1, 2. 1) ¿Tlake tikitasej ipan ni tlamachtili? 2) ¿Tlake kinextia Jehová kineki techpaleuis?

 JEHOVÁ techpaleuis ma tikijiyouikaj tlen ueli tlaouijkayotl uan ma tijtekipanokaj ika pakilistli. Ipan ni tlamachtili tikitasej kenijkatsa kichiua uan tlake uelis tijchiuasej tlaj tijnekij ma techpaleui. Achtoui ma tijnankilikaj ni tlajtlanili: “¿Nelnelia kineki techpaleuis Jehová?”.

² Tlaj tijnekij tijmatisej kenijkatsa monankilia ni tlajtlanili achtoui ma tikitakaj tlake kiijtok apóstol Pablo ipan amatlajkuiloli tlen kintitlanilik toikniuaj hebreos. Ya kiijtok: “ToTeko nechpaleuia, axnikimakasi tlen tlakamej uelis nechchiuilisej” (Heb. 13:6). Se keski diccionarios kiijtoua nopa tlajtoli “nechpaleuia” kiijtosneki kema se maseuali motlaloua pampa kineki kipaleuis se akajya. Ma timoiljuikaj Jehová kejuak motlaloua pampa kineki kipaleuis se akajya katli kiixnamiki se tlaouijkayotl. Ni tlajtoli kinextia ya kineki techpaleuis ika nochi iyolo. Uelis tikijiyouisej tlen ueli tlaouijkayotl uan nochipa tiyolpakisej pampa Jehová techpaleuia.

3. Xikijto eyi tlamantli tlen Jehová kitekiuia kema techpaleuia ma tikijiyouikaj tlaouijkayotl ika pakilistli.

³ ¿Kenijkatsa Jehová techpaleuia ma tikijiyouikaj se tlaouijkayotl ika pakilistli? Ipan amochtli Isaías kiijtoua kenijkatsa techpaleuia. Se keski tlajtolpanextili tlen Jehová kiiljuik Isaías ma kiijkuilo, techpaleuia ipan ni tonali. Isaías kitekiuik tlajtoli tlen amo ouij uan kiampa kiijtok kenijkatsa eli Jehová. Ipan capítulo 30 kiixnextik Jehová  ika se keski tlamantli tlen tlauel yejyektsi pampa kinekiyaya ma kimatikaj kenijkatsa ya techpaleuia. Nopaya kiijtoua Jehová 1) techtlakakilia kema timomaijtouaj uan techpaleuia, 2) techyakana, uan 3) techteochiua ipan ni tonali uan nojkia techteochiuas teipa. Ma tikixtomakaj sejse tlen ni tlamantli.

4. 1) ¿Tlake kiijtok Jehová tlen judíos kema itstoya Isaías uan tlake kikajki ma kinpano? 2) ¿Tlake kiijtok Jehová kinpanoskia judíos katli amo kitlauelkauaskiaj? (Isaías 30:18, 19).

⁴ Kampa peua Isaías capítulo 30, Jehová kiijtok judíos eliyayaj tochontikej uan tlauel tlajtlakolchiuayayaj. Uan nojkia kiijtok tlauel mosisiniyayaj uan amo kinekiyayaj kitlepanitasej itlanauatiljuaj (Is. 30:1, 9). Judíos amo kinekiyayaj kineltokasej Jehová, yeka Isaías kiijtok kinpanoskia tlen tlauel amo kuali (Is. 30:5, 17; Jer. 25:8-11). Uan nelia kiampa kinpanok pampa babiloniaeuanij kinuikakej ininaltepe. Maske kiampa panok, se keskij kena kineltokayayaj Jehová, yeka Isaías kiijtok se tonali sampa kinkuepiltiskiaj Jerusalén (xijpoua Isaías 30:18, 19). Tlen kiijtok Isaías nelia moaxitik pampa Jehová kinkuepiltik judíos ininaltepe maske panotoyaj miak xiuitl. Nopa tlajtoli: “ToTeko inmechchia inkitemosej para uelis inmechnextilis iteiknelijkayo”. Kinpaleuik judíos ma kimatikaj monekiyaya panos se keski xiuitl uan kiampa Jehová kinmakixtiskia katli kineltokayayaj. Uan kema panok 70 xiuitl Jehová kichijki sampa ma tlakuepilikaj Jerusalén (Is. 10:21; Jer. 29:10). Kema judíos itstoyaj Babilonia, mochokiliyayaj pampa tlauel mokuesouayayaj. Uan kema tlakuepilijkej Jerusalén, chokakej pampa tlauel yolpajkej

5. ¿Kenijkatsa techyolchikaua Isaías 30:19?

