• TLAKATKI IPAN: 1963

• EUA: GRAN BRETAÑA

• SEKINOK TLAMANTLI: KIKAJKI SE TEKITL KAMPA KITLANIYAYA MIAK TOMIJ

TLEN NECHPANOK

Nitlakatki ipan se pilaltepetsi tlen Londres tlen itoka Croydon. Notatauaj euaj ipan se isla tlen Caribe, tlen itoka San Vicente. Kinpixkej chiknauij ininkoneuaj uan na nitlakatki kema ya kinpixtoyaj makuiltij. Maske nonana yauiyaya ipan se Iglesia Metodista, na amo nechpaktiyaya religión. Kema nieliyaya nisiuapil nechpaktiyaya nijmatis miak tlamantli. Kema amo nimomachtiyaya, nechpaktiyaya nias nechka ueyatl uan nopaya nijpouayaya miak amochtli tlen nitlajtlaniyaya ipan biblioteca.

Kema tlanki nimomachtia uan panok se keski xiuitl, pejki nikinpaleuia katli teikneltsitsij. Nikinpaleuik katli amo kipixtoyaj ininchaj, katli amo kuali eltoya inintlakayo uan katli ouij kimatiyayaj kiyekosej se tlamantli. Teipa nimomachtik ciencias de la salud ipan se universidad. Kema tlanki nimomachtia, tlauel kuali tlen nechpanok pampa nechtekimakakej kampa kuali nechtlaxtlauiskiaj uan ueliyaya nijpia nochi tlen na nijnekiyaya. Ueliyaya nikinyakana empresas uan nimomachtiyaya miak tlamantli tlen ueliskia kinpaleuis maseualmej. San ika se computadora uan ika internet ueliyaya nitekiti. Miakpa niajki ipan sekinok altepemej uan nimokauayaya ipan se hotel tlen tlauel nechpaktiyaya. Nopaya niauiyaya gimnasio, kampa texixitouaj uan kampa teyejyekchiuaj, nopaya nojkia nechpaktiyaya nitlajtlachias pampa tlauel tlayejyektsi. Nimoiljuiyaya nijpixtoya nochi tlen kichiuaskia ma niyolpaki. Maske kiampa nimoiljuiyaya, nojua nechtekipachouayaya kej itstoyaj teikneltsitsij.

BIBLIA NECHPALEUIK KUALI MA NIMONEJNEMILTI

Miak xiuitl nimotlajtlanik kenke tiitstokej uan tlake techpanos teipa. Maske nijnekiyaya nijmatis nopa, amo kema nijpojki Biblia. Ipan xiuitl 1999, nechpaxalok nosiuaikni Margaret uan se iuampo. Inijuantij eliyayaj Jehová itlajtoltemakauaj. Iuampo kinextik tlauel nechikneliyaya uan nijnejki ma nechmachti ika Biblia. Tlauel nimotekiuiyaya ipan noteki uan nijchiuayaya miak tlamantli, yeka amo nima kuali nitlaneltokak.

Ipan xiuitl 2002 niajki Inglaterra pampa nojua nijnekiyaya nimomachtis, nopaya nimomachtik kenijkatsa elij maseualmej uan nijnekiyaya ma nechixmatikaj kej se akajya katli tlauel momachtijtok. Ipan nopa altepetl, na uan nokone pejkej nochipa timonechikouaj ipan nopa Kali kampa mosentiliaj Jehová itlajtoltemakauaj. Maske tlauel nimomachtijtoya, amo nijmatiyaya kenke tlaijiyouiaj maseualmej uan tlake kichiuaskia kuali ma itstokaj, ni pejki nijkuamachilia kema nimomachtik Biblia. Tlen kiijtoua Mateo 6:24 nojkia tlauel nechpaleuik. Monekiyaya nijtlapejpenis ajkia nijtekipanos: toTeotsij o tomij. Tlen nijtlapejpeniskia, nechpaleuiskia ma nikita ipan tlake nimosentlalijtoya.

