1, 2. ¿Tlake kichijki Jesús ipan nopa youali 14, mestli nisán, xiuitl 33? (Xikita nopa achtoui tlaixkopinkayotl.)

IPAN tonali 14, mestli nisán, xiuitl 33 kema nesiyaya mestli ne Jerusalén, Jesús uan apóstoles kichijkej nopa Pascua. Ika ni sejse xiuitl kiilnamikiyayaj kema toTeotsij kinkixtik ne Egipto kipia 1,500 xiuitl. Teipa Jesús uan 11 apóstoles pejkej kichiuaj seyok iljuitl, tlen monekiskia kichiuasej sejse xiuitl tlen ika kiilnamikiskiaj Jesús imikilis (Mateo 26:1, 2).

² Kema Jesús kipeualtik ni iljuitl momaijtok. Teipa kinmakak apóstoles nopa pantsi, uan kiniljuik: “Xijkuikaj ni pantsi uan xijkuakaj”. Teipa kikuik vino, sampa momaijtok uan kiniljuik: “Nochi inmojuantij xikikaj” (Mateo 26:26, 27). Nopa pantsi uan nopa vino eliyaya san se tlanextilili. Jesús kinmachtik tlake kiijtosnekiyaya uan sekinok tlamantli tlen tlauel ipati.

3. ¿Tlake tijnankilisej ipan ni tlamachtili?

³ Jesús tlanauatik ma moilnamiki imikilis sejse xiuitl. Teipa kitokaxtijkej “toTeko iTlakualis” (1 Corintios 11:20). Ma tijnankilikaj ni tlajtlanili: ¿Kenke moneki tikilnamikisej Jesús imikilis? ¿Tlake  kiixnextia nopa pantsi uan nopa vino? ¿Kenijkatsa uelis timokualchijchiuasej kema moilnamikis Cristo imikilis? ¿Ajkia inijuantij uelis kikuasej pantsi uan kiisej vino? Uan, ¿kenijkatsa tijtlaskamatiliaj toTeotsij pampa uelis tiitstosej nochipa?

4. ¿Tlake uelis tijselisej pampa Jesús techmakixtik ika imikilis?

⁴ Nochi titlajtlakolejkej uan timikij pampa Adán tlaixpanok (Romanos 5:12). Ueliskia timomakixtisej tlaj kimakaskiaj toTeotsij se tlaxtlauili. Pampa titlajtlakolejkej, amo uelis titlaxtlauasej uan tikinmakixtisej sekinok (Salmo 49:6-9). Jesús kena eliyaya xitlauak, yeka ika imikilis uelki kimakak toTeotsij nopa tlaxtlauili tlen monekiyaya, uelis timomakixtisej uan uelis tiitstosej nochipa (Romanos 6:23; 1 Corintios 15:21, 22).

5. 1) ¿Kenijkatsa Jehová uan Jesús kinextijkej techikneliaj? 2) ¿Kenke moneki ma timonechikokaj kema moilnamikis Jesús imikilis?

⁵ Jehová uan Jesús tlauel techikneliaj, yeka temakakej nopa tlaxtlauili tlen ika techmakixtisej (Juan 3:16). Jesús kinejki motemaktilis pampa ipa techikneliyaya kema ayamo ualajtoya ipan Tlaltipaktli (Proverbios 8:30, 31, TNM). ¡Tlauel tijtlaskamatiliaj tlen kichijkej Jehová uan Jesús! Yeka sejse xiuitl timonechikouaj kema moilnamiki Cristo imikilis, uan kiampa tijneltokaj tlen technauatik: “Xijchijtiakaj ya ni para innechilnamikisej” (1 Corintios 11:23-25).

6. ¿Tlake kiijtok Jesús kiijtosneki pantsi uan vino?

⁶ Kema Jesús kinnauatik apóstoles ma kiilnamikikaj imikilis, kiniljuik tlake kiixnextia pantsi uan vino. Tlen pantsi kiijtok: “Ni [kiijtosneki] notlakayo”. Uan tlen vino kiijtok: “Ni [...] tenextilia noeso tlen nijtoyauas para kipeualtis nopa yankuik tlajtolsenkauali” (Marcos 14:22-24). Jesús amo kichijki pantsi ma mokuepa inakayo yon vino ma mokuepa ieso. Uajka, eliyaya san se tlanextilili.

