Nitlakatki nechka altepetl Leipzig, ipan República Democrática Alemana, uan nopaya niitstoya se keski xiuitl. Nopa altepetl amo uejka mokauayaya tlen Polonia uan República Checa. Kema nijpixtoya chikuasej xiuitl, timochantitoj Brasil pampa notata nopaya tekitiskia, uan teipa tiajkej Ecuador.

Kema nijpixtoya 14 xiuitl, notatauaj sampa nechtitlankej Alemania pampa nimomachtiskia ipan se escuela kampa nopaya nimokauaskia. Uan pampa tlauel uejka niitstoya tlen inijuantij, monekiyaya noselti nimomokuitlauis. Nimomatki kiampa nijchiuas uan amo kenijki nikitayaya tlaj sekinok amo kinpaktiyaya tlen nijchiuayaya.

Kema nijpixtoya 17 xiuitl, notatauaj sampa tlakuepilijkej Alemania. Maske se keski metstli niitstoya ininuaya, nikistejki nochaj kema nijpixtoya 18 xiuitl pampa amo nijnekiyaya nijchiuas tlen inijuantij nechiljuiyayaj.

Amo nijmatiyaya kenke tiitstokej, yeka pejki nijchiua se keski tlamantli tlen nechpaleuiskia nijmatis. Nikitak tlake kichiuaj se keskij maseualmej katli mosentikapaleuiyayaj, uan teipa nimosentlalik nipaxalos ipan miak altepemej kampa tlayejyektsi, uan kiampa nijchiuaskia pampa maseualmej ayamo kitlamisokiuiyayaj Tlaltipaktli.

Nijkojki se motocicleta, nikistejki tlen Alemania uan niajki África. Teipa, monejki nitlakuepilis Europa pampa nomoto sosolijki. Kema ya nijkualchijchijtoya, niajki nechka ueyi atl ipan Portugal. Nopaya nimoiljuik ayokmo nijtekiuiskia nopa motocicleta uan nipaxaloskia kampa ueli ipan barco.

Nojkia nimosentilik ininuaya se keskij telpokamej katli kinekiyayaj kiixkotonasej océano Atlántico. Nopaya nojkia itstoya Laurie, katli teipa iuaya nimonamiktiskia. Tiasitoj ipan islas del Caribe uan timokajkej se keski tonali ipan Puerto Rico, uan teipa sampa titlakuepilijkej Europa. Laurie uan na tijnekiyayaj tijkouasej se barco tlen amo tlauel ueyi uan tijkualchijchiuaskiaj pampa nopaya tiitstoskiaj. Maske eyi metstli tijtemojkej, ayokmo uelki tijtemouaj pampa ipan Alemania nechnotskej ma nia ipan ejército.

Nitlatekipanok ipan ejército 15 metstli, uan ipan nopa tonali timonamiktijkej. Tojuantij nojua tijnekiyayaj tipaxalosej. Kema ayamo nechnotsayayaj ipan ejército, tijkojkej se lancha de salvamento uan ika yolik tijchijtiajkej kej se velero, maske nojua nitlatekipanouayaya ipan ejército. Tojuantij tijnekiyayaj timochantisej ipan nopa lancha uan nojua tipaxalosej kampa ueli. Kema nikiski tlen ejército uan ayamo tijtlamikualchijchiuayayaj nopa barco, Jehová itlajtoltemakauaj techkamanaljuijkej tlen Biblia uan pejki timomachtiaj ininuaya.

Achtoui nimoiljuiyaya amo monekiyaya nijpatlas miak tlamantli pampa nimonamiktijtoya iuaya nopa siuatl katli iuaya niitstoya uan ayokmo nitlachichinayaya (Efesios 5:⁠5). Nojkia, nimoiljuiyaya kuali nijtekiuiskia nonemilis tlaj nipaxaloskia kampa ueli uan nikitaskia tlen toTeotsij kichijchijtok.