⁵ Tlen kiijtoua Isaías 30:19 nojkia tlauel techyolchikaua. Nopaya kiijtoua: “Kema toTeko kikakis inkitsajtsilisej para ma inmechpaleui, inmechtlasojtlas miak”. Isaías kiijtok ma timotemachikaj Jehová techtlakakilis kema timomaijtosej uan nima techpaleuis. Nopa tlajtolpanextijketl nojkia kiijtok: “Nimantsi inmechnankilis”. Ni texto techilnamikilia Jehová amo san kinpaleuia katli kitlajtlaniaj, ya kichiua ika nochi iyolo. Tijmatisej ni tlamantli techpaleuia ma tikijiyouikaj tlen techpano ika pakilistli.

6. ¿Kenijkatsa tlen kiijtok Isaías kinextia Jehová kintlakakilia itekipanojkauaj?

⁶ Ni texto techilnamikilia Jehová nelnelia techtlakakilia sejse tlen tojuantij. ¿Kenke kiampa tikijtouaj? Kampa peua Isaías capítulo 30, Jehová kejuak kinkamanaljuia nochi judíos, uan ipan versículo 19 kejuak kinkamanaljuia sejse tlen inijuantij. Isaías kiijtok: “Asis tonali kema ayok inchokasej”; “toTeko [...] inmechtlasojtlas miak”; “inmechnankilis”. Maske ipan ni texto nesi kinojnotstok miakej, kema moijkuilok ipan hebreo, kinnojnotsayaya sesentsitsij. Jehová eli se toTata katli tlauel techiknelia, yeka kema kiita se ikone motekipachoua amo kiiljuia: “Moneki nojkia tijpias chikaualistli kej moikni”. Ya amo kiampa kichiua pampa kitekipachoua tlen kipano sejse itekipanojka uan kitlakakilia kema momaijtoua (Sal. 116:1; Is. 57:15).

7. ¿Kenijkatsa Isaías uan Jesús kinextijkej moneki nochipa timomaijtosej?

⁷ Kema tikiljuiaj Jehová se tlamantli  tlen techtekipachoua, uelis ya techmakas chikaualistli uan kiampa tikijiyouisej tlen techpano. Uan tlaj nojua uejkaua tikixnamiktokej nopa kuesoli, uelis moneki miakpa tikiljuisej toTeotsij ma techmaka chikaualistli. Uan ya, kiampa techiljuia ma tijchiuakaj. Isaías kiijtok amo ma tijkauakaj Jehová ma mosiajketsa (Is. 62:7). ¿Tlake kiijtosneki ni tlamantli? Moneki nochipa timomaijtosej uan amo tijkauasej Jehová kejuak ma mosiajketsa. Ni techilnamikilia kema Jesús kiijtok ma timomaijtokaj, kej kiijtoua Lucas 11:8-10, 13. Jesús kiixnextik ika miak tlamantli moneki miakpa timomaijtosej, tijtlajtlanisej toTeotsij tlen tijnekij uan nojua tikiljuisej ma techmaka itonal. Nojkia uelis tijtlajtlanisej Jehová ma techpaleui kuali tijtlapejpenisej tlen tijchiuasej.

8. ¿Kenijkatsa moaxitik tlen kiijtoua Isaías 30: 20, 21?

⁸ (Xijpoua Isaías 30:20, 21). Tlateuianij tlen Babilonia kiyaualojkej Jerusalén se xiuitl uan tlajko, ipan nopa tonali judíos mojmostla tlauel tlaijiyouiyayaj. Maske kiampa itstoyaj, ipan versículos 20 uan 21 Jehová kiniljuik kinmanauiskia tlaj moyolkuepaskiaj uan ayokmo kichiuaskiaj tlen amo kuali. Isaías kiniljuik judíos Jehová kinmachtiskia kenijkatsa kiueyichiuasej pampa ya eliyaya inintlamachtijka. Tlen kiijtok moaxitik kema judíos tlakuepilijkej tlen Babilonia. Jehová kinmachtik uan ika itlapaleuil sampa kiueyichijkej kej kinamiki. Ipan ni tonali Jehová nojkia eli totlamachtijka, yeka tlauel tiyolpakij.

9. ¿Kenijkatsa techyakana Jehová ipan ni tonali?

⁹ Tijpiaj se ueyi tlateochiualistli pampa Jehová eli totlamachtijka. Ipan ni versículos, Isaías kiijtoua kenijkatsa Jehová techmachtia. Achtoui kiijtok: “Yajaya tlen inmotlamachtijka ayok uelis motlatis uan ika inmoixteyol inkiitasej”. Ipan ni versículo kiijtoua Jehová itstok ininixpa katli kinmachtia. ¿Kenijkatsa techmachtia Jehová ipan ni tonali? Ika itlanechikol. Tlauel tiyolpakij pampa Jehová techmachtia ipan tlanechikoli, ipan uejueyi tlanechikolistli, ika pilamochtsitsij, ika tlen kisa ipan JW Broadcasting^® uan ika sekinok tlamantli. Ika nochi ni tlamantli Jehová techyakana uan techpaleuia ma tikixnamikikaj tlaouijkayotl ika pakilistli.

