1. ¿Kenke nojua tijnechkauisej Jehová tlaj tijchiuasej kej Jesús?

KEMA techpaktia tlen kichiua se akajya tijnekij tijchiuasej kej ya. Tlaj tijchiuasej kej Jesús tlauel techpaleuis, pampa ya kiijtok: “Yajaya tlen nechitstok, ya kiitstok noTata” (Juan 14:9). Ya kiijtok ni pampa kichiua kej Jehová. Kema tijmatij tlen kichiua Jesús, nojkia tijmatij tlen Jehová kichiua. Tlaj tijchiuaj kej Jesús nojua tijnechkauiaj Jehová. ¡Nelia se ueyi tlateochiualistli!

2, 3. 1) ¿Kenke Biblia kiijtoua miak tlamantli tlen Jesús kichijki? 2) ¿Tlake tikixtomasej ipan ni uan ipan nopa seyok tlamachtili?

² Biblia kiijtoua miak tlamantli tlen kichijki Jesús, pampa Jehová kineki kuali ma tikixmatikaj uan ma tijchiuakaj kej ya (xijpoua 1 Pedro 2:21). Maske Biblia kiijtoua ma tijchiuakaj nochi kej Jesús, Jehová amo techiljuia ma tijchiuakaj nochi xitlauak pampa ya eliyaya amo tlajtlakole uan tojuantij kena. Jehová kineki ma tijchiuakaj se ueyi kampeka tijchiuasej kej Jesús.

 ³ Ma tikitakaj se keski kuajkuali tlamantli tlen nojkia uelis tijnextisej. Ipan ni tlamachtili tikitasej Jesús amo moueyimati uan kiyolkokoua tlen kinpano sekinok. Uan ipan nopa seyok tikitasej amo majmaui uan kipia kuali tlalnamikilistli. Yeka tijnankilisej ni: ¿Tlake kiijtosneki? ¿Kenijkatsa kinextik Jesús? Uan, ¿kenijkatsa uelis tijnextisej tojuantij?

4. ¿Kenijkatsa uelis tijnextisej amo timoueyimatij?

⁴ ¿Nelia katli amo moueyimatij amo kipiaj chikaualistli uan amo kimatij tlake kichiuasej? Amo, pampa katli amo kinekij moueyimatisej moneki kipiasej chikaualistli uan amo majmauisej. Nojkia moneki kiitasej kej kinamiki tlen kichiuaj. Se amochtli kiijtoua se akajya katli amo moueyimati kimajtok kenijkatsa tlauel pilsiltsi toTeotsij iixpa. Uan amo timoiljuisej san tojuantij kena tijchiuaj nochi kuali (Rom. 12:3; Filip. 2:3). Kemantika tijmatij ouij pampa titlajtlakolejkej. Tlaj amo tijnekij timoueyimatisej, moneki timoyoliljuisej kenijkatsa Jehová tlauel ueyi uan kenijkatsa kinextik Jesús.

5, 6. 1) ¿Ajkia eliyaya Miguel? 2) ¿Kenijkatsa kinextik Miguel amo moueyimatiyaya?

⁵ Jesús amo kema moueyimatki maske eliyaya se iluikaejketl uan kipiayaya miak chikaualistli, uan nojkia kema itstoya ipan Tlaltipaktli kej se maseuali tlen amo tlajtlakole. Ma tikitakaj kenijkatsa kinextik.

⁶ Jesús kinextik amo moueyimatiyaya ika itlalnamikilis. Ne iluikak kinyakanayaya iluikaeuanij, yeka Biblia kitokaxtia Miguel. Nopa pilamochtsi Judas kiijtoua Miguel uan Satanás mokualanijkej (xijpoua Judas 9). ¿Kenke? Pampa Jehová kitlalpachok Moisés kampa amo aka ueliskia kipantis (Deut. 34:5, 6). Uan Satanás kinekiyaya kiuikas itlakayo uelis pampa kinekiyaya israeleuanij ma kiueyichiuakaj. Se amochtli kiijtoua uelis Jesús kiiljuik Satanás amo kinamikiyaya kiuikas Moisés itlakayo. Maske Jesús kitsakuilik Satanás, kimatiyaya amo kipixtoya miak tlanauatili. Yeka kikajki Jehová ma kitlajtolsenkaua pampa san ya kinamikiyaya kichiuas.

