• TLAKATKI IPAN: 1941

• EUA: BENÍN

• SEKINOK TLAMANTLI: KINPIXTOYA MIAKEJ ISIUAJUAJ UAN KINKUALANKAITAYAYA JEHOVÁ ITLAJTOLTEMAKAUAJ

TLEN NECHPANOK

Nitlakatki ipan se ueyi altepetl tlen Benín, tlen itoka Cotonou. Maske nechiskaltijkej ipan religión católica, san kemantika niauiyaya misa. Miakej católicos kinpiayayaj miakej ininsiuajuaj pampa tekichiuanij amo kenijki kiitayayaj. Yeka na nikinpixki nauij nosiuajuaj.

Ipan 1970 pejki se tlauilankayotl ipan Benín. Nimoiljuik nopa kipaleuiskia noaltepe, yeka nimokalakik ipan política. Katli tlaijixnamikiyayaj amo kuali kinitayayaj Jehová itlajtoltemakauaj pampa inijuantij amo mokalakiyayaj ipan nopa tlauilankayotl. Uan na nitlapaleuik kema kintlatsakuiltijkej. Ipan 1976, kema misioneros kinkixtijkej tlen toaltepe, nimoiljuik ayokmo kema tlakuepiliskiaj.

BIBLIA NECHPALEUIK KUALI MA NIMONEJNEMILTI

Nopa tlauilankayotl tlanki ipan 1990, uan nimosentlachilik kema nikitak nopa misioneros sampa tlakuepilijkej. Pejki nimoiljuia toTeotsij uelis kinpaleuiyaya. Ipan nopa tonali, nijpatlak kampa nitekitiyaya. Se katli iuaya nitekitiyaya eliyaya Jehová itlajtoltemajka, uan ya nechiljuik tlen kineltokayaya. Nechpouilik se keski versículos tlen Biblia kampa kiijtoua toTeotsij Jehová kichiua tlen xitlauak uan teiknelia (Deuteronomio 32:4; 1 Juan 4:⁠8). Nechpaktik nopa kuajkuali tlamantli tlen toTeotsij kinextia, yeka nojua nijnejki nikixmatis uan nijkajki ma nechmachtikaj.

Nima pejki nimonechikoua ininuaya Jehová itlajtoltemakauaj uan nechpaktik kema nikitak kenijkatsa tlauel moikneliyayaj: amo mochikoitayayaj maske sekij eliyayaj chipaktikej uan sekinok amo, yon pampa sekij tlatominpiayayaj uan sekinok amo. Kema niitstoya ininuaya, nikitstiauiyaya kenijkatsa inijuantij nelnelia eliyayaj Jesús itokilijkauaj (Juan 13:35).

Nikitak tlaj nijnekiyaya nijtekipanos Jehová, monekiyaya ayokmo nitlapaleuis ipan yon se tlamantli tlen mochiua ipan Iglesia Católica. Nijmatki ouij ayokmo kiampa nijchiuas pampa nimoiljuiyaya sekinok amo kuali nechitaskiaj. Maske niuejkajki, Jehová nechpaleuik amo ma nimajmaui, yeka niajki Iglesia uan nikiniljuik katli tlayakanayayaj ma kiixpolokaj notoka.

Nojua monekiyaya nijpatlas seyok tlamantli tlen tlauel ipati. Ipan Biblia nijyekok toTeotsij amo kuali kiita kema se tlakatl kinpia miakej isiuajuaj (Génesis 2:18-24; Mateo 19:4-6). Nikitak toTeotsij kuali kiitayaya kema achtoui nimosiuajtik, yeka nimoamasenkajki iuaya nopa siuatl katli achtoui nimokuilik. Uan maske nopa sekij siuamej nikinkixtik, nojua nikinmakayaya tlen ika mopanoltiskiaj. Teipa, omej tlen nopa siuamej mochijkej Jehová itlajtoltemakauaj.

¿KENIJKATSA NECHPALEUIJTOK?

Maske nosiua nojua católica, ya kitlepanita tlen nijneltoka. Nojkia tikitstokej nama kuali nijmokuitlauia.

