1, 2. 1) ¿Tlake kinpouilik Jesús nopa iuampoyouaj? (Xikita nopa achtoui tlaixkopinkayotl.) 2) ¿Tlake tlauel moneki tijmatisej tlen nopa tlapoualistli tlen nopa borregojmej uan nopa chivos?

SE TONALI, kema Jesús kiniljuik tlen tlauel ipati Pedro, Andrés, Santiago uan Juan, kinpouilik tlen nopa kuali tlatekipanojketl, matlaktli ichpokamej uan tlen nopa talentos. Teipa, kinpouilik tlen nopa katli ‘mokuepki Tlakatl’ uan kema ualaskia tetlajtolsenkauaki. Nopaya kiijtoua kinxeloua maseualmej “tlen nochi tlaltinij”. Sekij Jesús kintokaxtia “borregojmej” uan sekinok “chivojmej”. Nojkia kiijtoua itstokej sekinok tlen tlauel ininpati katli kiniljuia ‘iikniuaj’ nopa ‘tlanauatijketl’ (xijpoua Mateo 25:31-46).

² Tojuantij nojkia tijnekij tijmatisej tlake kiijtosneki ni tlapoualistli, pampa Jesús kiijtok sekij nochipa itstosej uan sekij kintsontlamiltisej. Yeka, tlauel moneki tijmatisej tlake kiijtosneki, tlake moneki tijchiuasej tlaj tijnekij nochipa tiitstosej uan moneki ma tijmatikaj kenijkatsa monankilia ni tlajtlanili: ¿Kenijkatsa techpaleuijtok Jehová ma tijkuamachilikaj ni tlapoualistli? ¿Kenijkatsa techpaleuia tikitasej tlauel moneki ma titlajtolmoyauakaj? ¿Ajkia inijuantij kinamiki tlajtolmoyauasej? ¿Kenke tlauel moneki ma tijpaleuikaj nopa tlanauatijketl uan iikniuaj?

3, 4. 1) ¿Tlake eyi tlamantli techpaleuis tijkuamachilisej nopa tlapoualistli tlen nopa borregojmej uan nopa chivos? 2) ¿Kenijkatsa ipan 1881 pilamochtsi La Atalaya kiixtonki nopa tlapoualistli?

³ Tlaj tijnekij tijkuamachilisej nopa tlapoualistli tlen nopa borregojmej uan nopa chivos moneki tijmatisej eyi tlamantli. Se. ¿Ajkia inijuantij kinixnextia katli ‘mokuepki Tlakatl’, tlanauatijketl, tlanauatijketl iikniuaj, borregojmej uan nopa chivos? Ome. ¿Kema katli mokuepki tlakatl kiijtoua ajkia inijuantij borregojmej uan ajkia inijuantij nopa chivos? Uan eyi. ¿Kenke kiijtoua sekij kejuak borregojmej uan sekij kejuak chivos?

⁴ Ipan 1881, pilamochtsi La Atalaya kiijtok katli ‘mokuepki Tlakatl’ uan nopa tlanauatijketl kiixnextia Jesús. Uan nopa tlanauatijketl iikniuaj kinixnextia katli tlanauatisej iluikak iuaya Jesús uan nojkia katli itstosej ipan Tlaltipaktli kema ayokmo elisej tlajtlakolejkej. ¿Kema kiijtos Jesús ajkia inijuantij kejuak borregojmej uan chivos? Kema Cristo tlanauatis 1,000 xiuitl. ¿Uan kenke kiijtoskia sekij eliskiaj kejuak borregojmej? Pampa ika nochi tlen kichijkej kinextijkej teikneliyayaj kej toTeotsij.

5. ¿Kenijkatsa ipan 1923 pilamochtsi La Atalaya kiixtonki nopa tlapoualistli tlen nopa borregojmej uan nopa chivos?

