1. ¿Tlake tlamantli nechka kichiuas Jesús?

 IPAN ni tonali nechka mopatlas miak tlamantli tlen amo kema panotoya. Nechka Jesús kintlajtolsenkauas nochi katli itstokej ipan Tlaltipaktli. ¿Kenke tikijtouaj nechka moaxitis nopa tlamantli? Pampa Jesús kiniljuik itokilijkauaj se tlajtolpanextili tlen kinpaleuiskia ma kiitakaj kema sampa ualaskia, uan kema “nechka tlamis tlen mochijtok ipan Tlaltipaktli” (Mat. 24:3). Uelis tijpouasej ni tlajtolpanextili ipan Mateo capítulo 24 uan 25, ipan Marcos capítulo 13 uan ipan Lucas capítulo 21.

2. ¿Tlake tikitasej ipan ni tlamachtili, uan kenke?

² Jesús kiijtok eyi tlapoualistli tlen techpaleuis ma timokualchijchijtokaj: nopa tlapoualistli tlen pilborregojtsitsij uan chivomej, tlen nopa matlaktli ichpokamej uan nopa talentos. Sejse tlen nopa tlapoualistli kinextia tlen Jesús kiitas ipan sejse maseuali kema tetlajtolsenkauas. Ipan ni tlamachtili tikitasej tlake techmachtia uan tlake uelis tijchiuasej. Achtoui ma tikitakaj nopa tlapoualistli tlen nopa pilborregojtsitsij uan chivojmej.

NOPA PILBORREGOJTSITSIJ UAN NOPA CHIVOJMEJ

3. ¿Kema Jesús kintlajtolsenkauas maseualmej?

³ Jesús kiijtok kema kitlajtolsenkauas sejse maseuali, kiitas tlaj kiselik nopa kuali tlamachtili uan tlaj kinpaleuik katli kintlapejpenijtokej yasej iluikak (Mat. 25:31-46). ¿Kema kiijtos Jesús tlaj se akajya eli kejuak se pilborregojtsi o se chivo? Ipan “ueyi tlaijiyouilistli”, kema nechka peuas Armagedón (Mat. 24:21). Sanse kej se tlapialmokuitlauijketl kinxeloua  pilborregojtsitsij tlen chivojmej, Jesús nojkia kinxelos katli kinpaleuiaj tlapejpenilmej uan katli amo.

4. Kej kiijtoua Isaías 11:3, 4, ¿kenke uelis timotemachisej Jesús xitlauak kitlajtolsenkauas maseualmej? (Nojkia xikita tlaixkopinkayomej ipan ipantsajka).

⁴ Jehová kiiljuik Jesús ma tetlajtolsenkaua, uan Biblia kiijtoua ya xitlauak tetlajtolsenkauas (xijpoua Isaías 11:3, 4). Ya kiitas tlen maseualmej moiljuiaj, kiijtouaj uan kichiuaj. Uan nojkia kiitas tlaj kinpaleuijkej katli kintlapejpenijtokej yasej iluikak (Mat. 12:36, 37; 25:40). Jesús kimatis ajkia inijuantij kinpaleuijkej tlapejpenilmej uan nopa tekitl tlen kichijkej. a Katli tijtekipanouaj Jehová, tijnextiaj tikinpaleuiaj tlapejpenilmej kema titlajtolmoyauaj. Tlaj kiampa tijchiuaj, Jesús techitas tixitlauakej uan uelis tiitstosej nochipa ipan Tlaltipaktli (Mat. 25:46; Apoc. 7:16, 17). ¡Tijselisej se ueyi tlateochiualistli pampa amo tijtlauelkauasej Jehová! Tlaj nojua kiampa tijchiuaj ipan ueyi tlaijiyouilistli uan kema ya panotos, totoka nojua ijkuilijtos ipan nopa “amatlapouali tlen kiijtoua ajkia inijuantij kipiaj yolistli” (Apoc. 20:15).