7. ¿Tlake kiixnextia nopa pantsi tlen amo kixokoltijtokej?

⁷ Jesús kitekiuik pantsi tlen amo kixokoltijtoyaj (Éxodo 12:8). Kemantika Biblia kiijtoua nopa tlasonejkayotl kiijtosneki tlajtlakoli (Mateo 16:6, 11, 12; Lucas 12:1). Uajka nopa pantsi tlen amo kixokoltijtoyaj, kiixnextik Jesús itlakayo tlen amo tlajtlakole (Hebreos 7:26). Yeka, kema moilnamiki Cristo imikilis motekiuia pantsi tlen amo kixokoltijtokej.

8. ¿Tlake kiixnextia nopa vino?

⁸ Nopa vino tlen Jesús kitekiuik kiixnextik ieso uan tlen motekiuia kema moilnamiki imikilis nojkia. Jesús kimiktijkej nechka Jerusalén. Ya motemaktilik pampa kiampa toTeotsij uelis techtlapojpoljuis (Mateo 26:28; 27:33). Uelis tijtlaskamatilisej tlaj timokualchijchiuasej kema moilnamikis Cristo imikilis. ¿Kenijkatsa uelis tijchiuasej?

9. 1) ¿Kenijkatsa techpaleuis tlaj tijpojtiasej ipan Biblia tlen mopoua kema moilnamiki Cristo imikilis? 2) ¿Tlake tijyolmati pampa techmakixtik Jesús?

⁹ Uelis timokualchijchiuasej tlaj tijpouasej tlen Jesús kichijki kema nechka mikiskia. Uelis tijpouasej tlen nesi ipan pilamochtsi Examinando las Escrituras diariamente. * (Xikita nopa nota.) Tlaj tijpouasej  kema timokualchijchiuasej techpaleuis timoyoliljuisej kenijkatsa techpaleuia Jesús imikilis. Se tosiuaikni kiijkuilok: “Tijchiaj ika nochi toyolo nopa tonali kema moilnamiki Cristo imikilis. Kej panotia sejse xiuitl tlauel tijpatiitaj”. Maske kimatiyaya kanke uala ipan Biblia tlen nopa tlaxtlauili uan kuali kiixtomayaya, san kema mijki itata, kiitak kenke tlauel ipati Jesús imikilis. Nopa tlauel kiyolchikajki.

10. ¿Tlake nojkia uelis tijchiuasej uan kiampa timokualchijchiuasej kema moilnamikis Cristo imikilis?

¹⁰ Nojkia moneki titlajtolmoyauasej miak. Ueliskia titlatekipanosej kej precursores auxiliares, kiampa uelis tikintlaneuisej miakej ma monechikokaj touaya. Tlaj tikinpouilisej sekinok tlen Jehová, tlen iKone uan kenijkatsa uelis tiitstosej nochipa, tlauel tiyolpakisej pampa tijmajtosej tijchijtokej tlen toTeotsij kineki (Salmo 148:12, 13).

11. ¿Kenke Pablo kiijtok sekij tlen Corinto amo kikuayayaj nopa pantsi yon kiijiyayaj nopa vino “keja kinamiki”?

¹¹ Ma timoyoliljuikaj tlen apóstol Pablo kiniljuik katli itstoyaj ne Corinto (xijpoua 1 Corintios 11:27-34). Kiijtok tlaj se akajya kikuaskia pantsi uan kiiskia vino amo “keja kinamiki”, kinextiskia amo kitlepanita Jesús “ieso uan itlakayo”. Tlaj se katli motemachia yas iluikak tlaixpanos, uan nojua kikuas pantsi uan kiiji vino, Pablo kiijtok ‘kitlatsakuiltis’ toTeotsij. Miakej katli euayayaj Corinto kichiuayayaj tlen amo kuali. Uelis miakej tlauel tlakuayayaj uan tlaiyayaj achtoui o kema moilnamikiyaya Cristo imikilis. Inijuantij kinextiyayaj amo kitlepanitayayaj nopa tonali, yeka toTeotsij amo kipaktiyaya ma kikuakaj pantsi yon ma kiikaj vino.

