“Tlakamauitij ni kuali tlamachtili”

“Uan tlakamej tlakamauitij ni kuali tlamachtili tlen kejatsa eltos kema toTeko tlanauatia. Uan kiuikasej hasta kampa ueli techaj ipan nochi tlaltinij [...]. Uan teipa ualas itlamia nochi tlen onka” (MATEO 24:14).

¿Tlake kinekiyaya kiijtos Jesús? Kej kiijtoua nopa pilamochtsi Lucas, “Jesús nejnemiyaya kampa ueli ipan altepetinij uan ranchos tlayolmelajtinemiyaya itlajtol toTeko uan tenotsayaya ma kalakikaj ipan itlanauatilis toTeko” (Lucas 8:⁠1). Uan ya kiijtok: “Moneki nias nijmoyauati nopa kuali tlajtoli tlen toTeotsij iTlanauatijkayo ipan sekinok altepemej, pampa yeka nechualtitlankej” (Lucas 4:43). Achtoui, Jesús kintitlanki itokilijkauaj ma tlajtolmoyauakaj ipan altepemej tlen amo uejka mokauayaya, uan teipa kiniljuik: “Kema asis itonal toTeko ipan inmoyolo, inkipiasej chikaualistli uan inyasej intlayolmelauatij tlen na hasta kampa más uejuejka pilaltepetsitsij ipan ni Tlaltipaktli” (Hechos 1:8; Lucas 10:1).

Tlen kichijkej achtoui Cristo itokilijkauaj. Jesús itokilijkauaj nima kichijkej tlen kinnauatijkej. Ipan Hechos 5:42 kiijtoua: “Uan mojmostla nopa tlayolmelauanij tlamachtijtinenkej ipan nopa ueyi israelita teopamitl uan ipan kaltinij para Jesús itstoya nopa Cristo tlen toTeko Dios kiijtok uejkajkia para kititlaniskia”. Nochi kichiuayayaj nopa tekitl uan amo san se keskij. Nopa historiador August Neander, kiijtoua “Celso elki se tlen achtoui kinkualankaitak Cristo itokilijkauaj uan kinpinajtiyaya katli tlajtolmoyauayayaj, pampa inijuantij san eliyayaj maseualmej katli amo tlauel ixtlamatiyayaj, sekij san kikualchijchiuayayaj borregojmej ininijuiyo, sekij kichijchiuayayaj tekaktli uan sekij kichijchiuayayaj miak tlamantli ika kuetlaxtli”. Se amochtli tlen kiijkuilok Jean Bernardi, kiijtoua nochi Cristo itokilijkauaj monekiyaya “kinkamanaljuisej nochi maseualmej kampa ueli kampa itstoskiaj. Katli kinpantiskiaj ipan ojtli, ipan altepemej, kampa itstoyaj miakej uan kajkalpa. Monekiyaya tlajtolmoyauasej kema maseualmej kuali kintlakakiliskiaj uan nojkia kema amo”. Uan teipa nojkia kiijtok monekiyaya tlajtolmoyauasej “kampa ueli ipan nochi Tlaltipaktli” (Les premiers siècles de L’Église).

¿Ajkia inijuantij kiampa kichiuaj ipan ni tonali? Nopa párroco anglicano David Watson kiijtoua “miakej amo kuali tlaneltokaj pampa ipan teopa amo tlamachtiaj moneki tlajtolmoyauasej o kuali kinmachtisej sekinok”. Ipan amochtli ¿Por qué se van los católicos?, José Luis Pérez Guadalupe kiijtoua Jehová itlajtoltemakauaj “tlajtolmoyauaj kajkalpa”, uan evangélicos, adventistas uan sekinok religiones amo kiampa kichiuaj.

Tlauel pankisa tlen Jonathan Turley kiijtok ipan se informe del Cato Institute: “Kema maseualmej kikakij nopa tlajtoli Testigos, nima moiljuiaj kenijkatsa tlajtolmoyajtinemij kajkalpa uan asij techaj kema amo aka kinchia. Jehová itlajtoltemakauaj amo yauij kajkalpa san pampa kinekij kimoyauasej tlen kineltokaj, kichiuaj nopa pampa kiampa kinextiaj kuali tlaneltokaj uan pampa kimatij ya nopa tlanauatia toTeotsij” (Cato Supreme Court Review, 2001-​2002).

[Recuadro]

¿Tijmati ajkia inijuantij?

Ipan ni pilamochtsi tikitstokej tlen Biblia kiijtoua kichiuaskiaj katli nelnelia elij Cristo itokilijkauaj. ¿Tijmati ajkia inijuantij elij? Maske ipan ni tonali onka miak religiones tlen kiijtouaj kitokiliaj Cristo, xikilnamiki tlen Jesús kiniljuik itokilijkauaj: “Miakej tlakamej nechnotsaj: ‘ToueyiTeko’, pero axnochi yajuantij kalakisej kampa toTeko tlen itstok iluikak tlanauatia. San yasej katli nelia kichiuaj ipakilis noTata tlen itstok iluikak” (Mateo 7:21). Uajka, tlaj tijnekij tijselisej nochi nopa tlateochiualistli tlen toTeotsij iTlanauatijkayo techmakas, moneki tijmatisej ajkia inijuantij nelnelia kichiuaj tlen toTeotsij kipaktia uan timonechikosej ininuaya. ¿Mitspaktiskia nojua tijyekos tlen toTeotsij iTlanauatijkayo uan tlen kichiuas? (Lucas 4:43). Timitstlaneuij ximokamanaljui ininuaya Jehová itlajtoltemakauaj katli mitsmakakej ni pilamatsi.