¿Kenke moneki tijmaktilisej tonemilis Jehová?

“Na niiaxka toTeko Dios uan yajaya tlen nijtekipanoua. Uan tlayoua nechtitlanilik iiluikaejka tlen nechiljuik” (HECH. 27:23).

1. 1) ¿Tlake moneki kichiuas se akajya tlaj kineki moatsonpoliuiltis? 2) ¿Tlake tlajtlanili tijnankilisej?

 “¿TIMOYOLKUEPTOK tlen motlajtlakoljuaj, tijmaktilijtok Jehová monemilis uan nelia timotemachia Jesucristo imikilis uelis mitsmakixtis?”. Ni eli se tlen nopa ome tlajtlanili tlen kinchiuiliaj katli moatsonpoliuiltisej kema tlami nopa tlamachtili tlen kinixtomiliaj. Uan, ¿kenke Cristo itokilijkauaj moneki kimaktilisej ininnemilis Jehová? ¿Kenijkatsa kinpaleuia kema kiampa kichiuaj? ¿Kenke moneki kimaktilisej ininnemilis Jehová tlaj kinekij ya kuali ma kiita tlen kichiuaj kema kitekipanouaj? Tlaj tijnekij tijmatisej kenijkatsa monankilia ni tlajtlanili, achtoui ma tikitakaj tlake kiijtosneki kema se akajya kimaktilia inemilis toTeotsij.

2. ¿Tlake kiijtosneki tijmaktilisej tonemilis toTeotsij?

² Tlen Pablo kiijtok kema yauiyaya ipan se barco tlen nechka atsonpoliuiskia, techpaleuis ma tijmatikaj tlake kiijtosneki tijmaktilisej tonemilis toTeotsij. Ya kiijtok: “Na niiaxka toTeko Dios uan yajaya tlen nijtekipanoua” (xijpoua Hechos 27:22-24). Maske “tlakamej kampa ueli ipan Tlaltipaktli mokauaj ipan ichikaualis Axkualtlakatl”, Cristo itokilijkauaj tielij iaxkauaj Jehová (1 Juan 5:19). ¿Kenijkatsa tijchiuaj ni tlamantli? Kema tijmaktiliaj tonemilis Jehová, ni kiijtosneki kema ipan se tlamaijtoli tijtenkauaj o tijchiuaj se tlajtolsenkaualistli iuaya, uan teipa timoatsonpoliuiltiaj.

3. ¿Tlake kinextik Jesús kema moatsonpoliuiltik, uan kenijkatsa Cristo itokilijkauaj tijchiuaj sanse kej ya?

³ Kema Jesús moatsonpoliuiltik, kinextik ininixpa sekinok mosentlalijtoya kichiuas toTeotsij ipakilis. Ya tlakatki ipan altepetl Israel uan motemaktilijtoyaj ika Jehová, yeka ayokmo monekiyaya sampa motemaktilis. Nojkia amo kichijki pampa kiampa kiijtouayaya nopa Tlanauatili tlen Moisés kimakatoyaj. Jesús moatsonpoliuiltik pampa kej kiijtoua Biblia, ya kiiljuik iTata: “Nikaj niitstok noTeko. Nijchiuas nochi mopakilis” (Heb. 10:7; Luc. 3:21). Uajka, kema Jesús moatsonpoliuiltik kinextik iixpa Jehová mosentlalijtoya kichiuas ipakilis. Ipan ni tonali, Cristo itokilijkauaj nojkia kiampa tijchiuaj kema timoatsonpoliuiltiaj. Uan kema tijchiuaj nopa, nojkia tijnextiaj ininixpa sekinok tijmaktilijtokej tonemilis Jehová ipan se tlamaijtoli.

¿Kenijkatsa techpaleuia kema timotemaktiliaj?

4. ¿Tlake techmachtia tlen kichijkej David uan Jonatán pampa tlauel kuali mouampojchijtoyaj?