⁵ Teipa, Jehová kinpaleuik itekipanojkauaj kuali ma kikuamachilikaj ni tlapoualistli. Ipan 1923, pilamochtsi La Atalaya, octubre 15 ika Biblia kiijtok kiijtosneki seyok tlamantli. Kiijtok katli ‘mokuepki Tlakatl’ kiixnextia Jesús. Nopa tlanauatijketl iikniuaj kinixnextia san katli tlanauatisej iuaya Jesús ne iluikak. Uan nopa borregojmej kinixnextia katli nochipa itstosej ipan Tlaltipaktli. ¿Kema kiijtos Jesús ajkia inijuantij kejuak borregojmej? Kema nojua itstoskiaj ipan Tlaltipaktli uan ayamo peuaskia nopa 1,000 xiuitl. ¿Kenke? Pampa ni tlapoualistli kiijtoua katli itstosej ipan Tlaltipaktli kinpaleuiskiaj nopa tlanauatijketl iikniuaj, uan panoskia san kema nojua itstoskiaj ipan Tlaltipaktli ininuaya nopa maseualmej. ¿Uan kenke kintokaxtiskiaj kejuak borregojmej? La Atalaya kiijtok pampa tlaneltokaj ipan Jesús uan pampa motemachiaj toTeotsij itlanauatijkayo kichiuas kuali ma tiitstokaj.

6. ¿Kenijkatsa mopatlak ipan 1995 kej tikixtomayayaj ni tlapoualistli?

⁶ Maske uejkajki timoiljuiyayaj maseualmej katli techtlakakiliyayaj eliyayaj kejuak borregojmej uan katli amo kinekiyayaj eliyayaj kejuak chivos, ipan 1995 tijpatlakej kej tikixtomayayaj ni tlapoualistli. La Atalaya kiixtonki tlen kiijtoua Mateo 24:29-31 uan Mateo 25:31 uan 32 (xijpoua). Kiijtok Jesús tetlajtolsenkauas kema mochijtos nopa ueyi tlaijiyouilistli uan ‘moseuis ipan isiya’. * (Xikita nopa nota.)

7. ¿Tlake kiijtosneki nopa tlapoualistli tlen nopa borregojmej uan nopa chivos?

⁷ Ipan ni tonali xitlauak tijkuamachiliaj ni tlapoualistli. Katli ‘mokuepki Tlakatl’ uan nopa tlanauatijketl kiixnextia Jesús. Nopa tlanauatijketl iikniuaj kinixnextia katli Jehová kitlapejpenijtok ika itonal. Inijuantij tlanauatisej iuaya Jesús ne iluikak (Rom. 8:16, 17). Uan nopa borregojmej uan nopa chivos kinixnextia maseualmej tlen nochi Tlaltipaktli. ¿Kema kintlajtolsenkauasej? Kema tlamis nopa ueyi  tlaijiyouilistli tlen nechka peuas. ¿Uan kenke kintokaxtisej kejuak borregojmej o chivos? Jesús kiijtos ajkia inijuantij elisej kejuak borregojmej o chivos kema kiitas tlake kinchiuilijtokej katli yasej iluikak uan nojua itstokej ipan Tlaltipaktli. Tijtlaskamatiliaj Jehová pampa techpaleuia tijkuamachilisej ni uan sekinok tlapoualistli tlen ijkuilijtok ipan Mateo 24 uan 25.

8, 9. ¿Kenke Jesús kiniljuia “xitlauakej” katli eliskiaj kejuak borregojmej?

⁸ Maske ipan nopa tlapoualistli tlen nopa borregojmej uan nopa chivos, Jesús amo kiijtok ma titlajtolmoyauakaj, tijmatij kena ya nopa techmachtia. ¿Kenijkatsa tijmatij?

⁹ Tlaj tijnekij tijkuamachilisej, moneki tijmajtosej ni san se neskayotl. Jesús amo kiijtok tlen nelnelia borregojmej uan chivos. Amo kiijtosneki katli kinekij elisej kejuak borregojmej, moneki kinmakasej tlen mokentisej uan tlen kikuasej katli yasej iluikak, kinmokuitlauisej kema kipiasej kokolistli o kinpaxalosej kema kintsakuaskiaj. Uajka, ¿tlake kiijtosneki? Jesús kiniljuiskia borregojmej san katli kimatiskiaj kenijkatsa katli yasej iluikak Jesús iikniuaj, uan kinpaleuiskiaj ipan itlamia tonali. Yeka, Jesús kiniljuia “xitlauakej” nopa kejuak borregojmej (Mat. 10:40-42; 25:40, 46; 2 Tim. 3:1-5).

