TLAMACHTILI 39
UIKATL 125 Yolpakij katli tetlasojtlaj
Tlaj más titemakaj tlen tijpiaj más tiyolpakisej
“Más tiyolpakis kema titemakas se tlenijki uan amo kej kema tijselis” (HECH. 20:35).
TLEN MOIXTOMAS
¿Tlake techpaleuis más ma titemakakaj tlen tijpiaj uan kiampa más tiyolpakisej?
1, 2. ¿Kenke kej Jehová techchijchijki tlauel techpaleuia?
MÁS tiyolpakij kema titemakaj se tlenijki uan amo kej kema tijseliaj. Kiampa tijyolmatij pampa Jehová kiampa techchijchijki (Hech. 20:35). Kema se akajya techmaka se regalo, kuali tijyolmatij. Pero más tiyolpakij kema tojuantij tikinpaleuiaj sekinok. Tlauel techpaleuia pampa Jehová kiampa techchijchijki. ¿Kenke?
2 Pampa Jehová kiampa techchijchijki, tojuantij uelis tijchiuasej más ma tiyolpakikaj. Tlaj tikitaj kenijkatsa uelis tikinpaleuisej sekinok, tlauel tiyolpakisej. ¡Jehová nelia tlauel kuali techchijchijki! (Sal. 139:14).
3. ¿Kenke Biblia kiijtoua Jehová eli “Dios katli yolpaki”?
3 Biblia kiijtoua katli temakaj tlen kipiaj uan kinpaleuiaj sekinok, tlauel yolpakij. Nojkia kiijtoua Jehová eli “Dios katli yolpaki” (1 Tim. 1:11). Ya eli katli achtoui temakak tlen kipixtoya uan amo aka kichiua kej ya. Apóstol Pablo kiijtok: “Ya techmaka nemilistli, kichiua ma timoojolinikaj uan ma tiitstokaj” (Hech. 17:28). Uan “nochi kuajkuali regalos uan nochi tlamantli tlen amo tleno kipoloua” uala tlen Jehová (Sant. 1:17).
4. ¿Tlake techpaleuis más ma tiyolpakikaj?
4 ¿Tlake uelis tijchiuasej tlaj tijnekij más tiyolpakisej kema titemakasej tlen tijpiaj o tikinpaleuisej sekinok? Ipan ni tlamachtili tikitasej kenijkatsa uelis tikinmakasej tlen tijpiaj uan tikinpaleuisej sekinok, kej Jehová kichiua (Efes. 5:1). Nojkia tikitasej tlake uelis tijchiuasej tlaj tikitaj sekij amo kipatiitaj tlen tijchiuaj. Ni tlamantli techpaleuis nojua ma tikinpaleuikaj sekinok uan más ma tiyolpakikaj.
MA TITEMAKAKAJ TLEN TIJPIAJ SANSE KEJ JEHOVÁ
5. ¿Tlake tlamantli techmaka Jehová?
5 Ma tikitakaj se keski tlamantli tlen kinextia Jehová kipaktia temakas tlen kipia. Ya techmaka tlen techpoloua. Maske ya amo kichiua tlauel ma titlapijpiakaj, kena techmaka tlen moneki kej tlen tijkuasej, timokentisej uan kampa tiitstosej (Sal. 4:8; Mat. 6:31-33; 1 Tim. 6:6-8). Uan amo kichiua san pampa kiampa kinamiki. Uajka ¿kenke kiampa kichiua?
6. ¿Tlake techmachtia Mateo 6:25, 26?
