Linda: ¿Tlake tijchiua Lucía? Niyolpajki pampa tiajki se chikueyiya kema moilnamijki Cristo imikilis. * ¿Kenijkatsa tikitak?

Lucía: Maske tlauel nechpaktik, amo nijkuamachilik nochi. Uan maske nijkaktoya ipan Navidad kiilnamikij kema Jesús tlakatki uan ipan Semana Santa kema moyolkuik, amo nijkaktoya tlaj kiilnamikiyayaj imikilis.

Linda: Kena. Maske nopa iljuitl tlauel miakej kichiuaj, Jehová itlajtoltemakauaj tikitaj tlauel moneki sejse xiuitl tikilnamikisej Cristo imikilis. Tlaj amo timotekiuijtok, ipan se keski minutos nechpaktiskia nimitsiljuis kenke.

Lucía: Kena, amo tlauel nimotekiuijtok.

Linda: Kualtitok. Tojuantij tikilnamikij Jesús imikilis pampa yaya tlanauatik ma tikilnamikikaj. Ma tikitakaj tlake panok se youali achtoui kema nechka kimiktiskiaj. ¿Tikilnamiki Jesús kichijki se tlakualistli tlen tlauel ipati ininuaya apóstoles?

Lucía: Aaa, kena. Kema san ipan nopa youali tlakuaskiaj sansejko.

Linda: Kualtitok. Nojkia kiiljuiaj toTeko iTlakualis. Kema tlakuajtoyaj, Jesús xitlauak kiniljuik itokilijkauaj kenijkatsa kichiuaskiaj. Ni kiijtoua ipan Lucas 22:19. ¿Mitspaktiskia tijpouas?

Lucía: Kena, kiijtoua: “Kiitskik se pantsi uan kitlaskamatki iTata Dios. Uan kitlapanki uan kinmajmakak imomachtijkauaj uan kiniljuik: ‘Ni notlakayo tlen nitemaktilis inmopampa. Xijchiuakaj ya ni para inkineskayotisej innechilnamikij’”.

Linda: Tlaskamati miak. Xikita tlen kiijtok Jesús kampa tlami: “Xijchiuakaj ya ni para inkineskayotisej innechilnamikij”. Uan achtouia, Jesús ya kiniljuijtoya tlake monekiyaya kiilnamikisej. Kiijtok temaktiliskia itlakayo, o inemilis, uan kiampa kinmakixtiskia itokilijkauaj. Ipan Mateo 20:28 Jesús nojkia kej nopa kiijtok. Xikita tlen kiijtoua: “Axniualajtok para nikinnauatis tlakamej [...]. Niualajtok para nikintekipanos tlakamej, uan para nimotemaktilis uan [...] nikintojtomas miak tlakamej”. Uajka, Jehová itlajtoltemakauaj timonechikouaj ipan nopa tonali pampa tikilnamikij kenijkatsa motemaktilik Jesús uan kiampa techmakixtik. Tlaj titlaneltokasej uelis timomakixtisej.

Lucía: Maske nijkaktoya Jesús mijki pampa monekiyaya techmakixtis, amo nijkuamachilia kenijkatsa techmakixtia imikilis.

 Linda: Kena, maske nopa tlamachtili tlen nopa tlaxtlauili o kej Jesús motemaktilik nelia ouij se kikuamachilis, nopa se kuajkualtsi tlamachtili tlen kipia Biblia. ¿Uelis nojua nimitspouilis se kentsi?

Lucía: Kena, kuali.

Linda: Kualtitok. Ni tlamachtili namanok nimomachtik. Nijchiuas se kampeka nimitsixtomilis ika amo ouij tlajtoli.

Lucía: Kualtitok.

Linda: Achtoui moneki ma tijkuamachilikaj tlake panok kema Adán uan Eva tlajtlakolchijkej ipan Xochimili Edén. Yeka, ma tijpouakaj tlen kiijtoua Romanos 6:23. ¿Mitspaktiskia tijpouas?

Lucía: Kena. “Intla se tlakatl tlajtlakolchiua, kipantia mikistli keja itlaxtlauil, pero toTeko Dios techmaka [ika] Jesucristo, [...] yolistli yankuik para nochipa.”

Linda: Tlaskamati. Ma tikixtomakaj ni texto. Xikita, kampa peua kiijtoua “intla se tlakatl tlajtlakolchiua, kipantia mikistli keja itlaxtlauil”. Ni tlanauatik toTeotsij kema pejkej itstoyaj maseualmej: nopa mikilistli, eliskia nopa tlaxtlauili, o tlen ika kitlatsakuiltiskiaj katli tlajtlakolchiuaskia. Achtoui amo aka tlaixpanotoya. ToTeotsij kinchijki Adán uan Eva amo tlajtlakolejkej, yeka eliyayaj xitlauakej. Uan ininkoneuaj nojkia amo kipixtoskiaj tlajtlakoli, yeka amo ueliskia mikisej. Maske Adán, Eva uan ininkoneuaj itstoskiaj nochipa uan ika pakilistli, ta tijmati kichijkej tlen amo kuali, yeka ayokmo moaxitik nopa. ¿Tikilnamiki tlake?

Lucía: Kena, Adán uan Eva kikuajkej nopa kuauitl itlajka tlen kiniljuijtoyaj amo ma kikuakaj.

Linda: Kualtitok. Kiampa tlajtlakolchijkej pampa kiixpanokej toTeotsij. Yeka, mochijkej tlajtlakolejkej uan kinpanok tlen amo kuali inijuantij uan nojkia ininkoneuaj.

Lucía: ¿Uan kenke techpanok nopa tlaj tojuantij amo titlaixpanokej?

