TLAMACHTILI 47
Amo kema ma tijtlauelkauakaj Jehová
“ToTeko, na nimotemachia ipan ta” (SAL. 31:14).
UIKATL 122¡Kuali nitlaneltokas!
TLEN MOIXTOMAS a
1. ¿Kenke timotemachiaj Jehová kineki ma tijnechkauikaj?
JEHOVÁ techiljuia ma tijnechkauikaj (Sant. 4:8). Ya kineki elis toTeotsij, toTata uan touampo. Techtlakakilia kema timomaijtouaj uan techpaleuia kema tijpiaj tlaouijkayotl. Uan nojkia, techmachtia uan techmokuitlauia ika itlanechikol. Uajka, ¿tlake techpaleuis amo kema ma tijtlauelkauaj?
2. ¿Tlake techpaleuis ma tijnechkauikaj Jehová?
2 Uelis tijnechkauisej Jehová kema timomaijtouaj, tijpouaj Biblia uan kema timoyoliljuiaj. Nopa kichiuas nojua tlauel ma tikiknelikaj uan ma tijtlaskamatikaj tlen techmakatok. Nojkia, kichiuas ma tijnekikaj nochipa tijneltokasej uan tijueyichiuasej (Apoc. 4:11). Tlaj tijchiuaj kampeka nojua kuali tikixmatisej Jehová, techpaleuis nojua tlauel ma timotemachikaj ipan ya uan ipan itlanechikol.
3. 1) ¿Tlake kichiua Satanás pampa kineki ma tijtlauelkauakaj Jehová? 2) ¿Tlake techpaleuis amo kema ma tijtlauelkauakaj Jehová uan itlanechikol? (Salmo 31:13, 14).
3 Satanás kineki ayokmo kuali ma timouikakaj iuaya Jehová, uan nojua kiampa kichiua kema tikixnamikij tlaouijkayotl. Ya yolik kichiua ayokmo ma timotemachikaj ipan Jehová uan ipan itlanechikol. Yeka, tlaj kuali titlaneltokaj uan timotemachiaj ipan toTeotsij, Satanás amo techtlanis uan amo kema tijtlauelkauasej Jehová uan itlanechikol (xijpoua Salmo 31:13, 14).
4. ¿Tlake tikitasej ipan ni tlamachtili?
4 Ipan ni tlamachtili tikisasej eyi tlamantli tlen uelis kichiuas ayokmo ma timotemachikaj ipan Jehová uan ipan itlanechikol. ¿Kenijkatsa ni tlamantli uelis techuejkatlalis tlen Jehová? Uan, ¿tlake techpaleuis amo ma techtlani Satanás?
KEMA TIJPIAJ TLAOUIJKAYOTL
5. ¿Kenijkatsa tlaouijkayotl uelis kichiuas ayokmo ma timotemachikaj ipan Jehová uan itlanechikol?
5 Uelis kemantika tochampoyouaj techtlaijiyouiltiaj pampa tijtekipanouaj Jehová o titlaijiyouiaj pampa amo tijpiaj tekitl. ¿Kenijkatsa ni tlamantli uelis kichiuas ayokmo ma timotemachikaj ipan Jehová uan itlanechikol? Kema uejkaua tikixnamiktokej se tlaouijkayotl, uelis timoiljuisej nochipa kiampa tiitstosej uan ayokmo tiyolpakisej. Satanás kitekiuia ni tlamantli pampa kineki ma timoiljuikaj Jehová ayokmo techiknelia. Kineki ma timoiljuikaj Jehová uan itlanechikol kichiua ma titlaijiyouikaj. Se keskij israeleuanij katli itstoyaj Egipto, nojkia kiampa kinpanok. Achtouia motemachiyayaj Jehová kintlapejpenijtoya Moisés uan Aarón ma kinkixtikaj tlen Egipto (Éx. 4:29-31). Uan kema faraón pejki kintlaijiyouiltia, inijuantij kiniljuijkej Moisés uan Aarón: “Inmojuantij inmotlajtlakol para itekiuejkauaj faraón ma techtlachilikaj fiero. Eltok keja inkitlalijtokej machete ipan ininma para ma techmiktikaj ika tlen inkiiljuijtokej nopa tlanauatijketl” (Éx. 5:19-21). ¡Tlauel amo kuali tlen kiijtojkej! Tlaj uejkajtok tikixnamiktok tlaouijkayotl, ¿tlake mitspaleuis nojua timotemachijtos ipan Jehová uan itlanechikol?