6 Jehová techmaka tlen moneki pampa techiknelia. Ma tikitakaj tlen Jesús kiijtok ipan Mateo 6:25, 26 (xijpoua). Ipan ni versículos Jesús kamanaltik tlen totomej uan kiijtok inijuantij “amo tokaj, amo pixkaj yon kiajokuij inintlakualis”. Uan nojkia kiijtok: “InmoTata katli itstok iluikak kintlamaka”. Teipa tlatsintokak: “¿Amo más inmopati que ne totomej?”. Ika tlen kiijtok, Jesús kinejki techmachtis Jehová más kinpatiita itekipanojkauaj. Tlaj Jehová kinmokuitlauia tlapialmej, uelis timotemachisej nojkia techmokuitlauis. Ya eli toTata uan techiknelia, yeka techmaka tlen techpoloua (Sal. 145:16; Mat. 6:32).
7. ¿Kenijkatsa uelis titemakasej tlen tijpiaj sanse kej Jehová kichiua? (Nojkia xikita tlaixkopinkayomej).
7 Sanse kej Jehová, tojuantij nojkia tikinikneliaj sekinok, yeka tikinmakaj tlen tijpiaj. ¿Tikixmati se toikni katli amo kipia tlen kikuas o tlen mokentis? Jehová uelis mitstekiuis para tikinpaleuis sekinok. Miakej techixmatij pampa kema pano se tlamantli, nochipa titemakaj tlen tijpiaj uan timopaleuiaj. Ma timoiljuikaj ipan tlen panok kema mochijtoya nopa ueyi kokolistli COVID-19. Se keskij toikniuaj temakakej tlakualistli, yoyomitl uan sekinok tlamantli. Nojkia miakej toikniuaj temakakej tomij pampa kinejkej kinpaleuisej nochi toikniuaj ipan Tlaltipaktli katli kintlasojsoljuilijtoya se tlenijki. Nochi inijuantij kichijkej tlen kiijtoua Hebreos 13:16: “Amo xikilkauakaj inkichiuasej tlen kuali uan inkinmakasej sekinok tlen inkipiaj, pampa nopa tlamantli eli kej ofrendas tlen tlauel kiyolpakiltia Dios”.
Nochi uelis titemakasej tlen tijpiaj kej Jehová kichiua. (Xikita párrafo 7).
8. ¿Kenijkatsa techpaleuia pampa Jehová techmaka fuerzas? (Filipenses 2:13).
8 Jehová techmaka fuerzas. Ya kipia miak chikaualistli uan nojkia kipaktia kinmakas itekipanojkauaj katli amo kitlauelkauaj (xijpoua Filipenses 2:13). ¿Tikiljuijtok Jehová ma mitsmaka fuerzas para tikijiyouis tlen mitsyoltilana, tikixnamikis se tlaouijkayotl o tijchiuas se keski tlamantli? Kema tikitak Jehová mitspaleuik, uelis tijyolmatki kej apóstol Pablo, katli kiijkuilok: “Nijpia fuerzas para nikixnamikis nochi, pampa Dios nechmaka chikaualistli” (Filip. 4:13).
9. ¿Kenijkatsa uelis tikinpaleuisej sekinok kej Jehová kichiua? (Nojkia xikita tlaixkopinkayotl).
9 Maske tojuantij amo tijpiaj nopa chikaualistli yon ueli titemakaj kej Jehová kichiua, kena uelis tijkixtisej tonali para tikinpaleuisej sekinok. Tlaj se toikni ya ueyi o mokokoua, uelis tijpaleuisej ika se keski tekitl ipan ichaj o uelis tijtlakouitij. Tlaj tiuelij, uelis titlapaleuisej kema kipojpouaj o kikualchijchiuaj nopa Kali kampa timosentiliaj. Tlaj kiampa tijchiuaj, tlauel tikinpaleuisej toikniuaj.
Uelis tijtekiuisej tochikaualis para tikinpaleuisej sekinok. (Xikita párrafo 9).
10. ¿Kenijkatsa uelis tikinyolchikauasej sekinok ika tlen tikiniljuisej?
