Tlaj tlanauatianij euaj kampa kichiuaj tlen amo xitlauak, tekichiuanij nochipa kej nopa kichiuasej. Yeka, tlaj tijnekij se tlanauatijketl tlen kichiua san tlen xitlauak moneki ualas kampa kichiuaj tlen xitlauak. Biblia kiijtoua katli toTeotsij kitekitlalis kichiuas tlen xitlauak, yeka Jesús kiniljuik itokilijkauaj ya nopa ma kitlajtlanikaj toTeotsij (Mateo 6:9, 10).

ToTeotsij iTlanauatijkayo tekichiua iluikak uan nechka kintekipatlas nochi tlanauatianij (Salmo 2:8, 9; Apocalipsis [o Revelación] 16:14; 19:19-21). Ni tlanauatijketl kitlamiltis nochi tlen amo xitlauak. Ma tikitakaj kenke uelis timotemachisej temachtli kichiuas.

TLEN AMO XITLAUAK: Tlanauatianij kiixtlauaj tlen kichiuaj ika nopa impuestos tlen maseualmej kiixtlauaj. Pampa kiseliaj miak tomij miakej tekichiuanij kiichtekij, uan katli amo kinekij ma kininamakaj miak impuestos, kinmakaj tomij. Yeka tlanauatianij moneki tlainamasej miak impuestos uan tlauel kichiuaj tlen amo xitlauak. Uan maseualmej katli kichiuaj tlen xitlauak inijuantij moneki tlaxtlauasej.

TLEN KISENKAUAS: ToTeotsij iTlanauatijkayo kuali tlanauatis pampa kiyakanas Jehová (Apocalipsis 11:15). * Ya amo moneki tlainamas impuestos uan kiampa uelis tlanauatis. Kinmakas nochi tlen kinpoloua itekipanojkauaj pampa kineki kinmakas uan pampa kipia miak chikaualistli (Isaías 40:26; Salmo 145:16).

TLEN AMO XITLAUAK: Susan Rose-Ackerman, nojkia kiijtoua moneki “tekichiuanij kipeualtisej ayokmo kichiuasej tlen amo xitlauak uan teipa sekinok”, uan kiampa tlamis. Kema se tlanauatijketl kinnauatia policías uan katli tekitij ipan aduanas ayokmo ma kichiuakaj tlen amo xitlauak, uan kinkaua tekichiuanij ma kichiuakaj, maseualmej ayokmo motemachiaj ipan ya. Nochi maseualmej mokuapolouaj, yeka Biblia kiijtoua: “Axonka niyon se tlakatl tlen nochipa kichiua tlen kuali uan axkema tlajtlakolchiua” (Eclesiastés 7:20).

TLEN KISENKAUAS: Maseualmej amo kichiuasej Jesucristo ma kichiua tlen amo xitlauak. Ni kuali neski kema Satanás katli kinauatia Tlaltipaktli, kinejki kikajkayauas kema kiiljuik kimakaskia “nochi tlanauatianij ipan nochi tlaltinij” tlaj motlankuaketsaskia iixpa uan kiueyichiuaskia, uan Jesús amo kinejki kichiuas (Mateo 4:8-10; Juan 14:30). Kema kitlaijiyouiltijtoyaj amo kiselik nopa droga tlen kimakayayaj, pampa maske kipaleuijtoskia ayokmo kuajkualos, uelis kikuatlapololtijtoskia (Mateo 27:34). Jesús kinextik uelis tekichiuas ipan toTeotsij iTlanauatijkayo pampa moyolkuik uan itstok iluikak (Filipenses 2:8-11).

TLEN AMO XITLAUAK: Kema ipan altepemej kitlapejpeniaj se inintlanauatijka, kiijtouaj uelij kinkixtiaj katli kichiuaj tlen amo xitlauak. Maske kiampa kiijtouaj, kampa ueli miakej kichiuaj tlen amo xitlauak. Katli tlatominpiaj kinchiualtiaj  tekichiuanij ma kichiuakaj tlen inijuantij kinekij pampa kinpaleuiaj ika tomij kema kintlapejpeniaj.

John Paul Stevens, katli tekiti ipan Tribunal Supremo de Estados Unidos, kiijtoua kema kichiuaj tlen amo xitlauak “tekichiuanij ayokmo tlanauatiaj kej kinamiki yon kej kiijtoua inintlanauatiljuaj, uan maseualmej ayokmo motemachiaj ipan inijuantij”. Yeka, miakej moiljuiaj nopa políticos tlauel kichiuaj tlen amo xitlauak.

TLEN KISENKAUAS: ToTeotsij iTlanauatijkayo nochipa tekichiuas, yeka ayokmo itstosej políticos uan amo aka kichiuas tlen amo xitlauak (Daniel 7:13, 14). ToTeotsij kitekitlalis itlanauatijka uan amo aka kitekipatlas. Uajka, san setsi tlanauatis uan tlen kichiuas kinpaleuis nochi.