7. ¿Kenijkatsa kinextik Jesús amo moueyimatiyaya kej kinnojnotsayaya sekinok uan ika tlen kichijki?

⁷ Kej Jesús kinnojnotsayaya sekinok kinextik amo moueyimatiyaya. Amo kema kinejki ya ma kiueyichiuakaj pampa san Jehová kinamiki tijueyichiuasej (Mar. 10:17, 18; Juan 7:16). Amo kema kiniljuik itokilijkauaj tlen ika kinpinaualtik yon kiniljuik amo tleno ininpati. Kintlepanitayaya uan kintlaskamatiliyaya kema kinextiyayaj kuajkuali tlamantli, kiampa kinextik motemachiyaya ipan inijuantij (Luc. 22:31, 32; Juan 1:47). Ika tlen kichijki nojkia kinextik amo moueyimatiyaya. Mopanoltiyaya san ika se keski tlamantli uan amo tlapijpixtoya miak (Mat. 8:20). Kichijki tekitl tlen amo aka kinekiyaya kichiuas (Juan 13:3-15). Uan nochipa tlaneltokak (xijpoua  Filipenses 2:5-8). Katli moueyimatij amo kinpaktia kinneltokasej sekinok. Uan Jesús amo moueyimatki, nochipa kineltokak Jehová uan kikajki ma kimiktikaj. Ni kuali kinextia Jesús ‘amo moueyimati’ (Mat. 11:29).

8, 9. ¿Kenijkatsa uelis tijnextisej amo timoueyimatij?

⁸ ¿Kenijkatsa uelis nojkia amo timoueyimatisej? Moneki tijmajtosej amo kinamiki tikinnauatisej sekinok yon tikijtosej amo kuali tlen kichiuaj. Yeka amo tikinijilnamikij (Luc. 6:37; Sant. 4:12). Amo timoiljuiaj tlauel topati pampa tijmatij miak o tijpiaj se kuali tekitl ipan tlanechikoli (Ecl. 7:16). Ueuejtlakamej amo kiijtouaj inijuantij tlauel ininpati uan sekinok amo, yeka moiljuiaj sekinok kena tlauel ininpati (Filip. 2:3; Luc. 9:48).

⁹ Ipan 1894 Walter Thorn pejki tlatekipanoua kej se katli tepaxaloua chijchikuasej mestli. Teipa, kiiljuijkej ma kinmokuitlauiti piyomej ne Nueva York. Kema moiljuiyaya kinamikiyaya kichijtos se tekitl tlen kena ipati, iselti moiljuiyaya: “Ta san titlaltejpoktli, ¿kenke kiampa timoiljuia?” (xijpoua Isaías 40:12-15). ¡Nelia amo moueyimatiyaya!

10. ¿Kenijkatsa ika tlen tikijtouaj uan ika tlen tijchiuaj tijnextiaj amo timoueyimatij?

¹⁰ Ika tlen tikijtouaj nojkia tijnextiaj amo timoueyimatij (Luc. 6:45). Kema timonojnotsaj ininuaya sekinok amo tikiniljuiaj san tlen tojuantij kuali tijchijtokej (Prov. 27:2). Yeka tikiniljuiaj kema kichiuaj tlen kuali uan kema kinextiaj kuajkuali tlamantli (Prov. 15:23). Ika tlen tijchiuaj nojkia tijnextiaj amo timoueyimatij. Amo tijnekij tlauel tipankisasej. Yeka, amo titlapijpiaj miak uan tijchiuaj tlen ueli tekitl, uan kiampa uelis tlauel tijtekipanosej Jehová (1 Tim. 6:6, 8). Uan kema tikinneltokaj ueuejtlakamej uan tlen technauatiaj ipan tlanechikoli nojkia tijnextiaj amo timoueyimatij (Heb. 13:17).

