Tlen kinpanotok Jehová itlajtoltemakauaj

Kimatki amo san tlapik tiitstokej

JESÚS kiijtoua kinixmati tlen kitokiliaj (Juan 10:14). Tlaj se maseuali kipia kuali iyolo, kipaktia tlaseuilistli uan tlen xitlauak, kinekis mouampojchiuas ininuaya Cristo itokilijkauaj. Kimatis amo san tlapik tiitstokej, kej kipanok se siuatl katli eua Bélgica. Ma tikitakaj tlen kipanok:

“Kema Jehová itlajtoltemakauaj nechpaxalokoj, tlauel miak tonali nimokuesojtoya uan nijnekiyaya nimomiktis. Nechpaktik kema kiijtojkej kenijkatsa mosenkauaskia nopa kuesoli tlen onka ipan ni Tlaltipaktli, san amo nechpaktik kema kiijtojkej toTeotsij kisenkauaskia. Kipiayaya chikueyi xiuitl ayokmo niauiyaya ipan se iglesia, pampa kichiuayayaj tlen amo kuali uan nopa nechkualankamakayaya. Maske ya nopa nikitayaya, nikitak tlen nechiljuijkej Jehová itlajtoltemakauaj nelnelia melauak uan nijkuamachilik amo uelis tiitstosej tlaj toTeotsij amo techpaleuis.

Maske nechpaxalojkej se keski tonali, teipa ayokmo uelki nimonojnotsa ininuaya. Tlauel nimokuesok. Pejki nitlachichina uan nijtlamiyaya ome cajas san ipan se tonal, nojkia pejki nijtekiuia drogas. Tlauel nijnekiyaya nimonojnotsas iuaya noueyitata katli ya miktoya, yeka pejki nijchiua tlen kichiuaj tetlajchiuianij. ¡Nechpanok tlen tlauel amo kuali pampa kiampa nijchijki! Ika tlayoua kema noselti niitstoya, nechmajmatiyayaj nopa amo kuali ajakamej. Kiampa nechpanok miak metstli. Amo nijnekiyaya niitstos noselti ika tlayoua.

Se tonali, kema niajki ninejnemito, amo niajki kampa nimomajtoya nia, niajki sejkanok uan niasito kampa kichijchijtoyaj se ueyi kali. Nimosentlachilik kema nikitak tlauel miakej tekitiyayaj. Kema nimonechkauito nikitak eliyayaj Jehová itlajtoltemakauaj katli kichijchiuayayaj se kali kampa mosentiliskiaj. Nikilnamijki kema nechpaxalouayayaj nochaj uan nimoiljuik tlauel kuali eliskia tlaj nochi maseualmej itstoskiaj kej inijuantij.

Nijnekiyaya ika nochi noyolo ma nechpaxalokaj, yeka nikinnojnotski se keskij katli nopaya tekitiyayaj. Nimomaijtok uan kema panok matlaktli tonali, sampa nechpaxaloko katli achtouia nechmachtiyaya. Nechiljuik tlaj sampa nijnekiyaya nimomachtis, uan nikiljuik kena. Nima nechtlanejki ma nia tlanechikoli uan kena niajki. ¡Amo kema nikitstoya tlen nopaya nikitak! Tlauel miak xiuitl nikintemojtoya maseualmej katli nelnelia yolpakij uan moikneliaj uan nama kena nikinpantijtoya.

Ipan nopa tonali, pejki nimonechikoua ininuaya sejse chikueyi. Uan kema panok se eyi semanas, ayokmo nitlachichinki. Nijtepejki nopa amochtli tlen tetlajchiuianij kitekiuiaj uan nopa discos kampa kiuikachiuiliaj Satánas, uan ika yolik nijmatki nechtlalkauijkej nopa amo kuali ajakamej. Pejki nijchiua ipan nonemilis tlen Jehová tlanauatia; uan kema panok eyi metstli, pejki nitlajtolmoyaua. Nimoatsonpoliuiltik kema panok chikuasej metstli, uan kema panok ome tonali, nimochijki precursora auxiliar.

Nijtlaskamatilia Jehová pampa nechpaleuik. Nama nijmati amo san tlapik niitstok. ToTeotsij Jehová eli kejuak se ueyi tepankali kampa nimomanauia uan nechmokuitlauia (Proverbios 18:10). Nijyolmati kej katli kiijkuilok se salmo, ya kiijtok: ‘Más kuali ma niyolto se tonal uan ma niitsto ipan moteopa, noTeko, uan axniyoltos se mil tonali uan san ninentinemis kampa ueli. Kena, achi más kuali nimoketsaskia kampa ipuerta moteopa, noTeko, uan axniitstos ipan se ueyi kali kampa onka tlajtlakoli’ ”.

Ni siuatl katli kuali iyolo kimatki amo san tlapik tiitstokej. Uan nochi maseualmej katli kitemosej Jehová ika kuali ininyolo, nojkia kiampa itstosej.