Ipan xiuitl 2001 nochipa niajtoya nimomachtia ininchaj toikniuaj, nopaya momachtiyayaj nopa amochtli ¿Existe un Creador que se interese por nosotros? * Tlen nimomachtik nopaya, nechpaleuik ma nikita san toTeotsij Jehová uelis kisenkauas nochi kuesoli tlen maseualmej kipixtokej. Uan ipan universidad amo kiampa tlamachtiyayaj, nopaya kiijtouayayaj amo moneki tijneltokas toTeotsij tlaj tijneki kuali tiitstos. Nopa kichijki tlauel ma nikualani. San nimomachtik ome metstli uan nijkajki pampa nijnekiyaya nojua kuali nimouampojchiuas iuaya toTeotsij.

Proverbios 3:5, 6 nechpaleuik ma nijpatla nonemilis: “Ximotemachi ipan toTeko ika nochi moyolo. Amo xijtokili san tlen motlalnamikilis mitsiljuia. Ximoiljui tlachke ipakilis toTeko ipan nochi tlamantli tlen tijchiuaskia, uan yajaya mitsyakanas ipan se ojtli tlen xitlauak”. Amo mitspaleuis tikixmatis toTeotsij tlaj tlauel timomachtis, titlatominpias o tlaj tlauel mitsixmatisej maseualmej. Nijnejki nijmaktilis nonemilis toTeotsij kema nijyekok tlen kineki kichiuas ipan Tlaltipaktli uan kenijkatsa Jesús motemaktilik uan mijki topampa. Ipan abril 2003 nimoatsonpoliuiltik. Ipan nopa tonali, ika yolik nijkajtiajki miak tlamantli.

¿KENIJKATSA NECHPALEUIJTOK?

Tlauel nijpatiita pampa nimouampojchijtok iuaya toTeotsij. Nama niitstok ika tlaseuilistli uan niyolpaki pampa kuali nikixmati Jehová. Nojkia nechpaktia niitstos ininuaya sekinok toikniuaj.

Kema nimomachtia Biblia noselti uan nia ipan tlanechikoli nechpaleuia ma nijyeko sekinok tlamantli. Uan nojkia nechpaktia nikiniljuis sekinok tlen nijyekojtok. Nimosentlalik nijchiuas ni tlamantli ipan nochi nonemilis uan yeka ipan junio 2008, pejki senkistok nitlajtolmoyaua. Kiampa nikinpaleuia sekinok maseualmej kuali ma itstokaj uan ma motemachikaj itstosej ipan se yejyektsi xochimili. Nama tlauel niyolpaki uan nijtlaskamatilia toTeotsij pampa nijmati tlake nijchiuas ipan nonemilis.

• TLAKATKI IPAN: 1973

• EUA: AUSTRIA

• SEKINOK TLAMANTLI: TLAUEL KIPAKTIYAYA MAUILTIS IKA TOMIJ

TLEN NECHPANOK

Nitlakatki ipan se altepetl tlen itoka Braunau (Austria) uan notatauaj eliyayaj católicos. Nopaya nochi kipixtoyaj tomij uan amo tlauel mochiuayaya tlen amo kuali.

Nikilnamiki se tonali ipan 1984, kema nijpixtoya 11 xiuitl, panok se tlamantli tlen kipatlak nonemilis. Se nouampo katli iuaya nimauiltiyaya fútbol, kipanok tlen amo kuali ipan carro uan mijki. Maske ya panotoya miak xiuitl, amo ueliyaya nikilkaua kema mijki nouampo. Uan nochipa nimotlajtlaniyaya tlake kinpano katli mikij.