10. ¿Kenijkatsa toTeotsij kejuak technojnotsa toika?

 ¹⁰ Isaías kiijtok nopa ompa tlamantli tlen ika Jehová techmachtia kema kiijtok: “Ika inmoika inkikakisej se itos”. Ipan ni versículo kiijtoua Jehová kejuak yaui ininika katli kinmachtia, kintlachilijtia uan kiniljuijtia kanke moneki yasej. ¿Kenijkatsa technojnotsa Jehová ipan ni tonali? Kema tijpouaj Biblia. Uejkajkia nopaya moijkuilok toTeotsij iTlajtol, uajka kema tijpouaj kejuak tijkakij toTeotsij technojnotsa toika (Is. 51:4).

11. ¿Tlake moneki tijchiuasej tlaj tijnekij tijtekipanosej Jehová ika pakilistli, uan kenke?

¹¹ ¿Tlake moneki tijchiuasej tlaj tijnekij toTeotsij ma techyakana ika itlanechikol uan ika iTlajtol? Isaías kiijtoua ome tlamantli tlen uelis tijchiuasej. Achtoui kiijtoua: “Ya ni nopa ojtli”, uan teipa kiijtoua: “Xijtokilikaj” (Is. 30:21). Uajka amo san moneki tikixmatisej nopa ojtli, moneki tijtokilisej. Ika iTlajtol uan itlanechikol, Jehová techiljuia kenijkatsa moneki timonejnemiltisej uan kenijkatsa uelis tijchiuasej tlen techmachtia. Tlaj tijnekij tijtekipanosej Jehová ika pakilistli, moneki tijchiuasej ni ome tlamantli. Kiampa uelis timotemachisej Jehová techteochiuas.

12. Kej kiijtoua Isaías 30:23-26, ¿kenijkatsa Jehová kinteochijki itekipanojkauaj uejkajkia?

¹² (Xijpoua Isaías 30:23-26). ¿Kenijkatsa moaxitik ni tlajtolpanextili uejkajkia? Nopa judíos katli kinuikatoyaj Babilonia uan tlakuepilijkej Jerusalén, kiselijkej miak tlateochiualistli. Jehová kinmakak tlen ika mopanoltiskiaj uan tlen kipaleuiskia nojua kuali ma tlaneltokakaj. Maske kinmakak miak tlakualistli, ya kichijki seyok tlamantli tlen kinpaleuik ma kinechkauikaj uan sampa ma kiueyichiuakaj kej kinamiki. ToTeotsij tlauel kinteochijki itekipanojkauaj katli itstoyaj ipan nopa tonali. Ipan versículo 26 kiijtoua toTeotsij kinmakak miak tlauili, ni kiijtosneki kinpaleuik ma kikuamachilikaj iTlajtol (Is. 60:2). Nochi nopa tlateochiualistli kinpaleuik nojua ma kitekipanojtokaj Jehová ika nochi ininyolo uan ika pakilistli. Inijuantij tlauel kuali kiyolmatiyayaj (Is. 65:14).

13. ¿Kenijkatsa moaxitijtok nopa tlajtolpanextili tlen kiijtoua sampa kiueyichiuaskiaj Jehová kej kinamiki?

¹³ Ipan ni tonali nojkia moaxitijtok nopa tlajtolpanextili kampa kiijtoua sampa tijueyichiuaskiaj Jehová kej kinamiki. Kema  pejki xiuitl 1919, miakej maseualmej pejkej kisaj tlen Ueyi Babilonia, tlen kiijtosneki nochi religiones tlen amo melauak. Inijuantij nojua tlauel kuali itstokej uan amo kej judíos katli kiskej tlen Babilonia, pampa Jehová kejuak kinuikak kampa tlauel tlayejyektsi (Is. 51:3; 66:8). ¿Tlake kiijtosneki nopa?

14. ¿Tlake kiijtosneki kejuak tiitstokej kampa tlauel tlayejyektsi, uan ajkia itstokej nopaya? (Xikita nopa nota).

¹⁴ Ipan 1919, katli kintlajpejpenijkej yasej iluikak tlauel yolpajkej pampa kejuak pejkej itstokej kampa tlauel tlayejyektsi. b Kej panotiajtok tonali, katli motemachiaj itstosej ipan Tlaltipaktli nojkia kejuak kalaktokej kampa tlauel tlayejyektsi uan kiselijtokej miak tlateochiualistli (Juan 10:16; Is. 25:6; 65:13).

15. ¿Kanke eli kampa tlauel tlayejyektsi?

