TLAMACHTILI 45
Jehová techpaleuia ma titlajtolmoyauakaj
“Nochipa kiilnamiktosej para onkak se teokamanalojketl tlatlajko yajuantij” (EZEQ. 2:5).
UIKATL 67 Ma tikinmachtikaj sekinok
TLEN MOIXTOMAS a
1. ¿Ipan tlake timotemachiaj Cristo itokilijkauaj uan kenke kiampa tikijtouaj?
AMO timosentlachiliaj kema maseualmej amo techkauaj ma titlajtolmoyauakaj, uan uelis teipa nojua tlauel kiampa kichiuasej (Dan. 11:44; 2 Tim. 3:12; Apoc. 16:21, TNM). Maske kiampa kichiuasej, timotemachiaj Jehová nochipa techpaleuis. ¿Kenke kiampa tikijtouaj? Pampa ya nochipa kinpaleuijtok itekipanojkauaj ma kichiuakaj tlen kinnauatia, maske eli se tlamantli tlen tlauel ouij. Tlaj tijnekij tikitasej Jehová nelnelia techpaleuis, ma tikitakaj tlen kipanok Ezequiel kema kinmatiltik se keski tlamantli judíos katli kinuikatoyaj Babilonia.
2. 1) ¿Kenijkatsa Jehová kiijtok eliyayaj judíos katli Ezequiel kinkamanaljuiskia? (Ezequiel 2:3-6). 2) ¿Tlake tikitasej ipan ni tlamachtili?
2 ¿Kenijkatsa eliyayaj maseualmej katli Ezequiel kinmatiltiskia tlen Jehová kinauatijtoya? Jehová kiijtok nopa judíos kipiayayaj “tetik ininxayak” uan nojkia “tlauel yoltetikej”, inijuantij tekokouayaj kejuak uitstli uan kej kolomej. Yeka Jehová miakpa kiiljuik Ezequiel: “Amo xikinmakasi nopa tlakamej” (xijpoua Ezequiel 2:3-6). Ezequiel uelki kichiua nopa tekitl pampa 1) Jehová kititlantoya, 2) toTeotsij itonal kimakak chikaualistli uan 3) nochipa momachtik toTeotsij iTlajtol. ¿Kenijkatsa kipaleuik ni eyi tlamantli? Uan, ¿kenijkatsa techpaleuia ipan ni tonali?
JEHOVÁ KITITLANKI EZEQUIEL
3. ¿Tlake tlajtoli kiyolchikajki Ezequiel, uan kenijkatsa Jehová kinextik kipaleuiskia?
3 Jehová kiiljuik Ezequiel: “Na nimitstitlani” (Ezeq. 2:). Nopa tlauel kiyolchikajki. Uelis kiilnamijki Jehová kiampa kiniljuik Moisés uan Isaías kema kintlapejpenik ma elikaj itlajtolpanextijkauaj ( 3, 4Éx. 3:10; Is. 6:8). Ezequiel nojkia kimatiyaya Jehová kinpaleuijtoya ni tlajtolpanextianij ma kichiuakaj se keski tekitl tlen tlauel ouij. Yeka kema Jehová ompa kiiljuik: “Na nimitstitlani”. Kichijki ma motemachi nelia kipaleuiskia. Ipan amochtli Ezequiel miakpa kiijtoua: “ToTeko nechkamauik” (Ezeq. 14:2). Uan nojkia miakpa kiijtoua: “Sampa toTeko nechkamauik” (Ezeq. 6:1). Tlen kiijtok Ezequiel kinextia motemachiyaya Jehová kititlantoya ma kichiua nopa tekitl. Nojkia itata eliyaya se sacerdote, yeka uelis kimachtijtoya Jehová nochipa kinpaleuia itlajtolpanextijkauaj. Jehová kiampa kichijki kema kiniljuik Isaac, Jacob uan Jeremías nochipa itstoskia ininuaya (Gén. 26:24; 28:15; Jer. 1:8).
4. ¿Tlake tlajtoli tlauel kiyolchikajki Ezequiel?