12. 1) ¿Ika tlake tlamantli kiixnextik Pablo nopa toTeko iTlakualis? 2) ¿Tlake kintlajtolmakak katli motemachiaj yasej iluikak? 3) Tlaj tlajtlakolchiuas katli motemachia yas iluikak, ¿tlake moneki kichiuas?

¹² Kema Pablo kiijtok ni eliskia kej kema se kintlaneui sekinok ma tlakuatij ichaj, kiniljuik: “Axueli inkiisej ipan nopa taza tlen iaxka toTeko uan nojkia inkiisej ipan nopa tazas tlen eltokej ininixtla ajakamej. Axueli inkipiasej se parte ika tlen eltok ipan imesa toTeko ipan itlakualis uan nojkia inkikuasej tlen eltok ipan ininmesa ajakamej” (1 Corintios 10:16-21). Tlaj katli motemachia yas iluikak tlauel tlaixpanos  moneki kiniljuis ueuejtlakamej (xijpoua Santiago 5:14-16). Tlaj moyolkuepas uelis kikuas pantsi uan kiijis vino, kiampa kinextis kitlepanita Jesús inemilis (Lucas 3:8).

13. ¿Kenke moneki tikiljuisej toTeotsij ma techpaleui tijmatisej kanke kineki ma tiitstokaj?

¹³ Kema nechka moilnamikis Cristo imikilis, uelis tikiljuisej toTeotsij ma techpaleui tijmatisej kanke kineki ma tiitstokaj. Tijnekij tijnextisej tijtlepanitaj Jesús inemilis. Yeka, tlaj amo tijmatij tlaj nelnelia techtlapejpenijtokej tiasej iluikak, amo tijkuaj pantsi yon tikijij vino. Uajka, ¿san ajkia inijuantij kena uelis kichiuasej?

14. ¿Tlake kichiuaj katli itstokej ipan nopa yankuik tlajtolsenkaualistli kema moilnamiki Cristo imikilis?

¹⁴ Katli kikuaj pantsi uan kiijij vino, kichijkej ininuaya se yankuik tlajtolsenkaualistli, yeka Jesús kiijtok tlen nopa vino: “Ni [...] tenextilia noeso tlen nijtoyauas para kipeualtis nopa yankuik tlajtolsenkauali” (1 Corintios 11:25). Jeremías kiijtok toTeotsij kipatlaskia nopa tlanauatili tlen kinmakatoya israeleuanij ika se yankuik tlajtolsenkaualistli (xijpoua Jeremías 31:31-34). Ni kichiua Jehová ininuaya katli kintlapejpenia (Gálatas 6:15, 16). Ni pejki moaxitia kema Cristo motemaktilik (Lucas 22:20). Jesús kichiua ma kinechkauikaj toTeotsij katli motemachiaj yasej iluikak uan ma itstokaj iuaya (Hebreos 8:6; 9:15). Pampa motemachiaj kichijkej ininuaya nopa yankuik tlajtolsenkaualistli, kema moilnamiki Cristo imikilis kikuaj nopa pantsi uan kiijij nopa vino.

15. 1) ¿Ajkia inijuantij nojkia tekichiuasej ipan toTeotsij iTlanauatijkayo? 2) ¿Tlake tlateochiualistli kiselisej tlaj amo kema kitlauelkauasej toTeotsij?

¹⁵ Nojkia motemachiaj tekichiuasej ipan toTeotsij iTlanauatijkayo (xijpoua Lucas 12:32). Ni tlajtolsenkaualistli kichijki Jesús ininuaya itokilijkauaj katli nojkia tlaijiyouijkej kej ya (Filipenses 3:10). Katli kintlapejpenijtokej ipan ni tonali, nojkia tlanauatisej nochipa ne iluikak iuaya Jesús (Apocalipsis [o Revelación] 22:5). Yeka kena kinamiki kikuasej nopa pantsi uan kiisej nopa vino.