10 Ika tlen tikijtosej uelis tikinyolchikauasej sekinok. ¿Tikixmati se akajya katli tlauel kipaleuiskia tlaj tikiljuia se keski tlajtoli? Tlaj kena, uelis tijpaxaloti, tijnojnotsas ika teléfono, tijtitlanilis se tarjeta o se mensaje tlen ika tijyolchikauas. Maske amo moneki tikiljuis miak tlamantli, moneki kisas ipan moyolo. Tlaj tikiljuis se keski tlajtoli ika tlaiknelili, uelis tlauel tijyolchikauas uan tijpaleuis nojua kuali ma tlaneltokato (Prov. 12:25; Efes. 4:29).
11. ¿Kenijkatsa Jehová techmaka tlalnamikilistli?
11 Jehová techmaka tlalnamikilistli. Santiago, se Cristo itokilijka kiijtok: “Tlaj se tlen inmojuantij amo kipia miak tlalnamikilistli, ajachika ma kitlajtlani Dios”. Uan nojkia kiijtok: “Pampa ya ika nochi iyolo kinmaka nochi katli kitlajtlaniaj uan amo teixkoiljuia” (Sant. 1:5). Kej kiijtoua ni versículo, Jehová amo kitlatia o kiiyana itlalnamikilis, ya kinmaka sekinok. Uan kema temaka, amo “teixkoiljuia” o “kinteneuilia”. Nopa kiijtosneki ya amo kineki amo kuali ma tijyolmatikaj kema tijtlajtlaniaj ma techpaleui. Ya kineki ma tijtlajtlanikaj (Prov. 2:1-6).
12. ¿Kenijkatsa uelis tikinnextilisej sekinok tlen tijmatij?
12 Tojuantij nojkia uelis tijchiuasej kej Jehová uan tikinnextilisej sekinok tlen tijmatij (Sal. 32:8). Uelis tijchiuasej ika miak tlamantli, kej tikinmachtisej kenijkatsa tlajtolmoyauasej katli namanok pejtokej tlajtolmoyauaj. Ueuejtlakamej nojkia kipiaj ininyolo kema kinpaleuiaj tlapaleuianij uan sekinok toikniuaj katli ya moatsonpoliuiltijtokej ma kichiuakaj se keski tekitl ipan tlanechikoli. Uan miakej toikniuaj uan tosiuaikniuaj katli kimatij kenijkatsa kichiuasej uan kikualchijchiuasej kali, kinnextiliaj sekinok toikniuaj kenijkatsa uelis kichiuasej se keski tekitl ipan kali kampa timosentiliaj uan ipan sekinok kali kampa tijueyichiuaj Jehová.
13. ¿Kenijkatsa uelis tijchiuasej kej Jehová kema monekis tikinmachtisej sekinok?
13 Katli kinnextiliaj sekinok tlen kimatij, kichiuaj kej Jehová. Kej timomachtijtokej, ya temaka tlalnamikilistli. Tojuantij nojkia tikinnextiliaj sekinok katli namanok kiyekojtokej se tlamantli. Tikinmachtiaj nochi tlen tijmatij uan amo timoiljuiaj katli tijmachtiaj techtekikixtilis yon timoiljuiaj: “Iselti ma momachti, ¡na amo aka nechmachtik!”. Katli tijtekipanouaj Jehová, amo kinamiki kiampa timoiljuisej. Amo san tikinnextiliaj sekinok nochi tlen tijmatij, nojkia tikinmachtiaj kenijkatsa kichiuasej (1 Tes. 2:8). Kema kiampa tijchiuaj, uelis timotemachisej “inijuantij kimatisej kenijkatsa kinmachtisej sekinok” (2 Tim. 2:1, 2). Tlaj tikinnextiliaj sekinok tlen tijmatij, nochi tiyolpakisej uan tijpiasej tlalnamikilistli.
¿UAN TLAJ TIKITAJ AMO KIPATIITAJ TLEN TIJCHIUAJ?
14. ¿Tlake pano kema tikinpaleuiaj sekinok?
