TLAMACHTILI TLEN IKA PEUA | TLAMACHTILI TLEN KICHIUA AMO KUALI MA TIKITAKAJ TOTEOTSIJ
Nopa istlakatili tlen kichijki ma moiljuikaj toTeotsij tlauel tetlaijiyouiltia
TLEN MASEUALMEJ KIIJTOUAJ
“Kema miki se maseuali katli kichiua uejueyi tlajtlakoli, kitlatsakuiltiaj ialma ipan infierno, ipan ‘tlitl tlen amo kema seui’ ” (Catecismo de la Iglesia Católica). Uan se keskij katli tlayakanaj ipan religiones kiijtouaj nopa infierno eli kema se akajya tlauel mouejkatlalia tlen toTeotsij.
TLEN BIBLIA KIIJTOUA
Katli “miktokej ayok tleno kimatij” (Eclesiastés 9:5). Uajka, tlaj mijkatsitsij amo tleno kimatij, ¿kenijkatsa uelis tlaijiyouisej ipan “tlitl tlen amo kema seui” o pampa tlauel mouejkatlalisej tlen toTeotsij?
Nopa tlajtoli ika hebreo uan griego tlen ipan Biblia motlajtolkuepa “infierno”, kiijtosneki “kampa kintlalpachouaj” mijkatsitsij. Se neskayotl, kema Job kipixki se kokolistli tlen tlauel kitlaijiyouiltik, kej ni kiiljuik toTeotsij: “Kuali eliskia intla tinechtlatiskia ipan nopa ueyi ostotl kampa itstokej mijkatsitsij” (Job 14:13). O “ipan infierno”, kej kitlajtolkuepa La Sagrada Biblia, de Guillermo Jünemann. Job amo kinekiyaya nochipa tlaijiyouijtos o mouejkatlalis tlen toTeotsij. Ya san kinekiyaya kema mikiskia ma kitokakaj kampa kintlalpachouaj mijkatsitsij uan kiampa ayokmo tlaijiyouiskia.
¿KENKE MONEKI TIJMATIS?
Tlaj tikitaj toTeotsij kej se akajya katli tetlatsakuiltia, kichiua ma timouejkatlalikaj tlen ya. Rocío, katli eua México, kiijtok: “Kema nieliyaya nisiuapil nechmachtijkej nelnelia eltok nopa infierno. Tlauel nijmakasiyaya toTeotsij uan nimoiljuiyaya amo kema kinextiyaya tlamantli tlen kuali. Nimoiljuiyaya nochipa kualantoya uan amo teikneliyaya”.
Kema Rocío kiitak tlake kiijtoua Biblia tlen toTeotsij uan tlake kinpano mijkatsitsij, kichijki ma kipatla tlen moiljuiyaya. Ya kiijtoua: “Ayokmo nimotekipachok uan nijmatki kejuak nechkixtilijkej se etik tlamamali. Nikitak toTeotsij kineki kuali ma tiitstokaj, ya techiknelia uan tojuantij nojkia uelis tikiknelisej. Nama nikita kej se tetaj katli tlauel kinikneliaj ikoneuaj uan kineki kuali ma itstokaj” (Isaías 41:13).
Miakej maseualmej itstokej ipan se religión pampa amo kinekij yasej infierno. Maske kiampa moiljuiaj, toTeotsij amo kineki ma tijtekipanokaj san pampa tijmakasij. Jesús kiijtok: “Moneki xikikneli toTeko Dios” (Marcos 12:29, 30). Uajka, kema tijkuamachiliaj toTeotsij kichiua tlen xitlauak, techpaleuia ma timotemachikaj teipa kema kintsontlamiltis axkuajkualmej, kichiuas ika xitlaualistli. Uelis tikijtosej kej Eliú, iuampo Job: “ToTeko Tlen Kipia Nochi Chikaualistli axtlajtlakolchiua, niyon axtlaixpano” (Job 34:10).