Kema tlanki nimomachtia, pejki nitekiti kej electricista. Teipa, pejki tlauel nechpaktia nimauiltis ika tomij. Uan maske ueliskia nijpolos miak tomij, amo kema nechpolouayaya se tlenijki. Nojkia nimauiltiyaya sekinok tlamantli uan nechpaktiyaya nijkakis uikatl heavy metal uan punk. Tlauel niauilnemiyaya, niauiyaya ipan discotecas uan ipan sekinok iljuitl. Maske nijchiuayaya nochi tlen nijnekiyaya, nijyolmatiyaya nechpolouayaya se tlamantli.

BIBLIA NECHPALEUIK KUALI MA NIMONEJNEMILTI

Ipan xiuitl 1995, se tlen Jehová itlajtoltemakauaj katli ya ueyi, nechkaltajtakanik uan nechmakak se amochtli tlen mokixtijtok ipan Biblia uan kinankiliyaya nopa tlajtlanili “¿Tlake kinpano katli miktokej?”. Nijselik nopa amochtli pampa nojua nechtekipachouayaya tlen kipanotoya nouampo. Amo san nijpojki nopa tlamachtili kampa kinankilia nopa tlajtlanili, nijpojki nochi nopa amochtli.

Amo san nijpantik tlen nijnekiyaya nijmatis, nojkia nijyekok sekinok tlamantli. Tlauel nitlaneltokayaya ipan Jesús pampa nieliyaya católico. Maske kiampa, tlauel nechpaleuik kema kuali nimomachtik Biblia pampa nojkia uelki nimouampojchiua iuaya iTata Jesús, toTeotsij Jehová. Tlauel nechyolchikajki kema nijmatki toTeotsij itstok ininnechka itekipanojkauaj uan kineki ma kiixmatikaj nochi katli kitemouaj (Mateo 7:7-11). Nojkia nijyekok kiyolkokoua kema titlaijiyouiaj uan nochipa kichiua tlen kiijtoua. Ni kichijki ma nijneki nijmatis kenijkatsa moaxitijtok tlajtolpanextili. Nochi tlen nijyekok kichijki nojua kuali ma nitlaneltoka.

Teipa nikitak san Jehová itlajtoltemakauaj kichiuaj kampeka kinpaleuisej maseualmej ma kikuamachilikaj tlen Biblia kiijtoua. Nikijkuilouayaya nochi textos tlen nesiyaya ipan pilamochtsitsij uan teipa nijtemouayaya ipan noBiblia católica. Kema kiampa nijchiuayaya, tlauel nechpaleuik ma nikita nijpantijtoya nopa religión tlen melauak.

Nojkia nijyekok ipan Biblia Jehová kineki ma nijneltoka itlanauatiljuaj. Kema nijpojki Efesios 4:22-24, nikitak monekiyaya nijtlauelkauas nonemilis “tlen achtoui” pampa san nijchiuayaya “tlamantli tlen fiero”, uan monekiyaya nijpias ‘nonemilis yankuikʼ, kej Jehová kineki ma timonejnemiltikaj. Nimantsi nimosentlalik ayokmo niauilnemis, ayokmo nitlapijpias yon nimauiltis ika tomij (1 Corintios 6:9, 10). Kiampa uelki nijchiua pampa ayokmo nimouikak ininuaya katli achtouia eliyayaj nouampoyouaj uan nimouampojchijki ininuaya katli nojkia kineltokayayaj toTeotsij itlanauatiljuaj.

Maske ouij nijmatki, kema pejki nia tlanechikoli, nikinpantik kuali nouampoyouaj. Nojua nimomachtiyaya Biblia uan nimoyoliljuiyaya ipan tlen nijyekojtoya. Ika yolik nijpatlatiajki tlen nijchiuayaya, ayokmo nijkajki uikatl tlen nechpaktiyaya, nijpatlak tlen nijnekiyaya nijchiuas ipan nonemilis uan kej ninesiyaya. Ipan 1995 nimoatsonpoliuiltik kej se Jehová itlajtoltemajka.

¿KENIJKATSA NECHPALEUIJTOK?

