¿Uelis se tlakatl uan se siuatl nochipa moiknelisej?
“Tlaiknelijkayotl eltok keja se tlitl tlen kauani ixochiyo pampa tlauel tlatla.” (EL CANTAR DE LOS CANTARES 8:6)
1, 2. ¿Ajkia inijuantij uelis kiyekosej miak ipan El Cantar de los Cantares, uan kenke? (Xikita nopa achtoui tlaixkopinkayotl.)
SE TELPOKATL uan se ichpokatl moixtlachiliaj uan moixuetskiliaj. Nesi tlauel moikneliaj. Nopa toikni katli kiixtonki nopa tlamachtili kema mosenkajkej kintlachilia uan moiljuia tlaj nochipa moiknelijtosej. Kema se tlakatl uan se siuatl nelnelia moikneliaj, nochipa itstokej sansejko maske kipiaj uejueyi kuesoli, uan miakej kema kinpano nopa, mokauaj. Yeka miakej moiljuiaj tlaj uelis nochipa moiknelijtosej.
2 Kema itstoya Salomón, katli tlanauatiyaya altepetl Israel, maseualmej amo nelnelia moikneliyayaj. ¿Kenke? Ipan Eclesiastés 7:26-29, Salomón kiijtok amo itstoyaj miakej katli kipixtoyaj kuali ininyolo. Ya kiijtok maske toTeotsij kinchijtoya kuali maseualmej, inijuantij pejkej kichiuaj tlen amo kuali. Ipan nopa tonali nopaya itstoyaj siuamej katli euayayaj ipan sekinok altepemej. Inijuantij kiueyichiuayayaj ininteotsij Baal uan momekatiyayaj. Yeka miakej tlakamej uan siuamej tlen eliyayaj israeleuanij nojkia pejkej kichiuaj nopa. * (Xikita nopa nota.) Uan kema poliuiyaya 20 xiuitl kema kiijkuiloskia pilamochtsi Eclesiastés, Salomón kiijkuilok se uikatl tlen se tlakatl uan se siuatl katli tlauel moikneliyayaj. Ni uikatl El Cantar de los Cantares nojkia se pilamochtsi tlen uala ipan Biblia. Katli kipiaj ininsiua, ininueue o katli itstokej ininselti uelis kiyekosej miak tlamantli ipan ni pilamochtsi. ¿Kenke? Pampa techpaleuia tijmatisej kenijkatsa uelis nelnelia timoiknelisej.
¿NELNELIA UELIS MOIKNELISEJ SE TLAKATL UAN SE SIUATL?
3. ¿Kenke se tlakatl uan se siuatl uelis nelnelia moiknelisej?
3 (Xijpoua El Cantar de los Cantares 8:6.) Biblia kiijtoua nopa tlaiknelili eliskia kejuak “se tlitl” tlen Jehová. ¿Kenke? Pampa Jehová tlauel teiknelia. Se tlakatl uan se siuatl kena uelis nelnelia moiknelisej, pampa kema toTeotsij kinchijki maseualmej, kinchijki ma uelikaj teiknelikaj (Génesis 1:26, 27). Teipa, kema Jehová ya kichijtoya nopa achtoui tlakatl, kimakak isiua. Uan kema Adán kiitak Eva, tlauel yolpajki, yeka kinextik tlauel kiikneliyaya uan Eva nojkia kinextik nopa, pampa toTeotsij kichijki tlen se Adán ielchikiomiyo (Génesis 2:21-23).
4, 5. ¿Tlake techpouilia pilamochtsi El Cantar de los Cantares?
4 Nopa pilamochtsi El Cantar de los Cantares kuali kinextia kenijkatsa se tlakatl uan se siuatl uelis moiknelisej. Ni pilamochtsi kiijtoua tlen se telpokatl tlapialmokuitlauijketl uan se yejyektsi ichpokatl tlen euayaya Sunem, o Sulem. Nopa ichpokatl tekitiyaya ipan iikniuaj ininmil, katli mokauayaya nechka kampa itstoya Salomón uan itlateuijkauaj. Kema Salomón kiixmatki tlatitlanki ma kinotsakaj. Uan maske kiiljuik tlauel yejyektsi eliyaya uan kinejki kitlamajmakas miak, ya kiiljuik kiixtokayaya nopa tlapialmokuitlauijketl uan san iuaya kinekiyaya itstos (El Cantar de los Cantares 1:4-14). Nopa telpokatl kitemoto nopa ichpokatl, uan kema mopantijkej, moiljuijkej tlauel moikneliyayaj ika yejyektsitsij tlajtoli (El Cantar de los Cantares 1:15-17).