⁴ Kema se Cristo itokilijka kimaktilia inemilis toTeotsij, kitenkaua se tlamantli tlen tlauel ipati. Uan, ¿kenijkatsa techpaleuia? Uelis tijkuamachilisej tlaj timoiljuiaj kenijkatsa techpaleuia kema tikijtouaj o tijtenkauaj tijchiuasej se keski tlamantli. Achtoui ma tikitakaj kema timouampojchiuaj iuaya se akajya. Tlaj tijnekij tijpiasej se kuali touampo, tojuantij nojkia kiampa moneki tielisej. Moneki tijchiuasej se keski tlamantli uan tijnextisej nelnelia techtekipachoua tlen kipano touampo. Biblia kiijtoua David uan Jonatán tlauel kuali mouampojchijkej, yeka kichijkej se tlajtolsenkaualistli (xijpoua 1 Samuel 17:57 uan 18:1, 3). Maske ipan ni tonali amo itstokej miakej katli kichiuaj kej inijuantij, katli kuali mouampojchijtokej nojkia kichiuaj kampeka amo motlauelkauasej uan sansejko mopaleuisej (Pro. 17:17; 18:24).

5. ¿Tlake monekiyaya kichiuas se tlatekipanojketl tlaj nochipa kinekiyaya kitekipanos iteko?

⁵ Nopa Tlanauatili tlen toTeotsij kinmakatoya israeleuanij, kiijtouayaya se tlatekipanojketl ueliskia kichiuas se tlajtolsenkaualistli ika iteko tlen nochipa uejkauaskia. Nopa Tlanauatili kiijtouayaya: “Intla nopa tlakatekitiketl kiijtos para axkineki itstos malakantok para yas kampa ya kinekis uan kiijtoua kiniknelia iteko, isiua, uan ikoneuaj uan kineki mokauas ininuaya, uajka yajaya uelis mokauas para noja elis iaxka iteko. Uan iteko kiuikas ininixpa jueces, uan nopona kinechkauiltisej puertajteno, uan ika se ueyi teposuitsmalotl kikoyonilis inakas. Keja nopa yajaya mochiuas itlatekipanojka nopa iteko para nochipa” (Éxo. 21:5, 6). Kej tikitaj, tlaj nopa tlatekipanojketl nojua kinekiyaya kitekipanos iteko katli teiknelia, monekiyaya kichiuas se tlajtolsenkaualistli iuaya uan kiijtos nochipa kineki kitekipanos.

6, 7. 1)¿Kenijkatsa techpaleuia kema tikijtouaj o tijtenkauaj tijchiuasej se keski tlamantli? 2) ¿Kenijkatsa techpaleuia ni tlamantli kema tijnekij kuali timouampojchiuasej ika Jehová?

⁶ Katli mosenkauaj nojkia moneki kiijtosej o kitenkauasej kichiuasej se keski tlamantli. Uan ni eli tlauel ipati pampa kichiuaj se tlajtolsenkaualistli ika ininnamik uan amo ika se tlamantli. Kema se tlakatl uan se siuatl san mosansejkotilijtokej, amo motemachiaj nochipa itstosej sansejko uan ininkoneuaj nojkia kiampa kiyolmatij. Uan katli mosenkajtokej uan kitenkajtokej o kiijtojkej kichiuasej se keski tlamantli, kichiuaj kampeka kisenkauasej nopa kuesoli tlen kipiaj kej kinamiki uan ika tlaiknelili (Mat. 19:5, 6; 1 Cor. 13:7, 8; Heb. 13:4).

⁷ Nama ma tikitakaj tlake kichiuaj katli tekitij sansejko. Uejkajkia, kema se akajya kitekimakayaya seyok, kiijtouayaya o kitenkauayaya kichiuas se keski tlamantli (Mat. 20:1, 2, 8). Kema sansejko kipeualtiaj se tekitl o se akajya tekiti iuaya seyok, tlauel kinpaleuia kema kitlaliaj ininfirma ipan se amatl kampa kiijtoua tlake moneki kichiuasej. Kej tikitstokej, kema maseualmej mouampojchiuaj, mosenkauaj uan tekitij sansejko, tlauel kinpaleuia kuali ma mouikakaj kema kiijtouaj o kitenkauaj kichiuasej se keski tlamantli. Nojkia tlauel techpaleuia kuali ma timouampojchiuakaj ika Jehová, kema timotemaktiliaj, pampa tikiljuiaj nama eli iaxka tonemilis. Ipan ni tlamachtili tikitasej kenijkatsa uejkajkia tlauel kinpaleuik katli motemaktilijkej ika Jehová, uan nojkia tikitasej amo san kiijtosneki tikijtosej o tijtenkauasej tijchiuasej se keski tlamantli.

Israeleuanij tlauel kinpaleuik pampa motemaktilijkej

8. ¿Tlake kinextijkej israeleuanij kema motemaktilijkej?

