1. ¿Kenke kinamiki ma tijtlaskamatilikaj Jehová?

JEHOVÁ techmaka miak kuajkuali tlamantli (Santiago 1:17). Uan pampa ya se kuali tlamokuitlauijketl, techmaka ika tlaiknelili tlen moneki (Salmo 23:1-3). Uan kema tijpiaj kuesoli, techmokuitlauia uan techmaka chikaualistli (Salmo 46:1). Uan kema timoyoliljuiaj kenijkatsa techteochijtok, tijyolmatij kej katli kiijkuilok Salmos: “¡Ma tijtlaskamatikaj toTeko pampa yajaya nelia kuali iyolo uan iteiknelijkayo axkema tlamis ika tojuantij!”. Uan nojkia kiijtok toTeotsij nochipa kichiuas tlen kuali (Salmo 106:1). Uajka, moneki ma tijtlaskamatilikaj toTeotsij.

2, 3. 1) ¿Tlake ueliskia panos tlaj ayokmo tijtlaskamatilisej toTeotsij? 2) ¿Tlake tijnankilisej ipan ni tlamachtili?

² Uejkajkia, Biblia kiijtok ipan ni tonali maseualmej ayokmo tetlaskamatiliskiaj, uan kej nopa panotok (2 Timoteo 3:2). Miakej amo kitlaskamatiliaj Jehová tlen kinmakatok, yeka mosentlalijtokej san kikouasej miak tlamantli tlen amo kinpoloua, uan maske kipiaj miak, amo yolpaktokej. Tlaj ayokmo  tijtlaskamatilisej toTeotsij ueliskia techpanos kej israeleuanij, uelis ayokmo tijpatiitaskiaj tlen Jehová techmakatok uan ayokmo kuali timouikaskiaj iuaya (Salmo 106:7, 11-13).

³ Tlaj ayokmo tijtlaskamatiliskiaj toTeotsij, ouij tijmatiskiaj tijsenkauasej kuesoli. ¿Kenke? Pampa timosentlaliskiaj san ipan kuesoli uan amo ipan tlen techmakatok toTeotsij (Salmo 116:3). Ipan ni tlamachtili tijnankilisej ome tlajtlanili: ¿Kenijkatsa uelis nochipa tijtlaskamatilisej toTeotsij? ¿Uan tlake techpaleuis ma tijpiakaj se kuali tlalnamikilistli kema tijpiasej kuesoli?

4. ¿Kenijkatsa uelis nochipa tijtlaskamatilisej Jehová?

⁴ Tlaj tijnekij nochipa tijtlaskamatilisej Jehová, moneki ma timoyoliljuikaj tlake tlamantli techmakatok. Uan nojkia moneki ma timoyoliljuikaj kenijkatsa tlauel techiknelia ika tlen techmakatok. Ya nopa kichijki se katli nojkia tlajkuilok ipan Biblia, uan kiitak tlauel yejyektsi tlen Jehová kimakatoya (xijpoua Salmo 40:5 uan 107:43).

5. ¿Kenijkatsa uelis tijtlaskamatilisej toTeotsij kej apóstol Pablo?

⁵ Tlen kichijki Pablo techpaleuia nojkia ma tijtlaskamatilikaj toTeotsij. Ya miakpa moyoliljuiyaya tlake kimakatoya Jehová. Uan ni tijmatij, pampa kema ya momaijtouayaya nochipa kitlaskamatiliyaya Jehová. Ya kimajtoya moueyimatiyaya, mosisiniyaya, kintlaijiyouiltiyaya Cristo itokilijkauaj uan kinistlakauiyaya. Yeka, kitlaskamatiliyaya toTeotsij pampa kitlapojpoljuik uan kikajki ma kinmachti sekinok ika itlajtol (xijpoua 1 Timoteo 1:12-14). Pablo nojkia kitlaskamatilik Jehová pampa kimakatoya iikniuaj, tlen kipixtoyaj kuali ininyolo uan kuali tlajtolmoyauayayaj (Filipenses 1:3-5, 7; 1 Tesalonicenses 1:2, 3). Uan nojkia kitlaskamatiliyaya Jehová kema kipaleuiyayaj toikniuaj pampa kipiayaya kuesoli (Hechos 28:15; 2 Corintios 7:5-7). Yeka, Pablo kiniljuiyaya toikniuaj ma kitlaskamatilikaj toTeotsij uan ma moyolchikauakaj ika uikatl kema kiueyichiuaskiaj toTeotsij (Colosenses 3:15-17).