5. ¿Tlake techmachtia nopa tlapoualistli tlen pilborregojtsitsij uan chivojmej, uan ajkia inijuantij kinpaleuia?

⁵ Xijnexti amo titetlauelkaua. Nopa tlapoualistli tlen pilborregojtsitsij uan chivojmej, kinpaleuia katli motemachiaj itstosej nochipa ipan Tlaltipaktli. Inijuantij kinextiaj amo tetlauelkauaj kema kinpaleuiaj Cristo iikniuaj ipan tlajtolmoyaualistli uan kema kinneltokaj katli Jesús kintlapejpenijtok ma kinyakanakaj (Mat. 24:45). Pero katli motemachiaj yasej iluikak, nojkia moneki kichiuasej tlen techmachtia ni tlapoualistli. ¿Kenke kiampa tikijtouaj? Pampa Jesús kiita nochi tlen kichiuaj, moiljuiaj uan kiijtouaj. Uajka, inijuantij nojkia moneki kinextisej amo kitlauelkauaj Jehová. Ipan Mateo Capítulo 25, nojkia tijpantiaj ome tlapoualistli kampa kiijtoua tlen moneki kichiuasej tlapejpenilmej. Ma tikitakaj nopa tlapoualistli tlen matlaktli ichpokamej.

NOPA MATLAKTLI ICHPOKAMEJ

6. ¿Kenijkatsa kinextijkej tlalnamikiyayaj nopa makuiltij ichpokamej? (Mateo 25:6-10).

⁶ Ipan ni tlapoualistli, Jesús kamanaltik tlen matlaktli ichpokamej katli yajkej kinamikitoj katli mosiuajtiskia (Mat. 25:1-4). Nochi kinekiyayaj itstosej iuaya ipan nopa iljuitl. Jesús kiijtok makuiltij tlen inijuantij “tlalnamikiyayaj” uan nopa sekinok “eliyayaj uiuitikej”. Katli tlalnamikiyayaj mokualchijchijtoyaj uan kuali tlachixtoyaj. Mosentlalijtoyaj kichiasej maske tlauel uejkauaskia o asiskia tlauel tlayoua, yeka kiuikayayaj inintlauil ika aceite, uan nojkia kiuikayayaj más aceite ipan se piltekontsi, kiampa nojua motlauiliskiaj (xijpoua Mateo 25:6-10). Kema katli mosiuajtiskia asito, nopa makuiltij ichpokamej katli tlalnamikiyayaj, kalajkej iuaya ipan nopa iljuitl. Katli kintlapejpenijtokej yasej iluikak nojkia kiampa kinpanos. Tlaj amo kitlauelkauasej Jehová uan kichiasej Jesús, katli mosiuajtis, kalakisej iuaya ipan iTlanauatijkayo (Apoc. 7:1-3). b ¿Uan tlake kinpanok nopa sekinok makuiltij ichpokamej?

7. ¿Tlake kinpanok nopa makuiltij ichpokamej katli eliyayaj uiuitikej, uan kenke?

⁷ Nopa makuiltij ichpokamej katli eliyayaj uiuitikej, amo mokualchijchijtoyaj kema  asito katli mosiuajtiskia. Nopa tlapoualistli kiijtoua kema nechka asiskia katli mosiuajtiskia, kiitakej nechka seuiskia inintlauil, uan pampa amo kiuikayayaj más aceite, monejki yasej kikouatij. Pero kema asito katli mosiuajtiskia, inijuantij ayamo asiyayaj. Uajka, “nopa ichpokamej katli kikualtlalijtoyaj inintlauil kalajkej iuaya ipan iljuitl, uan motsajki nopa puerta” (Mat. 25:10). Teipa, kema tlakuepilijkej nopa ichpokamej katli eliyayaj uiuitikej uan kinejkej kalakisej ipan nopa iljuitl, katli mosiuajtiskia kiniljuik: “Na amo niinmechixmati” (Mat. 25:11, 12). Amo mokualchijchijtoyaj para kichiasej katli mosiuajtiskia. ¿Tlake kinmachtia katli kintlapejpenijtokej yasej iluikak ni tlapoualistli?

