Biblia kinpaleuik kuali ma monejnemiltikaj

¿Tlake kipaleuik se telpokatl sampa ma itsto ipan nopa religión kampa itatauaj kimachtijtoyaj? ¿Tlake kipaleuik se tlakatl ma kipanti se akajya katli pejki kiita kej itata? Ma tikitakaj tlen kinpanok.

“Nikitak sampa monekiyaya nijtekipanos Jehová” (ELIE KHALIL)

TLAKATKI IPAN: 1976

EUA: CHIPRE

SEKINOK TLAMANTLI: AYOKMO KITEKIPANOK TOTEOTSIJ

TLEN NECHPANOK: Maske nitlakatki Chipre, nimoskaltik Australia. Notatauaj eliyayaj Jehová itlajtoltemakauaj uan inijuantij nechmachtijkej ma nikikneli toTeotsij uan ma nijpatiita tlen kiijtoua Biblia. Maske kichijkej kampeka kuali nechmachtisej, kema nimotelpokachijki, pejki nikinijixnamiki. Ika tlayoua, niichtakakisteuayaya nochaj uan ininuaya nouampoyouaj tikichtekiyayaj carros uan tijchiuayayaj sekinok tlamantli tlen amo kuali.

Achtoui amo nijnekiyaya notatauaj ma kimatikaj tlen nijchiuayaya pampa amo nijnekiyaya nikinyolkokos, uan teipa ayokmo kiampa nijmatki. Nouampoyouaj ya uejueyij eliyayaj uan amo kiikneliyayaj Jehová. Inijuantij kichijkej ma nijchiua tlamantli tlen tlauel amo kuali. Yeka, nikiniljuik notatauaj amo nijnekiyaya nielis se tlen Jehová itlajtoltemakauaj. Inijuantij kinekiyayaj nechpaleuisej uan na amo nikinkajki. Tlauel moyolkokojkej.

Kema ayokmo niitstoya nochaj, pejki nijtekiuia drogas. Nijtokayaya uan nijnamakayaya marihuana, nimomekatiyaya uan nochipa niitstoya discotecas. Nojkia pejki tlauel nimosisinia. Tlauel nechkualankamakayaya kema se akajya kiijtouayaya o kichiuayaya se tlamantli tlen na amo nechpaktiyaya. Yeka, kemantika nikinkuatsajtsiliyaya sekinok o nikinmakiliyaya. Nijchiuayaya tlen nechiljuijtoyaj amo monekiyaya kichiuas se Cristo itokilijka.

BIBLIA NECHPALEUIK KUALI MA NIMONEJNEMILTI: Nimouampojchijki iuaya se tlakatl katli nojkia kitekiuiyaya drogas uan itata mijki kema ya eliyaya okichpil. Ika tlayoua, uejkauayaya tikamanaltitokej. Miakpa nechiljuik tlauel kitemouayaya itata. Na nijmajtoya sampa moyolkuiskiaj katli miktokej, yeka nikiljuik Jesús kinyolkuik katli miktoyaj uan kiijtok nojkia kiampa kichiuaskia teipa (Juan 5:​28, 29). Nikiljuiyaya: “Ximoiljui, uelis sampa tikitas motata uan nochi tiitstosej ipan se yejyektsi xochimili”.

Kemantika na uan nouampo timokamanaljuiyayaj tlaj tiitstokej ipan itlamia tonali uan nopa tlamachtili tlen Trinidad. Na nijtekiuiyaya iBiblia uan kiampa nijnextiliyaya se keski textos kampa kiijtoua ajkia eli Jehová, Jesús uan tlaj tiitstokej ipan itlamia tonali (Juan 14:28; 2 Timoteo 3:1-5). Kema nijpouiliyaya nouampo tlen Biblia kiijtoua, kichiuayaya nojua tlauel ma nimoiljui ipan Jehová.