6. ¿Tlake tlamantli tijtlaskamatilia Jehová?

⁶ ¿Kenijkatsa uelis tijchiuasej kej Pablo? Tojuantij nojkia uelis timoyoliljuisej tlake techmakatok Jehová (Salmo 116:12). Ma timoyoliljuikaj: “¿Kenke kinamiki nijtlaskamatilis  toTeotsij?”. Uelis pampa kuali timouikaj iuaya o pampa motemaktilik iKone uan yeka uelis techtlapojpoljuisej. O nojkia pampa techpaleuijtokej toikniuaj kema tijpixtokej tlaouijkayotl, o pampa tijpiaj tosiua, toueue uan tokoneuaj. Uajka, ma timoyoliljuikaj kenijkatsa techpaleuijtok toTeotsij. Tlaj kiampa tijchiuasej, mojmostla tijnekisej tijtlaskamatilisej (xijpoua Salmo 92:1 uan 2).

7. 1) ¿Kenke kema timomaijtosej moneki tijtlaskamatilisej Jehová? 2) ¿Kenijkatsa uelis techpaleuis tlaj kema timomaijtosej tijtlaskamatilisej Jehová?

⁷ Kema timoyoliljuiaj ipan nochi kuajkuali tlamantli tlen tijpixtokej, tijnekij tijtlaskamatilisej Jehová kema timomaijtosej (Salmo 95:2; 100:4, 5). Maske sekij momaijtouaj san pampa kinekij kitlajtlanisej se tlenijki, ya nojkia kipaktia ma tijtlaskamatilikaj tlen tijpiaj. Biblia kiijtoua miakej, kej Ana uan Ezequías, kiampa kichijkej (1 Samuel 2:1-10; Isaías 38:9-20). Tojuantij nojkia uelis tijchiuasej kej inijuantij, uan tijtlaskamatilisej tlen techmakatok (1 Tesalonicenses 5:17, 18). Ni tlauel techyolchikauas, kichiuas tlauel ma tikiknelikaj Jehová uan kuali ma timouampojchiuakaj iuaya (Santiago 4:8).

8. ¿Tlake ueliskia kichiuas ayokmo ma tijtlaskamatilikaj toTeotsij?

⁸ Tlaj amo timomokuitlauisej nojkia ueliskia ayokmo tijpatiitasej tlen Jehová techmakatok. Ueliskia ayokmo ma tijtlaskamatilikaj pampa titlajtlakolejkej uan ya nopa techpanoltilijkej Adán uan Eva. Kema toTeotsij kichijki kinmakak nochi tlen monekiyaya uan ueliskia itstosej nochipa ika tlayolseuilistli kampa tlayejyektsi (Génesis 1:28). Inijuantij amo kipatiitakej tlen kinmakatoyaj pampa nojua kinekiyayaj sekinok tlamantli, yeka teipa kipolojkej nochi (Génesis 3:6, 7, 17-19). Nojkia ueliskia amo tijtlaskamatilisej toTeotsij, pampa tiitstokej kampa nochi amo kitlaskamatiliaj. Tlen onka ipan Tlaltipaktli ueliskia kichiuas ayokmo ma tijpatiitakaj tlen Jehová techmakatok. Ueliskia tikilkauasej yaya touampo uan nojkia tiitstokej ipan itlanechikol (1 Juan 2:15-17). ¿Tlake uelis techpaleuis amo ma techpano nopa? Tlaj timoyoliljuisej tlake techmakatok Jehová uan tlaj tijtlaskamatilisej kema timomaijtosej (xijpoua Salmo 27:4).