⁸ Israeleuanij motemaktilijkej ika Jehová kema kichijkej se tlajtolsenkaualistli. Ya kiniljuik ma monechikokaj iixpa nopa tepetl Sinaí uan kiniljuik: “Intla inkikakisej tlen niinmechiljuijtok uan inkichiuasej nopa tlajtoli tlen nijpia inmouaya, uajka inelisej innotlapejpeniljuaj tlen nochi tlakamej”. Uajka nochi tlanankilijkej: “Nochi tlen toTeko tlanauatijtok, tijchiuasej” (Éxo. 19:4-8). Kema motemaktilijkej ika Jehová amo san kiijtojkej kichiuasej se keski tlamantli, nojkia kinextijkej, inijuantij eliyayaj iaxkauaj Jehová uan ya kiniljuik: “Inelisej innotlapejpeniljuaj tlen nochi tlakamej”.

9. ¿Kenijkatsa kinpaleuik israeleuanij pampa motemaktilijkej ika Jehová?

⁹ Tlauel kinpaleuik israeleuanij kema motemaktilijkej ika Jehová. Ya amo kintlauelkajki, kiniknelik uan kinitak kej ikoneuaj. Nojkia kiniljuik: “¿Uelis se tenantsi ueli kitlauelkauas ipilkone? ¿Uelis axkitlasojtla tlen kitlakatiltik? Yonke se tenantsi ueliskia kiilkauaskia ikone, na axkema nikilkauas altepetl Jerusalén, niyon inmojuantij tlen ineuanij nopano” (Isa. 49:15). ToTeotsij kinyakanki ika nopa Tlanauatili tlen kimakak Moisés, kinyolchikajki kema kintitlanilik itlajtolpanextijkauaj uan kinmanauik ika iiluikaejkauaj. Katli kiijkuilok se salmo kiijtok: “[Jehová] kinmakak israelitajmej itlanauatiljuaj, uan kiniljuijtok nochi tlen kuali ma kichiuakaj ipan ininaltepe, para tetlajtolsenkauasej xitlauak. ToTeko axkinchiuilijtok ni tlamantli tlakamej ipan sekinok tlaltinij” (Sal. 147:19, 20; xijpoua Salmo 34:7, 19 uan 48:14). Sanse kej kinmokuitlauik israeleuanij katli eliyayaj iaxkauaj, nama Jehová kinmokuitlauia nochi Cristo itokilijkauaj katli motemaktilijtokej.

¿Kenke moneki tijmaktilisej tonemilis toTeotsij?

10, 11. ¿Kenke kema titlakatij ayokmo tielij tlen Jehová ichampoyouaj?

¹⁰ Sekij moiljuiaj: “¿Kenke moneki nimotemaktilis uan nimoatsonpoliuiltis tlaj nijneki nijtekipanos Jehová?”. Tijkuamachilisej kenke moneki kiampa tijchiuasej tlaj tikilnamikisej kenijkatsa tiitstokej iixpa toTeotsij. Pampa Adán tlajtlakolchijki, tojuantij ayokmo tielkej tlen toTeotsij ichampoyouaj (Rom. 3:23; 5:12). Yeka, tlaj tijnekij tielisej tlen toTeotsij ichampoyouaj, moneki tijmaktilisej tonemilis. Ma tikitakaj kenke.

¹¹ Nochi totatauaj tlajtlakolejkej, yeka nochi tojuantij tielij titlajtlakolejkej (1 Tim. 6:19). Kema titlakatkej ayokmo tieliyayaj toTeotsij ikoneuaj pampa Adán uan Eva tlajtlakolchijkej, uan nopa techuejkatlalik tlen toTata katli tlauel techiknelia uan toTlachijchijka (nojkia xikita Deuteronomio 32:5). Kema kiampa panok, nochi maseualmej ayokmo tielkej tlen Jehová ichampoyouaj uan timouejkatlalijkej tlen ya.

12. 1) ¿Kenijkatsa maske titlajtlakolejkej uelis tielisej tlen Jehová ichampoyouaj? 2) ¿Tlake moneki tijchiuasej tlaj tijnekij timoatsonpoliuiltisej?

