TLAMACHTILI 39
¿Ijkuilijtok motoka ipan nopa amochtli?
“ToTeko kintlakakilik uan kiijkuilok [...] ipan se libro nepa iixpa ipan iluikaktli kampa kipia nochi inintoka nopa tlakamej tlen kimakasij” (MAL. 3:16).
UIKATL 61 Kuali xijtekipanokaj Jehová
TLEN MOIXTOMAS *
Kej panotiajtok xiuitl, Jehová nojua kiijkuilojtok sekinok inintoka ipan nopa amochtli. (Xikita párrafos 1, 2).
1. Kej kiijtoua Malaquías 3:16, ¿tlake amochtli kiijkuiloua Jehová uan tlake kiijtoua?
IPAN miak xiuitl tlen panotok Jehová kiijkuilojtok se amochtli kampa nesi inintoka miakej maseualmej. Peua ika itoka Abel, se tlakatl katli amo kema kitlauelkajki Jehová (Luc. 11:50, 51). * Uan kej panotiajtok xiuitl, Jehová nojua kiijkuilojtok inintoka tlauel miakej maseualmej. Biblia kitokaxtia ni amochtli: “Se libro [...] kampa kipia nochi inintoka nopa tlakamej tlen kiimakasij”, “amatlapouali tlen kipia ajkeya inijuantij itstosej para nochipa” uan “amatlapouali tlen [...] kipia inintoka nochi tlakamej tlen kipiasej yolistli”. Ipan ni tlamachtili tijtokaxtisej amochtli tlen kiijtoua ajkia itstos nochipa (xijpoua Malaquías 3:16; Apoc. 3:5; 13:8).
2. ¿Ajkia inintoka ijkuilijtok ipan nopa amochtli, uan tlake uelis tijchiuasej tlaj tijnekij ma nesi totoka nopaya?
2 Ipan ni amochtli eltok inintoka nochi katli kiueyichiuaj Jehová, kimakasij kiixpanosej uan kiikneliaj. Inijuantij motemachiaj itstosej nochipa ipan iluikak o ipan Tlaltipaktli. Jehová uelis kiijkuilos totoka ipan nopa amochtli tlaj tijchiuaj kampeka kuali timouampojchiuasej iuaya uan tlaj tijneltokaj iKone Jesucristo katli techmakixtik (Juan 3:16, 36). ¡Nochi tijnekij ma ijkuilijto totoka ipan nopa amochtli!
3, 4. 1) Tlaj totoka ijkuilijtok ipan nopa amochtli, ¿kiijtosneki uelis tiitstosej nochipa? 2) ¿Tlake tikitasej ipan ni tlamachtili uan ipan tlamachtili 40?
3 ¿Temachtli tiitstosej tlaj totoka ijkuilijtok ipan nopa amochtli? Ipan Éxodo 32:33, Jehová kiiljuik Moisés: “Nikixpolos itoka uan nijmiktis tlen noka na tlajtlakolchiua”. Ni kiijtosneki Jehová uelis kiixpolos inintoka katli nesij ipan nopa amochtli pampa kejuak kiijkuilojtok ika lápiz (Apoc. 3:5). Yeka, moneki ma tijchijtokaj kampeka ma ijkuilijto totoka ipan nopa amochtli uan ma tijchixtokaj nopa tonali kema Jehová ayokmo kema kiixpolos.
4 Ni uelis kichiuas ma timotlatsintokikaj: “¿Tlake kiijtoua Biblia kiselisej katli ijkuilijtok inintoka ipan nopa amochtli? ¿Uan tlake kinpanos katli amo ijkuilijtok inintoka? ¿Kema kipiasej nemilistli tlen axkema tlami katli ijkuilijtok inintoka ipan nopa amochtli? ¿Tlake kinpanos katli mijkej uan amo kiixmatkej Jehová? ¿Nojkia ijkuilijtok inintoka?”. Ipan ni tlamachtili monankilis ni tlajtlanili, uan nojkia ipan tlamachtili 40.
¿AJKIA ININTOKA IJKUILIJTOK IPAN NOPA AMOCHTLI?