6. ¿Tlake techmachtia tlen kichijki Habacuc? (Habacuc 3:17-19).
6 Xikiljui Jehová nochi tlen tijyolmati uan ximotemachi ipan ya. Tlajtolpanextijketl Habacuc kiixnamijki miak tlaouijkayotl. Se tonali moiljuik Jehová amo kitekipachouayaya tlen kipanoyaya. Yeka kiiljuik nochi tlen kiyolmatiyaya, ya kiijtok: “ToTeko, ¿hasta kema tlamis nimitstsajtsilis xinechpaleuiki uan axtinechtlakakilis? [...] ¿Para tlen tijchiua ma nikita [...] tlen axxitlauak mojmostla?” (Hab. 1:2, 3). Jehová kitlakakilik uan kipaleuik ni tlajtolpanextijketl (Hab. 2:2, 3). Uan kema Habacuc moyoliljuik kenijkatsa Jehová kinpaleuijtoya itekipanojkauaj, pejki sampa yolpaki. Nopa kichijki sampa ma motemachi Jehová kena kitekipachouayaya tlen kipanoyaya uan kipaleuiskia ma kiixnamiki tlen ueli tlaouijkayotl (xijpoua Habacuc 3:17-19). ¿Tlake techmachtia tlen kipanok? Kema tikixnamikis se tlaouijkayotl, ximomaijto, xikiljui Jehová tlen tijyolmati uan ximotemachi ipan ya. Uan ya nelnelia mitspaleuis xikijiyoui tlen mitspano. Kema tikitas mitspaleuia, nojua kuali titlaneltokas.
7. ¿Tlake kiiljuijkej Shirley, uan tlake kipaleuik nojua ma motemachi ipan Jehová?
7 Nojua xijchiua tlen mitspaleuis xiitsto Jehová inechka. Ni tlamantli kipaleuik tosiuaikni Shirley, katli eua Papúa Nueva Guinea, kema kiixnamijki tlaouijkayotl. b Ya uan ichampoyouaj amo kipiayayaj tomij uan kemantika kimatiyayaj ouij kipiasej tlen kikuasej. Se tlen ichampoyouaj kinekiyaya ayokmo ma motemachi ipan Jehová, yeka kiiljuik: “Maske tikijtoua toTeotsij itonal inmechpaleuia, amo nelia pampa nojua inteikneltsitsij. San timotonalpoloua pampa titlajtolmoyaua”. Shirley kiijtoua kemantika moiljuiyaya tlaj Jehová nelnelia kitekipachouayaya tlen kinpanoyaya ya uan ichampoyouaj. Ya nojua kiijtoua: “Nima nikiljuik Jehová nochi tlen nijyolmatiyaya. Nijpouayaya Biblia uan amatlajkuiloli, uan nochipa niauiyaya tlanechikoli uan nitlajtolmoyauayaya”. Shirley kiitak Jehová kinmokuitlauiyaya ichampoyouaj pampa nochipa kipiayayaj tlen kikuasej uan yolpakiyayaj. Ya kiijtoua: “Nikitak Jehová kena nechtlakakilik kema nimomaijtok” (1 Tim. 6:6-8). Tlaj nojua tijchiua tlen mitspaleuis kuali xitlaneltoka, amo tijtlauelkauas Jehová maske tikixnamikis se tlaouijkayotl.
KEMA KINTLATSAKUILTIAJ TOIKNIUAJ KATLI TLAYAKANAJ
8. ¿Tlake uelis kinpanos toikniuaj katli tlayakanaj ipan toTeotsij itlanechikol?