Ika yolik pejki sampa nikilnamiki nochi tlen notatauaj kichijtoyaj kampeka nechmachtisej kema nojua nieliyaya niokichpil. Kemantika, kema niitstoya ininuaya nouampoyouaj uan nijtekiuiyaya drogas, peuayaya nimoiljuia ipan Jehová. Maske miakej nouampoyouaj kiijtouayayaj kiikneliyayaj toTeotsij, tlen kichiuayayaj, amo kiampa kinextiyaya. Amo nijnekiyaya nielis kej nouampoyouaj, yeka nikitak sampa monekiyaya nijtekipanos Jehová.

Maske tijmatis tlake moneki tijchiuas, kemantika ouij tijmatis. Sekij tlamantli amo ouij nijmatki ayokmo nijchiuas, kej ayokmo nijtekiuis drogas. Nojkia, amo ouij nijmatki ayokmo nimouikas ininuaya nouampoyouaj uan peuas nimomachtis Biblia iuaya se ueuejtlakatl.

Sekij tlamantli tlauel ouij nijmatki, kej ayokmo tlauel nimosisinis. Kemantika ayokmo tlauel nimosisiniyaya, uan teipa sampa nikualaniyaya, nopa kichiuayaya tlauel ma nimoyolkoko uan ma nimoiljui amo nopati. Amo kuali nijyolmatiyaya, yeka nikamanaltik iuaya nopa toikni katli nechmachtiyaya. Ya tlauel nechyolchikauayaya pampa amo mosisiniyaya uan kipixki iyolo nouaya. Ya nechiljuik ma nijpoua se tlamachtili tlen uala ipan Tlen Tematiltia, kampa kiijtoua moneki nojua tijchiuasej kampeka tijpatlasej tonemilis. * Tikitakej tlake ueliskia nijchiuas kema nijmatiskia sampa nikualani. Kema pejki nijchiua tlen kiijtouayaya nopa tlamachtili uan nimomaijtouayaya ika Jehová, nechpaleuik ayokmo tlauel ma nimosisini. Ipan abril, xiuitl 2000, nimoatsonpoliuiltik. Notatauaj tlauel yolpaktoyaj.

¿KENIJKATSA NECHPALEUIJTOK? Nama kuali nijyolmati uan ayokmo nechyolkokoua notlalnamikilis pampa ayokmo nijtekiuia drogas yon nimomekatia. Tlauel niyolpaki kema nitekiti, kema nia tlanechikoli o kema nimoyolpakiltia, uan nikita tlake tlamantli tlen kuali nechpano ipan nonemilis.

Nijtlaskamatilia Jehová pampa notatauaj nochipa nechpaleuijkej uan moiljuijkej ueliskia sampa nijtekipanos toTeotsij. Nojkia nimoyoliljuia ipan tlen Jesús kiijtok ipan Juan 6:​44: “Axaka ueli nechtokilis ika iselti. San noTata tlen nechtitlanki uelis kiyoltilanas se tlakatl para ma nechtokili”. Tlauel niyolpaki kema nimoiljuia uelki sampa nijtekipanoua Jehová pampa ya nechyoltilanki.

“Nijnekiyaya nijpias se notata” (MARCO ANTONIO ALVAREZ SOTO)

TLAKATKI IPAN: 1977

EUA: CHILE

SEKINOK TLAMANTLI: KALAKTOYA IPAN SE BANDA TLEN DEATH-METAL

TLEN NECHPANOK: Nimoskaltik ipan Punta Arenas ipan Magallanes, ika sur tlen continente americano, nopaya amo tlauel mosisiniaj. Notatauaj mokajkej kema na nijpixtoya makuili xiuitl. Nopa kichijki ma nijyolmati nechtlauelkajtoyaj. Nijnekiyaya nijpias se notata.

Nonana momachtiyaya Biblia ininuaya Jehová itlajtoltemakauaj uan nechuikayaya ipan nopa kali kampa mosentiliyayaj. Na amo nechpaktiyaya nias, uan yeka nitsajtsitiauiyaya. Ayokmo niajki kema nijpixtoya 13 xiuitl.