11. ¿Kenijkatsa tijnextiaj techyolkokoua tlen kinpano sekinok?

¹¹ Tlaj techyolkokos tlen kinpano sekinok techtekipachos, tikiniknelisej uan tijnekisej tikinpaleuisej. Biblia kiijtoua Jehová uan Jesús kinextiaj “teiknelijkayotl” uan ‘techtlasojtlaj miak’ (Luc. 1:78; 2 Cor. 1:3; Filip. 1:8). Ipan se amochtli kiijtoua kema techyolkokoua tlen kinpano sekinok tikinpaleuiaj uan amo san tikijtouaj teikneltsitsij. Yeka, ika tlen tijchiuaj tikinpaleuiaj kuali ma itstokaj.

12. ¿Kenijkatsa kinextik Jesús kiyolkokoua tlen kinpano sekinok ika tlen kiyolmatiyaya uan ika tlen kichijki?

¹² ¿Kenijkatsa kinextik Jesús kiyolkokoua tlen kinpano sekinok? Ma tikitakaj eyi. Se. Ika tlen kiyolmatiyaya. Kema kiitak María uan sekinok kichokiliyayaj Lázaro, ya nojkia mochokilik (xijpoua Juan 11:32-35). Ome. Ika tlen kichijki, yeka kiyolkuik se siuatl ikone uan  nojkia Lázaro (Luc. 7:11-15; Juan 11:38-44). Kiampa Lázaro teipa nojkia ueliskia itstos iluikak. Uan kema miakej yajkej kiitatoj Jesús, Biblia kiijtoua pampa kiyolkokok tlen kinpanoyaya “pejki kinmachtia miak tlamantli” (Mar. 6:34). Uajka, ni kinextia Jesús kiyolkokok tlen kinpanoyaya sekinok uan kinpaleuik (Mat. 15:32-38; 20:29-34; Mar. 1:40-42).

13. ¿Kenijkatsa ika tlen kiijtok Jesús kinextik kitekipachoua tlen kinpano sekinok? (Xikita nopa achtoui tlaixkopinkayotl.)

¹³ Eyi. Ika tlen kiijtok nojkia kinextik kiyolkokouayaya tlen kinpano sekinok. Yeka, katli tlaijiyouijtoyaj kinnojnotski ika tlaiknelili pampa sekinok kinchiuilijtoyaj tlen amo kuali. Mateo kitekiuik tlen Isaías kiijkuilok tlen Jesús, kema kiijtok: “Axkitlaijiyouiltis tlen ayok kipia fuerza uan tlen ya kineki mikis. ¡Kiyolchikauas! Axkiseuis se tlitl tlen pilkentsi lementok” (Is. 42:3; Mat. 12:20). Ni kinextia Jesús amo kema techiuilik tlen amo kuali. Kema kamanaltiyaya, kuali kiyolmatiyayaj sekinok. Uan nojkia kinmachtik “tlen tlauel moyolkuesouaj” (Is. 61:1). Kinyolchikajki katli tlaijiyouiyayaj (Mat. 11:28-30). Kiniljuik Jehová kitekipachoua tlen kinpano itokilijkauaj, uan katli sekinok amo kinpatiitayayaj (Mat. 18:12-14; Luc. 12:6, 7).

14. ¿Kenijkatsa uelis tijnextisej techyolkokoua tlen kipano sekinok ika tlen tijyolmatij?

