1, 2. ¿Kenijkatsa techpaleuis tlaj timomachtisej tlen kipanok Sansón?

 ¿TLAKE timoiljuia kema tijkaki itoka Sansón? Uelis timoiljuia ipan se tlakatl katli kipixki miak chikaualistli. Pero Sansón nojkia kitlapejpenik se tlamantli tlen amo kuali uan yeka tlaijiyouik. Maske mokuapolok, Jehová mosentlalik ipan nopa kuajkuali tlamantli tlen kinextik, uan yeka kikajki ma moijkuilo tlen kipanok ipan Biblia para techpaleuis.

² Jehová kitekiuik Sansón uan kiampa kinpaleuik israeleuanij. Kema panok miak xiuitl, Jehová kichijki apóstol Pablo ma kiijkuilo itoka Sansón ika sekinok tokajyotl tlen tlakamej katli kuali tlaneltokakej (Heb. 11:​32-34). Sansón motemachik ipan Jehová maske kipixki tlaouijkayotl. Ipan ni tlamachtili tikitasej kenijkatsa techyolchikaua tlen kichijki uan kenijkatsa techpaleuia.

3. ¿Tlake tekitl kimakakej Sansón?

³ Kema Sansón tlakatki, filisteaeuanij tlayakanayayaj ipan Israel uan kintlaijiyouiltiyayaj (Juec. 13:1). Israeleuanij  tlauel tlaijiyouiyayaj pampa filisteaeuanij kinchiuiliyayaj tlen amo kuali. Yeka Jehová kitlapejpenik Sansón para “kipeualtis kinmanauis israelitajmej ininmako nopa filisteos” (Juec. 13:5). Sansón monekiyaya motemachis ipan Jehová tlaj kinekiyaya kichiuas nopa tekitl tlen kiiljuijtoya.

4. ¿Kenijkatsa Jehová kipaleuik Sansón ma kintlani filisteaeuanij? (Jueces 15:​14-16).

⁴ Xikita kenijkatsa Sansón motemachik ipan Jehová uan kenijkatsa kipaleuik. Se tonali, tlateuianij tlen Filistea yajkej Lehí pampa kinekiyayaj kiitskitij Sansón. Judeaeuanij majmauiyayaj, yeka kitemaktilijkej Sansón (Juec. 15:​9-13). Pero “Itonal TOTEKO motlalik ipan Sansón” uan ya motojtonki. Teipa “kipantik se pilburrojtsi ikamachalomiyo tlen noja yankuik eltoya” uan ika nopa kinmiktik mil filisteaeuanij (xijpoua Jueces 15:​14-16).

5. ¿Kenijkatsa Sansón kinextik motemachiyaya ipan Jehová ika tlen kitekiuik kema tlateuik?

⁵ ¿Kenke Sansón kitekiuik ikamachalomiyo se pilburrojtsi? Nopa tlamantli amo aka kitekiuiyaya kema tlateuiyaya. Ni kinextia kenijkatsa Sansón motemachiyaya Jehová kipaleuiskia ma tlatlani uan amo nopa tlamantli tlen ika tlateuiskia. Kena, Sansón kitekiuik tlen eltoya imako para kichiuas tlen Jehová kinauatijtoya uan motemachik ipan ya, yeka Jehová tlauel kiteochijki uan kipaleuik ma tlatlani.

6. ¿Tlake tijyekouaj ika tlen kichijki Sansón kema techmakaj se tekitl ipan tlanechikoli?

⁶ Jehová nojkia techpaleuis ma tijchiuakaj tlen ueli tekitl tlen tijpiasej ipan itlanechikol maske se keski nesi tlauel ouij. Kemantika uelis techpaleuis ika se keski tlamantli tlen amo timoiljuijtoyaj. Tlaj timotemachiaj ipan Jehová, ya techpaleuis ma tijchiuakaj ipakilis uan techmakas chikaualistli sanse kej kichijki ika Sansón (Prov. 16:3).

7. ¿Tlake tlamantli kinextia moneki tijkauasej Jehová ma techyakana?

