“Ximoiknelikaj se ika seyok”

“Niinmechmaka se yankuik tlanauatili para xijchiuakaj: ximoiknelikaj se ika seyok keja na niinmechiknelia. Kena, keja nopa moneki ximoiknelikaj. Nochi tlakamej kimachilisej para nelia innomomachtijkauaj intla nelia inmoiknelisej” (JUAN 13:​34, 35).

¿Tlake kinekiyaya kiijtos Jesús? Cristo kiniljuik itokilijkauaj monekiyaya moiknelisej kej ya kinikneliyaya. ¿Uan kenijkatsa kinextik kinikneliyaya? Ya amo kema kinchikoitak siuamej yon maseualmej katli euayayaj ipan seyok altepetl, maske ipan nopa tonali kena kiampa kichiuayayaj (Juan 4:​7-​10). Nojkia kikixtik tonali, kitekiuik ichikaualis uan kemantika amo mosiajketski pampa kinekiyaya kinpaleuis sekinok (Marcos 6:​30-​34). Uan kinextik tlauel techiknelia kema mijki topampa. Ya kiijtok: “Na niitstok nopa kuali tlamokuitlauijketl tlen nimotemaktilia ininpampa noborregojuaj” (Juan 10:11).

Tlen kichijkej achtoui Cristo itokilijkauaj. Kema Cristo itokilijkauaj monojnotsayayaj, moiljuiyayaj “noikni” (Filemón 1, 2). Uan kema mosentiliyayaj, kinseliyayaj sejkanok euanij ika miak pakilistli. Maske sekij eliyayaj judíos uan sekij euayayaj Grecia, amo mochikoitayayaj pampa nochi tlaneltokayayaj ipan Jesús (Romanos 10:​11, 12). Ipan xiuitl 33, kema tlankej iljuichiuaj ipan Pentecostés, nopa tlaneltokanij tlen Jerusalén “pejkej kinamakaj inintlal uan tlamantli tlen ininaxka uan kinmajmakakej nopa tomij sekinok keja kinpolouayaya tlen ika panosej”. ¿Kenke? Pampa kiampa katli namanok moatsonpoliuiltijtoyaj, ueliskia mokauasej Jerusalén uan kikakiskiaj tlen apóstoles tlamachtiskiaj (Hechos 2:​41-​45). Kema ayamo asiyaya 200 xiuitl ika miktoyaj apóstoles, Tertuliano kiixtonki kenke Cristo itokilijkauaj tlauel moikneliyayaj uan kiijtok tlen sekinok kiijtouayayaj: “Xikita [...] kenijkatsa tlauel moikneliaj se ika seyok [...] uan motemakaj mikisej ininpampa ininikniuaj”.

¿Ajkia inijuantij kiampa kichiuaj ipan ni tonali? Ipan nopa amochtli Historia de la decadencia y ruina del Imperio romano, kiijtoua ipan miak xiuitl, katli kiijtouayayaj eliyayaj Cristo itokilijkauaj “tlauel motlaijiyouiltiyayaj uan amo kej kema sekinok kintlaijiyouiltiyayaj”. Ipan Estados Unidos kiitakej miakej katli kipixtoyaj ininreligión tlauel techikoitayayaj, uan miakej tlen inijuantij kiijtouayayaj eliyayaj Cristo itokilijkauaj. Maseualmej katli kipiaj sanse ininreligión uan amo euaj ipan sanse altepetl, amo monojnotsaj. Yeka, kema kinpano se tlamantli tlen kintlaijiyouiltia, amo mopaleuiaj pampa amo tleno kinyololinia ma mopaleuikaj.

Ipan 2004, ipan altepetl Florida (EE.UU.) panok naui uejueyi ajakatl san ipan ome metstli. Teipa, katli kiyakana nopa comité de operaciones de emergencia kinejki kiitas kenijkatsa kitekiuiyayaj tlamantli tlen temakatoya. Uan kema kiitak san Jehová itlajtoltemakauaj tlauel kuali tekitiyayaj uan mosentikapaleuiyayaj, kinejki kinpaleuis ika tlen kinpolouayaya. Ipan 1997, se keskij Jehová itlajtoltemakauaj yajkej ipan República Democrática del Congo, pampa kinekiyayaj kinpaleuisej toikniuaj uan sekinok maseualmej ika pajtli, tlakualistli, yoyomitl uan ika sekinok tlamantli tlen kinpolouayaya. Tlen toikniuaj katli euaj Europa kikojkej uan temakakej, elki se millón de dólares.