1. ¿Tlake tekitl kimakakej Pedro kema nechka mikiskia?

 APÓSTOL Pedro nochipa kuali kitekipanok Jehová. Tlajtolmoyajki iuaya Jesús uan ipan sekinok altepemej, uan elki se tlen nopa cuerpo gobernante tlen achtoui siglo. Kema nechka mikiskia, Jehová kimakak seyok tekitl. Ipan xiuitl 62 uan tlanki ipan xiuitl 64 y.u.J., Jehová kichijki ma kiijkuilo ome amatlajkuiloli: 1 Pedro uan 2 Pedro. Pedro kinekiyaya ni ome amatlajkuiloli nojua ma kinpaleui toikniuaj kema ya mikiskia (2 Ped. 1:​12-15).

2. ¿Kenke tlauel kinpaleuik toikniuaj nopa ome amatlajkuiloli tlen Pedro kiijkuilok?

² Pedro kiijkuilok ni ome amatlajkuiloli kema toikniuaj kiixnamikiyayaj miak tlaouijkayotl (1 Ped. 1:6). Itstoyaj se keskij tlakamej katli kimoyauayayaj istlakatili ipan tlanechikoli uan kinekiyayaj kichiuasej toikniuaj ayokmo kuali ma monejnemiltikaj (2 Ped. 2:​1, 2, 14). Cristo itokilijkauaj katli itstoyaj Jerusalén, itstoyaj kema romaeuanij nechka kitsontlamiltiskiaj Jerusalén uan teokali (1 Ped. 4:7). Nopa ome amatlajkuiloli tlen Pedro kiijkuilok, kinpaleuik toikniuaj ma kimatikaj tlake kichiuaskiaj ipan nopa tonali uan nojkia teipa. b

3. ¿Kenke moneki timomachtisej nopa ome amatlajkuiloli tlen kiijkuilok Pedro?

³ Maske Pedro kintlajkuiljuilik toikniuaj tlen achtoui siglo, Jehová kichijki nopa ome amatlajkuiloli ma elto ipan Biblia uan kiampa nojkia techpaleuiskia (Rom. 15:4). Ipan ni tonali, tiitstokej kampa maseualmej kinekij amo kuali ma timonejnemiltikaj  uan tikixnamikij tlaouijkayotl tlen kichiua ouij ma tijmatikaj tijtekipanosej Jehová. Uan nechka peuas nopa ueyi tlaijiyouilistli tlen amo elis sanse ika tlen mochijki kema kitsontlamiltijkej Jerusalén uan nopa teokali. Uajka nopa ome amatlajkuiloli tlen Pedro kiijkuilok, techpaleuia ma tijchiakaj nopa tonali kema Jehová kitsontlamiltis nochi tlen amo kuali, techpaleuia amo ma tikinmakasikaj maseualmej uan ma tikiniknelikaj toikniuaj. Tlen kiijtoua ni ome amatlajkuiloli nojkia kinpaleuis ueuejtlakamej kuali ma kinmokuitlauikaj toikniuaj ipan tlanechikoli.

4. ¿Tlake tlamantli uelis kichiuas ayokmo kuali ma titlaneltokakaj? (2 Pedro 3:​3, 4).

⁴ Miakej maseualmej amo kineltokaj tlen Biblia kiijtoua panos teipa. Techpinajtiaj kema tikiniljuiaj nechka kitsontlamiltisej tlen amo kuali uan techiljuiaj nopa tonali amo kema asis (xijpoua 2 Pedro 3:​3, 4). Tlaj kampa titlajtolmoyauaj, kampa titekitij o tochaj techiljuiaj ni tlamantli, uelis kichiuas ayokmo kuali ma titlaneltokakaj. ¿Tlake techpaleuis tlaj kiampa techpanos? Ma tikitakaj tlen kiijtok Pedro.

5. ¿Tlake techpaleuis ma tijpiakaj toyolo uan ma tijchiakaj kema Jehová kitsontlamiltis tlen amo kuali? (2 Pedro 3:​8, 9).

