakamej kitlapejpenijkej. Jehová kinextia tlaiknelili kema kikixtiaj se akajya tlen tlanechikoli, uan nopa kinpaleuia toikniuaj uan katli tlajtlakolchijki (xijpoua Hebreos 12:11). Uelis se keskij toikniuaj moiljuisej ueuejtlakamej  amo kuali kitlapejpenijkej kema kikixtijkej se akajya. Maske kiampa kiijtosej, xikilnamiki amo kimatij nochi tlen nelnelia panok, uan tojuantij nojkia amo tijmatij. Moneki timotemachisej ueuejtlakamej moyakankej ika Biblia kema tetlajtolsenkajkej uan kichijkej kampeka kichiuasej kej Jehová kineki (2 Crón. 19:6).

12. ¿Kenijkatsa kinpaleuijtok se keskij toikniuaj pampa kitlepanitakej tlen Jehová tlanauatik?

¹² Tlaj ta tijtlepanita tlen kitlapejpeniaj ueuejtlakamej kema kikixtiaj se tlen mochampoyouaj, uelis tijpaleuis sampa ma tlakuepili ipan Jehová itlanechikol. Elizabeth, katli tikijtojkej ipan párrafo 4, kiijtoua: “Tlauel ouij tijmatkej ayokmo timonojnotsasej iuaya totelpoka, katli ya motlakachijtoya. Teipa kema tlakuepilik ipan tlanechikoli, kiijtok kinamikiyaya ma kitlalnamiktikaj. Nojkia, kiijtok kiyekojtoya miak tlamantli. Nopa kichijki ma nijpatiita kema Jehová techtlalnamiktia”. Mark, iueue Elizabeth, kiijtoua: “Kema panok se keski xiuitl, tokone nechiljuik kinejki tlakuepilis pampa tijchijkej tlen kinamiki. Tlauel nijtlaskamatilia Jehová pampa techpaleuik ma tijchiuakaj tlen ya tlanauatia”.

13. ¿Tlake mitspaleuis amo tlauel ximoyolkoko?

¹³ Xikamanalti iuaya se mouampo katli kikuamachilis tlen tijyolmati. Xijkixti tonali tiitstos ininuaya toikniuaj katli kuali tlaneltokaj pampa inijuantij mitspaleuisej nojua tiyolpakis (Prov. 12:25; 17:17). Joanna, katli tikijtojkej ipan párrafo 9, kiijtoua: “Maske kemantika nijyolmatiyaya noselti niitstoya, tlauel nechpaleuik nimonojnotsas ininuaya nouampoyouaj katli amo kiijtojtinemiyayaj tlen nikinpouiliyaya”. Nama, ¿tlake uelis tijchiuas tlaj se toikni mitsiljuia tlen mitsyolkokoua?

14. ¿Kenke moneki tijpiasej toyolo ika toikniuaj uan timotlapojpoljuisej?

¹⁴ Xijnexti tijpia moyolo ika toikniuaj. Nochi titlajtlakolejkej, yeka kemantika tikijtouaj tlen amo kinamiki (Sant. 3:2). Nojkia, amo nima ma tikualanikaj kema se akajya kiijtoua tlen techyolkokoua o amo kimati kenijkatsa techyolchikauas. Nochipa ma tikilnamiktokaj tlen kiijtok apóstol Pablo: “Uajka xijpiakaj inmoyolo ika tlen inmechchiuiliaj tlen axkuali uan xikintlapojpoljuikaj” (Col. 3:13). Se toikni katli se tlen ichampoyouaj kikixtijtoyaj, kiijtoua: “Jehová nechpaleuik nikintlapojpoljuis toikniuaj katli amo kuali nechyolchikauayayaj pampa tlajtlakolejkej”. Nama, ma tikitakaj tlen uelis kichiuasej nochi toikniuaj uan kiampa kinpaleuisej ichampoyouaj katli kikixtijtokej.

15. ¿Kenijkatsa uelis tikinpaleuisej ichampoyouaj se katli namanok kikixtijkej?

¹⁵ Ma tikiniknelikaj uan ma tikintlasojtlakaj ichampoyouaj katli kikixtijkej pampa amo kitlauelkajtokej Jehová. Se tosiuaikni katli itoka Míriam, kiijtoua: “Kema noikni ya kikixtijtoyaj tlen tlanechikoli, amo nijnekiyaya nias tlanechikoli pampa nimoiljuiyaya sekij toikniuaj kiijtosej tlen nechyolkokoskia. Maske kiampa nijyolmatiyaya,  nikinpixtoya nouampoyouaj katli nojkia moyolkokojtoyaj ika tlen kipanotoya noikni, uan amo kiijilnamikiyayaj. Nopa tlauel nechpaleuik pampa amo kema nijyolmatki noselti niitstoya”. Seyok tosiuaikni kiijtoua: “Kema kikixtijkej tokone, techyolchikauakoj toikniuaj katli tlauel techikneliaj. Sekij kiijtojkej amo kimatiyayaj tlake techiljuisej, san chokakej touaya uan techtlajkuiljuilijkej. Nopa tlauel nechpaleuik”.