5, 6. 1) Kej kiijtoua Filipenses 4:3, ¿ajkia inijuantij ijkuilijtok inintoka ipan nopa amochtli? 2) ¿Kema ayokmo ixpoliuis?
5 ¿Ajkia inintoka ijkuilijtok ipan amochtli tlen kiijtoua ajkia itstos nochipa? Achtoui ma tikitakaj ajkia inijuantij itstokej ipan makuili pamitl maseualmej uan kiampa tijnankilisej ni tlajtlanili. Sekij ijkuilijtok inintoka ipan nopa amochtli, uan sekij amo.
6 Nopa achtoui pamitl maseualmej elij katli kintlapejpenijtokej tlanauatisej iuaya Jesús ipan iluikak. ¿Ijkuilijtok inintoka ipan nopa amochtli? Kena. Apóstol Pablo kiniljuik toikniuaj tlen Filipos, katli kintlapejpenijtokej yasej iluikak ijkuilijtok inintoka nopaya (xijpoua Filipenses 4:3). Tlaj amo kinekij ma kiixpolokaj inintoka ipan nopa amochtli, moneki amo kitlauelkauasej Jehová. Uan ayokmo kema ixpoliuis inintoka kema kintlalilisej nopa sello kema mikisej o kema peuas nopa ueyi tlaijiyouilistli (Apoc. 7:3).
7. ¿Kenijkatsa Apocalipsis 7:16, 17 techpaleuia ma tijmatikaj kema ayokmo ixpoliuis inintoka nopa tlauel miakej maseualmej?
7 Nopa ompa pamitl elij nopa tlauel miakej maseualmej katli motemachiaj itstosej ipan Tlaltipaktli. ¿Ijkuilijtok inintoka ipan nopa amochtli? Kena. ¿Nojua ijkuilijtos kema tlamis Armagedón? Kena (Apoc. 7:14). Jesús kiijtok ni maseualmej “itstosej para nochipa” (Mat. 25:46). Uan katli momanauisej kema tlamis Armagedón, amo nima kipiasej nemilistli tlen axkema tlamis. Inintoka ijkuilijtos kejuak san ika lápiz. Kema Jesús tlanauatis Mil Xiuitl, kinuikas kejuak “kampa meya atl tlen yoltok uan tlen temaka yolistli para nochipa”. Katli kineltokasej Jesús uan amo kema kitlauelkauasej Jehová, inintoka ijkuilijtos nochipa ipan nopa amochtli (xijpoua Apocalipsis 7:16, 17).
8. ¿Ajkia inijuantij amo ijkuilijtok inintoka ipan nopa amochtli uan tlake kinpanos?
8 Nopa expa pamitl elij maseualmej katli elij kej chivojmej uan kintsontlamiltisej ipan Armagedón. Inintoka amo ijkuilijtok ipan nopa amochtli. Jesús kiijtok ayokmo kema sampa itstosej (Mat. 25:46). Pablo kiijtok ni maseualmej kintlatsakuiltisej uan kintsontlamiltisej (2 Tes. 1:9; 2 Ped. 2:9). Nojkia kiampa kinpanos maseualmej katli ipan miak xiuitl kiijixnamiktokej toTeotsij itonal. Inijuantij nojkia kintsontlamiltisej uan amo moyolkuisej (Mat. 12:32; Mar. 3:28, 29; Heb. 6:4-6). Ipan sekinok párrafos moixtomas ajkia inijuantij itstosej ipan nopa ome pamitl maseualmej katli moyolkuisej ipan Tlaltipaktli.
KATLI MOYOLKUISEJ
9. Kej kiijtoua Hechos 24:15, ¿ajkia inijuantij itstosej ipan nopa ome pamitl katli moyolkuisej uan kenke amo elij sanse?
9 Biblia kiijtoua moyolkuisej ome pamitl maseualmej katli itstosej ipan Tlaltipaktli: “Tlen kuajkualmej uan tlen axkuajkualmej” (xijpoua Hechos 24:15). “Tlen kuajkualmej” elij katli nochipa kitekipanojkej Jehová. Uan “tlen axkuajkualmej” elij katli amo kitekipanojkej toTeotsij, miakej tlen inijuantij kichijkej se keski tlamantli tlen kiixpanok itlanauatiljuaj. ¿Kiijtosneki nopa ome pamitl maseualmej katli moyolkuisej ijkuilijtok inintoka ipan nopa amochtli? Ma tikitakaj tlake kichijkej ni ome pamitl maseualmej uan kiampa tijnankilisej ni tlajtlanili.