⁵ Uelis se keskij maseualmej moiljuiaj Jehová amo nima kitsontlamiltia tlen amo kuali. Pero Pedro kiijtok se tlamantli tlen kichiua ma tikilnamikikaj Jehová amo kiita tonali sanse kej tojuantij (xijpoua 2 Pedro 3:​8, 9). Ya kiita mil xiuitl kej se tonali uan kipia iyolo pampa amo kineki yon se akajya ma miki. Maske kiampa eli, Jehová kena kitsontlamiltis tlen amo kuali. Yeka tlauel tiyolpakij pampa nojua ueli titlajtolmoyauaj.

6. ¿Tlake techpaleuis ma tijchixtokaj nopa tonali tlen iaxka Jehová? (2 Pedro 3:​11, 12).

⁶ Pedro kiijtok moneki tijchixtosej nopa tonali tlen iaxka Jehová (xijpoua 2 Pedro 3:​11, 12). ¿Kenijkatsa uelis tijchiuasej ni? Uelis kiampa tijchiuasej tlaj mojmostla timoyoliljuiaj kenijkatsa tiitstosej ipan Xochimili. Ximoiljui kenijkatsa tiyolpakis kema tikijiyotilanas kuali ajakatl uan kema tijkuas tlen kipaleuis motlakayo. Ximoiljui tikinselia katli tikiniknelia pampa moyolkuikej uan tikinixtomilia tlajtolpanextili maseualmej katli uejkajkia mijkej. Tlaj timoyoliljuis ipan ni tlamantli, mitspaleuis tijchixtos nopa tonali tlen iaxka Jehová uan tikilnamiktos tiitstokej ipan itlamia tonali. Tijmatij tlake mosentlalijtok kichiuas toTeotsij teipa, yeka amo tijkauaj ma techkajkayauakaj katli kimoyauaj istlakatili (2 Ped. 3:17).

7. ¿Kenke amo kuali tlaj tikinmakasij sekinok?

⁷ Tijmatij nopa tonali tlen iaxka Jehová monechkauijtiuala. Yeka tijnekij tikiniljuisej maseualmej nopa kuali tlamachtili tlen toTeotsij iTlanauatijkayo. Pero uelis kemantika amo tijnekisej titlajtolmoyauasej pampa tikinmakasij maseualmej. Kiampa kiyolmatki Pedro nopa youali kema nechka kimiktiskiaj Jesús. Kiijtok amo eliyaya se itokilijka uan miakpa kiijtok amo kiixmatiyaya (Mat. 26:​69-75). Pero teipa ayokmo majmajki uan kiijtok: “Amo xikinimakasikaj sekinok, niyon amo ximokuesokaj” (1 Ped. 3:14). Tlen kiijtok kinextia uelis ayokmo tikinmakasisej maseualmej.

8. ¿Tlake techpaleuis ayokmo tikinmakasisej maseualmej? (1 Pedro 3:15).

⁸ ¿Tlake techpaleuis ayokmo ma tikinmakasikaj maseualmej? Pedro kiijtok: “Xijueyimatikaj Cristo ipan inmoyolo” (xijpoua 1 Pedro 3:15). Ni kiijtosneki moneki timoyoliljuisej  ipan nopa tekitl uan ipan nopa tlanauatili tlen kipia toTlanauatijka Jesucristo. Tlaj kema tijneki titlajtolmoyauas timajmaui, ximoyoliljui ipan toTlanauatijka. Ximoiljui itstok iluikak uan inechka itstokej tlauel miakej ángeles. Uan xikilnamiki ya kiselik nochi tlanauatili “ipan iluikak uan ipan tlaltipaktli” uan mitsmokuitlauis “nochi tonali hasta tlamis tlaltipaktli” (Mat. 28:​18-20). Pedro kiijtok nochipa ma timokualtlalijtokaj uan kiampa tijmanauisej tlen tijneltokaj. ¿Mitspaktiskia tijkamanaljuis se akajya tlen Biblia kampa titekiti, kampa timomachtia o sejkanok? Uajka ximoiljui kema uelis tijchiuas uan tlake tikijtos. Xikiljui Jehová ma mitspaleui ayokmo timajmauis. Uan ximotemachi ya mitspaleuis ayokmo tikinmakasis sekinok maseualmej (Hech. 4:29).