Maske achtouia nimoiljuiyaya política ueliskia techpaleuis kuali ma tiitstokaj, nikitak nopa amo nelia. Nama nijmati san toTeotsij iTlanauatijkayo uelis kitlamiltis nochi kuesoli tlen onka ipan Tlaltipaktli (Mateo 6:⁠9, 10). Tlauel nijtlaskamatilia Jehová pampa nechmachtik kenijkatsa nelnelia niyolpakis ipan nonemilis.

• TLAKATKI IPAN: 1977

• EUA: BRASIL

• SEKINOK TLAMANTLI: TLAYAKANAYAYA IPAN IGLESIA PENTECOSTAL

TLEN NECHPANOK

Nitlakatki ipan Itu, tlen mokauayaya iteno São Paulo, nopaya kinixmatiyayaj pampa kichiuayayaj tlen tlauel amo kuali.

Tlauel nimosisiniyaya, niauilnemiyaya uan nojkia nijnemakayaya drogas. Nikitak ueliskia nechtsakuasej o nechmiktisej pampa amo kuali nimonejnemiltiyaya, yeka ayokmo nijchijki nopa. Pejki nimosentilia ipan se Iglesia Pentecostal uan teipa nitlayakanki ipan nopa religión.

Nimoiljuiyaya tlaj nimonechikoskia ipan se Iglesia ueliskia nikinpaleuis sekinok, yeka pejki nitlamachtia tlen nijneltokayaya ipan radio uan nopa kichijki ma nechixmatikaj ipan noaltepe. Teipa nikitstiajki katli tlayakanayayaj ipan nopa Iglesia amo kintekipachouayaya tlen kinpanoyaya katli monechikouayayaj nopaya, uan amo kiueyichiuayayaj toTeotsij. San kinekiyayaj kisentilisej tomij, yeka nijkajki nopa religión.

BIBLIA NECHPALEUIK KUALI MA NIMONEJNEMILTI

Kema pejki nimomachtia ininuaya Jehová itlajtoltemakauaj, nikitak amo eliyayaj sanse kej sekinok religiones. Nechpaktik ome tlamantli tlen kichiuayayaj. Se: amo san kiijtouayayaj moneki tikiknelisej Jehová uan maseualmej, nikitak nelnelia kiampa kichiuayayaj. Ome: amo mokalakiaj ipan política yon yauij ipan tlauilankayotl (Isaías 2:4). Ni ome tlamantli kichijki ma nimotemachi inijuantij itstoyaj ipan religión tlen melauak o ipan nopa ojtli tlen teuika kampa onka nemilistli (Mateo 7:13, 14).

Nikitak tlaj nijnekiyaya nijyolpakiltis toTeotsij, monekiyaya nijpatlas se keski tlamantli: nijchiuas kampeka ayokmo nimoueyimatis uan niitstos ininuaya nochampoyouaj. Maske ouij nijmatki nijpatlas nopa tlamantli, uelki nijchiua pampa Jehová nechpaleuik. Nosiua achtoui pejki momachtia Biblia uan tlauel yolpajki kema kiitak nijpatlak se keski tlamantli, yeka nojua kichijki kampeka kuali tlaneltokatias. Uan amo uejkajki, tiomej timosentlalijkej tijtekipanosej Jehová, uan timoatsonpoliuiltijkej ipan sanse tonali.

¿KENIJKATSA NECHPALEUIJTOK?

Nosiua uan na tiyolpakij pampa tikinpaleuiaj eyij tokoneuaj ma mouampojchiuakaj iuaya Jehová. Tiitstokej ika pakilistli ininuaya tochampoyouaj. Nijtlaskamatilia toTeotsij pampa nechpaleuik ma nijmati tlake nelnelia tlamachtia iTlajtol. Biblia kipatla ininnemilis maseualmej uan na nojkia kipatlak nonemilis.

• TLAKATKI IPAN: 1957

• EUA: AUSTRALIA

• SEKINOK TLAMANTLI: TLAIJIYOUIK KEMA MOSKALTIK

TLEN NECHPANOK

Nimoskaltik ipan Newcastle (Nueva Gales del Sur). Nikinpiayaya chikomej noikniuaj uan na niachtouiejketl. Notata tlauel mosisiniyaya uan tlaiyaya. Nonana nojkia mosisiniyaya, nechmakiliyaya uan nechyolkokouayaya ika tlen nechiljuiyaya. Nochipa nechiljuiyaya nijchiuayaya tlen amo kuali, yeka toTeotsij nechtlatsakuiltiskia ipan tlitl. Tlauel nechmajmatiyaya tlen nechiljuiyaya.