¹⁵ ¿Kanke eli kampa tlauel tlayejyektsi ipan ni tonali? ToTeotsij itekipanojkauaj itstokej kampa ueli ipan Tlaltipaktli, yeka uelis tikijtosej kejuak tlauel ueyi kampa tlauel tlayejyektsi. Uajka, maske kampa ueli tieuaj, nojkia uelis kejuak tiitstosej kampa tlauel tlayejyektsi uan tijueyichiuasej Jehová kej kinamiki uan ika nochi toyolo.

16. ¿Tlake techpaleuis nochipa ma tijpatiitakaj kejuak tiitstosej kampa tlauel tlayejyektsi?

¹⁶ Tlaj tijnekij nochipa kejuak tiitstosej kampa tlauel tlayejyektsi, moneki tijpatiitasej toTeotsij itlanechikol. ¿Kenijkatsa uelis kiampa tijchiuasej? Moneki timosentlalisej san ipan nopa kuajkuali tlamantli tlen kinextiaj toikniuaj (Juan 17:20, 21). ¿Kenke moneki kiampa tijchiuasej? Ma timoiljuikaj ipan ni tlamantli: ipan se ueyi kuatitlamitl tlen tlauel yejyektsi, onka miak kuatinij tlen amo sanse. Nojkia, ipan toTeotsij itlanechikol itstokej miakej toikniuaj katli amo elij sanse (Is. 44:4; 61:3). Amo ma tijkauakaj se keski “kuauitl” tlen eltok tonechka ma kichiua ayokmo kuali ma tikitakaj nopa yejyektsi “kuatitlamitl”.  Ni kiijtosneki, moneki tijchiuasej kampeka tijpatiitasej Jehová tlanechikoli maske timokuapolosej o mokuapolosej toikniuaj.

17. ¿Tlake uelis tijchiuasej uan kiampa kuali tiitstosej ininuaya toikniuaj?

¹⁷ ¿Tlake moneki tijchiuasej tlaj tijnekij nochipa kuali tiitstosej ininuaya toikniuaj? Moneki tijchiuasej kampeka tiitstosej ika tlaseuilistli (Mat. 5:9; Rom. 12:18). Kema tijchiuaj kampeka kuali timouikasej ininuaya toikniuaj, tijchiuaj nojua kuali ma nesi kampa tlauel tlayejyektsi. Tijmatij Jehová kichijki sejse toikni ma itsto ipan itlanechikol (Juan 6:44). Ma timoiljuikaj kenijkatsa Jehová tlauel yolpaki kema kiita tijchiuaj kampeka tiitstosej ika tlaseuilistli ininuaya toikniuaj, pampa ya tlauel kinpatiita (Is. 26:3; Ageo 2:7).

18. ¿Ipan tlake tlamantli moneki nochipa timoyoliljuisej, uan kenke?

¹⁸ ¿Kenijkatsa uelis kuali tijtekiuisej nopa kuajkuali tlamantli tlen Jehová techmakatok? Ma timoyoliljuikaj tlen tijyekouaj ipan toTeotsij iTlajtol uan ipan amatlajkuiloli. Tlaj timomachtiaj uan timoyoliljuiaj, techpaleuis ma tijnextikaj kuajkuali tlamantli tlen kichiuas ma tikiniknelikaj toikniuaj ipan tlanechikoli (Rom. 12:10). Kema timoyoliljuiaj kenijkatsa Jehová tlauel techteochijtok, kichiua nojua kuali ma timouikakaj iuaya. Uan kema timoyoliljuiaj kenijkatsa Jehová techteochiuas teipa, techpaleuia ma timotemachikaj uelis tijtekipanosej nochipa. Nochi ni kichiuas tlauel ma tiyolpakikaj kema tijtekipanouaj Jehová.

19. 1) Kej kiijtoua Isaías 30:18, ¿ipan tlake uelis timotemachisej? 2) ¿Tlake techpaleuis ma tikijiyouikaj tlen techpano ika pakilistli?

¹⁹ Jehová techmanauis kema kitsontlamiltis nochi tlen amo kuali (Is. 30:18). Ya “kichiua tlen xitlauak”, yeka timotemachiaj kitlamiltis tlen amo kuali ipan nopa tonali tlen kiixtlalijtok (Is. 25:9). Nojkia, sanse kej tojuantij, Jehová kichixtok nopa tonali kema techmakixtis. Namantsi ayamo asi nopa tonali, yeka timosentlalijtokej tijpatiitasej tlamaijtoli, timomachtisej Biblia, tijchiuasej tlen nopaya kiijtoua uan nojkia timoyoliljuisej ipan nopa tlateochiualistli tlen toTeotsij techmakatok. Tlaj tijchiuaj nochi ni tlamantli, Jehová techpaleuis ma tikijiyouikaj tlen techpano uan ma tijtekipanokaj ika pakilistli.