Nama nikita kej kinamiki tomij uan sekinok tlamantli. Achtouia tlauel nimosisiniyaya uan nama nijchijtok kampeka ayokmo nima nikualanis. Nojkia, ayokmo tlauel nechtekipachoua tlen panos teipa.

Tlauel niyolpaki pampa nijtekipanoua Jehová ininuaya sekinok toikniuaj katli itstokej ipan nochi Tlaltipaktli. Maske kiixnamikij miak tlaouijkayotl, amo kitlauelkauaj Jehová. Tlauel niyolpaki nikijtos ayokmo nijchiua san tlen na nijneki, nama nimosentlalijtok nijtekipanos Jehová uan nikinpaleuis sekinok maseualmej.

• TLAKATKI IPAN: 1963

• EUA: GRAN BRETAÑA

• SEKINOK TLAMANTLI: AMO KIPAKTIYAYA KEJ ITSTOYA

TLEN NECHPANOK

Nitlakatki ipan Inglaterra, uan kema nijpixtoya se chikome xiuitl, nochampoyouaj yajkej Australia uan mochantijkej ipan se altepetl tlen Queensland tlen itoka Gold Coast. Maske amo tlauel titlatominpiayayaj, amo techpolok tlen ika timopanoltisej.

Maske nijpixtoya nochi tlen moneki, amo niyolpakiyaya pampa amo nechpaktiyaya kej niitstoya. Notata tlauel moiuintiyaya uan na amo tlauel nikikneliyaya. Amo nechpaktiyaya kema tlauel motlailtiyaya uan kitlaijiyouiltiyaya nonana. Kema panok miak xiuitl, nijkuamachilik kiampa kichiuayaya pampa tlauel tlaijiyouik kema tlatekipanouayaya kej soldado ipan Malasia.

Pejki tlauel nitlai kema niauiyaya secundaria. Kema nikaxitik 16 xiuitl, ayokmo nimomachtik uan nikalajki kej soldado ipan Marina. Ipan nopa tonali pejki nijtekiuia drogas, nijchichina iyatl uan tlauel nimoiuintiyaya. Achtouia san nimoiuintiyaya sejse chikueyi uan teipa pejki mojmostla nimoiuintia.

Kema nijpixtoya se 20 xiuitl pejki nimotlatsintokia tlaj itstok toTeotsij. Nikijtouayaya: “Tlaj itstok toTeotsij, ¿kenke titlaijiyouiaj uan timikij?”. Nojkia nikijkuilok se keski poemas kampa nikijtouayaya toTeotsij kichiua ma pano tlen amo kuali ipan Tlaltipaktli.

Kema nikaxitik 23 xiuitl, ayokmo nitekitik kej soldado ipan Marina. Amo sejkotsi nitekitik uan se xiuitl nipaxaloto ipan sekinok altepemej, uan maske kiampa nijchijki, amo nechpaktiyaya kej niitstoya. Amo nijmatiyaya tlake nijchiuas ika nonemilis uan amo nijnekiyaya nijchiuas yon se tlamantli. Amo tleno nechyolpakiltiyaya. Amo nijnekiyaya nijchiuas kampeka nijpias se kali, se kuali tekitl o nijtlanis miak tomij, na san nijnekiyaya nimotlailtis uan nijtlakakilis uikatl.

Nojua nikilnamiki nopa tonali kema nijnejki nijmatis kenke tiitstokej. Niajki Polonia pampa nipaxaloto kampa kintlatsakuiltiyayaj maseualmej ipan Auschwitz. Na san nijpojtoya tlen kichijkej nopaya, uan kema nikitak kenijkatsa tlauel tlauexka eliyaya, tlauel nimoyolkokok. Amo nijmatiyaya kenke maseualmej kichiuayayaj tlen tlauel amo kuali. Kema ninejnemiyaya nopaya, nimochokiliyaya uan nimotlajtlaniyaya: “¿Kenke panok ni?”.