Nonana tlauel nechmakiliyaya, yeka kemantika amo niueliyaya nia escuela. Kema nijpixtoya 11 xiuitl, tekichiuanij ayokmo kinkauilijkej notatauaj ma nechmokuitlauikaj uan inijuantij nechmokuitlauijkej. Teipa nechkauatoj ipan se convento uan kema nikaxitik 14 xiuitl, nikistejki. Amo nijnekiyaya sampa nias nochaj, yeka pejki nimokaua ipan nopa calles tlen Kings Cross ipan altepetl Sydney.

Kema nimokauayaya ipan calles, pejki nijtekiuia drogas, nitlaiyaya, nikitayaya pornografía uan nechtlaxtlauiyayaj kema nimotekayaya ininuaya sekinok. Se tonali tlauel nimomajmatik. Nimokauayaya ichaj se tlakatl katli eliyaya iaxka se kali kampa moyolpakiltiyayaj ika tlayoua uan ipan se youali, asitoj omej tlakamej. Maske ya nechiljuik ma nia kampa nikochiyaya, nijkajki tlen kiijtouayayaj. Nopa tlakatl kinekiyaya nechnamakas, nopa omej tlakamej nechtlejkoltiskiaj ipan se barco tlen yaui Japón uan nopaya nitekitiskia ipan se bar. Tlauel nimomajmatik kema nijkajki tlen kinekiyayaj nechchiuilisej, yeka nimantsi nicholok pampa nijnekiyaya se akajya ma nechpaleui.

Nijnamijki se tlakatl katli paxalouayaya ipan nopa altepetl uan nikiljuik tlen nechpanoyaya pampa nijnekiyaya ma nechmaka tomij. Maske amo nechmakak tlen nitlajtlanik, ya nechiljuik ma nia kampa mokauayaya pampa nopaya ueliskia nimaltis uan nitlakuas. Nopaya nimokajki uan kema panok se xiuitl, timosenkajkej.

BIBLIA NECHPALEUIK KUALI MA NIMONEJNEMILTI

Kema pejki nimomachtia Biblia ininuaya Jehová itlajtoltemakauaj, nijyolmatki miak tlamantli. Tlauel nikualanki kema nijmatki Satanás kichiua ma onka kuesoli, pampa nochipa nechiljuijtoyaj toTeotsij techtlaijiyouiltia. Nojkia kuali nijyolmatki kema nijyekok toTeotsij amo techtlatsakuiltia ipan tlitl, pampa kema nieliyaya nisiuapil nopa tlamachtili tlauel nechmajmatiyaya.

Nimosentlachilik kema nikitak Jehová itlajtoltemakauaj kichiuaj ipan ininnemilis tlen momachtiaj ipan Biblia. Maske na amo nima nijneltokayaya tlen nechiljuiyayaj, san tlemach nikijtouayaya uan nijchiuayaya, inijuantij nochipa nechtlepanitakej uan nechtlasojtlakej.

Tlauel ouij nijmatki nijpatlas tlen nijyolmatiyaya. Nimoiljuiyaya amo tleno nopati uan tlauel nimokualankamakayaya, yeka amo nimoitasnekiyaya. Maske ya nimoatsonpoliuiltijtoya uan nieliyaya Jehová itlajtoltemajka, nojua kiampa nijyolmatiyaya. Maske nijmatiyaya nikikneliyaya toTeotsij, nimoiljuiyaya ya amo kema nechikneliskia.

Kema panok se 15 xiuitl ika nimoatsonpoliuiltijtoya, mopatlak tlen nijyolmatiyaya. Ipan se tlamachtili tlen moixtonki ipan Kali kampa mosentiliaj Jehová iTlajtoltemakauaj, toikni kipojki Santiago 1:23 uan 24. Nopa textos kiijtoua toTeotsij iTlajtol eli kejuak se teskatl kampa tikitaj kenijkatsa techita Jehová. Pejki nimotlajtlania tlaj Jehová kuali nechitayaya. Maske nimotlajtlanik nopa, nojua nimoiljuiyaya Jehová amo nechikneliyaya.