10. ¿Kenke moyolkuisej “tlen kuajkualmej” uan tlake tlateochiualistli kiselisej se keskij? (Nojkia xikita ipan ni pilamochtsi “Tlen maseualmej kinekij kimatisej”, kampa kiixtoma ajkia inijuantij moyolkuisej ipan Tlaltipaktli).
10 Nopa najpa pamitl elij maseualmej “tlen kuajkualmej”. Kema ayamo mikiyayaj ipa ijkuilijtoya inintoka ipan nopa amochtli. ¿Ixpolijki inintoka kema mijkej? Amo, pampa Jehová nojua kinilnamiktok, ya kinita kejuak “noja yoltokej [...] iixtla” (Luc. 20:38). Ni kiijtosneki kema moyolkuisej, inintoka nojua ijkuilijtos ipan nopa amochtli maske kejuak san ika lápiz (Luc. 14:14). Uelis se keskij kinmakasej “tekiuejkayotl” ipan Tlaltipaktli (Sal. 45:16).
11. ¿Tlake monekis kiyekosej “tlen axkuajkualmej” tlaj kinekij nojkia ma moijkuilo inintoka ipan nopa amochtli?
11 Ma tikitakaj nopa makuilpa pamitl maseualmej: “Tlen axkuajkualmej”. Uelis inijuantij amo kiixmatkej itlanauatiljuaj Jehová, yeka amo kuali monejnemiltijkej. Uan inintoka amo ijkuilijtok ipan nopa amochtli. Kema toTeotsij kinyolkuis kinkauas ma kinextikaj tlaj nojkia kinekij ma moijkuilo inintoka. Ni maseualmej monekis tlauel ma kinpaleuikaj pampa achtouia kichijkej tlen tlauel amo kuali. Inijuantij monekis kiyekosej toTeotsij itlanauatiljuaj uan kichiuasej ipan ininnemilis. Nochi ni maseualmej uelis kiixmatisej toTeotsij pampa iTlanauatijkayo kichiuas ma kiixmatikaj.
12. 1) ¿Ajkia inijuantij kinmachtisej “tlen axkuajkualmej”? 2) ¿Tlake kinpanos katli amo kinekisej kichiuasej tlen kinmachtisej?
12 ¿Ajkia inijuantij kinmachtisej “tlen axkuajkualmej”? Nopa tlauel miakej maseualmej uan “tlen kuajkualmej” katli moyolkuisej. ¿Tlake monekis kichiuasej “tlen axkuajkualmej” tlaj kinekisej ma moijkuilo inintoka ipan nopa amochtli? Monekis mouampojchiuasej ika Jehová uan kitekipanosej. Jesús uan katli tlanauatisej iluikak kiitasej tlaj kichiuaj tlen kinnauatiaj (Apoc. 20:4). Tlaj se akajya amo tlaneltokas, kitsontlamiltisej maske ya kipias se 100 xiuitl (Is. 65:20). Jehová uan Jesús kiitaj tlen eltok ipan ininyolo maseualmej, yeka ipan yankuik Tlaltipaktli amo kikauasej ma itsto se akajya katli kichiuas tlen amo kuali (Is. 11:9; 60:18; 65:25; Juan 2:25).
MOYOLKUISEJ KATLI KISELISEJ NEMILISTLI UAN KATLI KINTLAJTOLSENKAUASEJ
13, 14. 1) ¿Kenijkatsa tijkuamachiliyayaj tlen Jesús kiijtok ipan Juan 5:29? 2) ¿Tlake moneki tikitasej kema tijpouaj ni texto?