Na tlauel nechpaktiyaya nijkakis uikatl uan nikitak ueliyaya kuali nitlatsotsona. Kema nijpixtoya 15 xiuitl, nijtsotsonayaya heavy-metal uan death-metal, titlatsotsonayayaj ipan bares, kampa itstokej miakej uan kema techtlaneuiyayaj techaj. Nimouampojchijki ininuaya katli kuali tlatsotsonayayaj, yeka pejki nechpaktia música clásica. Ipan universidad pejki nimomachtia kenijkatsa kuali nitlatsotsonas. Kema nijpixtoya 20 xiuitl, niajki altepetl Santiago pampa nijnekiyaya nojua tlauel nimomachtis. Kema nimomachtiyaya universidad, nojkia nitlatsotsonayaya ipan bandas tlen heavy-metal uan death-metal.

Maske nijchiuayaya nochi nopa tlamantli, amo nelnelia niyolpakiyaya. Yeka nitlaiyaya uan nijtekiuiyaya drogas ininuaya nouampoyouaj katli eliyayaj tlen nopa banda, katli nikinitayaya kej nochampoyouaj. Tlauel nitlaijixnamikiyaya, uan kej nimoyoyontiyaya kiampa kinextiyaya: noyoyo eliyaya yayauik, nijpixtoya notentso uan notsonkal tlamiyaya notsinkechtla.

Kej nimonejnemiltiyaya kichiuayaya nochipa ma nimokualani ininuaya sekinok, uan policías kinekiyayaj nechitskisej uan nechtsakuasej. Se tonali, se keskij maseualmej katli kinamakayayaj drogas, pejkej techtlaijiljuiaj na uan nouampoyouaj, na tlauel niiuintitoya, yeka nikinmakilik, uan inijuantij nojkia tlauel nechmakilijkej uan tlauel nechkokojkej ipan nokamajchal.

Maske amo kuali tlen nechpanok, nojua tlauel nechyolkokok tlen nechchiuilijkej katli tlauel nikinikneliyaya. Se tonali, nechiljuijkej notlaixtokil kipiayaya miak xiuitl nechkajkayaua ika se nouampo. Nouampoyouaj kimajtoyaj tlen panoyaya uan amo tleno nechiljuijkej. Tlauel nimoyolkokok.

Nitlakuepilik Punta Arenas uan pejki nikinmachtia sekinok kenijkatsa tlatsotsonasej uan nijtsotsonayaya violonchelo. Nojkia, nijchiuayaya uikatl ininuaya bandas tlen heavy-metal uan death-metal. Ipan nopa tonali nikixmatki se yejyektsi ichpokatl katli itoka Sussan, teipa pejki tiitstokej sansejko. Sussan kimatki inana kineltokayaya nopa tlamachtili tlen Trinidad uan na amo, yeka kinejki kimatis tlake tlamachtili eliyaya melauak. Nikiljuik nopa tlamachtili amo eliyaya melauak, uan maske amo nijmatiyaya tlake textos kiampa kinextiyaya, kena nijmatiyaya ajkia inijuantij ueliskiaj kiixtomilisej. Nikiljuik Jehová itlajtoltemakauaj ueliskia kiixtomilisej nopa tlamachtili ika Biblia. Nojkia, nimomaijtok uan nikiljuik toTeotsij ma nechpaleui, maske uejkajkia ayokmo kiampa nijchijtoya.

Se keski tonali teipa, nikitak se tlakatl katli nijmatki kejuak ya nikitstoya, uan nikiljuik tlaj eliyaya se tlen Jehová itlajtoltemakauaj. Maske uelis nechmakasik pampa amo kuali kej nimoyoyontijtoya, ya kuali nechnankilik uan nechiljuik kema mosentiliyayaj. Nikitak Jehová nechkajki kema nimomaijtok uan yeka nijpantik nopa toikni. Niajki kampa mosentiliyayaj uan nimoseuik tlakaltech pampa amo nijnekiyaya ma nechitakaj. Maske amo nijnekiyaya ma nechitakaj, miakej nechixmatkej pampa kema nieliyaya niokichpil, nopaya nimonechikouayaya. Nochi kuali nechselijkej uan nechnajnauajkej uan na kuali nijyolmatki. Nijmatki kejuak sampa nitlakuepilijtoya nochaj. Kema nikitak nopaya itstoya nopa toikni katli nechmachtiyaya kema nieliyaya niokichpil, nikiljuik sampa ma nechmachti.