¹⁴ Ika tlen tijyolmatij tijnextiaj nojkia techyolkokoua tlen kipano sekinok. Maske ouij, Biblia kiijtoua moneki tijchiuasej kampeka tijnextisej tikinikneliaj sekinok. Ni moneki nochi tijnextisej (xijpoua Colosenses 3:9, 10 uan 12). ¿Kenijkatsa uelis tijchiuasej? Biblia kiijtoua ma tikiniljuikaj sekinok tikinikneliaj (2 Cor. 6:11-13). Kema se akajya techiljuis tlen kiyolmati uan tlen kitekipachoua moneki kuali tijtlakakilisej (Sant. 1:19). Uan ma timotlajtlanikaj: “Tlaj na nechpanoskia nopa, ¿tlake nijyolmatiskia? ¿Kenijkatsa monekiskia ma nechpaleuikaj?” (1 Ped. 3:8).

15. ¿Kenijkatsa uelis tikinpaleuisej katli tlaijiyouiaj o katli mijki se tlen ininchampoyouaj?

¹⁵ Ika tlen tijchiuaj nojkia tijnextiaj techyolkokoua tlen kinpano sekinok. Ni techyololinia tikinpaleuisej katli  tlaijiyouiaj o katli mijki se tlen ininchampoyouaj. Romanos 12:15 kiijtoua: “Xichokakaj ininuaya tlen chokaj”. Uajka, maseualmej kinekij ma tikinyolchikauakaj, amo ma tikiniljuikaj kenijkatsa kisenkauasej kuesoli tlen kipiaj. Kinekij ma techtekipacho tlen kinpano uan ma tikintlakakilikaj. Se tosiuaikni katli kiyolchikajkej kema mijki isiuapil, kiijtok: “Nikintlaskamatilik miak pampa ualajkej nochaj uan chokakej nouaya”. ¿Kenijkatsa nojkia uelis tikinpaleuisej? Katli ayokmo itstok iueue uelis kineki ma kikualchijchiuakaj se tlenijki ichaj. O uelis se ueuentsi moneki ma kiuikakaj tlanechikoli, tlajtolmoyauati o mopajtiti. Ika amo uejueyi tlamantli uelis tlauel tikinpaleuisej sekinok (1 Juan 3:17, 18). Nojkia uelis tlauel titlajtolmoyauasej uan kiampa tikinpaleuisej katli kipiaj kuali ininyolo.

16. ¿Tlake uelis tikiniljuisej katli mokuesouaj uan katli moyolkokouaj?

¹⁶ Ika tlen tikijtouaj nojkia tijnextiaj techyolkokoua tlen kinpano sekinok. Biblia kiijtoua ma tikinyolchikauakaj katli mokuesouaj uan katli moyolkokouaj (1 Tes. 5:14). Uelis tikiniljuisej tlauel tikinikneliaj, tlake kuajkuali tlamantli kinextiaj ipan ininnemilis, uelis tikiniljuisej tlen kuali kichiuaj uan tlauel kinpatiita Jehová, yeka itstokej ipan tlanechikoli (Juan 6:44). Nojkia uelis tikiniljuisej Jehová kitekipachoua kema tlaijiyouiaj uan moyolkokoua (Sal. 34:18). Tlaj tijchiuasej nopa uelis tlauel tikinyolchikauasej (Prov. 16:24).

17, 18. 1) ¿Tlake kinnauatia Jehová ma kichiuakaj ueuejtlakamej? 2) ¿Tlake tikixtomasej ipan nopa seyok tlamachtili?

¹⁷ Jehová kineki ueuejtlakamej ma kinyolkoko tlen kinpano sekinok (Hech. 20:28, 29). Yeka moneki kinmachtisej uan kinyolchikauasej (Is. 32:1, 2; 1 Ped. 5:2-4). Amo kinnauatiaj tlen amo moneki yon kinchiualtiaj ma kichiuakaj tlen amo uelij. Yeka, kinekij ma yolpakikaj toikniuaj, motemachiaj kiikneliaj Jehová uan kichiuaj se ueyi kampeka kitekipanosej (Mat. 22:37).

¹⁸ Tlaj tikilnamiktosej Jesús amo moueyimatki uan kiyolkokoua tlen kinpano sekinok, nojkia kiampa tijchiuasej. Ipan nopa seyok tlamachtili tikitasej kenijkatsa titlalnamikisej uan amo timajmauisej kej Jesús.