TLEN AMO XITLAUAK: Sekij moiljuiaj tlaj kiijkuiloskiaj sekinok tlanauatili ayokmo kichiuaskiaj tlen amo xitlauak. Miakej kiitstokej maske onka miak tlanauatili, miakej kiixpanoj. Uan kema kinekij kichiuasej ma kineltokakaj nopa tlanauatili moneki kitekiuisej miak tomij, uan amo uelij kitlamiltiaj tlen amo xitlauak.

TLEN KISENKAUAS: ToTeotsij itlanauatiljuaj kena tepaleuia. Jesús amo temakak miak tlanauatili kampa kiijtoua tlake kuali se kichiuas uan tlake amo, ya kiijtok san ni: “Xikinchiuilikaj sekinok, iuikal keja inkinekij sekinok ma inmechchiuilikaj” (Mateo 7:12). Uan nojkia onka tlanauatili tlen mosentlalia ipan tlen tijyolmatij, amo ipan tlen tijchiuaj. Yeka Jesús kiijtok: “Xikinikneli sekinok keja timoiknelia moselti” (Mateo 22:39). ToTeotsij kichiuas ma moaxiti nopa tlanauatili pampa ya kiita tlen tijpiaj ipan toyolo (1 Samuel 16:7).

TLEN AMO XITLAUAK: Kema tekichiuanij uan maseualmej tlauel kinekij tlapijpiasej uan amo temakasej tlen kipiaj, kichiuaj tlen amo xitlauak. Ipan achtoui tlamachtili tikitakej katli  kalchiuaj kintlaxtlauijkej tlanauatianij pampa kimatiyayaj amo nelpatiyo kisaskia tlaj kinkauaskiaj ma kitekiuikaj amo kuajkuali tlamantli tlen ika kalchiuaj yon kej tekichiuanij tlanauatiaj.

Tlaj maseualmej kinmachtisej amo tlauel ma tlapijpiakaj uan ma kinekikaj temakasej tlen kipiaj, ayokmo mochiuas tlen amo xitlauak. Maske tekichiuanij kichiuaskiaj ni, amo uelij uan amo kinekij ma kinmachtikaj nopa.

TLEN KISENKAUAS: ToTeotsij kena uelis kitlamiltis tlen amo xitlauak, pampa kinmachtia ika tlen uelis kuali moyakanasej. * Nopa ‘kiyankuilia inintlalnamikilis’ (Efesios 4:23). Uan kinpaleuia amo ma kinekikaj tlauel tlapijpiasej uan ma temakakaj tlen kipiaj, kiampa pakisej ika tlen kipiaj uan kintekipachos tlen sekinok kinpoloua (Filipenses 2:4; 1 Timoteo 6:6).

TLEN AMO XITLAUAK: Maske kampa tiitstokej kichiuaj tlen kuali uan momachtijtokej miak, sekij kichiuaj tlen amo xitlauak. Yeka miakej kiijtouaj amo ueli kitlamiltiaj tlen amo xitlauak, uan san uelis kichiuasej amo tlauel ma teyolkokokaj kema kichiuaj tlen amo xitlauak.

TLEN KISENKAUAS: Ipan nopa Convención de las Naciones Unidas, kiijtouaj uelis kitlamiltisej tlen amo xitlauak tlaj tlanauatianij tlamachtisej “amo ma tlakajkayauakaj uan ma kichiuakaj tlen kinamiki”. ToTeotsij amo techiljuia san ma tijnekikaj tijchiuasej, ya technauatia ma tijchiuakaj. Yeka Biblia kiijtoua ipan toTeotsij iTlanauatijkayo amo itstosej katli kinekij tlauel tlapijpiasej yon istlakatinij (1 Corintios 6:9-11; Apocalipsis 21:8).

Nochi uelis kitlepanitasej toTeotsij itlanauatiljuaj, kej kichijkej nopa achtoui Cristo itokilijkauaj. Kema Simón kinejki kinmakas tomij, inijuantij amo kiselijkej uan kiiljuijkej: “Xijpatla moyolo uan xijkaua nopa tlajtlakoli”. Kema Simón kimatki amo kuali tlen kinekiyaya, kiniljuik ma kitlajtlanikaj toTeotsij ma kipaleui (Hechos 8:18-24).

Maske tieua ipan tlen ueli altepetl, nojkia uelis tijpaleuis toTeotsij iTlanauatijkayo (Hechos 10:34, 35). Tlen tlamachtia toTeotsij mitsnextilis kenijkatsa uelis tijchiuas. Jehová itlajtoltemakauaj tlauel kinpaktis mitsnextilisej kenijkatsa tlamachtiaj ika Biblia. Tlaj tijneki ma mitsmachtikaj se keski minutos sejse chikueyi, tikixmatis nopa tlamachtili tlen toTeotsij iTlanauatijkayo uan kenijkatsa toTeotsij kitlamiltis tlen amo xitlauak (Lucas 4:43). Ximonojnotsa ininuaya Jehová itlajtoltemakauaj katli itstokej nechka mochaj o ipan www.pr418.com/nah xikita sekinok tlamachtili.