Amo kinamiki timoiljuisej nopa 70 itokilijkauaj kitlauelkajtoyaj Jesús o ya ayokmo kuali kinitayaya san pampa amo itstoyaj iuaya nopa youali. Jesús san kinekiyaya itstos ininuaya iapóstoles.

Jesús kuali kinitayaya nopa 12 uan nopa 70 itokilijkauaj. Pero achtoui kintlapejpenik 12 itokilijkauaj uan kintokaxtik apóstoles (Luc. 6:12-16). Teipa kema itstoya ipan Galilea, “kinsentilik nopa 12 apóstoles” uan “kintitlanki ma tekamanaljuikaj tlen iTlanauatijkayo Dios uan ma kinchikauakaj katli mokokouayayaj” (Luc. 9:1-6). Uan kema itstoya ipan Judea, “kintlapejpenik sekinok 70 uan kintitlanki ojomej” (Luc. 9:51; 10:1). Uajka, ipan miak pilaltepetsitsij itstoyaj Jesús itokilijkauaj katli tlajtolmoyauayayaj.

Judíos katli mochiuayayaj Jesús itokilijkauaj sejse xiuitl kichiuayayaj nopa Pascua, uelis ininuaya ininchampoyouaj (Éx. 12:6-11, 17-20). Kema nechka kimiktiskiaj, Jesús yajki Jerusalén ininuaya iapóstoles. Pero ya amo kiniljuik nochi itokilijkauaj tlen Judea, Galilea uan Perea ma yakaj iuaya uan ma kichiuakaj Pascua. Ipan nopa tonali, uelis Jesús kinekiyaya itstos san ininuaya iapóstoles. Yeka, kiniljuik: “Tlauel nijnekiyaya nijkuas inmouaya ni tlakualistli ipan Pascua kema ayamo peua nitlaijiyouia” (Luc. 22:15).

Jesús kinekiyaya itstos san ininuaya iapóstoles pampa nechka motemaktiliskia kej “iBorregojtsi Dios katli kikixtia tlajtlakoli ipan Tlaltipaktli” (Juan 1:29). Mikiskia ipan Jerusalén, kampa uejkajkia temakayayaj tlakajkaualistli. Nopa pilborregojtsi tlen kitekiuiyayaj israeleuanij ipan Pascua, kinilnamikilik kema Jehová kinmakixtik tlen Egipto, pero Jesús imikilis tlauel tlapaleuiskia pampa kinmakixtiskia nochi maseualmej tlen tlajtlakoli uan mikilistli (1 Cor. 5:7, 8). Tlen Jesús kichijki kinpaleuik 12 iapóstoles ma kipeualtikaj nopa tlanechikoli tlen Cristo itokilijkauaj (Efes. 2:20-22). Nopa altepetl Jerusalén tlen tlatsejtseloltik kipia ipan itsinpeualtil “matlaktli uan ome uejueyij tetinij” uan nopaya ijkuilijtok “inintoka nopa matlaktli uan omej itlayolmelajkauaj nopa Pilborregojtsi” (Apoc. 21:10-14). Uajka, apóstoles kipaleuiskiaj tlen Dios mosentlalijtok kichiuas. Yeka, Jesús kinekiyaya itstos ininuaya para kichiuasej nopa iyojtsi Pascua uan teipa toTeko itlakualis.

Maske nopa 70 itokilijkauaj amo itstoyaj iuaya Jesús kema tlakuajki ininuaya iapóstoles, nochi katli amo kitlauelkauaskiaj tlauel kinpaleuiskia. ¿Kenke? Pampa nochi katli teipa kintlapejpeniskiaj ma yakaj iluikak, ueliskiaj tlanauatisej iuaya Jesús, kej kiniljuik iapóstoles nopa youali (Luc. 22:29, 30).