5 Uajka, Salomón sampa yajki Jerusalén uan kikuito nopa ichpokatl. Uan nopa telpokatl kintokilijtiajki (El Cantar de los Cantares 4:1-5, 8, 9). Maske Salomón kitemolik ayokmo ma kiikneli nopa tlapialmokuitlauijketl, amo uelki kichijki (El Cantar de los Cantares 6:4-7; 7:1-10). Yeka kikajki sampa ma yaui ichaj. Teipa, nopa ichpokatl kinotski nopa telpokatl uan kiiljuik ma motlalojtia kampa ya “keja se ueyi masatl” (El Cantar de los Cantares 8:14).
6. ¿Kenke ouij se kimatis ajkia kamanaltiyaya ipan nopa pilamochtsi El Cantar de los Cantares?
6 Tlen kiijkuilok Salomón kiiljuiaj “uikatl tlen más yejyektsi” (El Cantar de los Cantares 1:1). Ya kinekiyaya tlauel ma pankisa nopa yejyektsitsij tlajtoli tlen kiijtoua nopa uikatl, yeka amo kiijtoua inintoka katli kamanaltiyayaj. Yeka kemantika ouij se kimatis ajkia kamanaltiyaya. Maske amo kiijtoua inintoka, ika tlen kiijtouaj se uelis kimatis ajkia kamanalti. * (Xikita nopa nota.)
XIJNEXTI TLEN TIJYOLMATI
7, 8. Xikijto kenijkatsa nopa tlapialmokuitlauijketl uan nopa ichpokatl kinextijkej moikneliyayaj.
7 Nopa ichpokatl uan nopa tlapialmokuitlauijketl moiljuijkej yejyektsitsij tlajtoli. Tlen moiljuiyayaj amo tijtekiuiskiaj ipan ni tonali pampa kiijkuilojkej kipano 3,000 xiuitl (El Cantar de los Cantares 1:2). Uan maske amo itstoyaj kej tojuantij, techpaleuia tijmatisej kenijkatsa tlauel moikneliyayaj. Nopa telpokatl kiijtok nopa ichpokatl iixteyoljuaj eliyayaj kejuak “omej pilpalomajtsitsij”. Ika nopa kiiljuik tlauel yejyektsi tlachiayaya (El Cantar de los Cantares 1:15). Uan nopa ichpokatl nojkia kej nopa kiiljuik (xijpoua El Cantar de los Cantares 5:12). Uan nopa ichpokatl kiitayaya nopa telpokatl iixteyoljuaj pankisayayaj kampa tlachipauak kejuak yayauikej palomas katli maltiaj ipan leche.
8 Nopa tlapialmokuitlauijketl uan nopa ichpokatl amo moikneliyayaj san pampa kuali nesiyayaj. Nopa telpokatl kipaktiyaya kej nopa ichpokatl kinnojnotsayaya sekinok (xijpoua El Cantar de los Cantares 4:7 uan 11). Yeka kiiljuik: “Motenxipal nelia tsopelik keja nektli. Uan tlatsintla tlen monenepil kisa nektli uan lechi”. Tlen kiiljuiyaya kiitayaya kejuak eliskia leche uan nektli. Uan nojkia kiiljuik: “Nelia tiyejyektsi, ta tlen nimitsiknelia. [...] Axonka niyon se tlamantli tlen axkuali ipan ta”. Ni tlajtoli kinextia nopa tlapialmokuitlauijketl kipaktiyaya tlen kinextiyaya nopa ichpokatl ipan inemilis uan amo san pampa yejyektsi eliyaya.
Se tlakatl iuaya isiua kinextiaj moikneliaj ika tlen moiljuiaj uan ika tlen kichiuaj
9. 1) ¿Kenijkatsa katli mosenkajtokej kinextiaj nelnelia moikneliaj? 2) ¿Kenke tlauel moneki ma kinextikaj moikneliaj?
9 Katli kitekipanouaj toTeotsij uan mosenkajtokej nelnelia moikneliaj uan kinextiaj. ¿Kenijkatsa kinextiaj? Moikneliaj kej Biblia kiijtoua ma tikiniknelikaj sekinok (1 Juan 4:8). Nojkia moikneliaj kej kinikneliaj ininchampoyouaj uan kej kinikneliaj ininuampoyouaj (Juan 11:3). Uan nojkia moikneliaj pampa moixtokaj (Proverbios 5:15-20). Maske tlauel motekiuijtosej, tlauel moneki kiampa ma moiknelikaj. ¿Kenke? Pampa kema katli mosenkajtokej monextiliaj uan moiljuiaj kenijkatsa tlauel moikneliaj, kuali mosentikapaleuiaj. Ni kichiua ma yolpakikaj. Ipan sekij altepemej, tetajmej kintlapejpeniaj katli mosenkauasej ininuaya ininkoneuaj. Kema kiampa mosenkauaj, moneki kinextisej moikneliaj kema nojua moixmajtiauij. Kiampa tlauel moiknelijtiasej uan kuali mouikasej.