Kema panok se keski tonali, nijpojki se texto tlen tlauel nechpaleuik. Nijpojki Isaías 1:18, kampa Jehová kiijtoua: “Xiualakaj nimantsi uan ma tijsenkauakaj tocuentas. Yonke tlauel miak inmotlajtlakoljuaj hasta nesij chichiltik, na nijchiuas ma eli chipauak keja nextli”. Nijyolmatki kejuak Jehová nechiljuiyaya: “Xiuala Vicky, tijsenkauasej mokuesol. Na kuali nimitsixmati, uan maske nijmati timokuapolojtok, na nikixmati moyolo uan tlauel nimitsiknelia”.

Amo uelki nikochki ipan nopa youali. Maske amo nijneltokayaya toTeotsij nechikneliyaya, pejki nimoyoliljuia kenijkatsa Jesús temaktilik inemilis. Uajka nijkuamachilik toTeotsij kipixtoya iyolo nouaya, uan nijkuamachilik ya nechnextilijtok ika miak tlamantli tlauel nechiknelia. Uan na kejuak nikiljuiyaya: “Motlaiknelil amo uelis nechpaleuis. Maske moKone motemaktilik amo uelis tinechtlapojpoljuis”. Amo nijpatiitayaya tlen Jehová kichijki kema techmakixtik ika iKone. Kema pejki nimoyoliljuia ipan tlen Jehová kichijki, nojkia pejki nijyolmati kenijkatsa Jehová tlauel nechiknelia.

¿KENIJKATSA NECHPALEUIJTOK?

Nama kuali nijyolmati uan niyolpaki. Kuali nimouika iuaya noueue uan niyolpaki pampa tlen nechpanok, ueli kinpaleuia sekinok. Kej panotia tonali, nijmati nojua nijnechkauijtia Jehová.

• TLAKATKI IPAN: 1974

• EUA: RUSIA

• SEKINOK TLAMANTLI: TLAUEL KIPAKTIYAYA HEAVY METAL

TLEN NECHPANOK

Nitlakatki ipan Vótkinsk, kampa nojkia tlakatki Piotr Ilič Chaikovski, katli tlauel kiixmatiyayaj pampa kichiuayaya uikatl. Nochampoyouaj eliyayaj teikneltsitsij uan maske notata kinextiyaya kuajkuali tlamantli, tlauel tlaiyaya, yeka ipan nochaj nochipa onkayaya kuesoli.

Kema niauiyaya escuela, amo nima nijyekouayaya tlen nechmachtiyayaj, yeka pejki nimoiljuia amo kuali nijchiuayaya se tlamantli. Nojkia amo nitenojnotsayaya, amo nimotemachiyaya ipan sekinok uan tlauel nikouijmatiyaya nias escuela. Nikilnamiki kema nechiljuiyayaj ma nikixtoma se tlamantli ininixpa sekinok, amo ueliyaya nikixtoma maske achtouia amo ouij nijmatiyaya nikixtomas. Kema nimomachtiyaya secundaria, uan tlanki se xiuitl, kitlalijkej ipan noama: “Amo ueli kiijtoua tlen kiyolmati uan amo ueli kuali kamanalti”. Tlen kiijkuilojkej tlauel nechyolkokok uan kichijki ma nimoiljui amo tleno nopati. Yeka pejki nimoiljuia san tlapik niitstoya.

Kema nimotelpokachijki, pejki nitlai. Achtoui kuali nijyolmatiyaya kema nitlaiyaya, uan kema tlauel nimoiuintiyaya, ayokmo kuali nijyolmatiyaya. Nimoiljuiyaya san tlapik niitstoya. Tlauel nimoyolkokouayaya uan miak tonali san kalijtik niitstoya. Yeka kemantika nijnekiyaya nimomiktis.

Kema nikaxitik 20 xiuitl pejki tlauel nechpaktia nijkakis heavy metal. Nopa uikatl kichiuayaya kuali ma nijyolmati, yeka pejki nimomati ininuaya sekinok katli nojkia kinpaktiyaya nopa uikatl, nijkajki ma ueueyakia notsonkal, nimonakaskoyoni uan nimoyoyontik kej inijuantij kichiuayayaj. Teipa pejki tlauel nimosisinia uan nijnekiyaya nitlateuis, yeka tlauel nimokualaniyaya ininuaya nochampoyouaj.