8 Kemantika ipan radio, televisión uan ipan redes sociales kinistlakauiaj toikniuaj katli tlayakanaj ipan Jehová itlanechikol (Sal. 31:13). Tekichiuanij kintsaktokej se keskij toikniuaj pampa kiijtouaj kichijkej tlen amo kuali. Ipan achtoui siglo nojkia kiampa panok. Apóstol Pablo kitsajkej maske amo tleno kichijtoya. ¿Tlake kichijkej Cristo itokilijkauaj katli itstoyaj ipan nopa tonali?
9. ¿Tlake kichijkej se keskij Cristo itokilijkauaj kema kitsajkej apóstol Pablo?
9 Kema Pablo tsaktoya ipan Roma, se keskij Cristo itokilijkauaj kitlauelkajkej (2 Tim. 1:8, 15). Uelis pinauayayaj pampa maseualmej kiitayayaj Pablo kej se akajya katli kiixpanok tlanauatili (2 Tim. 2:8, 9). O uelis majmauiyayaj pampa moiljuiyayaj nojkia kintlatsakuiltiskiaj. Uelis Pablo tlauel moyolkokok kema kitlauelkajkej, pampa ya amo san kiixnamijki miak tlamantli tlen amo kuali, nojkia nechka kimiktiaj pampa kinekiyaya kinpaleuis toikniuaj (Hech. 20:18-21; 2 Cor. 1:8). Amo kema ma tijchiuakaj kej katli kitlauelkajkej Pablo kema kiixnamijki tlaouijkayotl. ¿Tlake moneki tikilnamikisej kema kintlatsakuiltiaj toikniuaj katli techyakanaj?
10. ¿Tlake moneki tikilnamikisej kema kintlatsakuiltiaj toikniuaj katli tlayakanaj, uan kenke?
10 Xikilnamiki kenke techtlatsakuiltiaj uan ajkia kichiua kiampa ma techpano. Ipan 2 Timoteo 3:12 kiijtoua: “Nochi tlaneltokanij tlen kinekij monejnemiltisej keja Cristo Jesús kineki, kinpantisej tlakamej tlen kintlaijiyouiltisej”. Satanás kintlatsakuiltia katli tlayakanaj ipan tlanechikoli pampa kineki ma kitlauelkauakaj Jehová uan techmajmatis (1 Ped. 5:8).
Kema Pablo tsaktoya, Onesíforo amo majmajki uan kipaleuik. Ipan ni tonali, toikniuaj nojkia kinpaleuiaj sekinok toikniuaj katli tsaktokej, kej nesi ipan ni tlaixkopinkayotl. (Xikita párrafos 11, 12).
11. ¿Tlake techmachtia tlen kichijki Onesíforo? (2 Timoteo 1:16-18).
11 Amo xikintlauelkaua uan xikinpaleui toikniuaj katli tlayakanaj (xijpoua 2 Timoteo 1:16-18). Ipan achtoui siglo, se Cristo itokilijka katli motokaxtiyaya Onesíforo, kena kipaleuik Pablo kema tsaktoya. Pablo kiijtok: “Axpinajki pampa niitstoya nikaj niilpitok ika teposcadena”. Onesíforo kichijki kampeka kipantis Pablo, uan kema kipantik, tlauel kipaleuik maske ueltoskia kimiktisej. ¿Tlake techmachtia? Moneki amo timajmauisej uan tikinpaleuisej toikniuaj katli kintlatsakuiltiaj. Ma tijchiuakaj kampeka tikinmanauisej uan tikinpaleuisej (Prov. 17:17). Moneki tijnextisej tikinikneliaj uan tikinpaleuiaj.
12. ¿Tlake techmachtia tlen kichiuaj toikniuaj tlen Rusia?
12 Ximoiljui tlen kichiuaj toikniuaj tlen Rusia kema kintsakuaj se keskij toikniuaj katli nopaya itstokej. Kema kintlajtolsenkauaj ininixpa tekichiuanij, miakej toikniuaj yauij nopaya uan kinyolchikauaj. ¿Tlake techmachtia? Amo ximajmaui kema kinistlakauiaj, kintlatsakuiltiaj uan kintsakuaj toikniuaj katli tlayakanaj ipan tlanechikoli. Ximomaijto ininpampa, xikinpaleui ininchampoyouaj uan xikita ika tlake sekinok tlamantli uelis titlapaleuis (Hech. 12:5; 2 Cor. 1:10, 11).