16. ¿Kenijkatsa nochi toikniuaj uelis kinpaleuisej ichampoyouaj katli kikixtijtokej?

¹⁶ Nojua ma tikinpaleuikaj ininchampoyouaj katli kinkixtijtokej. Ma tijnextikaj nojua tlauel tikinikneliaj uan ma tikinyolchikauakaj (Heb. 10:24, 25). Kemantika, se keskij toikniuaj kiitstokej sekij ayokmo kinnojnotsaj, kejuak nojkia kinkixtijtoskiaj tlen tlanechikoli. ¡Amo kema kiampa ma tijchiuakaj! Telpokamej katli inintatauaj kinkixtijtokej, tlauel moneki ma tikinyolchikauakaj uan ma tikiniljuikaj kuali kej tlatekipanouaj. Se tosiuaikni katli itoka María, kiijtoua: “Kema noueue kikixtijkej uan techtlauelkajki, se keskij nouampoyouaj ualajkej tochaj, tlakualchijkej uan nechpaleuijkej nikinmachtis nokoneuaj. Kiyolmatkej tlen nijyolmatiyaya uan chokakej nouaya. Nojkia kema se keskij maseualmej nechistlakauijkej, inijuantij nechmanauijkej. Tlauel nechyolchikajki” (Rom. 12:13, 15).

17. ¿Kenijkatsa ueuejtlakamej uelis kinyolchikauasej katli moyolkokouaj?

¹⁷ Ueuejtlakamej, nochipa xikitakaj kenijkatsa uelis inkinyolchikauasej ininchampoyouaj katli kikixtijtokej. Inmojuantij inkipiaj nopa tekitl (1 Tes. 5:14). Xijchiuakaj kampeka inkinyolchikauasej toikniuaj kema ayamo peua o kema tlamis tlanechikoli. Nojkia, uelis inkinpaxalosej uan inkiiljuisej Jehová ma kinpaleui. Uelis intlajtolmoyauasej ininuaya o inkintlaneuisej kema inmomachtiaj ininuaya inmochampoyouaj. Ueuejtlakamej moneki kinextisej kintlasojtlaj toikniuaj, kinikneliaj uan kinpaleuiaj kema moneki (1 Tes. 2:7, 8).

18. Kej kiijtoua 2 Pedro 3:9, ¿tlake kineki Jehová ma kichiuakaj katli kinkixtijtokej?

¹⁸ Jehová “axkineki niyon se ma poliui para nochipa”, yeka kineki ma timoyolkuepakaj (xijpoua 2 Pedro 3:9). Maske  se akajya kichiua se ueyi tlajtlakoli, Jehová nojua kipatiita inemilis. Xikilnamiki, Jehová temaktilik iKone ma techmakixtiki sejse tojuantij. Yeka, ika tlaiknelili kineki kinpaleuis katli ayokmo kitekipanouaj sampa ma tlakuepilikaj ipan itlanechikol. Ya tlauel kineki kiampa ma kichiuakaj, kej kiijtoua ipan nopa tlapoualistli tlen nopa telpokatl katli tlakuepilik kampa itata, katli Jesús kiijtok (Luc. 15:11-32). Miakej katli kinkixtijtoyaj tlen tlanechikoli sampa tlakuepilijtokej kampa ininTata katli tlauel teiknelia, uan toikniuaj tlen tlanechikoli nojkia kuali kinselijtokej. Elizabeth tlauel yolpajki kema ikone sampa tlakuepilik. Ya kiijtoua: “Tlauel nikintlaskamati katli techyolchikajkej uan techiljuijkej tokone tlakuepiliskia”.

19. ¿Kenke nojua uelis timotemachijtosej ipan Jehová?

¹⁹ Nochipa ma timotemachikaj ipan Jehová. Ya amo kema techiljuis ma tijchiuakaj se tlamantli tlen kichiuaskia amo kuali ma tiitstokaj. Jehová eli se Tetaj katli kipaktia temakas tlen kipia, tetlasojtla uan tlauel kiniknelia itekipanojkauaj katli kiikneliaj uan kiueyichiuaj. Ma tikilnamiktokaj, toTeotsij amo kema techtlauelkauas kema tikixnamikisej se tlaouijkayotl (Heb. 13:5, 6). Mark, katli tikijtojkej ipan párrafo 12, kiijtoua: “Jehová amo kema techtlauelkajki. Ya nochipa itstok tonechka kema tikixnamikij tlaouijkayotl”. Jehová nojua techmakatos “nopa ueyi chikaualistli” (2 Cor. 4:7). Nopa techpaleuis nojua ma titlaneltokakaj uan ma timotemachijtokaj ipan tlen tijselisej teipa, maske tlaj se tlen tochampoyouaj kitlauelkauas Jehová.