10. ¿Kenijkatsa nopa kejuak borregojmej uelis kinpaleuisej Cristo iikniuaj?

¹⁰ ¿Kenke monekiskia ma kinpaleuikaj Jesús iikniuaj? Kema ayamo kiniljuiyaya nopa tlapoualistli tlen nopa borregojmej uan nopa chivos, Jesús kiniljuijtoya tlake panoskia ipan itlamia tonali (Mat. 24:3). Kiniljuijtoya monekiskia tlajtolmoyauasej ipan nochi Tlaltipaktli (Mat. 24:14). Nojkia kiniljuijtoya nopa tlapoualistli tlen nopa talentos. Ika ni kiniljuik katli yasej iluikak monekiskia kichiuasej se ueyi kampeka tlajtolmoyauasej. ¿Kenijkatsa ueliskia tlajtolmoyauasej ipan nochi Tlaltipaktli tlaj itstokej san se keskij katli yasej iluikak? Ipan nopa tlapoualistli tlen nopa borregojmej uan nopa chivos, Jesús kiijtok nopa kejuak borregojmej kinpaleuiskiaj katli yasej iluikak. ¿Kenijkatsa kichiuaskiaj? Kinpaleuiskiaj tlajtolmoyauasej. Uan, ¿monekiskia san ma kinyolchikauakaj o san ma kinmakakaj tomij kema tlajtolmoyauaskiaj?

11. ¿Tlake kualtiaskia ma timotlajtlanikaj?

¹¹ Ipan ni tonali itstokej chikueyi millones Jesús itokilijkauaj. Uan miakej amo motemachiaj yasej iluikak. Jesús amo kinmakak inijuantij nopa talentos o amo kinnauatik inijuantij ma tlajtolmoyauakaj. Nopa talentos kinmakak san katli yasej iluikak (Mat. 25:14-18). Uajka kualtiaskia ma timotlajtlanikaj: “¿Moneki ma tlajtolmoyauakaj nopa kejuak borregojmej maske Jesús kinmakak nopa talentos san katli yasej iluikak?”. Kena. Ma tikitakaj naui tlamantli tlen kinextia nopa.

12. ¿Tlake techmachtia tlen Jesús kiijtok ipan Mateo 28:19 uan 20?

¹² Se. Jesús kinnauatik nochi itokilijkauaj ma tlajtolmoyauakaj. Kema moyolkuik, kiniljuik itokilijkauaj ma tlajtolmoyauakaj uan ma kinmachtikaj maseualmej ma kichiuakaj nochi tlen kinnauatijtoya. Uajka, katli  mochiuaskiaj itokilijkauaj nojkia monekiskia ma tlajtolmoyauakaj (xijpoua Mateo 28:19 uan 20, TNM). Ni kinextia moneki tlajtolmoyauasej nochi katli yasej iluikak uan katli itstosej ipan Tlaltipaktli (Hech. 10:42).

13. ¿Tlake techmachtia nopa pilamochtsi Apocalipsis?

¹³ Ome. Pilamochtsi Apocalipsis o Revelación kinextia amo tlajtolmoyauaskiaj san katli yasej iluikak. Nopa apóstol Juan kiitak “isiua nopa pilborregojtsi” katli kiniljuia maseualmej ma kiikaj nopa “atl tlen temaka yolistli”. Nopa isiua kinixnextia nopa 144,000 katli tlanauatisej iuaya Jesús ne iluikak (Apoc. 14:1, 3; 22:17). Nopa atl kiixnextia kema motemaktilik Jesús, tlen ika temakixtiskia tlen tlajtlakoli uan mikilistli (Mat. 20:28; Juan 3:16; 1 Juan 4:9, 10). Katli yasej iluikak kinmachtiaj maseualmej kenijkatsa uelis kinpaleuis nopa tlaxtlauili (1 Cor. 1:23). Juan nojkia kinitak sekinok katli amo yasej iluikak uan motemachiaj itstosej ipan Tlaltipaktli. Inijuantij nojkia kinnauatiaj ma kiniljuikaj sekinok ma kiikaj nopa atl tlen temaka yolistli. Yeka tlajtolmoyauaj. Uajka, tlen kiitak Juan kinextia nochi katli kinekij momachtisej moneki tlajtolmoyauasej.