KEMA TECHPINAJTIAJ
13. ¿Kenijkatsa kema techpinajtiaj uelis kichiuas ayokmo ma timotemachikaj ipan Jehová uan itlanechikol?
13 Uelis se keskij tlen tochampoyouaj katli amo kitekipanouaj Jehová, katli ininuaya timomachtiaj o titekitij techpinajtisej pampa titlajtolmoyauaj uan timonejnemiltiaj kej Biblia kiijtoua (1 Ped. 4:4). Uelis techiljuisej: “Maske kuali nimouika mouaya, ipan moreligión amo mitskauaj xijchiua miak tlamantli uan tlen nopaya tlamachtiaj ayokmo tlapaleuia ipan ni tonali”. Uelis se keskij kiijtouaj amo nelnelia titeikneliaj pampa ayokmo tikinnojnotsaj katli kinkixtiaj ipan tlanechikoli. Kema kiampa techiljuiaj uelis kichiuas ma timoiljuikaj tlaj nelnelia kuali tlen tijneltokaj uan ma timotlajtlanikaj: “¿Nechiljuia Jehová ma nijchiua tlen tlauel ouij? ¿Amo nechkaua Jehová itlanechikol ma nijchiua yon se tlamantli?”. Tlaj kiampa timoiljuia, ¿tlake mitspaleuis amo xijtlauelkaua Jehová uan itlanechikol?
Job amo kinneltokak katli kipinajtijkej. Ya mosentlalijtoya amo kitlauelkauas Jehová. (Xikita párrafo 14).
14. ¿Tlake moneki tijchiuasej tlaj sekinok techpinajtisej pampa timonejnemiltiaj kej Jehová kineki? (Salmo 119:50-52).
14 Ximosentlali timonejnemiltis kej Jehová kineki. Job nochipa kuali monejnemiltik maske sekinok kipinajtijkej. Se tlakatl katli kiijtouayaya eliyaya iuampo, kinejki ma moiljui Jehová amo kipatiitayaya maske kuali monejnemiltiyaya (Job 4:17, 18; 22:3). Job amo kineltokak tlen kiiljuik. Ya nochipa monejnemiltik kej Jehová kineki pampa kimatiyaya tlauel techpaleuia kema tijchiuaj tlen technauatia. Amo kikajki sekinok ma kichiuakaj ma kitlauelkaua Jehová (Job 27:5, TNM; 27:6). ¿Tlake techmachtia? Amo ximoiljui toTeotsij itlanauatiljuaj amo tepaleuia san pampa sekinok mitspinajtiaj. Ximoiljui kenijkatsa mitspaleuijtok pampa tijchijtok ipan monemilis tlen Jehová technauatia. Uelis miakpa tikitstok kena tepaleuia. Uajka, ximosentlali tijpaleuis toTeotsij itlanechikol pampa nopaya nochipa mochiua tlen Jehová technauatia. Tlaj kiampa tijchiuas, amo kema tijtlauelkauas Jehová maske sekinok mitspinajtisej (xijpoua Salmo 119:50-52).
15. ¿Kenke kipinajtijkej Brizit?
15 Ma tikitakaj tlen kipanok Brizit, se tosiuaikni tlen la India. Ichampoyouaj tlauel kipinajtijkej pampa kitekipanoua Jehová. Ya moatsonpoliuiltik ipan xiuitl 1997. Teipa, iueue katli amo kitekipanouayaya Jehová, ayokmo kipixki tekitl. Yeka kiijtok inijuantij uan ininsiuapiljuaj yaskiaj kampa itatauaj, katli itstoyaj ipan seyok altepetl. Maske nopaya yajkej, nojua kiixnamijkej sekinok tlaouijkayotl. Iueue amo kipantiyaya tekitl, yeka Brizit monejki tekitis nochi semana uan kiampa kinpanoltiskia ichampoyouaj. Nojkia, nopa tlanechikoli kampa ueliskia monechikos, mokauayaya se 350 kilómetros. Ichampoyouaj iueue pejkej kitetsopaj Brizit pampa kitekipanouayaya Jehová, yeka sampa monejki yasej sejkanok. Teipa panok seyok tlamantli, iueue mijki uan teipa isiuapil katli kipixtoya 12 xiuitl kipixki cáncer uan nojkia mijki. Yeka ichampoyouaj Brizit, kitlajtlakoltijkej pampa panok nochi ni tlamantli. Kiiljuijkej tlaj amo mochijtoskia se Jehová itlajtoltemajka, amo panotoskia nochi nopa tlamantli. Maske kiampa kiiljuijkej, ya nojua motemachik ipan Jehová uan itlanechikol.