16. Xikixtoma tlake kiijtosneki tlen kiijtoua Romanos 8:15-17.

¹⁶ Nojkia motemachiaj inijuantij toTeotsij ikoneuaj (xijpoua Romanos 8:15-17). Pablo kiijtok inijuantij kiiljuiaj toTeotsij abba, o “Papá”. Nopa abba motekiuia ika tlajtoli arameo. Ika ni kinextiyayaj kiikneliyayaj uan kitlepanitayayaj. Nojkia kinextiyayaj tlauel kuali mouikayayaj iuaya kema mochiuayayaj ‘ikoneuaj’. Itonal kinpaleuia ma kimatikaj kintlapejpenijtok toTeotsij, yeka motemachiaj toTeotsij kinita kej ikoneuaj. Ni amo kichiuaj pampa amo kinekij itstosej ipan Tlaltipaktli. Kimatij tlaj amo kema kitlauelkauasej toTeotsij, katli kintlapejpenijtokej tekichiuasej iuaya Jesús. Ipan ni tonali mokajtokej ipan Tlaltipaktli san se keskij tlen nopa 144,000 (1 Juan 2:20; Apocalipsis 14:1). Uan pampa kiyolmatij itstokej Jehová inechka kiiljuiaj “Papá”.

17. ¿Tlake uelis kiselisej katli motemachiaj yasej iluikak, uan kenke kimatij kintlapejpenijtok toTeotsij?

¹⁷ Tlaj timotemachia tias iluikak, nochipa tikiljuia Jehová nopa tlamantli. Uan kema tijpoua Biblia, tlen tijpoua ta mitsijkuiljuiliaj. Kema kiijtoua Jesús kejuak mosiuajtis iluikak iuaya “keja se kuali ichpokatl”, tijmati  ni kichiuas mouaya, yeka tijchixtok ma asi nopa tonali (2 Corintios 11:2; Juan 3:27-29; Apocalipsis 21:2, 9-14). Kema toTeotsij kiijtoua kiniknelia, tijmati ta mitsiljuijtok. Uan kema ipan Biblia tikita tlen kinnauatiaj katli yasej iluikak, tijneltoka. Uajka, toTeotsij itonal mitsmatiltia nojkia tiitstos iluikak.

18. ¿Tlake uelis kiselisej nopa “onpano miak tlakamej”, uan ni tlake mitsyololinia tijchiuas?

¹⁸ ToTeotsij kiijtoua nopa “onpano miak tlakamej”, itstosej nochipa ipan Xochimili (Apocalipsis 7:9; Juan 10:16). Tlauel mitspaktia katli Biblia kiijtoua tlen nopa Xochimili. Tijneki tiitstos ika tlayolseuilistli ininuaya nochi, ayokmo ma onka mayantli, tlaijiyouilistli, kokolistli, mikilistli yon katli amo tleno kipiaj (Salmo 37:10, 11, 29; 67:6; 72:7, 16; Isaías 33:24). Tijneki tikitas kema moyolkuisej mochampoyouaj (Juan 5:28, 29). Uan tlauel tijtlaskamatilia Jehová pampa kichiuas nopa, uan pampa motemaktilik Jesús. Yeka, maske amo tijkua nopa pantsi yon amo tikiji nopa vino, timonechikoua kema moilnamiki Cristo imikilis.

19, 20. 1) ¿Tlake moneki tijchiuasej tlaj tijnekij nochipa tiitstosej? 2) ¿Kenke nojkia tijneki timonechikos kema moilnamikis Cristo imikilis?

¹⁹ Pampa tijnekij tiitstosej nochipa, uelis iluikak o ipan Tlaltipaktli, moneki ma titlaneltokakaj ipan Jehová, ipan Jesucristo uan ipan nopa tlaxtlauili. Yeka, kema moilnamikis Cristo imikilis uelis timoyoliljuisej tlake kiijtoua toTeotsij techmakas uan kenke tlauel ipati Jesús imikilis. Ipan tonali viernes 3, mestli abril, xiuitl 2015, ipan nochi Tlaltipaktli tikilnamikisej toTeko iTlakualis kampa timosentiliaj uan ipan sekinok kali.

²⁰ Kema nechka moilnamikis Cristo imikilis, moneki ma timoyoliljuikaj kenke tlauel ipati nopa tlaxtlauili, kiampa tlauel tijtlaskamatilisej Jesús. Tlaj kuali tijtlakakilisej tlen kiixtomasej, tikiniknelisej sekinok uan tikiniljuisej tlauel techiknelia Jehová uan tlen mosentlalijtok techmakas (Mateo 22:34-40). Uajka, nochi ma timonechikokaj kema moilnamikis Cristo imikilis.