TLAMACHTILI 40
Kinuikasej miakej ipan “ojtli xitlauak”
“Tlakamej tlen tenextilijkej nopa ojtli xitlauak tlauisej keja sitlalimej para nochipa” (DAN. 12:3).
UIKATL 151 Kinnotsas katli miktokej
TLEN MOIXTOMAS *
1. ¿Tlake tlamantli kichiuas ma tiyolpakikaj kema Jesús tlanauatis Mil Xiuitl?
IPAN nopa Mil Xiuitl kema Jesús tlanauatijtos, tlauel tiyolpakisej pampa tikinitasej miakej moyolkuisej. Nochi tijnekij sampa tikinitasej katli tikinikneliaj uan mijkej. Uan Jehová nojkia sampa kineki kinitas (Job 14:15). Ma timoiljuikaj kenijkatsa nochi maseualmej tlauel yolpakisej pampa kinitasej katli kinikneliaj. Kej tikitakej ipan tlamachtili 39, “tlen kuajkualmej” ijkuilijtok inintoka ipan amochtli tlen kiijtoua ajkia itstosej nochipa. Uan kema moyolkuisej, uelis kiselisej nemilistli tlen axkema tlamis (Hech. 24:15; Juan 5:29). Uelis katli achtoui moyolkuisej, elisej katli tlauel tikinikneliaj. * Nojkia tikitakej tlen axkuajkualmej o katli amo kiixmatkej Jehová yon kitekipanojkej, moyolkuisej uan kintlajtolsenkauasej.
2, 3. 1) Kej kiijtoua Isaías 11:9, 10, ¿tlake tlamantli kinmachtisej nochi katli moyolkuisej? 2) ¿Tlake tikitasej ipan ni tlamachtili?
2 Nochi katli moyolkuisej monekis kiyekosej miak tlamantli (Is. 26:9; 61:11). Yeka monekis kiitasej kenijkatsa kinmachtisej (xijpoua Isaías 11:9, 10). “Tlen axkuajkualmej” monekis kiixmatisej Jesucristo, kimatisej tlake eli nopa toTeotsij iTlanauatijkayo, kenke Jesús mijki uan kenke san Jehová kinamiki tlanauatis. Uan “tlen kuajkualmej”, nojkia monekis kikuamachilisej tlake tlamachtili mopatlatiajtok. Se keskij toTeotsij itekipanojkauaj mijkej kema ayamo tlantoyaj kiijkuilouaj Biblia. Uajka, katli amo kuajkualmej uan katli kuajkualmej, monekis momachtisej miak tlamantli.
3 Ipan ni tlamachtili tijnankilisej ni tlajtlanili: ¿kenijkatsa kinmachtisej katli moyolkuisej? ¿Tlake kinpanos katli kiselisej tlen kinmachtisej uan katli amo? Tlauel techpaleuis tlaj tijnankilisej ni tlajtlanili. Tikitasej se keski tlajtolpanextili tlen ijkuilijtok ipan amochtli Daniel uan ipan Apocalipsis, tlen techpaleuis tijkuamachilisej tlake panos kema moyolkuisej. Achtoui tikitasej nopa tlajtolpanextili tlen eltok ipan Daniel 12:1, 2.
“TLEN MIKTOKEJ [...], MOTLALANASEJ”
4, 5. ¿Tlake kiijtoua Daniel 12:1 panoskia ipan itlamia tonali?
4 (Xijpoua Daniel 12:1). Ipan amochtli Daniel kiijtoua kenijkatsa panotias se keski tlamantli ipan itlamia tonali. Se neskayotl, ipan Daniel 12:1 kiijtoua Miguel, katli eli Jesucristo, kinpaleuis toTeotsij itekipanojkauaj. Ni tlajtolpanextili pejki moaxitia ipan 1914, kema Jesús pejki tekichiua ipan toTeotsij iTlanauatijkayo ne iluikak.
5 Daniel nojkia kiiljuijkej kema Jesús peuaskia tekichiuas onkaskia “tlaijiyouilistli tlen más ueyi”, ni tlaijiyouilistli eli sanse ika tlen kiijtoua Mateo 24: 21. Jesús kinmanauis toTeotsij itekipanojkauaj kema tlamis nopa ueyi tlaijiyouilistli, o ipan Armagedón. Ipan amochtli Apocalipsis kiijtoua inijuantij elij nopa tlauel miakej maseualmej katli momanauiaj ipan nopa “ueyi tlaijiyouilistli” (Apoc. 7:9, 14).