10. ¿Kenijkatsa nojkia kinpaleuia katli mosenkajtokej kema nochipa monextiliaj moikneliaj?
10 Kema katli mosenkajtokej nochipa monextiliaj kenijkatsa moikneliaj, nojkia kichiua kuali ma itstokaj. Nopa pilamochtsi El Cantar de los Cantares kiijtoua Salomón kinekiyaya kimakas nopa ichpokatl tlamantli tlen kichijtoyaj ika oro uan ika plata. Uan nojkia kiiljuik eliyaya “yejyektsi keja nopa mestli” uan “ualpetlani keja [...] tonati” (El Cantar de los Cantares 1:9-11; 6:10). Uan pampa ya kiikneliyaya nopa tlapialmokuitlauijketl, amo kitlauelkajki kema amo itstoyaj sansejko (xijpoua El Cantar de los Cantares 1:2 uan 3). Ya kiilnamijki tlauel kipaktiyaya tlen nopa telpokatl kiiljuiyaya, yeka kiijtok eliyaya tlauel kuajkuali uan amo kej nopa “xokomekaatl”. Kema amo itstoya iuaya, tlen kiiljuiyaya kiyoltlaliyaya (Salmo 23:5; 104:15). ¿Tlake kinmachtia ni katli mosenkajtokej? Tlaj kiilnamikisej kema moiljuiaj kenijkatsa moikneliaj, kinpaleuis amo kema motlauelkauasej. Uajka, tlaj nochipa monextilisej kenijkatsa moikneliaj, tlauel moiknelisej uan tlauel kuali itstosej.
AMO NIMANTSI XIMOSIUAJTI O XIMONAMIKTI
11. ¿Tlake techmachtia tlen nopa ichpokatl kiniljuik nopa siuamej katli itstoyaj ipan Salomón ichaj?
11 Katli kinekij mosenkauasej se tonali, tlauel kinpaleuia tlen kiijtoua El Cantar de los Cantares kichijki nopa ichpokatl. Ya amo kiixtokayaya Salomón, yeka kiniljuik nopa siuamej katli itstoyaj ipan Salomón ichaj: “Xijkauakaj ma kochi [nopa tlaiknelili] hasta kema yajaya kinekis isas” (El Cantar de los Cantares 2:7; 3:5). ¿Tlake techmachtia ni tlajtoli? Amo kinamiki peuas tikixtokasej se katli ueli maseuali. Tlaj amo timoisiuiltisej uelis timosenkauasej iuaya se katli kinamiki.
Tlaj amo timoisiuiltisej, uelis timosenkauasej iuaya se katli kinamiki
12. ¿Kenke nopa ichpokatl tlauel kiikneliyaya nopa tlapialmokuitlauijketl?
12 ¿Kenke nopa ichpokatl tlauel kiikneliyaya nopa tlapialmokuitlauijketl? Ya kiijtok eliyaya tlauel yejyektsi kej “se okichmasatl”, ima eliyayaj tejtetikej kejuak “tepostli tlen oro” uan imetsuaj eliyayaj tejtetikej kejuak “tlaketsali tlen mármol”. Uan nopa ichpokatl nojkia kimatiyaya nopa telpokatl kiikneliyaya Jehová uan kinextiyaya kuajkuali tlamantli ipan inemilis. Yeka, nopa ichpokatl tlauel kipatiitayaya kejuak eliskia “kej se manzanakuauitl tlen mopantia ininuaya sekinok kuatinij” (El Cantar de los Cantares 2:3, 9; 5:14, 15).
13. ¿Kenke nopa tlapialmokuitlauijketl tlauel kiikneliyaya nopa ichpokatl?
13 Nopa ichpokatl nojkia eliyaya tlauel yejyektsi. Yeka, Salomón nojkia kiixtokak maske ya kinpixtoya ‘60 siuatlanauatianij, 80 iompasiuajuaj uan tlauel miak ichpokamej’. ¿Nopa tlapialmokuitlauijketl kiikneliyaya nopa ichpokatl san pampa tlauel yejyektsi eliyaya? Amo. Ya kiikneliyaya Jehová, kinextiyaya kuajkuali tlamantli ipan inemilis uan amo moueyimatiyaya, yeka kiijtok eliyaya kejuak se “xochitl tlen Sarón”. Uan nopa telpokatl tlauel kipatiitayaya kejuak eliskia se “xochitl lirio tlen mopantia kampa uitstli” (El Cantar de los Cantares 2:1, 2; 6:8).