Maske kiampa nimoiljuiyaya, nojua monekiyaya nijpatlas se keski tlamantli ipan nonemilis uan nojkia kej nieliyaya. Tlauel nimoueyimatiyaya uan amo nijnekiyaya sekinok ma nechpaleuikaj. Nojkia, tlauel nechpaktiyaya niteiljuis tlen niueliyaya nijchiua uan tlen nijchijtoya. San na tlauel nimopatiitayaya.

Se tonali nijpojki nopa Sermón del Monte (Mateo, capítulos 5-7). Achtoui nimosentlachilik ika tlen Jesús kiijtok tlen pakilistli. Ya kiijtok tlauel pakiyayaj katli mayanayayaj uan katli amikiyayaj (Mateo 5:⁠6). Yeka, nimotlatsintokiyaya kenke se akajya katli mayanayaya uan amikiyaya ueliyaya yolpakis. Kema nojua nimomachtijtiauiyaya Biblia, nikitak nochi moneki tikixmatisej Jehová, uan tlaj tijmajtosej nopa, techpaleuis kiampa ma tijchiuakaj. Kiampa kiijtok Jesús: “Pakij katli kimatij moneki momachtisej toTeotsij iTlajtol” (Mateo 5:⁠3, TNM).

Laurie uan na pejkej timomachtiaj Biblia ipan Alemania, teipa timochantitoj Francia uan teipa Italia. Kampa ueli itstoyaj Jehová itlajtoltemakauaj. Tlauel nimosentlachiliyaya pampa inijuantij tlauel moikneliaj uan mosentikapaleuiaj. Nikitak elij kej iknimej maske kampa ueli euaj (Juan 13:​34, 35). Uan kema panok se keski xiuitl timoatsonpoliuiltijkej.

Maske ya nimoatsonpoliuiltijtoya, nojua monekiyaya nijpatlas se keski tlamantli ipan nonemilis. Laurie uan na tijnekiyayaj tiasej ipan barco, tijyaualoskiaj África uan tiasiskiaj Estados Unidos. Kema tiauiyayaj tlatlajkotipa océano Atlántico, na san iuaya nosiua ipan nopa barco tlen amo tlauel ueyi, nikitak san toTeotsij tlauel ueyi uan tojuantij amo. Nijpixtoya miak tonali, yeka nimosentlalik nimomachtis Biblia (amo uelis tijchiuas miak tlamantli kema tiitstos ipan ueyi atl). Kema nikitak nopa tlapoualistli kampa kiijtoua tlen kipanok Jesús, kichijki ma nimoyoliljui ipan miak tlamantli. Maske ya amo kipiayaya tlajtlakoli uan kinextiyaya miak kuajkuali tlamantli, amo kema kinejki ma kiuejkapantlalikaj. Ya mosentlalijtoya kiyolpakiltis iTata uan amo ya iselti.

Kema nimoyoliljuik ipan tlen Jesús kichijki, nikitak amo kinamikiyaya nijtekipanos toTeotsij san kema niueliyaya, monekiyaya nikachtouitlalis ipan nonemilis (Mateo 6:33). Yeka, kema tiasitoj Estados Unidos, timosentlalijkej ayokmo tinemiskiaj ipan barco uan timosentlaliskiaj tijtekipanosej toTeotsij.

Achtouia kema nimoiljuiyaya san ipan na, amo nijmatiyaya tlake panoskia ika tlen nijtlapejpeniyaya nijchiuas. Nama nimoyakana ika se tlamantli tlen nochipa kuali nechpaleuis (Isaías 48:​17, 18). Nijmati tlake moneki tijchiuasej ipan tonemilis: tijueyichiuasej toTeotsij uan tikinpaleuisej maseualmej ma kiixmatikaj.

Laurie uan na tlauel kuali tiitstokej pampa Biblia techpaleuijtok. Nojkia, Jehová tlauel techteochijtok pampa tijpixtokej se tosiuapil katli nojkia kiixmati Jehová uan kiiknelia.

Maske tikixnamiktokej se keski tlaouijkayotl ipan tonemilis, Jehová nochipa techpaleuijtok, uan tojuantij timosentlalijtokej nochipa tijtekipanosej uan timotemachisej ipan ya (Proverbios 3:​5, 6).