9. ¿Kema kinextik Pedro amo teiknelia? (Nojkia xikita tlaixkopinkayotl).

⁹ Pedro kiyekok kenijkatsa kinextis teiknelia. Ya itstoya kema Jesús kiijtok: “Ximoiknelikaj se ika seyok keja na niinmechiknelia. Kena, keja nopa moneki ximoiknelikaj” (Juan 13:34). Maske Jesús kiampa kiijtok, teipa Pedro amo kinejki tlakuas ininuaya maseualmej katli amo eliyayaj judíos pampa kimakasiyaya tlen kiijtoskiaj sekinok. Apóstol Pablo kiijtok Pedro amo kinamikiyaya kiampa kichiuas (Gál. 2:​11-14). Pedro kitlakakilik  tlen kiiljuik Pablo uan ayokmo kiampa kichijki. Ipan nopa ome amatlajkuiloli tlen kiijkuilok, kiijtok amo san moneki tikijtosej tikinikneliaj toikniuaj, moneki tijnextisej.

10. ¿Tlake techpaleuis ma tijnextikaj nelnelia tikinikneliaj toikniuaj? (1 Pedro 1:22).

¹⁰ Pedro kiijtok moneki nelnelia tikiniknelisej toikniuaj (xijpoua 1 Pedro 1:22). Tikinikneliaj sekinok pampa tijchiuaj “tlen kiijtoua nopa tlajtoli tlen melauak tlen Toteko” uan nopaya kiijtoua “Toteko axtechchikoiknelia” (Hech. 10:​34, 35). Tlaj tijnextiaj tikinikneliaj san se keskij toikniuaj ipan tlanechikoli, kiijtosneki amo tijchiuaj tlen Jesús kiijtok. Uelis más kuali timouikaj ininuaya se keskij toikniuaj, sanse kej kipanok Jesús ika se keskij itokilijkauaj (Juan 13:23; 20:2). Pero Pedro techilnamikilik moneki tijnextisej tikinikneliaj nochi toikniuaj, ni kiijtosneki moneki tikiniknelisej sanse kej tikinikneliaj tochampoyouaj (1 Ped. 2:17).

11. ¿Tlake kiijtosneki nelnelia titeiknelisej?

¹¹ Pedro kiijtok: “Nelia ximoiknelikaj se ika seyok ika inmoyolo kuali”. Ipan ni texto nopa tlajtoli “nelia ximoiknelikaj”, kiijtosneki moneki tikiniknelisej sekinok katli amo kuali tikinixmatij. Se neskayotl, ¿tlake tijchiuaskiaj tlaj se toikni techyolkokoua o techchiuilia tlen amo kuali? Uelis tijnekisej timomakuepasej uan amo tijnextisej tikikneliaj. Pero nopa amo kiyolpakiltiskia Jehová, kej Jesús kiiljuik Pedro (Juan 18:​10, 11). Pedro kiijkuilok: “Amo xikinkuepilikaj tlakamej tlen fiero inmechchiuiliaj. Amo xikintlaijiljuikaj tlen inmechtlaijiljuiaj, pero xikinchiuilikaj tlen kuali uan xijtlajtlanikaj Toteko ma kinteochiua” (1 Ped. 3:9). Tlaj nelnelia titeiknelia, tikinchiuilis sekinok tlen kuali uan kuali tikinnojnotsas maske uelis mitsyolkokojkej.

12. 1) ¿Tlake sekinok tlamantli tijchiuasej tlaj nelnelia tikinikneliaj toikniuaj? 2) ¿Tlake techyololinia tijchiuasej nopa video Ma tijchiuakaj kampeka tiitstosej ika tlaseuilistli ininuaya sekinok?