⁷ Miakej toikniuaj uan tosiuaikniuaj katli tlapaleuiaj kema kichijchiuaj kali kampa titlaueyichiuaj, kinextijtokej motemachiaj  ipan Jehová. Uejkajkia toikniuaj kichijchiuayayaj nochi kali kampa timosentiliaj. Teipa kiitakej monekiyaya kipatlasej se keski tlamantli ipan Jehová itlanechikol. Toikniuaj katli kiyakanaj nopa tekitl momaijtojkej uan kiiljuijkej Jehová ma kinpaleui, yeka moiljuijkej kichiuasej sekinok tlamantli, kej kikouasej se keski kali uan kikualchijchiuasej. Robert, katli miak xiuitl tlapaleuijtok ipan ni tekitl, kiijtoua: “Achtouia miakej kimatkej ouij kichiuasej tlen kiniljuijkej. Tlauel mopatlak tlen tijchijtoyaj miak xiuitl, pero toikniuaj amo kenijki kiitakej kipatlasej tlen kichiuayayaj, uan tikitstokej kenijkatsa Jehová kiteochijtok tlen nama mochiua”. Ni kinextia kenijkatsa Jehová kiyakana itlanechikol uan kiampa mochiua ipakilis. Tlauel kuali tlaj kemantika timotlatsintokiaj: “¿Nijkajtok Jehová ma nechyakana uan nijpatla tlen moneki kema nitlatekipanoua?”.

8. ¿Tlake kichijki Sansón kema tlauel amijki?

⁸ Uelis tikilnamiki sekinok tlamantli tlen kichijki Sansón. Se neskayotl, se tonali moteuik ika se león uan kimiktik. Teipa kinmiktik 30 filisteaeuanij katli euayayaj Asquelón (Juec. 14:​5, 6, 19). Sansón kimajtoya amo ueliskia kichiuas nochi ni tlamantli tlaj Jehová amo kipaleuiskia. Teipa, kinextik tlauel motemachiyaya ipan Jehová kema kinmiktik mil filisteaeuanij uan tlauel amijki. Ya amo kichijki kampeka kipantis atl iselti, kiiljuik Jehová ma kipaleui (Juec. 15:18).

9. ¿Kenijkatsa Jehová kinankilik Sansón? (Jueces 15:19).

⁹ Jehová kichijki ma yoli atl uan kiampa kipaleuik Sansón, uan kema kiijik “pejki kipia más chikaualistli” (xijpoua Jueces 15:19). Kema Jehová kichijki teokamanalojketl Samuel ma kiijkuilo amochtli Jueces, nopa ameli nojua eltoya. Uelis kema israeleuanij kiitayayaj nopa ameli, kiilnamikiyayaj tlaj motemachiyayaj ipan Jehová, ya kinpaleuiskia kema kipiaskiaj tlaouijkayotl.

10. ¿Tlake moneki tijchiuasej tlaj tijnekij Jehová ma techpaleui? (Nojkia xikita tlaixkopinkayomej).

¹⁰ Sanse kej Sansón, nochi moneki tikiljuisej Jehová ma techpaleui. Maske kuali tijchiuaj se keski tlamantli o tijchijtokej se keski tekitl ipan tlanechikoli, Jehová nojua moneki ma techpaleui. Ma tikilnamikikaj amo nochi ueli tijchiuaj, uan san ika itlapaleuil uelis tijchiuasej. Sansón kipixki chikaualistli kema kiijik nopa atl tlen Jehová kimakak. Tojuantij nojkia uelis kuali titlaneltokasej tlaj tijtekiuiaj nochi tlen Jehová techmaka (Mat. 11:28).

11. ¿Tlake moneki tijchiuasej uan kiampa techpaleuis tlen Jehová techmaka, uan tlake techmachtia tlen kichijki se tlakatl iuaya isiua?