BIBLIA NECHPALEUIK KUALI MA NIMONEJNEMILTI

Ipan xiuitl 1993, kema nitlakuepilik nochaj, pejki nijpoua Biblia pampa nijnekiyaya nijmatis kenijkatsa monankiliyaya tlen nimotlajtlaniliyaya. Teipa, omej Jehová itlajtoltemakauaj nechkaltajtakanijkej uan nechtlanejkej ma nia ipan se ueyi tlanechikolistli tlen mochiuaskia ipan se estadio tlen nechka mokauayaya. Uan kena niajki.

Panotoya se keski metstli niajtoya ipan nopa estadio pampa nikinitato katli mauiltiaj, uan nama amo sanse eliyaya. Jehová itlajtoltemakauaj tlauel kuali teseliyayaj uan kuali moyoyontijtoyaj, uan ininkoneuaj tlatlepanitayayaj. Tlajkotona panok se tlamantli tlen kichijki ma nimosentlachili: tlauel miakej Jehová itlajtoltemakauaj tlakuajkej ipan cancha uan kema sampa moseuitoj amo mokajki yon se tlasoli tlalchi. Maske tlauel kuali nopa, nojua tlauel nechpaktik kema nikitak nochi tlauel yolpaktoyaj uan kuali kiyolmatiyayaj, na ya nopa nijnekiyaya nikitas. Maske amo nikilnamiki yon se tlamachtili tlen mopanoltik, amo kema nikilkauas tlen kichijkej Jehová itlajtoltemakauaj.

Ipan nopa youali nikilnamijki tlen nechiljuijtoya nomachikni, katli kiixmatiyaya Biblia uan momachtijtoya sekinok religiones, ya nechiljuijtoya se akajya uelis kiitas ajkia inijuantij nelnelia elij Cristo itokilijkauaj ika tlen kichiuaj, kej Jesús kiijtok (Mateo 7:15-20). Nimoiljuiyaya monekiyaya nijmatis kenke Jehová itlajtoltemakauaj amo eliyayaj kej sekinok religiones. Ipan nopa tonali niyolpajki, amo kema kiampa nijyolmajtoya.

Ipan seyok semana, nopa omej Jehová itlajtoltemakauaj katli nechtlanejkej ma nia ipan ueyi tlanechikolistli, sampa nechpaxalojkej. Nechiljuijkej tlaj nijnekiyaya nimomachtis ika Biblia uan kena nijnejki. Nojkia pejki nia ipan tlanechikoli.

Kema nojua nimomachtiyaya ika Biblia ayokmo nimoiljuik tlen amo kuali tlen toTeotsij. Nijmatki ya amo kichiua tlen amo kuali uan amo techtlaijiyouiltia, uan kema maseualmej kichiuaj tlen amo kuali, ya tlauel kiyolkokoua (Génesis 6:6; Salmo 78:40, 41). Nimosentlalik nijchiuas kampeka ayokmo kema nijyolkokos uan nochipa nijyolpakiltis (Proverbios 27:11). Ayokmo kema nitlachichinki, nitlaik yon niauilnenki. Uan ipan marzo tlen xiuitl 1994, nimoatsonpoliuiltik kej se Jehová itlajtoltemajka.

¿KENIJKATSA NECHPALEUIJTOK?

Tlauel niyolpaki uan kuali nijyolmati. Ayokmo nimoiuintia kema nimokuesoua. Nochipa nikiljuia Jehová ma nechpaleui kema nechtekipachoua se tlenijki (Salmo 55:22).

Kipia matlaktli xiuitl nimosiuajtik iuaya se yejyektsi tosiuaikni katli itoka Karen, uan nijpia se notepotskone katli tlauel kuali iyolo uan itoka Nella. Tieyij tlauel techpaktia titlajtolmoyauasej uan tikinpaleuisej sekinok ma kimatikaj tlen melauak tlen toTeotsij. Nama kena nijmati tlake nijchiuas ipan nonemilis.