13 Jesús kiijtok ajkia inijuantij moyolkuiskiaj ipan Tlaltipaktli. Ya kiijtok: “Asis se tonali nojkia kema nochi tlakamej tlen miktokej uan tlen kintlalpachojtokej, nechkakisej uan pankisasej. Tlakamej tlen kichijtokej tlen kuali nikinyolitis uan itstosej para nochipa, pero tlen kichijkej tlen axkuali nikinyolitis para kiselisej tlatsakuiltilistli para nochipa” (Juan 5:28, 29). ¿Tlake kinejki kiijtos?
14 Achtouia tijkuamachiliyayaj Jesús kinekiyaya kiijtos tlen kichiuaskiaj maseualmej teipa kema moyolkuiskiaj. Maske kiampa tijkuamachiliyayaj, ipan texto Jesús amo kiijtoua katli moyolkuisej kichiuasej tlen kuali o kichiuasej tlen amo kuali. Ya kinekiyaya kiijtos tlen kichijkej kema ayamo mikiyayaj. Uan nelia tlen kiijtok, pampa ipan yankuik Tlaltipaktli amo aka kikauasej ma kichiua tlen amo kuali. “Tlen axkuajkualmej” kichijkej tlen amo kuali kema ayamo mikiyayaj. Uajka, ¿tlake kinejki kiijtos Jesús kema kiijtok “nikinyolitis uan itstosej para nochipa” uan “nikinyolitis para kiselisej tlatsakuiltilistli”?
15. ¿Ajkia inijuantij moyolkuisej uan “itstosej para nochipa”, uan kenke?
15 “Tlen kuajkualmej” o katli kichijkej tlen kuali kema ayamo mikiyayaj, moyolkuisej uan “itstosej para nochipa” pampa inintoka ijkuilijtok ipan nopa amochtli. Uajka, ni kiijtosneki “tlen kichijtokej tlen kuali” kej kiijtoua Juan 5:29, elij sanse ika “kuajkualmej” tlen kiijtoua Hechos 24:15. Tlen nikaj moixtoma mouika ika tlen kiijtoua Romanos 6:7, TNM: “Pampa katli miki, kiixtlaua itlajtlakol”. Kema “tlen kuajkualmej” mikij, inintlajtlakoljuaj ixpoliui, uan Jehová kiilnamiki san nopa kuajkuali tlamantli tlen kichijkej (Heb. 6:10). Maske kiampa pano, kema moyolkuisej nojua kichijtosej kampeka amo kema kitlauelkauasej Jehová tlaj amo kinekij inintoka ma ixpoliui ipan nopa amochtli.
16. ¿Tlake kiijtosneki “kinyolkuisej para kiselisej tlatsakuiltilistli”?
16 ¿Tlake kinpanos katli kichijkej tlen amo kuali kema ayamo mikiyayaj? Maske kema mijkej ixpolijki inintlajtlakoljuaj, inijuantij amo kema kitekipanojkej Jehová. Inintoka amo ijkuilijtok ipan nopa amochtli. Uajka, “tlen kichijkej tlen axkuali” uan moyolkuisej, elij sanse ika “tlen axkuajkualmej” tlen kiijtoua Hechos 24:15. Inijuantij “kiselisej tlatsakuiltilistli”. * Ni kiijtosneki kiitasej tlaj nelia kichiuasej tlen kinmachtisej (Luc. 22:30). Monekis panos miak tonali uan kiampa kiitasej ajkia nelnelia kinamiki ijkuilijtos itoka ipan nopa amochtli. Yeka, “tlen axkuajkualmej” monekis ayokmo monejnemiltisej kej achtouia uan kitekipanosej Jehová.
17, 18. 1) ¿Tlake monekis kichiuasej nochi katli moyolkuisej ipan Tlaltipaktli? 2) Kej kiijtoua Apocalipsis 20:12, 13, ¿tlake kintlatsintokisej?
17 “Tlen kuajkualmej” uan “tlen axkuajkualmej” monekis kineltokasej nopa yankuik tlanauatili tlen moixtomas ipan nopa Mil Xiuitl. Apóstol Juan kiijtok kiitak kejuak ipan se temiktli “nochi mijkatsitsij tlen uejueyi uan pilsiltsitsij moketstoyaj iixtla nopa ueyi silla. [...] Uan kitlapok seyok amatlapouali tlen kitlapok kipixki inintoka tlakamej tlen itstosej para nochipa. Uan toTeko kintlajtolsenkajki nochi nopa mijkatsitsij ika tlen ijkuilijtok ipan nopa sekinok amatlapouali pampa kipixkej nochi tlen kichijtoyaj” (Apoc. 20:12, 13).