14 Kema tikinpaleuiaj toikniuaj, inijuantij kinextiaj tlauel kipatiitaj kema techtlaskamatiliaj. Uelis kiampa kinextiaj kema techmakaj se nota o ika sekinok tlamantli (Col. 3:15). Kema kiampa kichiuaj, tlauel tiyolpakij.
15. ¿Tlake moneki tikilnamikisej tlaj amo techtlaskamatiliaj tlen tijchiuaj?
15 Moneki tikilnamikisej amo nochi techtlaskamatilisej tlen tijchiuasej, maske tijkixtisej tonali, tikinmakasej tlen tijpiaj uan tijtekiuisej tochikaualis para tikinpaleuisej. Tlaj kiampa techpanos, ¿tlake techpaleuis nojua ma tiyolpaktokaj? Ma tikilnamikikaj tlen kiijtoua Hechos 20:35. Tlauel tiyolpakij kema titemakaj tlen tijpiaj maske uelis amo techtlaskamatiliaj, yeka nojua moneki tijchiuasej kampeka titepaleuisej. Ma tikitakaj se keski tlamantli tlen uelis techpaleuis.
16. ¿Ipan tlake moneki timosentlalisej?
16 Xikilnamiki, kema titemaka tijchiua kej Jehová. Ya kinmaka maseualmej tlen moneki maske kemantika amo kipatiitaj (Mat. 5:43-48). Jehová kiijtojtok tlaj itekipanojkauaj temakaj tlen kipiaj uan amo kichiaj ma kinkuepilikaj, kiselisej miak tlateochiualistli (Luc. 6:35). Yeka, amo ximoyolkoko tlaj sekinok amo nochipa mitstlaskamatiliaj tlen tijchiua. Xikilnamiki Jehová nochipa mitsteochiuas pampa tikinpaleuia sekinok uan pampa titemaka “ika pakilistli” (2 Cor. 9:7; Prov. 19:17).
17. ¿Tlake techpaleuis ma timosentlalikaj tijchiuasej kej Jehová? (Lucas 14:12-14).
17 Seyok texto tlen mitspaleuis titemakas kej Jehová kichiua, eli tlen kiijtoua Lucas 14:12-14 (xijpoua). Kemantika amo kenijki tlaj tikinpaleuiaj katli nojkia ueliskia techpaleuisej. Pero tlaj tikitaj tikinpaleuiaj sekinok san pampa nojkia tijnekij ma techpaleuikaj, moneki tijchiuasej tlen Jesús kiijtok: ma tikinpaleuikaj katli amo uelis techkuepilisej tlen tikinmakaj. Tlaj kiampa tijchiuaj, tlauel tiyolpakisej pampa tijchiuasej kej Jehová. Tlaj amo tijchiaj ma techkuepilikaj tlen titemakaj, nochipa titemakasej ika pakilistli maske sekij amo techtlaskamatilisej.
18. ¿Tlake techpaleuis amo ma timoiljuikaj tlen amo kuali tlen toikniuaj?
18 Amo ximoiljui sekij amo kuali ininyolo (1 Cor. 13:7). Tlaj tijpaleuiaj se akajya uan amo techtlaskamatilia, uelis timotlatsintokiliaj: “¿Amo kipatiita tlen nijchijki o kiilkajki nechtlaskamatilis?”. O uelis onka sekinok tlamantli tlen kichiua nopa maseuali kiampa ma eli. Uelis tlauel kipatiita tlen tijchijkej, pero kimati ouij kiijtos tlen kiyolmati o pinaua pampa nama ayokmo ueli tepaleuia uan moneki sekinok ma kipaleuikaj. Maske kiampa techpanos, amo ma timoiljuikaj tlen amo kuali tlen toikniuaj uan nojua ma tikinpaleuikaj ika pakilistli pampa tlauel tikinikneliaj (Efes. 4:2).