8, 9. ¿Tlake kinmachtia katli yasej iluikak nopa tlapoualistli tlen matlaktli ichpokamej? (Nojkia xikita tlaixkopinkayomej).

⁸ Xijnexti kuali titlachixtok uan timokualchijchijtok. Jesús amo kinejki kiijtos onkaskia ome pamitl katli yaskiaj iluikak: katli kena mokualchijchijtoskiaj uan kichiaskiaj hasta kema kitsontlamiltis tlen amo kuali uan katli amo mokualchijchijtoskiaj (Juan 14:3, 4). Tlaj timotemachiaj tiitstosej ipan Tlaltipaktli o ipan iluikak, nochi moneki tijchiuasej tlen techmachtia nopa tlapoualistli tlen matlaktli ichpokamej: moneki kuali titlachixtosej uan timokualchijchijtosej para tikijiyouisej tlen techpanos (Mat. 24:13).

⁹ Kej tikitakej ipan nopa tlapoualistli tlen matlaktli ichpokamej, Jesús kiijtok tlauel ipati kuali titlachixtosej uan timokualchijchijtosej. Teipa, nojkia kiijtok nopa tlapoualistli tlen talentos uan kiampa kinextik moneki tlauel titekitisej.

NOPA TALENTOS

10. ¿Kenijkatsa omej tlatekipanouanij kinextijkej kuali tekitiyayaj? (Mateo 25:19-23).

¹⁰ Ipan ni tlapoualistli, Jesús kamanaltik tlen ome tlatekipanouanij katli kuali kitekipanojkej iteko, uan se katli amo (Mat. 25:14-18). Kema ininteko yaskia seyok altepetl,  kinkauilijtejki itekipanojkauaj se keski talentos, tlen eliyaya tlauel miak tomij. Omej itekipanojkauaj kinextijkej tlauel tekitiyayaj, pampa kichijkej kampeka kitlanisej más tomij ika tlen ininteko kinkauilijtejki. ¿Tlake panok pampa kiampa kichijkej? Ininteko tlauel yolpajki pampa kitlanilijkej ompa uelta nopa tomij tlen kinmakatejki. Yeka kiniljuik: “Xiuala uan xiyolpaki iuaya moteko” (xijpoua Mateo 25:19-23). ¿Uan tlake kichijki nopa seyok tlatekipanojketl ika nopa tomij tlen kimakatejkej?

11. ¿Tlake kipanok nopa tlatekipanojketl katli tlatsiuiyaya, uan kenke?

¹¹ Ininteko nojkia kimakak se talento nopa seyok tlatekipanojketl pampa kinekiyaya ma tekiti uan ma kitlani más tomij. Pero nopa tlatekipanojketl tlatsiuiyaya, yeka kitlaltojki nopa talento. Kema ininteko tlakuepilik, nopa tlatekipanojketl san kikuepilik nopa tomij. Ya amo kiiljuik iteko ma kitlapojpoljui uan kiijtok “chikauak tlanauatia”. Yeka, iteko kiajuak, kikixtilik nopa talento uan kikixtik tlen ichaj (Mat. 25:24, 26-30).

12. ¿Ajkia kinixnextia ipan ni tonali nopa omej tlatekipanouanij katli chikauak tekitikej?

¹² Nopa omej tlatekipanouanij katli kuali tekitikej, kinixnextiaj katli kintlapejpenijtokej yasej iluikak. Jesús, katli eli ininteko kiniljuia: “Xiuala uan xiyolpaki iuaya moteko”. Nopa nojkia kiijtosneki kiselisej tlen kintenkauilijkej, pampa achtoui moyolkuisej (Mat. 25:21, 23; Apoc. 20:5). Uan tlen kichijki nopa tlatekipanojketl katli tlatsiui, nojkia kinmachtia tlen amo moneki kichiuasej katli kintlapejpenijtokej yasej iluikak. Ma tikitakaj kenke.