¹² Ipan nopa achtoui amatlajkuiloli tlen Pedro kiijkuilok, kiijtok: “Ximoiknelikaj miak”. Nopa tlaiknelili techpaleuis miakpa ma titetlapojpoljuikaj uan amo san kemantika (1 Ped. 4:8). Kema kiijkuilok ni tlamantli, uelis Pedro kiilnamijki tlen Jesús kimachtik kema kiiljuik kenijkatsa kinamiki titetlapojpoljuisej. Kema Pedro kiiljuik kitlapojpoljuiskia se akajya “hasta chikome uelta”, uelis moiljuik tlauel miakpa tetlapojpoljuiskia. Pero Jesús kiiljuik monekiyaya tetlapojpoljuis “hasta chikompa setenta ueltas”. Nopa kiijtosneki monekiyaya nochipa tetlapojpoljuis uan tojuantij nojkia kiampa moneki tijchiuasej (Mat. 18:​21, 22). Tlaj tijmati ouij tijchiuas ni tlamantli, nojua xijchiua kampeka. Nochi katli tijtekipanouaj Jehová, titlajtlakolejkej, yeka kemantika ouij tijmatij titetlapojpoljuisej. Uajka, ¿tlake uelis tijchiuasej? Moneki tijchiuasej kampeka tijtlapojpoljuisej katli techyolkokok uan sampa kuali timouikasej iuaya. c

13. ¿Kenke ueuejtlakamej uelis ouij kimatij kinmokuitlauisej toikniuaj ipan tlanechikoli?

¹³ Uelis Pedro amo kiilkajki tlen Jesús kiiljuik kema moyolkuik. Ya kiiljuik: “Xikinmokuitlaui notlakauaj keja se kinmokuitlauia iborregojuaj” (Juan 21:16). Tlaj titlatekipanoua kej ueuejtlakatl, tijmati nojkia moneki tijchiuas ni tekitl. Pero uelis tijmati amo tijpia tonali uan kiampa tijchiuas tlen Jesús tlanauatik. Ueuejtlakamej moneki kinpaleuisej  ininchampoyouaj kuali ma itstokaj, kuali ma kiyolmatikaj uan kuali ma tlaneltokakaj. Nojkia, moneki tlajtolmoyauasej uan kuali mokualchijchiuasej para tlamachtisej ipan tlanechikoli uan ipan uejueyi tlanechikolistli. Se keskij kinpaleuiaj toikniuaj Katli kamanaltij ininuaya tepajtianij, uan sekij tlapaleuiaj Kampa kiitaj kenijkatsa ipan nopa altepetl mochijchiua Kali kampa titlaueyichiuaj. Ueuejtlakamej tlauel motekiuiaj pampa kipiaj miak tekitl.

14. ¿Kenke ueuejtlakamej kinekij kinpaleuisej toikniuaj, uan tlake kinpaleuis kiampa ma kichiuakaj? (1 Pedro 5:​1-4).

¹⁴ Pedro kiniljuik sekinok Cristo itokilijkauaj katli nojkia eliyayaj ueuejtlakamej: “Keja tlakamej kinmokuitlauiaj ininborregojuaj, moneki [ . . . ] xikinmokuitlauikaj itlakauaj Toteko” (xijpoua 1 Pedro 5:​1-4). Ueuejtlakamej kinikneliaj toikniuaj uan kinekij kinmokuitlauisej. Pero kemantika uelis ouij kimatij kichiuasej ni tekitl pampa tlauel motekiuijtokej o siajtokej. Tlaj kiampa mitspano, ¿tlake uelis tijchiuas? Xikiljui Jehová tlen tijyolmati. Pedro kiijtok: “Intla se tlen inmojuantij kipia iteki para kinpaleuis sekinok, ma kinpaleui ika nopa chikaualistli tlen Toteko kimaka” (1 Ped. 4:11). Uelis toikniuaj kiixnamikij tlaouijkayotl tlen amo uelis mosenkauas ipan ni tonali. Pero xikilnamiki Jesucristo katli eli nopa “Ueyi Tlamokuitlauijketl”, uelis kichiuas tlen ta amo tiyajati uan kinpaleuis nama uan nojkia ipan Xochimili. Jehová kineki ueuejtlakamej ma kiniknelikaj toikniuaj, ma kinmokuitlauikaj uan ma kinnextilikaj ika tlen kichiuaj kenijkatsa kitekipanosej.

