Se tonali, kema Jesús itstoya ipan Jerusalén, kamanaltiyaya tlen iTata Jehová uan kiijtok katli tlayakanayayaj ipan religiones tlen nopa tonali tlamachtiyayaj tlen amo melauak (Juan 8:​12-30). Ika tlen kiijtok kinextik kenijkatsa moneki tikitasej tlen maseualmej kineltokaj tlen toTeotsij ipan ni tonali. Ya kiijtok: “Tlaj mojmostla inkichijtiasej tlen niinmechiljuia, uajka nelia initstosej innomomachtijkauaj. Uan inkimatisej tlen melauak, uan nopa tlen melauak inmechtojtomas” (Juan 8:​31, 32).

Kema kiijtok “Tlaj mojmostla inkichijtiasej tlen niinmechiljuia”, Jesús kinextik tlake uelis techpaleuis tijmatisej tlaj eli melauak se tlamachtili. Kema mitsiljuisej se tlamantli tlen toTeotsij, ximotlajtlani: “¿Mouika ika tlen Jesús tlamachtik uan ika sekinok tlamachtili tlen uala ipan Biblia?”. Xijchiua kej nopa maseualmej katli kitlakakilijkej apóstol Pablo: kuali ximomachti Biblia uan kiampa tikitas tlaj se tlamachtili nelnelia eli melauak (Hechos 17:11).

Ya nopa kichijkej Marco, Rosa uan Raimunda, katli tikijtojkej achtouia: momachtijkej Biblia ininuaya Jehová itlajtoltemakauaj. ¿Tlake kiyekojkej?

Marco: “Nopa toikni katli techmachtiyaya nochipa kitekiuiyaya Biblia kema nosiua uan na tijtlajtlaniyayaj se keski tlamantli. Ika yolik pejki tikikneliaj Jehová uan nosiua uan na pejki tlauel kuali timouikaj”.

Rosa: “Nimoiljuiyaya Biblia eliyaya san se amochtli tlen filosofía, tlen kinekiyaya kiixtomas ajkia eli toTeotsij ika maseualmej inintlalnamikilis. Teipa, nikitak Biblia kinankiliyaya nochi tlen nimotlajtlaniyaya. Nama, nijmati Jehová temachtli itstok uan uelis nimotemachis ipan ya”.

Raimunda: “Nikiljuik toTeotsij ma nechpaleui nikixmatis. Teipa, noueue uan na pejkej timomachtiaj Biblia. ¡Nama tijmatkej tlen melauak tlen Jehová! Tlauel tiyolpakiyayaj pampa tijmatkej kenijkatsa eli toTeotsij”.

Biblia, amo san kiijtoua tlen melauak, nojkia kiijtoua toTeotsij kinextia kuajkuali tlamantli. Uan techpaleuia ma tijmatikaj “nochi nopa tlamantli” tlen toTeotsij techmakak pampa techiknelia (1 Corintios 2:12). Ta nojkia uelis tijmatis tlen Biblia tlamachtia tlen toTeotsij, tlen mosentlalijtok kichiuas uan tlen panos teipa. Uelis tijpantis nopa tlamachtili ipan www.pr418.com/nch kampa kiijtoua “Tlen Biblia tlamachtia > Tlen Biblia kinankilia”. Nopaya nojkia uelis titlajtlanis ma mitsmachti ika Biblia se Jehová itlajtoltemajka. Tlaj kiampa tijchiuas, tikitas kena uelis tikiknelis toTeotsij.