Linda: Ximoiljui ni tlamantli. ¿Tijchijtok pantsi ipan se molde?

Lucía: Mmm, kena. Na nechpaktia nipanchiuas.

Linda: Ximoiljui timokouik seyok yankuik, uan kema nechka tijtekiuiskia, tijmalakanik, uan pampa motejtsonki ayokmo kuali mokajki. ¿Kenijkatsa kisaskia nochi pantsi tlen tijchiuaskia nopaya? ¡Nochi amo kuali kisaskia!

Lucía: Kena, nopa nelia.

Linda: Uajka, kema Adán uan Eva kiixpanokej toTeotsij ayokmo kuali mokajkej kej nopa tepostli. Pampa tlajtlakolchijkej kema ayamo konepiayayaj, ininkoneuaj tlakatkej ika tlajtlakoli. Kema ipan Biblia kiijtoua tlajtlakoli, kiijtosneki amo kuali tlamantli tlen maseualmej kichiuaj uan nojkia kema tijnekij titlajtlakolchiuasej kej totatauaj. Yeka, maske tojuantij amo titlaixpanokej kema Adán uan Eva tlajtlakolchijkej uan ayamo titlakatiyayaj, nochi techpanoltilijkej tlajtlakoli. Yeka ipan Romanos 6:23 kiijtoua “intla se tlakatl tlajtlakolchiua, kipantia mikistli keja itlaxtlauil”.

Lucía: Nelia amo kinamiki nochipa techpanotos tlen amo kuali pampa tlaixpanokej Adán uan Eva.

Linda: Kena, maske nelia amo kinamiki, toTeotsij nochipa kichiua tlen xitlauak. Yeka, pampa Adán uan Eva tlajtlakolchijkej, toTeotsij kiijtok mikiskiaj. Maske panok nopa, ya kichijki ininkoneuaj ma motemachikaj kichiuaskia ma momanauikaj tlen nopa amo kuali tlamantli. Uan nopa mochiuaskia ika Cristo imikilis. Sampa ma tijpouakaj Romanos 6:23. Teipa, kema kiijtoua “intla se tlakatl tlajtlakolchiua, kipantia mikistli keja itlaxtlauil”, kiijtoua “toTeko  Dios techmaka [ika] Jesucristo, [...] yolistli yankuik para nochipa”. Uajka, Cristo imikilis uelis techmakixtis tlen tlajtlakoli uan mikilistli. *

Linda: Ni texto kiijtoua seyok tlamantli tlen nechpaktiskia nimitsixtomilis.

Lucía: ¿Tlake?

Linda: Xikita: “ToTeko Dios techmaka [ika] Jesucristo, [...] yolistli yankuik para nochipa”. Tlaj tlaijiyouik Jesús uan mijki kema temaktilik inemilis uan kiampa kiixtlajki totlajtlakoljuaj, ¿kenke nikaj amo kiijtoua “Jesús techmaka”? *

Lucía: Mmm... Amo nijmati.

Linda: Kema Adán uan Eva amo kineltokakej toTeotsij ipan Xochimili Edén, kiixpanokej katli kinchijtoya. Maske tlauel kiyolkokok Jehová kema kiijixnamijkej, ya nimantsi moiljuik tlake kichiuaskia: se iluikaejketl ualaskia ipan Tlaltipaktli, itstoskia kej se maseuali tlen amo tlajtlakole uan teipa motemaktiliskia uan kiampa kinmakixtiskia maseualmej. * Uajka toTeotsij techmakak nopa tlaxtlauili. ¿Timoiljuijtok kenijkatsa kiyolmatki toTeotsij kema kimiktijkej Jesús?

Lucía: Amo.

Linda: ¿Tikinpia konemej? Nimitstlajtlania pampa nikita tijpia ajauili.

Lucía: Kena, omej; se okichpil uan se siuapil.

Linda: Pampa tikinpia mokoneuaj, uelis timoyoliljuis kenijkatsa kiyolmatki Jehová kema kiitak mijki iKone. ¿Kenijkatsa timoiljuia kiyolmatki kema kiitskitoj Jesús, kipinaualtijkej uan kimakilijkej? Ximoiljui kenijkatsa kiyolkokok Jehová kema kiitak tlaijiyouik iKone uan ika yolik miktiajki ipan se kuauitl.

Lucía: ¡Nelia tlauel amo kuali! Amo kema nimoiljuijtoya nopa.

Linda: Maske amo tijmatij kenijkatsa nelnelia kiyolmatki toTeotsij, Biblia kiijtoua tlake kiyololinik kikauas ma kitlaijiyouiltikaj iKone. Ipan Juan 3:16 kiixtoma ika yejyektsitsij tlajtoli. ¿Ueliskia tijpouas?

Lucía: Kena. Nikaj... kiijtoua: “ToTeko nelia miak kiniknelia nochi tlakamej ipan ni Tlaltipaktli uan yeka kititlanki iKone iyojtsi para mikis ininpampa. Uan keja nopa nochi tlen kineltokasej, axpoliuisej, pero kipiasej yolistli tlen yankuik para nochipa”.

Linda: Tlaskamati. Xikita kampa peua, nopaya kiijtoua: “ToTeko nelia miak kiniknelia nochi tlakamej”. Nikaj kiijtoua toTeotsij kiyololinik tlaiknelili. Yeka kititlanki iKone ipan Tlaltipaktli uan kiampa techmakixtik kema mijki. Ika ni kinextik tlauel techiknelia. Ya nopa tlen Jehová itlajtoltemakauaj tikilnamikij sejse xiuitl ipan nopa tonali kema moilnamiki Cristo imikilis. ¿Kena tijkuamachilik?

Lucía: Kena. Tlaskamati miak pampa tinechixtomilik.