14. ¿Tlake moneki tijchiuasej tlaj tijnekij tijneltokasej “tlen Cristo technauatijtok”?

¹⁴ Eyi. Nochi katli kineltokaj “tlen Cristo technauatijtok” moneki tlajtolmoyauasej (Gál. 6:2). Jehová kineki nochi katli kiueyichiuaj ma kineltokakaj sanse tlanauatili. Uejkajkia, kinekiyaya ma kineltokakaj itlanauatiljuaj israeleuanij uan katli euayayaj ipan sekinok altepemej uan itstoyaj ininuaya (Éx. 12:49; Lev. 24:22). Maske ipan ni tonali amo moneki tijneltokasej tlen Jehová kinnauatik israeleuanij, moneki nochi  ma tijneltokakaj “tlen Cristo technauatijtok”. Jesús technauatik tlauel moneki ma timoiknelikaj (Juan 13:35; Sant. 2:8). Moneki ma tikiknelikaj Jehová, Jesús uan maseualmej. Uan ni uelis tijnextisej kema tikinmachtisej tlen toTeotsij iTlanauatijkayo (Juan 15:10; Hech. 1:8).

15. ¿Kenke tijmatij Jesús kineki nochi itokilijkauaj ma tlajtolmoyauakaj?

¹⁵ Naui. Tlen Jesús kiniljuik se keskij itokilijkauaj nojkia monekiyaya kineltokaskiaj sekinok. Maske Jesús kichijki se tlajtolsenkaualistli ininuaya 11 itokilijkauaj uan kiampa tlanauatiskiaj iuaya ne iluikak, eliskiaj 144,000 katli tlanauatiskiaj iuaya (Luc. 22:29, 30; Apoc. 5:10; 7:4-8). Uan teipa kema moyolkuik, Jesús kiniljuik ma tlajtolmoyauakaj san se keskij itokilijkauaj (Hech. 10:40-42; 1 Cor. 15:6). Maske kiniljuik san se keskij, kema itstoyaj apóstoles nochi itokilijkauaj tlajtolmoyajkej (Hech. 8:4; 1 Ped. 1:8). Uajka, maske amo tiitstoyaj kema Jesús kiijtok nopa moneki nojkia titlajtolmoyauasej. Yeka, ipan ni tonali titlajtolmoyauaj nechka chikueyi millones uan kiampa tijnextiaj titlaneltokaj ipan Jesús (Sant. 2:18).

16-18. 1) ¿Kenijkatsa uelis tikinpaleuisej Jesús iikniuaj? 2) ¿Kenke moneki nama ma tikinpaleuikaj katli motemachiaj yasej iluikak?

¹⁶ Satanás tlauel kintlaijiyouiltijtok katli yasej iluikak uan nojua itstokej ipan Tlaltipaktli. Uan kimati amo kipia miak tonali (Apoc. 12:9, 12, 17). Ya amo ueli kichiua ayokmo ma tlajtolmoyauakaj. Yeka, ipan ni tonali kinmachtiaj tlauel miakej. Ni kinextia Jesús kinyakantok uan kinpaleuijtok (Mat. 28:20).

¹⁷ Nelnelia se ueyi tlateochiualistli pampa tikinpaleuiaj tlajtolmoyauaj katli yasej iluikak. ¿Kenijkatsa nojkia uelis tikinpaleuisej? Uelis titemakasej tomij uan titekitisej kema kichiuaj kali Betel o kampa timosentiliaj. Nojkia uelis tikinpaleuisej kema tikinneltokaj ueuejtlakamej uan sekinok toikniuaj katli kintlalijtok nopa “tlalnamijkatlatekipanojketl tlen nelia temachtli” (Mat. 24:45-47; Heb. 13:17).

¹⁸ Kema kejuak kintlalilisej se sello katli motemachiaj yasej iluikak uan nojua itstokej ipan Tlaltipaktli, peuas nopa ueyi tlaijiyouilistli (Apoc. 7:1-3). Uan kema nechka peuas Armagedón, Jesús kinuikas iluikak (Mat. 13:41-43). Uajka, tlaj tijnekij Jesús ma kiijto tojuantij nojkia kejuak tiborregojmej, moneki nama ma tikinpaleuikaj iikniuaj.