15. ¿Tlake kichiua toikni William pampa kineki kinpaleuis toikniuaj? (Nojkia xikita tlaixkopinkayotl).

¹⁵ Toikni William, katli tlatekipanojtok kej ueuejtlakatl miak xiuitl, tlauel kipatiita kinmokuitlauis toikniuaj. Kema momoyajki COVID-19, ya uan sekinok ueuejtlakamej tlen itlanechikol, kiitakej tlauel monekiyaya kinnojnotsasej sejse semana nochi toikniuaj tlen iningrupo. ¿Kenke? Ya kiijtoua: “Miakej toikniuaj itstoyaj ininselti ininchaj, yeka ueliskia motekipachosej uan moiljuisej tlen amo kuali”. Kema se toikni kipia tlaouijkayotl, William kuali kitlakakilia pampa kineki kimatis tlake kitekipachoua uan tlake kipoloua. Teipa kitemoua se tlamachtili tlen kipaleuis. Uan miakpa kitekiuia videos tlen eltok ipan  jw.org. William kiijtoua: “Ipan ni tonali tlauel moneki tikinpaleuisej toikniuaj. Tijchiuaj se ueyi kampeka kema tikintemouaj maseualmej katli kinekij kiixmatisej Jehová. Uajka nojkia moneki tijchiuasej kampeka tikinpaleuisej toikniuaj ipan tlanechikoli, kiampa inijuantij nojua kitekipanojtosej Jehová”.

16. ¿Kenijkatsa uelis tijchiuasej ipan tonemilis tlen kiijtoua nopa ome amatlajkuiloli tlen Pedro kiijkuilok?

¹⁶ Ipan ni tlamachtili san tikitstokej se keski tlamantli tlen techmachtia nopa ome amatlajkuiloli tlen kiijkuilok Pedro. Uelis tikitstok moneki tijpatlas se keski tlamantli. Se neskayotl, ¿mitspaktiskia más timoyoliljuis kenijkatsa tiitstosej kema toTeotsij kiyankuilis Tlaltipaktli? ¿Timosentlalijtok titlajtolmoyauas kampa titekiti, kampa timomachtia o sejkanok? ¿Timoiljuia ipan tlake sekinok tlamantli uelis tijnextis nelnelia tikiniknelia toikniuaj? Uan tlaj tiueuejtlakatl, ¿timosentlalijtok tijchiuas kampeka tikinpaleuis toikniuaj ika pakilistli? Tlaj tikita nojua mitspoloua tijchiuas se tlamantli, amo ximotekipacho. Xikilnamiki Jesús kipia “ueyi iyolo” uan ya mitspaleuis xijchiua tlen mitspoloua (1 Ped. 2:3). Pedro techiljuia: “Toteko [ . . . ] inmechchiuas inchikajtokej uan intemachmej. Uan inmechmakas yankuik chikaualistli uan tetili pampa inmotlatskilijtokej ipan ya” (1 Ped. 5:10).

17. ¿Tlake tlateochiualistli tijselisej tlaj nochipa tijchiuaj kampeka kuali titlatekipanosej uan tijkauaj Jehová ma techyakana?

¹⁷ Se tonali, Pedro kiijtok amo kinamikiyaya itstos iixpa Jesús (Luc. 5:8). Pero pampa Jehová uan Jesús kiiknelijkej uan kipaleuijkej, Pedro nochipa kuali tlatekipanok. Yeka kikajkej ma tlanauati iuaya Jesús ne iluikak (2 Ped. 1:11). ¡Kiselik se ueyi tlateochiualistli! Tlaj tijchiuaj kampeka tielisej kej Pedro uan tijkauaj Jehová ma techpaleui kuali timonejnemiltisej, uelis timomanauisej uan tiitstosej nochipa (1 Ped. 1:9).