4 ¿Nochi israeleuanij kitlakakiliskiaj tlen Ezequiel kiniljuiskia? Jehová kiiljuik: “Axkinekisej mitstlakakilisej pampa axkinekij nechneltokasej” (Ezeq. 3:7). Kema kiampa kichijkej, kinextijkej amo kinekiyayaj kitlakakilisej Jehová. Tlen Jehová kiiljuik Ezequiel tlauel kiyolchikajki pampa kiitak ya kuali kichiuayaya iteki maske maseualmej amo kinekiyayaj kitlakakilisej. Nojkia Jehová kiiljuik kema kintlatsakuiltiskia judíos, inijuantij amo ueliskiaj kiijtosej amo itstoya se tlajtolpanextijketl katli kinmatiltiskia tlake kinpanoskia (Ezeq. 2:5; 33:33). Tlen Jehová kiiljuik Ezequiel, tlauel kiyolchikajki uan kipaleuik kuali ma kichiua iteki.
JEHOVÁ TECHTITLANI MA TITLAJTOLMOYAUAKAJ
Maske maseualmej amo kinekij techtlakakilisej o techtlatsakuiltiaj sanse kej Ezequiel, timotemachiaj Jehová techpaleuia. (Xikita párrafos 5, 6).
5. ¿Kenke tlauel techyolchikaua Isaías 44:8?
5 Tojuantij nojkia tlauel techyolchikaua pampa eli Jehová katli techtitlani ma titlajtolmoyauakaj. Tijpiaj se ueyi tlateochiualistli pampa tielij itlajtoltemakauaj (Is. 43:10). Jehová kiiljuik Ezequiel: “Amo xikinmakasi nopa tlakamej”. Uan tojuantij techiljuia: “Amo ximajmauikaj”. ¿Kenke amo kinamiki tikinmakasisej tokualankaitakauaj? Pampa katli techtitlani ma titlajtolmoyauakaj eli Jehová, uan ya techpaleuis sanse kej kipaleuik Ezequiel (xijpoua Isaías 44:8).
6. 1) ¿Kenijkatsa Jehová techiljuia nochipa techpaleuis? 2) ¿Tlake tlauel techyolchikaua?
6 Jehová techiljuia nochipa techpaleuis. Kema Jehová ayamo kiijtojtoya: “Inmojuantij [...] innotestigos”, kiijtok: “Kema inpanosej ipan kuesoli keja se atl tlen uejkatla, na niitstos inmouaya. Kema inkipanosej tlaouijkayotl tlen eltok keja se ueyi atemitl, axinmechatsonpoliuiltis. Uan kema inpanosej ipan se tlaijiyouilistli keja se tlitl, axinmechtlatis” (Is. 43:2). Maske kema titlajtolmoyauaj tikixnamikij uejueyi tlaouijkayotl tlen eli kej ueyatl uan tlitl, Jehová techpaleuia nojua ma titlajtolmoyauakaj (Is. 41:13). Tojuantij nojkia techpano sanse kej Ezequiel, miakej maseualmej amo kinekij techtlakakilisej. Maske kiampa techpano, amo kineki kiijtos amo kuali tijtekipanouaj Jehová. Tlauel techyolchikaua pampa tijmatij Jehová yolpaki pampa tijchiuaj kampeka nojua titlajtolmoyauasej. Apóstol Pablo kiijtok: “ToTeko techtlaxtlauis sejse tojuantij keja nopa tekitl tlen tijchijtokej” (1 Cor. 3:8; 4:1, 2). Se tosiuaikni katli miak xiuitl tlatekipanojtok kej precursora, kiijtok: “Tlauel niyolpaki nijmatis Jehová techteochiua pampa tijchiuaj kampeka tijtekipanosej”.
TOTEOTSIJ ITONAL KIMAKAK CHIKAUALISTLI EZEQUIEL
Ezequiel kiitak kejuak ipan se temiktli se carro tlen Jehová kiyakanayaya, nopa kipaleuik nojua tlauel ma motemachi Jehová kipaleuiskia ma tlajtolmoyaua. (Xikita párrafo 7).
7. ¿Kenijkatsa kipaleuiyaya Ezequiel kema moiljuiyaya ipan tlen kiitak? (Xikita tlaixkopinkayotl ipan ipantsajka).