¹¹ Ma tikitakaj tlen kipano toikni Alexéi, katli itstok Rusia. Ya tlauel tlaijiyouia pampa ipan ialtepe amo kinkauaj ma kiueyichiuakaj Jehová. ¿Tlake kipaleuijtok ma kiijiyoui nochi tlaouijkayotl? Ya uan isiua nochipa kichiuaj tlamantli tlen kinpaleuia kuali ma tlaneltokakaj. Alexéi kiijtok: “Nijchiua kampeka nimomachtis uan nijpouas Biblia mojmostla. Ika ijnalok, nosiua uan na sansejko tijpouaj nopa amochtli Mojmostla timomachtiaj toTeotsij iTlajtol uan sansejko timomaijtouaj”. ¿Tlake techmachtia? Amo ma timotemachikaj ipan tojuantij, ma timotemachikaj ipan Jehová. Tlaj kiampa tijnekij tijchiuasej, moneki tijpouasej Biblia, timomaijtosej, tiasej tlanechikoli uan titlajtolmoyauasej. Tlaj tijchiuaj nochi ni, Jehová techteochiuas uan techpaleuis nojua kuali ma tijtekipanojtokaj. Jehová nojkia techmakas chikaualistli sanse kej Sansón.

12. ¿Ipan tlake tlamantli mokuapolok Sansón uan kenke tlen kichijki amo elki sanse ika tlen ipa kichijtoya?

¹² Sansón nojkia eliyaya tlajtlakole kej tojuantij. Yeka kemantika mokuapolok. Se tonali amo kuali kitlapejpenik se tlamantli uan tlauel tlaijiyouik pampa amo moiljuik ipan tlen Jehová kiiljuijtoya ma kichiua. Kema ya kiuikayaya se keski xiuitl kintlajtolsenkajtoya israeleuanij, “Sansón kiixmatki se siuatl tlen itoka Dalila tlen tlali Sorec uan kiiknelik” (Juec. 16:4). Kema ayamo kiixmatiyaya Dalila, kinekiyaya mosiuajtis iuaya se siuatl tlen Filistea. Pero Biblia kiijtoua “TOTEKO keja nopa kinekiyaya ma pano. Yajaya kikualtlaliyaya para ika ni tlamantli kintlaniskia nopa filisteos”. Teipa Sansón yajki Gaza, se altepetl tlen Filistea, uan nopaya mokajki ichaj se auilnenkasiuatl. Ipan nopa tonali, Jehová kimakak chikaualistli Sansón uan kichijki ma kikixtili ipuertas nopa altepetl uan kiampa nima kintlaniskiaj ininkualankaitakauaj (Juec. 14:​1-4; 16:​1-3). Pero ika Dalila amo kiampa panok, ya uelis euayaya Israel, yeka nopa amo kipaleuiskia kema kinteuiskia filisteaeuanij.

13. ¿Tlake kichijki Dalila pampa kinekiyaya kikajkayauas Sansón?

¹³ Filisteaeuanij kinekiyayaj Dalila ma kikajkayaua Sansón, yeka kiiljuijkej kimakaskiaj miak platatomij, uan ya kena kinejki kinpaleuis. Pero, ¿kenke Sansón amo kiitak Dalila kinekiyaya kikajkayauas? ¿Uelis tlauel kiixtokayaya? Maske amo tijmatij, Dalila tlauel kitetsopki uan yeka Sansón kiiljuik kenke kipiayaya miak chikaualistli. Tlen Sansón kitlapejpenik, kichijki Jehová ayokmo kuali ma kiita uan yeka ayokmo kipixki chikaualistli se keski tonali (Juec. 16:​16-20).

14. ¿Tlake kipanok Sansón pampa motemachik ipan Dalila?

 ¹⁴ Sansón motemachik más ipan Dalila uan amo ipan Jehová, yeka tlauel tlaijiyouik. Filisteaeuanij kiitskijkej uan kikixtilijkej iixteyol, teipa kitsajkej ipan Gaza, nopa altepetl tlen achtouia kikixtilijtoya ipuertas. Nopaya kichiualtijkej ma tisi kej se tlatekipanojketl. Teipa filisteaeuanij kichijkej se iljuitl uan kimakakej tlakajkaualistli inindios Dagón pampa moiljuiyayaj ya kichijtoya ma kitlanikaj Sansón. Teipa “kikuitoj kampa tlatsaktli uan kiketskej tlatlajko” pampa kinekiyayaj kiuetskilisej uan kipinajtisej (Juec. 16:​21-25).

15. ¿Kenijkatsa Sansón kinextik sampa motemachiyaya ipan Jehová? (Jueces 16:​28-30; xikita tlaixkopinkayotl ipan ipantsajka).

