Michelle: Yaui Sofía. Niyolpaki pampa sampa nimitspaxaloua.

Sofía: Tlaskamati, na nojkia niyolpaki sampa nimitsitas.

Michelle: Kema timonojnotskej tikitakej kenijkatsa kiyolmati toTeotsij kema kiita titlaijiyouiaj. * Tinechiljuik nochipa timotlatsintokijtok nopa, uan kema monana kipanok tlen amo kuali, pejki nojua tlauel timotlatsintokia nopa tlamantli. Uan, ¿kenijkatsa itstok monana?

Sofía: Kemantika kuali itstok uan kemantika amo. Uan nama kuali itstok.

Michelle: Kualtitok. Nimoiljuia amo kuali tijyolmati pampa tijpia nopa tekipacholi.

Sofía: Kena. Kemantika nimotlajtlania tlaj asis se tonali kema ayokmo titlaijiyouisej.

Michelle: Amo kenijki tlaj kiampa timotlajtlania. Kema achtoui nimitspaxaloko timokajkej nama tikitaskiaj kenke toTeotsij kikaua nojua ma titlaijiyouikaj tlaj ya uelis kichiuas kuali ma tiitstokaj.

Sofía: Kena, nikilnamiki.

Michelle: Achtoui nijneki ma tikompauikaj tlen tikitakej, uan teipa tijnankilisej ni tlajtlanili.

Sofía: Kualtitok.

Michelle: Tikitakej uejkajkia itstoya se tlakatl katli kuali kitekipanouayaya toTeotsij uan ya motlajtlanik kenke kikaua toTeotsij ma titlaijiyouikaj. Uan toTeotsij amo kiajuak yon kiiljuik amo kuali tlaneltokayaya.

Sofía: Kena, nopa amo nijmatiyaya.

Michelle: Nojkia tikitakej Jehová kiyolkokoua kema kiita titlaijiyouiaj. Biblia kiijtoua kema ialtepe tlaijiyouiyaya, “ipan nochi inintlaijiyouilis yajaya nojkia tlaijiyouik”. * ¡Tlauel techyolchikaua tijmatisej toTeotsij nojkia kiyolkokoua tlen techpano!

Sofía: Kena.

Michelle: Nojkia tikitakej toTeotsij uelis kitlamiltis tlaijiyouilistli pampa ya kipia miak chikaualistli.

Sofía: Uajka, ¿kenke nojua kikaua ma pano tlen amo kuali tlaj ya uelis kitlamiltis?

Michelle: Achtoui ma tikitakaj tlen kiijtoua Génesis, nopa achtoui amochtli tlen uala ipan Biblia. ¿Tijkaktok nopa tlapoualistli tlen Adán uan Eva uan nopa kuauitl itlajka tlen kiniljuijkej amo ma kikuakaj?

Sofía: Kena, ya nopa nechmachtijkej ipan iglesia. ToTeotsij kiniljuik amo ma kikuakaj itlajka se kuauitl, uan inijuantij amo tlaneltokakej.

Michelle: Kena. Nama ma tikitakaj tlake panok achtoui, ni techpaleuis tijkuamachilisej kenke titlaijiyouiaj. ¿Tijneki tijpouas Génesis, capítulo 3, versículo 1 uan tlami ipan 5?

Sofía: Kena, kiijtoua: “Nopa kouatl eliyaya tlen más tlalnamiki uan más kimatiyaya kejatsa tlakajkayauas kej nochi sekinok tlapialmej tlen toTeko Dios kinchijtoya. Uan se tonal nopa kouatl kitlajtlanik nopa siuatl: ‘¿Axinmechiljuijtok Dios para amo xijkuakaj itlajka niyon se kuauitl ipan ni xochimili?ʼ. Uan nopa siuatl kinankilik: ‘Uelis tijkuasej itlajka tlen ueli kuauitl, pero iyojtsi ne tlen eltok tlatlajko xochimili Dios techiljuijtok axkuali tijkuasej, niyon tikitskisej itlajka ne kuauitl pampa intla tijchiuasej, timikisejʼ. Pero nopa kouatl kiiljuik nopa siuatl: ‘Axneli, axinmikisej. Kuali kimati Dios intla inkikuasej itlajka nopa kuauitl elis keja inmechtlapouilis inmoixteyol uan inmotlalnamikilis uan inkimatisej tlen kuali uan tlen axkuali. Keja nopa inelisej keja ya’ ”.

Michelle: Tlaskamati. Ma tikixtomakaj ni versículos. Achtoui kiijtoua se kouatl kinojnotski Eva. Ipan seyok texto tlen Biblia kiijtoua elki Diablo o Satanás katli kikamanaljuik Eva ika nopa kouatl. * Ya kitlajtlanilik Eva tlaj toTeotsij kiniljuijtoya amo kuali tlaj kikuaskiaj nopa kuauitl itlajka. ¿Tlake kiniljuik toTeotsij kinpanoskia Adán uan Eva tlaj kikuaskiaj nopa kuauitl itlajka?

Sofía: Kiniljuik mikiskiaj.

Michelle: Kena. Teipa Diablo kiistlakauik toTeotsij. Xikita tlen kiijtok: “Axneli, axinmikisej”. ¡Kiijtok toTeotsij san istlakati!

Sofía: Nopa amo nechixtomilijtoyaj.