7 Ezequiel kiitak toTeotsij itonal kipia miak chikaualistli. Ya kiitak kejuak ipan se temiktli kenijkatsa Jehová itonal kichiuayaya ma mojmolinikaj iluikaeuanij uan nopa uejueyi ruedas tlen se carro (Ezeq. 1:20, 21). Ezequiel kiijtok: “Kema nikitak, niuetski tlalchi ika noxayak” (Ezeq. 1:28). Uelis kema moiljuiyaya ipan tlen kiitak, kipaleuiyaya ma motemachi toTeotsij itonal kipaleuiskia ma kichiua nopa tekitl.
8, 9. 1) ¿Tlake tlamantli Jehová kinauatik Ezequiel? 2) ¿Kenijkatsa Jehová nojkia kiyolchikajki Ezequiel?
8 Jehová kinauatik Ezequiel: “Tlakatl, ximoketsa uan nimitskamauis”. Tlen toTeotsij kinauatik uan itonal kiyolchikajki uan kipaleuik ma moketsa, yeka kiijtok: “Itonal kalajki ipan na uan nechchijki ma nimoketsa” (Ezeq. 2:1, 2). Teipa kema tlajtolmoyajki, Jehová kipaleuik “ika ima” o itonal (Ezeq. 3:22; 8:1; 33:22; 37:1; 40:1). ToTeotsij itonal kipaleuik Ezequiel ma kinkamanaljui judíos maske inijuantij kipiayayaj “tetik ininxayak uan tlauel yoltetikej” (Ezeq. 3:7). Jehová kiiljuik: “Nimitschijtok moxayak tetik keja yajuantij uan nimitschijtok tiyoltetik keja yajuantij. Na nimitschijtok titetik keja tetl. Uajka amo xikinimakasi. Yonke yajuantij nesiskiaj ixkualantokej” (Ezeq. 3:8, 9). Ika ni tlajtoli Jehová kejuak kiiljuik: “Amo xijkaua ma mitsyolkokokaj pampa amo kinekij mitstlakakilisej, na nimitsmakas chikaualistli”.
9 Kema Ezequiel tlanki kiita nopa tlamantli, toTeotsij itonal kiuikak kampa monekiyaya tlajtolmoyauas. Ezequiel kiijtok: “ToTeko nechitskiyaya chikauak ika ima”. Ya amo nima kikuamachilik tlake monekiyaya kinmatiltis israeleuanij, monejki panos se semana (Ezeq. 3:14, 15). Teipa, Jehová kinauatik ma yaui ipan se tlamayamitl uan nopaya itonal kalajki ipan Ezequiel (Ezeq. 3:23, 24). Kiampa Ezequiel kipixki chikaualistli uan pejki tlajtolmoyaua.
TOTEOTSIJ ITONAL TECHMAKA CHIKAUALISTLI
¿Tlake tlamantli tlen kipaleuik Ezequiel nojkia techpaleuis ma titlajtolmoyauakaj? (Xikita párrafo 10).
10. ¿Tlake techpaleuis kuali ma titlajtolmoyauakaj, uan kenke kiampa tikijtouaj?
10 Ma tikitakaj tlen kipanok Ezequiel uan kiampa tijmatisej tlake techpaleuis kuali ma titlajtolmoyauakaj. Kema ayamo tlajtolmoyauayaya, toTeotsij itonal kimakak chikaualistli. Kej Ezequiel, tojuantij amo ueliskia titlajtolmoyauasej tlaj toTeotsij itonal amo techpaleuiskia. ¿Kenke kiampa tikijtouaj? Pampa Satanás kichiua kampeka amo ma tijchiuakaj nopa tekitl (Apoc. 12:17). Maske timoiljuisej amo uelis tijtlanisej Satanás pampa kipia miak chikaualistli, kema titlajtolmoyauaj tijnextiaj kena tiuelisej (Apoc. 12:9-11). Kema tikinkamanaljuiaj maseualmej, tijnextiaj Satanás amo techmajmatia ika tlen kineki techchiuilis uan nojkia amo uelis techtlanis. Uajka, kema tijchiuaj kampeka titlajtolmoyauasej maske techtlatsakuiltiaj, tijnextiaj toTeotsij itonal techyakana uan Jehová yolpaki ika tlen tijchiuaj (Mat. 5:10-12; 1 Ped. 4:14).
11. ¿Kenijkatsa techpaleuis toTeotsij itonal, uan tlake uelis tijchiuasej tlaj tijnekij nojua tijselijtosej?
