IPAN ni tonali, miakej maseualmej moiljuiaj uelis kinojnotsasej tlen ueli tlamantli kema momaijtosej uan toTeotsij nochipa kintlakakilis. Se keskij katli tlayakanaj ipan se religión uan katli kiijtouaj nochi religiones eli kuali, kiijtouaj uelis kiampa tijchiuasej. ¿Nelia techtlakakilis toTeotsij tlaj kiampa tijchiuasej?

Biblia kiijtoua kema miakej maseualmej momaijtouaj amo nochipa kinojnotsaj toTeotsij katli nelia melauak. Uejkajkia kema moijkuilok Biblia, maseualmej momajtoyaj momaijtosej ininixpa teteyomej. Yeka toTeotsij miakpa kiniljuik itekipanojkauaj inijuantij amo kiampa ma kichiuakaj. Ipan Salmo 115:​4-6, kiijtoua nopa teteyomej “kipiaj ininnakas, pero axtlakakij”. Nelia melauak tlen kiijtoua ni texto. Uajka, ¿kinamiki tijnojnotsasej se akajya katli amo ueli tlakaki?

Tlaj tijnekij tijkuamachilisej ni tlamantli, ma tikitakaj nopa tlapoualistli kampa kiijtoua tlen kipanok Elías kema kiniljuik katli kiueyichiuayayaj Baal ma kichiuakaj se tlamantli. Elías kinojnotsaskia toTeotsij uan inijuantij kinojnotsaskiaj Baal. Katli tlanankiliskia, kinextiskia eli se teotsij katli melauak. Katli kineltokayayaj Baal, kena kinejkej kiampa kichiuasej uan pejkej momaijtouaj. Uan maske uejkajkej momaijtojtoyaj, “axaka kinnankilik, niyon axaka kinchiuilik cuenta” (1 Reyes 18:29). ¿Nojkia kiampa kipanok Elías?

Amo. Kema tlanki momaijtoua toTeotsij kiualtitlanki tlitl uan kitlamitlatik nopa tlakajkaualistli tlen Elías kitlalijtoya. ¿Kenke ya kena kinankilijkej? Ipan 1 Reyes 18:​36, 37, kiijtoua kenke kinankilijkej. Maske ika hebreo nopa tlamaijtoli san kipiayaya se treinta tlajtoli, Elías kiijtok expa toTeotsij itoka, Jehová.

¿Kenke tlauel kuali tlen kichijki? Ma tikilnamikikaj, Baal (tlen kiijtosneki, “tekojtli”, o “tlayakanketl”) eliyaya ininteotsij canaáneuanij uan nojkia kitokaxtiyayaj ika sekinok tokajyotl. Uan Jehová amo kipatiliaj itoka ika sekinok tokajyotl pampa san ya kinamiki kiampa tijtokaxtisej. Ya kiijtok: “Na niDios [Jehová, TNM], niinmoTeko. Ya nopa notoka uan axaka seyok nijkauilis ma kipia noueyitilis” (Isaías 42:⁠8).

Nopa tlamaijtoli tlen kichijkej katli kineltokayayaj Baal uan Elías, ¿kintlakakilik sanse teotsij? Amo. Kema kiueyichiuayayaj Baal, kinmiktiyayaj maseualmej uan momekatiyayaj, nochi nopa tlamantli kichiuayaya amo ma motlepanitakaj uan amo kuali ma monejnemiltikaj. Uan kema kiueyichiuayayaj Jehová, amo kiampa kichiuayayaj uan amo aka kichiualtiyayaj ma kichiua tlen amo kuali. Uajka, nopa tlamaijtoli tlen kichijki Elías, amo kitlakakiliskia Baal. Eliskia kej tijtlajkuiljuiliskia se amatlajkuiloli se mouampo katli kuali monejnemiltia uan kiasiskia seyok katli amo kuali monejnemiltia.

Katli kinojnotsaj Jehová kema momaijtouaj, kinojnotsaj katli kinchijchijki nochi maseualmej. * Tlajtolpanextijketl Isaías kiijtok ni tlamantli kema momaijtok: “Ta titoTeko [Jehová, TNM], kena, tiitstoskia titoTata” (Isaías 63:16). Jesús kamanaltiyaya tlen Jehová kema kiniljuik ni tlamantli itokilijkauaj: “Nitlejkos kampa itstok noTata tlen nojkia inmoTata uan yajaya tlen noTeko uan nojkia inmoTeko” (Juan 20:17). Tlaj Jehová eli Jesús iTata, nojkia eli iTeotsij uan Jesús ya kinojnotski kema momaijtok yeka itokilijkauaj nojkia kiampa monekiyaya kichiuasej (Mateo 6:⁠9).

¿Biblia kiijtoua moneki tikinnojnotsasej Jesús, María, santojmej o iluikaeuanij kema timomaijtosej? Amo. Moneki san Jehová tijnojnotsasej pampa tijueyichiuaj kema timomaijtouaj uan Biblia kiijtoua san ya moneki tijueyichiuasej (Éxodo 20:⁠5). Nojkia pampa ya techtlakakilia kema timomaijtouaj (Salmo 65:⁠2). Uan maske kinmakatok sekinok se keski tekitl, ya amo kikajtok ma kikakikaj kema timomaijtouaj.

Yeka tlaj tijnekij Jehová ma techtlakakili, moneki san ya tijnojnotsasej. Biblia kiijtoua: “Nochi tlakamej tlen kinotsasej toueyiTeko para ma kinmakixtis, yajaya, kena, kinmakixtis” (Hechos 2:21). Uajka, ¿toTeko Jehová kintlakakilia nochi katli momaijtouaj tlaj kitekiuiaj itoka? ¿O moneki tijchiuasej se tlamantli?