Michelle: Kema Diablo kiijtok toTeotsij istlakati, monejki panos miak xiuitl uan kiampa monankilis nopa tlajtlanili. ¿Tijmati kenke?

Sofía: Mmm... Amo nijmati.

Michelle: Ma timoiljuikaj ni. Ximoiljui se tonali niuala uan nimitsiljuia na nijpia miak chikaualistli uan ta amo. ¿Tlake kinamikiskia tijchiuasej uan kiampa nesis tlaj niistlakati o amo?

Sofía: Uelis tijtlananasej se tlamantli.

Michelle: Kena. Uelis tijtemosej se tlamantli tlen tlauel etik uan tikitasej ajkia ueli kitlanana. Kiampa nesis ajkia kipia chikaualistli.

Sofía: Kena, uelis kiampa tijchiuasej.

Michelle: Uan, ¿eliskia sanse tlaj nikijtoskia ta amo tijchiua tlen xitlauak?

Sofía: Amo.

Michelle: Pampa amo uelis tijnextisej tijchiuaj tlen xitlauak tlaj san tijtlananasej se tlamantli tlen etik.

Sofía: Nopa nelia.

Michelle: Tlaj tijneki tijnextis tijchiua tlen xitlauak, moneki tijkauas ma pano tonali uan kiampa sekinok kiitasej tlaj kuali timonejnemiltia.

Sofía: Kena.

Michelle: Sampa ma tikitakaj tlen kiijtoua Génesis. ¿Kiijtok Diablo ya kipia miak chikaualistli uan toTeotsij amo?

Sofía: Amo.

Michelle: ToTeotsij amo ouij kinextijtoskia Satanás san istlakati. Satanás kiijtok toTeotsij amo kichiua tlen xitlauak. Uelis tikijtosej kiampa kiiljuik Eva: “ToTeotsij mitsistlakauia, uan na nimitsiljuia tlen melauak”.

Sofía: Amo nijmajtoya.

Michelle: ToTeotsij tlauel tlalnamiki, yeka kikajki ma pano miak xiuitl, kiampa Diablo ueliskia kinextis tlaj nelia tlen kiijtok. Uan nojkia nochi kimatiskiaj ajkia istlakatik.

Sofía: Kema Eva mijki, neski toTeotsij kiijtouayaya tlen melauak.

Michelle: Maske nopa nelia, Satanás nojkia kinejki kiijtos seyok tlamantli. Xikita tlen kiijtoua versículo 5. ¿Tlake seyok tlamantli kiiljuik Eva?

Sofía: Kiiljuik tlaj kikuaskia itlajka nopa kuauitl kejuak tlapouiskia iixteyol.

Michelle: Kena, uan nojkia kiiljuik eliskia kej toTeotsij uan kimatiskia tlake kuali uan tlake amo kuali. Satanás kinejki kiijtos toTeotsij amo kineki kinmakas maseualmej tlen kuali.

Sofía: Amo nijmatiyaya nopa.

Michelle: Uan nopa eli se ueyi istlakatili.

Sofía: ¿Kenke eli se ueyi istlakatili?

Michelle: Satanás kinejki Eva ma moiljui, ya uan nochi maseualmej kuali itstoskiaj tlaj ininselti monauatiskiaj. Jehová kimatiyaya monekiyaya panos miak tonali uan kiampa nesiskia Satanás san istlakati. Yeka kikajki ma tlanauati ipan Tlaltipaktli se keski tonali. Yeka nama titlaijiyouiaj pampa tlanauatia Satanás uan amo toTeotsij. * Maske nama tlauel titlaijiyouiaj, onka se kuali tlamachtili tlen moneki tijmatisej.

Sofía: ¿Tlake kuali tlamachtili?

Michelle: Biblia techmachtia se kuali tlamantli tlen toTeotsij. Kiijtoua toTeotsij itstok tonechka kema titlaijiyouiaj. Ma tikitakaj tlen kiijkuilo tlanauatijketl David ipan Salmo 31:7. Maske David tlauel tlaijiyouik xikita tlen kiiljuik toTeotsij. ¿Tijneki tijpouas ni texto?

Sofía: Kena, kiijtoua: “Nijpia miak pakilistli pampa tinechiknelia. Ta tikitstok nochi nokuesol, tikixmajtok nochi tlen nopantitok”.

Michelle: Maske David tlauel tlaijiyouik, kiyolchikauayaya pampa kimatiyaya Jehová kiitayaya nochi tlen kipanoyaya. Uan ta, ¿mitsyolchikaua tijmatis Jehová kiita nochi tlen mitspano, uan nojkia nochi tlamantli tlen mitsyolkokoua tlen sekinok amo kikuamachiliaj?

Sofía: Kena, tlauel techyolchikaua.

Michelle: Biblia kiijtoua toTeotsij amo kikauas nochipa ma titlaijiyouijtokaj. Nojkia techiljuia nechka kitlamiltis nochi tlen Satanás kinauatia uan nojkia tlen techtlaijiyouiltia. ToTeotsij nojkia kitlamiltis tlen inmechtlaijiyouiltijtok monana uan ta. Nijnekiskia niualas ne seyok semana uan nimitsnextilis kenke uelis timotemachisej toTeotsij nechka kitlamiltis tlaijiyouilistli. *

Sofía: Kena, kuali tlaj tiualas.