13, 14. ¿Tlake kinmachtia nopa tlapoualistli tlen talentos katli kintlapejpenijtokej yasej iluikak? (Nojkia xikita tlaixkopinkayomej).

¹³ Xijnexti tlauel titekiti. Ipan tlapoualistli tlen talentos, Jesús amo kinekiyaya kiijtos tlapejpenilmej tlatsiuiskiaj. Ya kinmachtijtoya se tlamantli tlen tlauel ipati kej ipan tlapoualistli tlen nopa matlaktli ichpokamej. Uan kiniljuik tlaj ayokmo mosentlaliskiaj tlatekipanosej, uajka ayokmo motemachiskiaj “Dios nojkia kinnotstok  uan kintlapejpenijtok”, yon yaskiaj iluikak (2 Ped. 1:10).

¹⁴ Ika nopa tlapoualistli tlen matlaktli ichpokamej uan nopa talentos, Jesús kinmachtik katli kitlapejpenijtokej yasej iluikak moneki mokualchijchijtosej, kuali tlachixtosej uan chikauak tekitisej. Pero ipan Mateo 24:40, 41, Jesús nojkia kiniljuik seyok tlamantli tlen monekiyaya kichiuasej. Ma tikitakaj ni textos.

¿AJKIA “KIUIKASEJ”?

15, 16. Kej kiijtoua Mateo 24:40, 41, ¿kenke katli kintlapejpenijtokej yasej iluikak moneki kuali tlachixtosej?

¹⁵ Kema Jesús ayamo kiijtouayaya nopa eyi tlapoualistli, kiijtok kichiuaskia se tlamantli tlen kinextiskia ajkia inijuantij nelnelia yaskiaj iluikak. Ya kamanaltik tlen omej tlakamej katli tekitiyayaj mila uan omej siuamej katli tisiyayaj. Maske nesi kichijtokej sanse tekitl, Jesús kiijtok: “Se kiuikasej uan se kikajteuasej” (xijpoua Mateo 24:40, 41). Ipan nopa seyok versículo kiniljuik itokilijkauaj: “Nochipa kuali xitlachixtokaj, pampa amo inkimatij tlake tonali uala inmoTeko” (Mat. 24:42). Jesús nojkia kiampa kiijtok kampa tlami nopa tlapoualistli tlen matlaktli ichpokamej (Mat. 25:13). Uajka, nopa ome tlamantli tlen Jesús kiijtok eli sanse. Ya kiixtonki se tonali kiitaskiaj ajkia inijuantij nelnelia kintlapejpenijtokej yasej iluikak. Uan san katli nelnelia kintlapejpenijtokej uan amo kema kitlauelkauaj Jehová, Jesús kinuikas ipan iTlanauatijkayo (Juan 14:3).

¹⁶ Xijnexti kuali titlachixtok. Tlaj se katli kitlapejpenijtokej yas iluikak amo mosentlalia kitekipanos Jehová, amo mosansejkotilis ininuaya nopa sekinok tlapejpenilmej (Mat. 24:31). Pero nochi katli motemachiaj itstosej ipan Tlaltipaktli, nojkia moneki kitlakakilisej tlen Jesús kiijtok, kuali tlachixtosej uan amo kitlauelkauasej.

17. ¿Kenke amo timotekipachouaj tlaj Jehová kintlapejpenia se keskij ipan ni tonali ?

¹⁷ Tojuantij kuali tikixmatij Jehová uan timotemachiaj nochi tlen kitlapejpenia kisa kuali. Yeka, amo timotekipachouaj tlaj Jehová kintlapejpenia se keskij itekipanojkauaj ipan ni tonali. c Ma tikilnamikikaj nopa tlapoualistli kampa se tlakatl kiniljuik sekinok tlakamej ma yakaj tekititij kema ya eliyaya tiotlak (Mat. 20:1-16). Inijuantij kintlaxtlauijkej sanse kej katli tekititoyaj se tonal. Nochi tlapejpenilmej katli kuali tlaneltokaj, yasej iluikak maske namanok kintlapejpenijkej o uejkajkia.