9. ¿Kenke moneki ma timoyoliljuikaj tlake techmakatok Jehová kema tijpiasej tlaouijkayotl?

⁹ Tlaj tijtlaskamatilisej toTeotsij techpaleuis kema tijpiasej uejueyi tlaouijkayotl. Kemantika amo tijmatij tlake tijchiuasej kema techpano tlen amo timoiljuiyayaj. Uelis se akajya kikajkayauaskia iueue o isiua, kipiaskia se kokolistli, mikiskia se tlen ichampoyouaj o kitlasojsoljuiliskia se chikauak ajakatl. Tlaj moyoliljuis tlake kimakatok Jehová, kiyolchikauas uan nopa kipaleuis kiijiyouis kuesoli. Ma tikitakaj kenijkatsa ni kinpaleuijtok se keskij.

10. ¿Kenijkatsa kipaleuijtok Irina kema kiilnamiki tlen Jehová kimakatok?

¹⁰ Irina * eua Estados Unidos, ya tlatekipanoua kej precursora regular. (Xikita nopa nota.) Iueue, katli eliyaya ueuejtlakatl, kikajkayajki uan kikajki iuaya ikoneuaj. ¿Tlake  kipaleuia amo kema ma kitlauelkaua Jehová? Ya kiijtoua: “Nijtlaskamatilia Jehová pampa nechmokuitlauia uan kitekipachoua tlen nechpano. Kema mojmostla nimoyoliljuia kenijkatsa nechteochiua, nikita nijpia se noTata katli nechixmati uan nechmanauia. Nijmati ya amo kema nechtlauelkauas”. Irina yolpaki maske kipanotok uejueyi tlaouijkayotl, nopa kipaleuijtok kiijiyouis nochi uan ma kinyolchikaua sekinok.

11. ¿Tlake kipaleuijtok Kyung-sook kiijiyouis se ueyi kokolistli?

¹¹ Tosiuaikni Kyung-sook eua Asia. Ya tlatekipanojtok kej precursora iuaya iueue kipano 20 xiuitl. Kiiljuijkej kipixtoya kokolistli cáncer de pulmón, uan tlauel kitlanauijtoya, uan itstoskia san eyi o chikuasej mestli. Maske kinpanotoya sekinok tlaouijkayotl, amo kema kipixtoyaj se kokolistli. Ya kiijtoua: “Tlauel nechyolkokok kema nechiljuijkej nijpixtoya se kokolistli. Nimoiljuik nochi polijtoya uan tlauel nimajmajki”. ¿Tlake kipaleuik? Ya kiijtoua: “Mojmostla, kema ayamo nikochi, nitlejko kalpani uan nopaya nimomaijtoua. Uajka nijtlaskamatilia toTeotsij ika nochi noyolo makuili kuajkuali tlamantli tlen nechpanok ipan nopa tonali”. Nopa kiyolchikaua uan kipaleuia kinextis kenijkatsa kiiknelia Jehová. Ya kiijtoua pampa momaijtoua kiitstok kenijkatsa Jehová nochipa techpaleuia kema tijpiaj tlaouijkayotl, uan maske tijpiaj kuesoli, nochipa tijpiaj tlauel miak tlateochiualistli.

12. ¿Tlake kipaleuik Jason kema mijki isiua?

¹² Jason, katli tekiti ipan kali Betel ne África, ya kipano 30 xiuitl kitekipanoua miak toTeotsij. Kipia chikome xiuitl mijki isiua pampa kipixtoya cáncer. Tlauel kiyolkokouayaya kema kiilnamikiyaya kenijkatsa tlaijiyouik. ¿Tlake kipaleuik kiijiyouis nopa? Ya kiijtoua se tonali kiilnamijki kenijkatsa tlauel yolpajkej ika tlen kinpanok. Nopa kiyolchikajki, yeka pejki kitlaskamatilia Jehová nopa yejyektsi tlamantli tlen panok iuaya isiua. Ni kipaleuijtok kipias se kuali tlalnamikilistli. Maske nojua moyolkokoua pampa ayokmo itstok isiua, nama kuali kiyolmati. Kipaleuijtok kitlaskamatilis miak Jehová pampa kipixtoya isiua uan pampa tlatekipanok iuaya isiua katli tlauel kiikneliyaya Jehová.