¹² Maske kiampa, sejse tlen tojuantij uelis kiiljuis Jehová ma kiseli kej se tlen ichampoyouaj. * ¿Uan kenijkatsa uelis techselis tlaj titlajtlakolejkej? Kej Pablo kiijtok, kema “tieliyayaj tiikualankaitakauaj toTeko, Cristo iKone toTeko mijki topampa. Uan pampa mijki, toTeko moyoltlalik touaya uan techchijtok tiiuampoyouaj” (Rom. 5:10). Tlaj tijnekij Jehová ma techseli, moneki tikiljuisej ma techmaka se kuali totlalnamikilis, uan ni tijchiuaj kema timoatsonpoliuiltiaj (1 Ped. 3:21). Tlaj tijnekij timoatsonpoliuiltisej, achtoui moneki tijchiuasej se keski tlamantli. Moneki kuali tikixmatisej Jehová uan timotemachisej ipan ya; nojkia moneki timoyolkuepasej uan tijpatlasej tonemilis (Juan 17:3; Hech. 3:19; Heb. 11:6). ¿Uan tlake nojua moneki tijchiuasej?

13. ¿Kenke kinamiki tijmaktilisej tonemilis toTeotsij tlaj tijnekij ma techseli kej se tlen ichampoyouaj?

¹³ Tlaj tijnekij tielisej tlen Jehová ichampoyouaj katli kiueyichiuaj, achtoui moneki tijtenkauilisej se tlamantli. ¿Kenke moneki kiampa tijchiuasej? Ma timoiljuikaj ipan ni tlamantli. Se tetaj katli tlauel kitlepanitaj kampa itstok, kiixmati se telpokatl katli eli iknotsi, peua kiiknelia uan kineki ma eli se tlen ichampoyouaj. Yeka kiiljuia: “Nijneki xinechiljui tinechitas kej motata, tinechiknelis uan nochipa tinechtlepanitas”. Tlaj nopa telpokatl kichiua tlen nopa tetaj kiiljuia, ya kiselis kej se tlen ichampoyouaj. Tlen kiijtoua nopa tetaj amo eli se tlamantli tlen tlauel ouij. Jehová nojkia kiampa kichiua, ya kinselia kej ichampoyouaj san katli motemaktiliaj. Kiampa kinextia Biblia kema kiijtoua ma tijmaktilikaj nochi tonemilis “keja se tlakajkaualistli para ya, pero ma eli se tlakajkaualistli tlen yoltok uan tlen tlatsejtseloltik, pampa keja nopa kipaktia toTeko” (Rom. 12:1).

Tijnextiaj tlaiknelili uan titlaneltokaj

14. ¿Kenke kema tijmaktiliaj tonemilis toTeotsij tijnextiaj tikikneliaj?

¹⁴ Kema timotemaktiliaj ika toTeotsij, tijnextiaj tlauel tikikneliaj. Eli kejuak kema se tlakatl uan se siuatl kichiuaj nopa tlajtolsenkaualistli kema mosenkauaj. Kema se Cristo itokilijka mosenkaua, kinextia kiiknelia nopa ichpokatl katli iuaya mosenkauas kema kitenkauilia nochipa itstos iuaya maske kiixnamikisej tlaouijkayotl. Amo san kiijtoua se tlamantli, kitenkauilia inamik amo kema kitlauelkauas. Nojkia, kimatij amo uelis itstosej sansejko tlaj amo kichiuaj nopa tlajtolsenkaualistli. Tojuantij nojkia amo uelis tijselisej nochi nopa tlateochiualistli tlen kiseliaj katli elij Jehová ichampoyouaj tlaj amo tijmaktiliaj tonemilis. Uajka, timotemaktiliaj ika toTeotsij pampa maske titlajtlakolejkej tijnekij tielisej tiiaxkauaj, uan timosentlalijtokej amo kema tijtlauelkauasej maske tikixnamikisej tlaouijkayotl (Mat. 22:37).

15. ¿Kenke kema timotemaktiliaj tijnextiaj kuali titlaneltokaj?

¹⁵ Kema timotemaktiliaj, nojkia tijnextiaj kuali titlaneltokaj. ¿Kenke kiampa tikijtouaj? Pampa kema kuali titlaneltokaj, timotemachiaj tlauel techpaleuis tlaj timouampojchiuasej ika Jehová (Sal. 73:28). Maske kemantika tijmatisej ouij tijtekipanosej pampa tiitstokej ika “tlakamej tlen tlauel fiero inintlalnamikilis”, timotemachiaj toTeotsij techpaleuis tlaj tojuantij tijchiuaj kampeka tijchiuasej tlen ya kineki (Fili. 2:15; 4:13). Nojkia, tijmatij Jehová techtlasojtlas kema timokuapolosej pampa titlajtlakolejkej (xijpoua Salmo 103:13, 14 uan Romanos 7:21-25). Uan timotemachiaj ya techteochiuas pampa tijchiuaj kampeka amo tijtlauelkauasej (Job 27:5).