NOCHIPA KUALI XITLACHIXTO

18, 19. ¿Tlake techmachtia tlen tikitstokej ipan ni tlamachtili?

¹⁸ ¿Tlake tikitstokej ipan ni tlamachtili? Nopa tlapoualistli tlen pilborregojtsitsij uan chivojmej, kinextia kenke tlauel ipati katli motemachiaj itstosej ipan Tlaltipaktli amo ma kitlauelkauakaj Jehová, ipan ni tonali uan ipan ueyi tlaijiyouilistli. Ipan nopa tonali, Jesús tetlajtolsenkauas uan kiijtos ajkia inijuantij amo kitlauelkajkej uan “kipiasej nemilistli tlen amo kema tlamis” (Mat. 25:46).

¹⁹ Nojkia tikitstokej ome tlapoualistli tlen kinmachtia se keski tlamantli katli kintlapejpenijtokej yasej iluikak. Ipan nopa tlapoualistli tlen nopa matlaktli ichpokamej, makuiltij tlen inijuantij kinextijkej mokualchijchijtoyaj uan kuali tlachixtoyaj. Kinextijkej tlalnamikiyayaj uan mosentlalijtoyaj kichiasej katli mosiuajtiskia maske  uejkauaskia. Uan pampa nopa sekinok eliyayaj uiuitikej, amo mokualchijchijtoyaj. Yeka, katli mosiuajtiskia amo kinkajki ma kalakikaj ipan nopa iljuitl. ¿Tlake techmachtia? Moneki timosentlalijtosej tijchiasej nopa tonali kema Jesús kitsontlamiltis tlen amo kuali maske uejkauas. Ipan nopa tlapoualistli tlen talentos, tikitakej omej tlakamej kuali tekitikej. Inijuantij amo kitlauelkajkej ininteko uan kichijkej kampeka kitlanisej más tomij, yeka kuali kinitak. Pero nopa tlatekipanojketl katli tlatsiuiyaya, iteko kikixtik tlen ichaj. ¿Tlake techmachtia? Moneki tijchiuasej kampeka nochipa tijtekipanojtosej Jehová. Nojkia tikitstokej Jesús kiijtok katli kintlapejpenijtokej yasej iluikak, moneki kuali tlachixtosej tlaj kinekij kalakisej ipan iTlanauatijkayo. Inijuantij tlauel kinekij mosentilisej iuaya Jesús ipan iluikak. Kema tlantos Armagedón, kejuak monamiktisej iuaya Jesús ipan nopa “nenamiktili tlen nopa pilborregojtsi” (2 Tes. 2:1; Apoc. 19:9).

20. ¿Tlake kichiuas Jehová tlaj tijchiuaj tlen techiljuia?

²⁰ Jesús nechka kintlajtolsenkauas maseualmej, pero amo moneki timajmauisej. Tlaj amo tijtlauelkauaj Jehová, ya techmakas “nopa tetikayotl tlen amo aka ueli kipia”. Kiampa uelis tiijkatosej “iixpa katli eli se maseuali” (2 Cor. 4:7; Luc. 21:36). Yeka, maske timotemachiaj tiitstosej ipan iluikak o ipan Tlaltipaktli, moneki tijchiuasej tlen Jesús kiijtok ipan nopa eyi tlapoualistli tlen tikitakej. Tlaj kiampa tijchiuaj, Jehová kuali techitas uan pampa techtlasojtla, totoka ijkuilijtos ipan nopa “amatlapouali tlen kipia ajkia inijuantij itstosej para nochipa” (Dan. 12:1; Apoc. 3:5).