13. ¿Tlake kipaleuik Sheryl amo tlauel ma moyolkoko?

 ¹³ Ipan itlamia xiuitl 2013, kema Sheryl kipixtoya 13 xiuitl, ipan altepetl Filipinas kintlasojsoljuilik se chikauak ajakatl. Nechka kipolok nochi tlen kipixtoya. Ya kiijtoua: “Tlanki nochaj uan mijkej nechka nochi nochampoyouaj”. Mijkej itatauaj uan eyij iikniuaj. ¿Tlake kipaleuia Sheryl amo tlauel moyolkokos? Ya kiilnamiki nochi kuajkuali tlamantli tlen kipia, uan nopa kipaleuia kitlaskamatilis toTeotsij. Ya kiitak kenijkatsa toikniuaj kinpaleuijkej uan kinyolchikajkej nochi. Uan kimatiyaya kampa ueli toikniuaj kitlajtlaniyayaj toTeotsij ma kinpaleui. Yeka kiijtok: “Nijtlaskamatilia Jehová pampa nechpaleuia. Ya nochipa techmaka tlen moneki”. Tlaj nochipa tijtlaskamatilisej toTeotsij nopa kuajkuali tlamantli tlen tijpiaj, amo timoyolkokosej uan nojkia techpaleuis ma tikijiyouikaj nochi tlaouijkayotl tlen tijpiasej (Efesios 5:20; xijpoua Filipenses 4:6 uan 7).

14. ¿Ipan tlake kiijtoua toTeotsij ma timotemachikaj? (Xikita nopa achtoui tlaixkopinkayotl.)

¹⁴ Jehová itekipanojkauaj nochipa kitlaskamatilijtokej pampa kinpaleuijtok. Kema kinmanauik israeleuanij tlen faraón ipan ueyi atl Rojo, inijuantij kitlaskamatilijkej ika uikatl (Éxodo 15:1-21). Ipan ni tonali, toTeotsij techiljuia ma timotemachikaj nechka kitlamiltis nochi tlen kichiua ma titlaijiyouikaj (Salmo 37:9-11; Isaías 25:8; 33:24). Ma timoiljuikaj kenijkatsa tijyolmatisej kema Jehová kintsontlamiltis nochi ikualankaitakauaj uan kichiuas ma tiitstokaj kampa onkas tlayolseuilistli uan mochiuas san tlen xitlauak. Yeka, ¡tlauel tijnekij tijtlaskamatilisej Jehová! (Apocalipsis [o Revelación] 20:1-3; 21:3, 4.)

15. ¿Tlake tijnekij tijchiuasej ipan xiuitl 2015?

¹⁵ Timotemachiaj Jehová tlauel techteochiuas ipan xiuitl 2015. Maske uelis nojkia tijpiasej tlaouijkayotl, tijmatij Jehová amo kema techtlauelkauas (Deuteronomio 31:8; Salmo 9:9, 10). Ya nochipa techmakas nochi tlen monekis uan kiampa nochipa tijtekipanosej. Yeka moneki nojkia tijchiuasej kej Habacuc. Ya kiijtok maske amo kipiaskia miak tlakualistli uan kipiaskia uejueyi kuesoli, yolpakiskia pampa kipaleuiskia Jehová (Habacuc 3:17, 18). Ma timoyoliljuikaj ipan tlen techmakatok toTeotsij uan ma tijchiuakaj tlen techtlajtolmaka nopa texto tlen xiuitl 2015: “Ma tijtlaskamatikaj toTeko pampa yajaya nelia kuali iyolo” (Salmo 106:1).