6. ¿Tlake panos kema nopa tlauel miakej maseualmej momanauisej ipan ueyi tlaijiyouilistli, uan kenke kiampa tikijtouaj? (Nojkia xikita ipan ni pilamochtsi “Tlen maseualmej kinekij kimatisej”, kampa kiixtoma ajkia inijuantij moyolkuisej ipan Tlaltipaktli).
6 (Xijpoua Daniel 12:2). ¿Tlake panos teipa kema nopa tlauel miakej maseualmej momanauisej ipan nopa ueyi tlaijiyouilistli? Ni tlajtolpanextili kiijtoua moyolkuisej katli miktokej. Achtouia Daniel 12:2 tijkuamachiliyayaj kamanalti tlen katli moyolkuiskiaj iluikak o katli ayokmo kinkajkej ma tlaueyichiuakaj uan sampa pejkej tlajtolmoyauaj ipan 1918. * Nama tijkuamachiliaj elij katli moyolkuisej ipan nopa yankuik Tlaltipaktli. Moyolkuisej kema tlamis itlamia tonali uan kema ya panotos Armagedón.
7. 1) ¿Tlake kiijtosneki katli moyolkuisej kipiasej “yolistli tlen axkema tlamis”? 2) ¿Kenke amo elij sanse ika katli moyolkuikej uejkajkia?
7 Uajka, ¿tlake kineki kiijtos Daniel 12:2 kema kiijtoua katli moyolkuisej kipiasej “yolistli tlen axkema tlamis”? Kiijtosneki katli moyolkuisej monekis kiixmatisej uan kineltokasej Jehová uan Jesús ipan nopa Mil Xiuitl, kiampa kiselisej nemilistli tlen axkema tlamis (Juan 17:3). Inijuantij amo moyolkuisej sanse kej katli moyolkuikej uejkajkia (Heb. 11:35). ¿Kenke? Pampa ayokmo kema mikisej.
8. ¿Tlake kiijtosneki sekij moyolkuisej uan “kipantisej pinaualistli uan tlaijiyouilistli tlen axkema tlamis”?
8 Maske miakej moyolkuisej, amo nochi kinekisej kiixmatisej Jehová. Tlajtolpanextili tlen Daniel, kiijtoua sekij moyolkuisej uan “kipantisej pinaualistli uan tlaijiyouilistli tlen axkema tlamis”. Inintoka ni maseualmej amo moijkuilos ipan amochtli tlen kiijtoua ajkia itstos nochipa yon kiselisej nemilistli tlen axkema tlamis pampa tlauel tlaijixnamikisej, yeka kiselisej “tlaijiyouilistli tlen axkema tlamis” o kintsontlamiltisej. Uajka Daniel 12:2 kamanalti tlen kinpanos katli moyolkuisej pampa kiitasej tlen kichiuasej teipa * (Apoc. 20:12). Sekij kiselisej nemilistli tlen axkema tlamis uan sekij amo.
KINUIKASEJ MIAKEJ IPAN “OJTLI XITLAUAK”
9, 10. ¿Tlake sekinok tlamantli panos kema tlamis nopa ueyi tlaijiyouilistli, uan ajkia inijuantij “tlauisej chikauak” ipan iluikak?
9 (Xijpoua Daniel 12:3). ¿Tlake sekinok tlamantli panos teipa kema tlamis nopa ueyi tlaijiyouilistli? Daniel 12:3 techiljuia tlake panos.
10 ¿Ajkia inijuantij “tlauisej chikauak” ipan iluikak? Tlen kiijtok Jesús ipan Mateo 13:43 techpaleuia ma tijmatikaj. Ya kiijtok: “Nochi nopa tlakamej tlen itstokej xitlauakej iixtla toTeko toTata tlauisej keja tonati nepa kampa toTeko tlanauatia”. Kema Jesús kiijtok nopa, kamanaltiyaya tlen “tlakamej tlen iaxkauaj toTeko” o iikniuaj katli kintlapejpenijtokej ma tlanauatikaj iuaya ipan toTeotsij iTlanauatijkayo (Mat. 13:38). Uajka Daniel 12:3 kamanalti tlen katli kintlapejpenijtokej yasej iluikak uan nopa tekitl tlen kichiuasej ipan nopa Mil Xiuitl kema tlanauatijtos Jesús.
