4. Ayokmo kinikneliaj ininchampoyouaj

“Tlakamej [...] axteiknelisej” (2 TIMOTEO 3:​1-3).

● Chris tekiti kampa kinpaleuiaj siuamej katli kinmakiliaj ipan altepetl Gales. Ya kiijtoua: “Se tonali ualajki se siuatl katli tlauel kimakilijtoyaj, yeka amo nijmatki ajkia eliyaya. Sekij siuamej katli kinekij ma tikinpaleuikaj tlauel kintlaijiyouiltijtokej, yeka amo kinekij techixtlachilisej pampa moiljuiaj amo tleno ininpati”.

¿TLAKE KINEXTIA TLEN PANOTOK? Ipan se altepetl tlen África, nechka treinta por ciento tlen nopa siuamej kinchiuilijkej tlen amo kinamiki kema eliyayaj siuapilmej. Uan kema kintlatsintokilijkej tlakamej kenijkatsa kiitayayaj kema kinmakiliyayaj siuamej, nechka tlajko tlen nopa tlakamej kiijtojkej amo kenijki kiitayayaj. Amo san siuamej kinmakiliaj. Ipan Canadá, nechka tlajko tlen nopa tlakamej katli nopaya itstokej, kiijtojkej ininsiuajuaj kinmakilijtokej o kintlaijiyouiltijtokej.

TLEN SEKIJ KIIJTOUAJ. Maske uejkajkia nojkia kinmakiliyayaj siuamej, san ipan ni tonali itstokej miakej katli kinpaleuiaj.

¿NELIA TLEN KIIJTOUAJ? Maske nama miakej maseualmej kiijtouaj tlauel amo kuali kema se akajya kitlaijiyouiltiaj, nojua itstokej miakej siuamej katli kiampa kinchiuiliaj. Ipan ni tonali maseualmej ayokmo kinikneliaj ininchampoyouaj.

¿TLAKE TIMOILJUIA? ¿Moaxitia tlen kiijtoua 2 Timoteo 3:​1-3? ¿Maseualmej ayokmo tlauel kinikneliaj ininchampoyouaj?

Nopa seyok tlajtolpanextili tlen nama tikitasej eli tlen kipano ni Tlaltipaktli. Ma tikitakaj tlen kiijtoua Biblia.

[Tlajtoli tlen pankisa]

“Miakej siuamej amo motlateljuiliaj kema ininueue kinmakilia. Se siuatl kimakiliaj se 35 imiakpa uan teipa motlateljuilia” (KATLI KINPALEUIA KATLI KINTLAIJIYOUILTIAJ ININCHAJ TLEN ALTEPETL GALES).