Kema timotemaktiliaj ika toTeotsij kichiua ma tiyolpakikaj

16, 17. ¿Kenke kema timotemaktiliaj ika Jehová kichiua tlauel ma tiyolpakikaj?

¹⁶ Kema timotemaktiliaj ika toTeotsij kichiua ma tiyolpakikaj, pampa kiijtosneki tijmakaj tonemilis, uan kej Jesús kiijtok: “Más pakilistli kiselia tlen temaka se tlenijki, uan axkeja tlen kiselia” (Hech. 20:35). Kema Jesús ualajki ipan Tlaltipaktli uan tlajtolmoyajki, tlauel yolpajki pampa kinpaleuik sekinok. Kemantika, amo nima mosiajketsayaya, amo nima tlakuayaya yon amo moiljuiyaya san ipan ya, pampa kinmachtiyaya sekinok nopa ojtli tlen temaka nemilistli (Juan 4:34). Jesús tlauel yolpakiyaya pampa kimajtoya tlauel kiyolpakiltiyaya iTata. Yeka kiijtok: “Mojmostla nijchiua tlen kipaktia” (Juan 8:29; Pro. 27:11).

¹⁷ Jesús kiniljuik itokilijkauaj tlake monekiyaya kichiuasej tlaj nelnelia kinekiyayaj yolpakisej: “Intla se tlakatl kineki nechtokilis, ma kitlauelkaua tlen yajaya kineki” (Mateo 16:24). Kema ayokmo tijchiuaj san tlen tojuantij tijnekij, techpaleuia ma tijnechkauikaj toTeotsij katli teiknelia. ¡San toTeotsij uelis tlauel kuali techmokuitlauis!

18. ¿Kenke tlauel tiyolpakij kema tijmaktiliaj tonemilis Jehová uan amo tlaj tijmaktiliaj tonemilis se maseuali o se tlamantli?

¹⁸ Katli tijmaktilijtokej tonemilis Jehová uan tijchiuaj tlen ya kineki, tlauel tiyolpakij uan amo kej katli mosentlaliaj kitekipanosej se akajya o mosentlaliaj kichiuasej se tlamantli, kej tlatominpiasej. Katli tielij Cristo itokilijkauaj tlauel tiyolpakij pampa timotemaktilijtokej ika Jehová (Mat. 6:24). Maske tiyolpakij pampa “titekitij iuaya toTeko”, nochipa tikilnamiktokej amo tijmaktilijkej tonemilis se tekitl, tijmaktilijkej tonemilis toTeotsij katli tlauel techpatiita (1 Cor. 3:9). Jehová tlauel kipatiita kema amo tijtlauelkauaj uan amo kiilkaua nochi tlen tijchiuaj. Uan nojkia sampa kichiuas ma timotelpokachiuakaj uan nochipa techmokuitlauis (Job 33:25; xijpoua Hebreos 6:10).

19. ¿Tlake tlateochiualistli kipiaj katli kimaktiliaj ininnemilis Jehová?

¹⁹ Biblia techiljuia ma tijchiuakaj ni tlamantli: “Ximonechkauikaj kampa toTeko uan yajaya inmechnechkauis” (Sant. 4:8; Sal. 25:14). Katli kimaktilisej ininnemilis Jehová, tlauel yolpakisej pampa tlauel kuali mouampojchiuasej iuaya. Ipan nopa seyok tlamachtili tikitasej kenke amo kinamiki timajmauisej tijmaktilisej Jehová tonemilis uan kiampa tielisej tiiaxkauaj.

[Tlatsintla kiijtoua]

¿Tlake titlanankiliskia?

• ¿Tlake kiijtosneki tijmaktilisej tonemilis Jehová?

• ¿Kenijkatsa techpaleuia kema timotemaktiliaj?

• ¿Kenke Cristo itokilijkauaj moneki motemaktilisej ika Jehová?

[Tlajtlanili tlen monankilis]

[Tlaixkopinkayotl]

Tlaj tijchiuaj tlen tijtenkajkej kema tijmaktilijkej tonemilis Jehová, techpaleuis ma tiyolpakikaj