Nopa 144,000 uan Jesucristo, kinyakanasej katli tlamachtisej ipan nopa Mil Xiuitl. (Xikita párrafo 11).
11, 12. ¿Tlake tekitl kichiuasej nopa 144,000 ipan Mil Xiuitl?
11 Katli kintlapejpenijtokej tlanauatisej iluikak kinuikasej miakej ipan “ojtli xitlauak”. ¿Kenijkatsa kichiuasej? Kipaleuisej Jesucristo ma kinyakana nochi katli tlamachtisej ipan Tlaltipaktli ipan nopa Mil Xiuitl. Nopa 144,000 elisej tlanauatianij uan nojkia sacerdotes (Apoc. 1:6; 5:10; 20:6). Inijuantij kinpaleuisej maseualmej yolik ma mochijtiakaj xitlauakej (Apoc. 22:1, 2; Ezeq. 47:12). ¡Tlauel yolpakisej kema kichiuasej nopa tekitl!
12 ¿Ajkia inijuantij kinuikasej ipan nopa “ojtli xitlauak”? Katli moyolkuisej, katli momanauisej kema tlamis Armagedón uan konemej katli tlakatisej ipan yankuik Tlaltipaktli. Uan kema tlamis nopa Mil Xiuitl tlanauatijtos Jesús, nochi maseualmej elisej xitlauakej. Uajka, ¿kema ayokmo ixpoliuis inintoka maseualmej ipan nopa amochtli tlen kiijtoua ajkia itstos nochipa?
SAMPA TECHYEJYEKOSEJ
13, 14. ¿Tlake monekis kinextisej katli elisej xitlauakej tlaj kinekisej kiselisej nemilistli tlen axkema tlamis?
13 Ma tikilnamikikaj maske se akajya elis xitlauak amo nima kipias nemilistli tlen axkema tlamis. Ma timoiljuikaj ipan Adán uan Eva, maske inijuantij eliyayaj xitlauakej amo kineltokakej Jehová, yeka amo kiselijkej nopa nemilistli tlen axkema tlamis (Rom. 5:12).
14 Kej tikitstokej, kema tlamis nopa Mil Xiuitl, nochi maseualmej elisej xitlauakej. ¿Nochipa kipaleuisej toTeotsij iTlanauatijkayo o elisej kej Adán uan Eva, katli kitlauelkajkej Jehová maske eliyayaj xitlauakej? ¿O tlake kichiuasej?
15, 16. 1) ¿Kema sampa monekis amo tijtlauelkauasej Jehová? 2) ¿Uan tlake kiselisej kema kiampa panos?
15 Satanás kitsakuasej mil xiuitl, yeka amo uelis tekajkayauas. Teipa, sampa kikixtisej uan kinekis kinkajkayauas katli xitlauakej. Ipan nopa tonali maseualmej uelis kitlapejpenisej tlaj kipaleuisej Jehová uan kikauasej san ya ma kinyakana o amo (Apoc. 20:7-10). Tlen kichiuasej kinextis tlaj kinamiki ijkuilijtos inintoka ipan nopa amochtli.
16 Maske amo tijmatij keskij, sekij elisej kej Adán uan Eva pampa amo kikauasej Jehová ma kinyakana. ¿Tlake kinpanos ni maseualmej? Apocalipsis 20:15 kiijtoua: “Tlen axkipixkej inintoka ijkuilijtok ipan nopa amatlapouali [...] kinkuamajkajkej ipan nopa tlitl tlen onpano ueyi”. Kej tikitaj, kintsontlamiltisej katli tlaijixnamikisej. Uan miakej maseualmej katli elisej xitlauakej momanauisej, uan inintoka amo kema ixpoliuis ipan nopa amochtli tlen kiijtoua ajkia itstosej nochipa.
IPAN “ITLAMIA TONALI”
17. ¿Tlake kiiljuijkej Daniel panoskia ipan “itlamia tonali”? (Daniel 12:4, 8-10).