18 ¿Kenijkatsa kintlajtolsenkauasej katli moyolkuisej? ¿Kintlatsintokisej tlen kichijkej kema ayamo mikiyayaj? Amo. Ma tikilnamikikaj kema mijkej ixpolijki nochi nopa tlajtlakoli tlen kichijkej. Uajka amo kintlajtolsenkauasej ika tlen kichijkej uejkajkia, san kiitasej tlaj kichiuaj tlen kinmachtisej ipan nopa yankuik Tlaltipaktli. Tlaj Noé, Samuel, David, Daniel uan sekinok monekis kineltokasej Jesucristo uan motemachisej ipan imikilis, uajka “tlen axkuajkualmej” nojua tlauel monekis kichiuasej kampeka kuali tlaneltokasej.
19. ¿Tlake kinpanos katli amo kinekisej ma moijkuilo inintoka ipan nopa amochtli?
19 Apocalipsis 20:15 kiijtoua tlake kinpanos katli amo kinekisej kuali tlaneltokasej. Nopaya kiijtoua: “Tlen axkipixkej inintoka ijkuilijtok ipan nopa amatlapouali [...] kinkuamajkajkej ipan nopa tlitl tlen onpano ueyi”. Ni kiijtosneki kintsontlamiltisej uan ayokmo kema sampa itstosej. Yeka, nochipa ma tijchijtokaj kampeka ma ijkuilijto totoka ipan nopa amochtli uan amo kema ma kiixpolokaj.
Se toikni kinmachtia sekinok. Itstokej kema Cristo tekichiuas Mil Xiuitl. (Xikita párrafo 20).
20. ¿Tlake tekitl mochiuas ipan nopa Mil Xiuitl kema Jesús tlanauatis? (Xikita tlaixkopinkayotl ipan ipantsajka).
20 Kema Jesús tlanauatis ipan Mil Xiuitl, panos miak tlamantli tlen tlauel kuali. Ipan nopa tonali nojua tlauel titlajtolmoyauasej uan titlamachtisej ipan nochi Tlaltipaktli. Maske kiampa tijchiuasej, nojkia kiitasej tlaj kuali tlaneltokaj “tlen kuajkualmej” uan “tlen axkuajkualmej” (Is. 26:9; Hech. 17:31). ¿Kenijkatsa kinmachtisej nochi nopa maseualmej? Ipan tlamachtili 40 tikitasej kenijkatsa tijchiuasej uan kenke moneki tijpatiitasej.
UIKATL 147 Tiitstosej nochipa ipan Xochimili
^ Ipan ni tlamachtili tikitasej kenijkatsa moneki tijkuamachilisej tlen Jesús kiijtok ipan Juan 5:28, 29, kampa kiijtok kinyolitis maseualmej katli “itstosej para nochipa” uan katli “kiselisej tlatsakuiltilistli”. Tikitasej tlake kiijtosneki ni tlajtoli uan ajkia inijuantij kinyolkuisej.
^ Ni amochtli pejki moijkuiloua kema pejkej tlakatij maseualmej katli monekiyaya kinmakixtisej (Mat. 25:34; Apoc. 17:8). Yeka Abel itoka achtoui ijkuilijtok.
^ Achtouia nopa tlajtoli “tlatsakuiltilistli” tlen eltok ipan Juan 5:29 tijkuamachiliyayaj kinpanoskia tlen amo kuali maseualmej katli moyolkuiskiaj. Maske ipan tlajtoli griego kena kiampa kiijtosneki, Jesús amo ya nopa kinekiyaya kiijtos. Ya kiampa kiijtok pampa ipan nopa tonali kema moyolkuisej nopa maseualmej, kiitasej kenijkatsa monejnemiltisej. Uan se diccionario griego nojkia kiampa kiijtoua.