Maske nimoiljuiyaya nopa uikatl kichiuaskia ma niyolpaki, amo kiampa panok. Pampa nopa kichijtiajki ma nijpatla kej nimonejnemiltiyaya. Uan tlauel nimoyolkokok kema nijmatki tlamantli tlen amo kuali kichiuayayaj katli nechpaktiyaya kej uikaj.

Sampa nijnejki nimomiktis uan nelia kiampa nijnekiyaya nijchiuas. Amo kiampa nijchijki pampa nimoiljuiyaya nijyolkokoskia nonana, ya tlauel nechikneliyaya uan tlauel nechpaleuijtoya. Tlauel nitlaijiyouiyaya uan amo nijmatiyaya tlake nijchiuas: maske ayokmo nijnekiyaya niitstos, amo nimotemakayaya nimomiktis.

Ayokmo nijnekiyaya nimoiljuis ipan nopa tlamantli, yeka pejki nijpoua amochtli tlen eltoya ipan tlajtoli ruso. Ipan se tlen nopa amochtli kamanaltiyaya tlen se tlakatl katli tlayakanayaya ipan se Iglesia. Teipa nijnejki nikixmatis toTeotsij uan nikinpaleuis sekinok. Maske axkema nijchijtoya, nimomaijtok uan nikiljuik toTeotsij tlen nijyolmatiyaya, nojkia nikiljuik ma nechpaleui niyolpakis ipan nonemilis. Kema tlanki nimomaijtoua, kuali nijyolmatki. Uan tlauel nimosentlachilik pampa kema panok ome hora, Jehová itlajtoltemakauaj nechpaxalojkej uan nechiljuijkej tlaj nijnekiyaya nimomachtis Biblia. Nikitak toTeotsij nechtlakakilik kema nimomaijtok. Nopa kichijki ma nijpatla nonemilis uan tlauel ma niyolpaki.

BIBLIA NECHPALEUIK KUALI MA NIMONEJNEMILTI

Maske tlauel ouij nijmatki, nijtepejki nochi tlen nijpixtoya kema nijkakiyaya heavy metal. Miak tonali nikilnamikiyaya nopa uikatl. Kema nipanoyaya kampa tlatsotsonayayaj, nikilnamikiyaya amo kuali tlamantli tlen nijchijtoya. Pejtoya nijyekoua kuajkuali tlamantli uan nijnekiyaya nopa ma mokaua ipan notlalnamikilis uan ipan noyolo, yeka ayokmo nipanok kampa kakistiyaya nopa uikatl. Uan kema nijnekiyaya nikilnamikis tlen uejkajkia nijchijki, nima nimomaijtouayaya. Kema kiampa nijchiuayaya nikitayaya kenijkatsa toTeotsij nechmakayaya tlaseuilistli ipan noyolo “tlen tlakamej axuelis kimachilisej” (Filipenses 4:7).

Kema nimomachtik Biblia, nijkuamachilik katli elij Cristo itokilijkauaj moneki tlajtolmoyauasej (Mateo 28:19, 20). Maske na nimoiljuiyaya amo kema ueliskia nitlajtolmoyauas, tlen nijyekok nechpaleuik ma niyolpaki uan ma nijpia tlaseuilistli. Nijmatiyaya sekinok maseualmej nojkia monekiyaya kimatisej tlen melauak. Yeka, maske nimajmauiyaya, nijchijki kampeka nikiniljuis sekinok tlen nijyekouayaya. Kema pejki nitlajtolmoyaua, nechpaleuik ma nimotemachi ipan na uan nojkia nechpaleuik kuali ma nitlaneltoka.

¿KENIJKATSA NECHPALEUIJTOK?

Nama ya nimosiuajtik uan tlauel niyolpaki pampa ueltok nijpaleuia noikni, nonana uan sekinok maseualmej ma kimatikaj tlen Biblia tlamachtia. Nijmati amo san tlapik niitstok pampa nijtekipanoua toTeotsij uan nikinpaleuia sekinok ma kiixmatikaj.