19, 20. ¿Kenke moneki amo tijchiasej nima ma techtlaskamatilikaj? (Nojkia xikita tlaixkopinkayomej).
19 Amo xijchia nima ma mitstlaskamatilikaj. Tlanauatijketl Salomón kiijtok: “Xitemajmaka miak pampa teipa, ika miak tonali, sampa asiki momako” (Ecl. 11:1). Tlen kiijtoua ni texto, techpaleuia ma tikitakaj kemantika uelis techtlaskamatilisej tlen tijchiuaj kema ya panotos miak tonali. Ma tikitakaj se neskayotl tlen kiampa kinextia.
20 Kipia miak xiuitl, isiua se toikni katli tepaxaloua chijchikuasej metstli, kititlanilik se nota se tosiuaikni katli namanok moatsonpoliuiltijtoya, kampa kiiljuiyaya amo kema ma kitlauelkaua Jehová. Kema panotoya chikueyi xiuitl, nopa tosiuaikni kinankilik ika se carta kampa kiijtouayaya: “Nimitstlajkuiljuilia pampa nijneki nimitsiljuis miak xiuitl tlauel tinechpaleuijtok maske amo tijmatiyaya”. Nojkia kiijtouayaya: “Tlauel nechyolchikajki tlen tikijkuilok ipan nopa nota uan amo nikilkaua nopa texto tlen tikijkuilok”. a Kema kipouilik se keski tlaouijkayotl tlen kiixnamiktoya, nojkia kiijtok: “Kemantika amo kuali nijyolmatiyaya uan nijnekiyaya nijtlauelkauas Jehová, pero nopa texto tlen tikijkuilok, nechpaleuik nojua ma nijchiua kampeka nijtekipanos Jehová. Ipan nopa chikueyi xiuitl tlen panotok, nopa texto tlauel nechpaleuijtok”. Isiua nopa toikni katli tepaxaloua chijchikuasej metstli, tlauel yolpajki kema kiselik nopa carta. Tlaj tijpaleuijkej se akajya, uelis nojkia techtlaskamatilis kema ya panotos miak tonali.
Uelis se akajya techtlaskamatilis tlen tijchijkej kema ya panotos miak tonali. (Xikita párrafo 20). b
21. ¿Kenke moneki tijchiuasej kampeka titemakasej tlen tijpiaj kej Jehová kichiua?
21 Kej tikitakej ipan ni tlamachtili, kema Jehová techchijchijki, kichijki más ma tiyolpakikaj kema titemakaj se tlamantli uan amo kej kema tijseliaj. Kuali tijyolmatij kema tikinpaleuiaj toikniuaj uan techpaktia ma techtlaskamatilikaj. Tlaj techtlaskamatiliaj o amo, uelis tiyolpakisej pampa tijchiuaj tlen Jehová kipaktia. Xikilnamiki tlen kiijtoua 2 Crónicas 25:9: “TOTEKO kipia chikaualistli para mitsmakas noja más miak”. San Jehová techmaka miak tlamantli. Uan tlauel tiyolpakij pampa ya techteochiua. Yeka, moneki tijchiuasej kampeka titemakasej kej Jehová.
UIKATL 17 “Kena nijneki”
a Nopa texto eliyaya 2 Juan 8, tlen kiijtoua: “Titekititokej chikauak nopano kampa inmojuantij para uelis inkiselisej se tlaxtlauili ipan nopa tonal kema Toteko temakas. Ximotlachilikaj para amo xijpolokaj. Ximotlachilikaj uan Toteko asitok inmechtlaxtlauis”.
b TLEN NESI IPAN TLAIXKOPINKAYOMEJ: Ipan ni tlaixkopinkayotl nesi isiua nopa toikni katli tepaxaloua chijchikuasej metstli, kitlakuiljuilia se tosiuaikni para kiyolchikauas. Kema pano se keski xiuitl, kiselia se carta kampa nopa tosiuaikni kitlaskamatilia.