¹⁵ Maske Sansón mokuapolok, nojua kichijki kampeka. Nojua kinekiyaya kinteuis filisteaeuanij kej Jehová kinauatijtoya (xijpoua Jueces 16:​28-30). Yeka kiiljuik Jehová ma kipaleui uan kiampa sampa ueliskia kinteuis filisteaeuanij. ToTeotsij kitlakakilik uan sampa kimakak chikaualistli. Yeka ipan nopa tonali, Sansón kinmiktik más filisteaeuanij uan amo kej achtouia.

16. ¿Tlake techmachtia tlen kichijki Sansón?

¹⁶ Maske Sansón tlauel tlaijiyouik pampa mokuapolok, nojua kichijki kampeka kichiuas tlen Jehová kinauatijtoya. Tlaj tojuantij timokuapolouaj uan techtlalnamiktiaj o techkixtiliaj se tekitl ipan tlanechikoli, moneki tijchiuasej kej Sansón. Ma tikilnamikikaj Jehová amo kema techtlauelkauas (Sal. 103:​8-10). Yeka maske timokuapolouaj, Jehová nojua uelis techtekiuis kej kichijki ika Sansón.

17, 18. ¿Kenke mitsyolchikaua tlen kichijki Michael? (Nojkia xikita tlaixkopinkayomej).

¹⁷ Ma tikitakaj tlen kipanok se toikni telpokatl katli itoka Michael. Ya kipiayaya miak tekitl ipan tlanechikoli pampa eliyaya tlapaleuijketl uan precursor regular. Teipa mokuapolok uan kikixtilijkej nopa tekitl tlen kipixtoya. Ya kiijtoua: “Achtouia nijmatiyaya tlauel kuali nijtekipanouayaya Jehová uan teipa nijmatki ayokmo tleno ueliskia nijchiuas ipan tlanechikoli. Maske nijmatiyaya Jehová amo kema nechtlauelkauaskia, nimotlajtlaniyaya tlaj se tonali sampa kuali nimouikaskia iuaya uan tlaj sampa nijchiuaskia nopa tekitl tlen nijchiuayaya”.

 ¹⁸ Maske Michael mokuapolok, nojua kichijki kampeka. Ya kiijtoua: “Nijchijki kampeka kuali nimouikas iuaya Jehová. Yeka nimomaijtouayaya ika nochi noyolo, nimomachtiyaya uan nimoyoliljuiyaya”. Teipa Michael sampa kitekimakakej ipan tlanechikoli uan nama eli ueuejtlakatl uan precursor regular. Ya kiijtoua: “Ueuejtlakamej tlauel nechpaleuijkej uan nechyolchikajkej, yeka nikitak Jehová nojua nechikneliyaya. Nama sampa nitlatekipanoua ika pakilistli. Tlen nechpanok kinextia Jehová uelis kitlapojpoljuis se akajya katli nelia moyolkuepa”. Sanse kej Michael, uelis timotemachisej maske timokuapolouaj, Jehová nojua uelis techtekimakas uan techteochiuas tlaj tijchiuaj kampeka kuali timonejnemiltisej uan timotemachisej ipan ya (Sal. 86:5; Prov. 28:13).

19. ¿Kenijkatsa mitsyolchikaua tlen kichijki Sansón?

¹⁹ Ipan ni tlamachtili san tikitakej se keski tlamantli tlen kipanok Sansón. Maske ya nojkia eliyaya tlajtlakole uan mokuapolok ika Dalila, kichijki kampeka nojua kuali tlatekipanos. Uan Jehová amo kitlauelkajki uan nojua kitekiuik. Ya kiitak kuali tlaneltokayaya uan kichijki itoka ma moijkuilo ipan Hebreos capítulo 11, kampa nesi inintoka sekinok katli kuali tlaneltokakej. Tlauel techyolchikaua pampa tikitaj Jehová kineki techpaleuis uan techmakas chikaualistli kema tijpiasej tlaouijkayotl. Yeka, ma tijchiuakaj kej Sansón. Ma tikiljuikaj Jehová: “TOTEKO, Ta Tlen Más Tijpia Tlanauatili, xinechilnamiki uan xinechtlakakili san nama. San ni uelta techmaka chikaualistli” (Juec. 16:28).