BIBLIA NECHPALEUIK KUALI MA NIMONEJNEMILTI: Se tonali, nijpojki Proverbios 27:11, nopaya kiijtoua: “Xieli titlalnamiki, tinotelpoka, uan techmakas miak pakilistli”. Tlauel niyolpajki kema nijmatki na ueliskia nijyolpakiltis toTeotsij. Nijkuamachilik Jehová eliyaya noTata katli nochipa nijnektoya nikixmatis.

Maske nijnekiyaya nijyolpakiltis Jehová uan nijchiuas tlen kipaktia, ouij nijmatiyaya pampa uejkajki nijtekiuia drogas uan nimoiuintia. Nijkuamachilik tlen Jesús kinejki kiijtos ipan Mateo 6:​24, nopaya kiijtoua: “Axaka uelis kintekipanos omej itekojuaj”. Kema nijchijtoya kampeka nijpatlas nonemilis, tlauel nechpaleuik tlen kiijtoua 1 Corintios 15:33, nopaya kiijtoua: “Intla se kuali tlakatl nemi ika fiero tlakamej, kiijtlakosej nopa kuali tlen kinekiyaya kichiuas”. Nikitak amo ueliskia nijkauas tlen nimomajtoya nijchiua tlaj nojua niaskia kampa ipa niauiyaya o tlaj nojua ininuaya nimouikaskia nouampoyouaj. Tlauel nechpaleuik tlen Biblia kiijtoua, yeka nikitak monekiyaya nijpatlas se keski tlamantli tlen ueliskia kichiuas sampa ma nijchiua tlen amo kuali (Mateo 5:​30).

Na tlauel nechpaktia nitlatsotsonas, yeka ouij nijmatki ayokmo niitstos ipan nopa banda tlen heavy-metal. Toikniuaj tlen tlanechikoli tlauel nechpaleuijkej, yeka uelki nijkaua. Ayokmo nijtekiuik drogas yon nimoiuintik, nimotsonkaltejki, nimotentsonxinki uan ayokmo nimokentik san yoyomitl yayauik. Kema nikiljuik Sussan nimotsonkaltekiskia, ya kinejki kimatis kenke kiampa nijnekiyaya nijchiuas, uan nechiljuik: “Nias mouaya kampa inmosentiliaj, nijneki nijmatis tlake inkichiuaj nopaya”. Tlauel kipaktik kema yajki ipan tlanechikoli uan yeka nojkia pejkej kimachtiaj ika Biblia. Teipa timosenkajkej, uan ipan 2008, tiomej timoatsonpoliuiltijkej. Nama tlauel tiyolpakij pampa tijtekipanouaj Jehová iuaya nonana.

¿KENIJKATSA NECHPALEUIJTOK? Nama nelia tlauel niyolpaki uan ayokmo niitstok ininuaya maseualmej katli san tlakajkayauaj. Maske nojua nechpaktia nitlatsotsonas, nama kuali nijtlapejpenia tlake uikatl nijkakis. Ika tlen nechpanok, ueli nikinpaleuia nochampoyouaj uan telpokamej ma kipatlakaj ininnemilis. Nijneki nikinpaleuis ma kiitakaj maske nesi yejyektsi tlen onka ipan Tlaltipaktli, nopa amo nelia techpaleuia ma tiyolpakikaj uan eli “keja tlasoli” (Filipenses 3:8).

Kema nikixmatki Jehová, nechpaleuik ma nikinpanti ipan tlanechikoli katli nelnelia elij nouampoyouaj, kampa tlauel moikneliaj uan nochi kuali mouikaj. Uan nojua tlauel niyolpaki pampa nama nijpia notata katli tlauel nechiknelia: Jehová.

[Tlatsintla kiijtoua]

[Tlajtoli katli pankisa]

“Uelki sampa nijtekipanoua Jehová pampa ya nechyoltilanki”