17 ¡Tlauel tiyolpakij pampa tijmatij tlen panos teipa! Maske kiampa tijyolmatij, se iluikaejketl nojkia kiiljuik Daniel sekinok tlamantli tlen panoskia ipan “itlamia tonali” (xijpoua Daniel 12:4, 8-10; 2 Tim. 3:1-5). Ya kiiljuik: “Momiakilis miak tlamatilistli”. Ni kiijtosneki nochi Jehová itekipanojkauaj nojua kuali kikuamachiliskiaj tlajtolpanextili tlen eltok ipan amochtli Daniel. Nopa iluikaejketl nojkia kiijtok maseualmej katli amo kuali monejnemiltiaj kichiuaskiaj sekinok tlamantli tlen tlauel amo kuali, uan amo kikuamachiliskiaj ni tlajtolpanextili.
18. ¿Tlake nechka kinpanos katli amo kualmej?
18 Ipan ni tonali katli amo kualmej kichiuaj san tlen inijuantij kinekij (Mal. 3:14, 15). Yeka, Jesús nechka kinxelos katli elij kej “chivojmej” uan katli elij kej “borregojmej” (Mat. 25:31-33). Katli amo kualmej amo momanauisej ipan nopa ueyi tlaijiyouilistli yon moyolkuisej ipan nopa yankuik Tlaltipaktli. Inintoka amo ijkuilijtos ipan nopa amochtli tlen kiijtoua Malaquías 3:16.
19. ¿Tlake moneki tijchiuasej nama, uan kenke? (Malaquías 3:16-18).
19 Ipan ni tonali moneki tijnextisej amo tielij kej katli amo kuali monejnemiltiaj, pampa Jehová kinsentilia katli tlauel kiniknelia uan kinpatiita (xijpoua Malaquías 3:16-18). Uan nochi tijnekij kiampa ma techita.
¡Tlauel tiyolpakisej kema tikinitasej Daniel, katli tikinikneliaj uan sekinok moyolkuij uan kiseliaj tlateochiualistli! (Xikita párrafo 20).
20. ¿Tlake nojkia kitenkauilijkej Daniel, uan kenke tijnekij ma moaxiti?
20 Maske timosentlachiliaj ika tlen pano, teipa nojua tlauel timosentlachilisej pampa panos sekinok tlamantli. Monechkauia kema tlamis nochi tlen amo kuali. Teipa tikitasej kenijkatsa moaxitis tlen Jehová kitenkauilik Daniel: “Kema asis itlamia tonali, timeuas uan tijselis tlen tijtlantok” (Dan. 12:13). ¿Nojkia tijneki tikitas kema Daniel uan katli tikiniknelia moyolkuisej? Uajka xijchiua kampeka amo kema tijtlauelkauas Jehová, uan ya kiijkuilos motoka ipan nopa amochtli tlen kiijtoua ajkia itsto nochipa.
UIKATL 80 Jehová tlauel kuali iyolo
^ Ipan ni tlamachtili moixtomas kenijkatsa kinmachtisej maseualmej katli moyolkuisej kej kiijtoua Daniel 12:2, 3. Tikitasej kema peuas ni tekitl uan ajkia inijuantij tlamachtisej. Nojkia tikitasej tlauel kinpaleuis tlen kiyekosej katli itstosej ipan Tlaltipaktli pampa kiixnamikisej se ueyi tlaouijkayotl kema tlamis nopa Mil Xiuitl.
^ Uelis achtoui moyolkuisej katli amo kitlauelkajkej Jehová uan mijkej ipan itlamia tonali, uan teipa moyolkuisej katli uejkajkia mijkej. Tlaj kiampa panos, maseualmej uelis kinselisej katli kinixmatkej. Biblia kiijtoua katli yasej iluikak, moyolkuij kema kinamiki. Uajka, katli itstosej ipan Tlaltipaktli nojkia moyolkuisej kema kinmelauas (1 Cor. 14:33; 15:23).
^ Ni kipatla tlen kiijtoua amochtli Prestemos atención a las profecías de Daniel, capítulo 17 uan La Atalaya, julio 1, 1987, iamayo 21-25.
^ Hechos 24:15 kiijtoua “tlen kuajkualmej uan tlen axkuajkualmej” uan Juan 5:29 kiijtoua “tlen kichijtokej tlen kuali” uan “tlen kichijkej tlen axkuali”. Ni textos san mosentlalia ipan tlen kichijkej maseualmej kema ayamo mikiyayaj.