11 Kema Jehová kichijki tetik ixayak Ezequiel, techilnamikilia toTeotsij itonal nojkia uelis techpaleuis ma tikixnamikikaj tlen ueli tlaouijkayotl (2 Cor. 4:7-9). Uajka, ¿tlake moneki tijchiuasej tlaj tijnekij toTeotsij nojua ma techmaka itonal? Moneki miakpa tijtlajtlanisej uan timotemachisej ya techpaleuis. Jesús kiniljuik itokilijkauaj: “Xijtlajtlanikaj”, “xijtemokaj tlen inmechpoloua” uan “xijnotsakaj toTeko”. ¿Tlake kichiuas Jehová tlaj kiampa tijchiuasej? Ya techmakas itonal (Luc. 11:9, 13; Hech. 1:14; 2:4).
EZEQUIEL MOMACHTIK TOTEOTSIJ ITLAJTOL
12. Kej kiijtoua Ezequiel 2:9-3:3, ¿kanke kiski nopa amatlajkuiloli uan tlake kiijtouayaya?
12 Ezequiel amo san kiselik toTeotsij itonal, nojkia momachtik toTeotsij iTlajtol. Se tonali kejuak kiitak ipan se temiktli se akajya “imako kipixtoya se amatl mimilijtok” (xijpoua Ezequiel 2:9–3:3). ¿Kanke kiski nopa amatl? ¿Tlake kiijtouayaya? Uan, ¿kenijkatsa Ezequiel kejuak kikuajki nopa amatl? Nopa amatl kiski kampa Jehová moseuijtoya. Uelis Jehová kititlanki nopa amatlajkuiloli ika se tlen nopa nauij iluikaeuanij katli Ezequiel kinitak (Ezeq. 1:8; 10:7, 20). Ni amatlajkuiloli kiijtouayaya tlen kinpanoskia katli kinuikatoyaj Babilonia pampa tlaijixnamikiyayaj, uan Jehová kinauatijtoya Ezequiel ma kinmatilti (Ezeq. 2:7). Nopa amatl kipiayaya tlajkuiloli iixpa uan iika.
13. ¿Tlake kinauatik Jehová ma kichiua Ezequiel ika nopa amatlajkuiloli, uan kenke kimatki tsopelik?
13 Jehová kiiljuik Ezequiel: “Xijkua nochi nopa amatl hasta temis nochi moijti”. Ezequiel kichijki tlen kinauatijkej uan kikuajki nochi nopa amatl. ¿Tlake kiijtosneki tlen kiitak? Ezequiel monekiyaya kuali kikuamachilis tlen tematiltiskia. Monekiyaya kineltokas pampa nopa kiyololiniskia ma tlajtolmoyaua. Teipa, Ezequiel kimatki nopa amatl “tsopelik keja sayolnektli” (Ezeq. 3:3). ¿Kenke kiampa kimatki? Pampa kiitak kej se tlateochiualistli tematiltis tlen Jehová kinauatijtoya (Sal. 19:8-11). Tlauel yolpakiyaya pampa Jehová kitlapejpenijtoya ma eli se itlajtolpanextijka.
14. ¿Tlake kipaleuik Ezequiel ma tlajtolmoyaua?
14 Teipa Jehová kiiljuik Ezequiel: “Xijkauili para nochi ni notlajtol ma kalaki ipan moyolo. Uan xijtlakakili ika miak cuidado” (Ezeq. 3:10). Jehová kinekiyaya Ezequiel ma kiilnamiki uan ma moyoliljui ipan tlen kiijtouayaya nopa amatlajkuiloli. Nopa kipaleuiskia kuali ma tlaneltoka uan nojkia ma kiilnamiki tlen monekiyaya kinmatiltis nopa maseualmej (Ezeq. 3:11). Kema Ezequiel kikuamachilik uan kineltokak tlen Jehová kinauatijtoya, kipaleuik ma tlajtolmoyaua (nojkia xikita Salmo 19:14).
TOJUANTIJ NOJKIA TIMOMACHTIAJ TOTEOTSIJ ITLAJTOL
15. ¿Tlake moneki tijneltokasej ika nochi toyolo tlaj tijnekij nojua titlajtolmoyauasej?