16. ¿Tlake tlateochiualistli kiselik Brizit pampa amo kitlauelkajki Jehová uan itlanechikol?
16 Nopa tlanechikoli kampa Brizit yauiyaya uejka mokauayaya, yeka toikni katli tepaxaloua chijchikuasej metstli kiiljuik ma tlajtolmoyaua kampa itstoya uan ma kichiua tlanechikoli ichaj. Maske achtouia Brizit moiljuik ouij kimatiskia tlaj kiampa kichiuaskia, kichijki tlen kiiljuijkej. Yeka, pejki tlajtolmoyaua, kichijki tlanechikoli ichaj uan momachtiyaya ininuaya isiuapiljuaj. ¿Tlake panok pampa kiampa kichijki? Pejki kinmachtia miakej maseualmej uan se keskij moatsonpoliuiltijkej. Uan ipan 2005, Brizit pejki tlatekipanoua kej precursora regular. Kiselik miak tlateochiualistli pampa motemachik ipan Jehová uan itlanechikol. Iichpokauaj kuali kitekipanouaj Jehová, uan ipan ni tonali onka ome tlanechikoli nechka kampa itstok. Brizit motemachia Jehová kipaleuik ma kiijiyoui kema kiixnamijki tlaouijkayotl uan kema ichampoyouaj kipinajtijkej.
AMO MA TIJTLAUELKAUAKAJ JEHOVÁ YON ITLANECHIKOL
17. ¿Tlake kinamiki timosentlalijtosej tijchiuasej?
17 Satanás kineki ma timoiljuikaj Jehová amo techpaleuia kema tikixnamikij tlaouijkayotl uan nojua tlauel ouij tiitstosej tlaj tijchiuaj tlen itlanechikol techiljuia. Nojkia kineki ma timajmauikaj kema kinistlakauiaj, kintlatsakuiltiaj uan kintsakuaj toikniuaj katli tlayakanaj ipan tlanechikoli. Uan kema techpinajtiaj, Satanás kineki ayokmo ma timotemachikaj ipan Jehová uan itlanechikol. Maske kiampa kichiua, tojuantij ya tijmatij ika tlake tlamantli kineki techkajkayauas uan amo tijneltokaj (2 Cor. 2:11). Amo ma tijkauakaj Satanás ma techkajkayaua uan amo kema ma tijtlauelkauakaj Jehová yon itlanechikol. Ma tikilnamikikaj, Jehová nochipa techpaleuis (Sal. 28:7). Uajka, amo kema ma tijtlauelkauakaj Jehová maske tikixnamikisej tlaouijkayotl (Rom. 8:35-39).
18. ¿Tlake tikitasej ipan seyok tlamachtili?
18 Ipan ni tlamachtili tikitakej se keski tlamantli tlen kichiuaj maseualmej uan tlen uelis kichiuas ayokmo ma timotemachikaj ipan Jehová uan itlanechikol. Ipan tlanechikoli nojkia uelis tikixnamikisej se keski tlaouijkayotl. ¿Tlake techpaleuis kema kiampa techpanos? Ni tikitasej ipan tlamachtili 48.
UIKATL 118 Xijchiua kuali ma nitlaneltoka
a Tlaj tijnekij tikijiyouisej tlaouijkayotl uan amo tijtlauelkauasej Jehová, moneki timotemachisej ipan ya uan nojkia ipan itlanechikol. Diablo amo kineki kiampa ma tijchiuakaj, yeka ipan ni tlamachtili tikitasej eyi tlamantli tlen kitekiuia uan tlake techpaleuis amo ma tijtlauelkauakaj Jehová.
b Mopatlatok se keski tokajyotl.