14. ¿Tlake kinmachtia katli kinekij mosiuajtisej o monamiktisej tlen kichijki nopa tlapialmokuitlauijketl uan nopa ichpokatl?
14 Jehová kineki itekipanojkauaj ma ‘monamiktikaj ika se tlen nojkia kineltoka toTeko’ (1 Corintios 7:39). Yeka, moneki tikixtokasej uan timosenkauasej san iuaya se tlen Jehová itlajtoltemakauaj katli moatsonpoliuiltijtok. ¿Kenke? Pampa nopa tlakatl uan nopa siuatl kipiasej kuesoli. Tlaj kuali mouikasej iuaya Jehová, nochipa yolpaktosej. Yeka, tlaj teipa tijnekis timosiuajtis o timonamiktis, nojkia xijchiua kej nopa tlapialmokuitlauijketl uan nopa ichpokatl tlen kiijtoua ipan El Cantar de los Cantares. Xijtemo se akajya katli kinextia kuajkuali tlamantli ipan inemilis uan katli nojkia kiiknelia Jehová.
Moneki tikixtokasej uan timosenkauasej san iuaya se tlen Jehová itlajtoltemakauaj katli moatsonpoliuiltijtok (Xikita párrafo 14)
XIMOCHIUA “KEJA SE XOCHIMILI TLEN KUALI TLATSAKTLI”
15. ¿Tlake kinmachtia katli mosenkauasej tlen kichijki nopa ichpokatl?
15 (Xijpoua El Cantar de los Cantares 4:12.) Nopa tlapialmokuitlauijketl kiijtok nopa ichpokatl eliyaya kejuak “se xochimili tlen kuali tlatsaktli” kampa amo nochi ueliskiaj panosej. ¿Kenke? Pampa nopa ichpokatl san ya kiikneliyaya. Uan pampa monamiktiskia iuaya, amo kitlauelkajki uan amo kinejki kiixtokas Salomón. Ya eliyaya kejuak se tepamitl, uan amo kejuak se kaltemitl tlen nimantsi kitlapouayayaj (El Cantar de los Cantares 8:8-10). Yeka, katli mosenkauasej moneki amo mokajkayauasej uan amo kinamiki ma kiixtokakaj seyok.
16. ¿Tlake kinmachtia katli mosenkauasej tlen kiijtoua El Cantar de los Cantares?
16 Nopa tlapialmokuitlauijketl kitlanejki nopa ichpokatl ma yakaj paxalotij, uan iikniuaj amo kikajkej ma yaui iuaya, yeka kinauatijkej ma kimokuitlauiti ininmil. Ni amo kichijkej pampa amo motemachiyayaj ipan ya, yon pampa moiljuiyayaj ya uan nopa telpokatl kinekiyayaj momekatisej. Iikniuaj kinekiyayaj kimokuitlauisej uan kiampa amo tlaixpanoskia (El Cantar de los Cantares 1:6; 2:10-15). Ipan ni tonali, katli mosenkauasej moneki amo kichiuasej tlen amo kinamiki, yon tlen ueliskia kichiuas ma kiixpanokaj Jehová itlanauatiljuaj. Moneki moiljuisej tlake kena uelis kichiuasej uan moneki amo kema itstosej ininselti kampa amo aka uelis kinitas. Uan kema monextilisej kenijkatsa moikneliaj, moneki kichiuasej san kej kinamiki.
17, 18. ¿Kenijkatsa mitspaleuik tlen timomachtijkej ipan El Cantar de los Cantares?
17 Jehová kineki nopa tlakatl iuaya isiua ma moiknelikaj uan nochipa ma itstokaj sansejko. Maske moikneliaj kema mosenkauaj, moneki nochipa tlauel ma moiknelikaj, uan kiampa maske panos miak xiuitl, nojua moiknelijtosej kejuak se tlitl tlen amo kema seui (Marcos 10:6-9).
18 Tlaj tijneki timosiuajtis o timonamiktis, xijtemo se akajya katli nelnelia uelis mitsiknelis. Uan kema tijpantis, xijchiuakaj kampeka nochipa tlauel inmoiknelisej. Kej tikitakej ipan El Cantar de los Cantares, se tlakatl uan se siuatl kena uelis nelnelia moiknelisej nochipa. Nopa tlaiknelili eliskia kejuak “se tlitl” tlen Jehová (El Cantar de los Cantares 8:6).