15 Tlaj nojua tijnekij titlajtolmoyauasej, moneki timomachtisej toTeotsij iTlajtol. Moneki tijneltokasej ika nochi toyolo tlen Jehová techiljuia. Ipan ni tonali Jehová kitekiuia Biblia, kiampa techiljuia tlake kineki ma tijchiuakaj. ¿Kenijkatsa uelis tijmatisej tlaj toTeotsij iTlajtol nojua kiyakana tlen timoiljuiaj uan tlen tijyolmatij?
16. ¿Tlake moneki tijchiuasej ika toTeotsij iTlajtol uan kenijkatsa uelis kiampa tijchiuasej?
16 Kema titlakuaj, tlauel kipaleuia totlakayo. Uan kema timomachtiaj toTeotsij iTlajtol uan timoyoliljuiaj ipan tlen tijpouaj, techpaleuia kuali ma titlaneltokakaj. Nopa tlamantli kineki techmachtis kema Ezequiel kiitak se amatlajkuiloli. Jehová kineki kejuak ma timoixuitikaj ika iTlajtol uan ma tijkuamachilikaj. Uelis tijchiuasej nopa tlaj timomaijtosej, titlapouasej uan timoyoliljuisej. Achtoui timomaijtouaj pampa tijnekij tijkuamachilisej tlen toTeotsij kiijtoua. Teipa tijpouaj Biblia uan nojkia timoketstiauij uan timoyoliljuiaj ipan tlen tijpojkej. ¿Kenijkatsa techpaleuis tlaj kiampa tijchiuasej? Tlaj timoyoliljuiaj ipan tlen tijpouaj, techpaleuis nojua tlauel kuali ma titlaneltokakaj.
17. ¿Kenke tlauel moneki timoyoliljuisej kema tijpouaj Biblia?
17 Tlauel techpaleuis tlaj tijpouasej Biblia uan timoyoliljuisej pampa nopa kichiuas amo ma timajmauikaj kema titematiltisej tlen toTeotsij iTlanauatijkayo. Uan nojkia techpaleuis amo ma timajmauikaj kema monekis tikinmatiltisej maseualmej kinpanos tlen amo kuali. Kema timoyoliljuiaj ipan nopa kuajkuali tlamantli tlen Jehová kinextia, techpaleuia nojua kuali ma timouampojchiuakaj iuaya. Nopa techpaleuis kuali ma tijyolmatikaj uan ma tijpiakaj tlaseuilistli (Sal. 119:103).
TIMOSENTLALIJTOKEJ NOJUA TLAUEL TITLAJTOLMOYAUASEJ
18. ¿Tlake tlamantli kiitasej katli tikinkamanaljuijkej, uan kenke?
18 Maske amo tielij tlajtolpanextianij kej Ezequiel, kena uelis titematiltisej tlen Jehová kiijtojtok ipan Biblia. ToTeotsij nojua techkajtok ma titlajtolmoyauakaj, yeka timosentlalijtokej tikinkamanaljuisej nochi maseualmej. Kema Jehová tetlajtolsenkauas, maseualmej amo uelis kiijtosej amo aka kiniljuik o kinmatiltik tlen monekiyaya kichiuasej (Ezeq. 3:19; 18:23). Ipan nopa tonali kiitasej tlen titematiltiyayaj eliyaya toTeotsij iTlajtol.
19. ¿Tlake techpaleuis ma titlajtolmoyauakaj?
19 Uelis titlajtolmoyauasej pampa nojkia techpaleuia nopa eyi tlamantli tlen kipaleuik Ezequiel: titlajtolmoyauaj pampa Jehová techtitlantok, techmaka itonal uan nojkia pampa timomachtiaj Biblia. Jehová techpaleuia, yeka timosentlalijtokej titlajtolmoyauasej uan nojkia tikijiyouisej “tlen panotiualas hasta itlamia tonali” (Mat. 24:13).
UIKATL 65 Xijchiua kampeka titlaneltokas
a Ipan ni tlamachtili tikitasej eyi tlamantli tlen kipaleuik tlajtolpanextijketl Ezequiel ma tematilti tlen Jehová kinauatijtoya. Kema tikitasej kenijkatsa Jehová kipaleuik, kichiuas ma timotemachikaj ya nochipa techpaleuis kema titlajtolmoyauasej.