1. ¿Kenke moneki kuali ma timouampojchijtiakaj iuaya Jehová?

JEHOVÁ itlajtoltemakauaj tijpiaj tlen tlauel ipati. Timouampojchijtokej iuaya Jehová. Ni tlauel moneki pampa katli kinnauatia Satanás uan totlajtlakol ueliskia kichiuas ayokmo kuali ma timouikakaj iuaya.

2. 1) ¿Tlake pano kema se mouampojchiua iuaya se akajya? (Xikita nopa nota.) 2) ¿Kenijkatsa uelis tlauel kuali timouampojchiuasej iuaya Jehová?

² ¿Tikita Jehová kej se nelnelia mouampo? ¿Mitspaktiskia nojua kuali timouampojchiuas iuaya? Santiago 4:8 kiijtoua kenijkatsa: “Ximonechkauikaj kampa toTeko uan yajaya inmechnechkauis”. Uajka, ta uan Jehová uelis kuali inmouampojchiuasej tlaj inkichiuasej se tlamantli. * (Xikita nopa nota.) Tlaj tijnechkauis Jehová, ya nojkia mitsnechkauis. Uan tlaj tlauel tijnechkauis, kuali timouampojchiuas iuaya, uan tijyolmatis kej Jesús kema kiijtok: “Yajaya tlen nelia temachtli nechtitlantok”. Uan nojkia kiijtok:  “Nikixmati” (Juan 7:28, 29). Ma tikitakaj tlake moneki tijchiuasej tlaj tijnekij tijnechkauisej Jehová.

3. ¿Kenijkatsa uelis timonojnotsasej iuaya Jehová?

³ Tlaj tijnekij tijnechkauisej Jehová, tlauel moneki ma tijnojnotsakaj. Ximoiljui ni. ¿Tlake uelis kichiuasej tlaj omej katli mouampojchijtokej itstokej uejka? Uelis nochipa motlajkuiljuilisej uan monojnotsasej ipan teléfono. Tlaj tijnekij timouampojchijtosej iuaya Jehová nojkia moneki tijchiuasej nopa. ¿Kenijkatsa tijnojnotsaj? Kema nochipa timomaijtouaj (xijpoua Salmo 142:2). ¿Uan kenijkatsa technojnotsa ya? Ika Biblia. Yeka, tlaj tijnekij tijtlakakilisej, moneki nochipa tijpouasej uan timoyoliljuisej kenijkatsa uelis techpaleuis (xijpoua Isaías 30:20 uan 21). Ma tikitakaj kenijkatsa tlaj nochipa timonojnotsasej iuaya Jehová, kuali timouampojchiuasej iuaya.

4, 5. ¿Kenijkatsa kejuak technojnotsa Jehová ika Biblia? Xikixtoma ika se neskayotl.

⁴ Biblia uelis kinpaleuis nochi maseualmej, uan nojkia uelis techpaleuis nochi ma tijnechkauikaj. Tlaj tijnekij ma techpaleui, moneki tikitasej tlake tijyolmatij kema timomachtiaj Biblia uan kenijkatsa uelis tijchiuasej ipan tonemilis. Kiampa, Jehová kejuak technojnotsas. Uan kema tikitasej techpaleuia, tlauel kuali timouampojchiuasej iuaya (Heb. 4:12; Sant. 1:23-25).

⁵ Ma tikitakaj Mateo 6:19 uan 20 kampa Jesús kiijtok: “Amo xikajkokuikaj miak tomij [...] ipan ni Tlaltipaktli”. ¿Kenijkatsa tijyolmatij kema tijpouaj ni? Tlaj tijneltokatokej ni, tijyolmatisej kipaktia Jehová tlen tijchiuaj. Uan tlaj tikitasej moneki amo titlapijpiasej miak uan timosentlalisej tijtekipanosej miak toTeotsij, uajka tijkuamachilisej Jehová techpaleuijtok ma tikitakaj tlen tojuantij moneki tijchiuasej uan kiampa nojua tijnechkauisej.

6, 7. 1) ¿Kenijkatsa techpaleuia kema timomachtiaj Biblia? 2) ¿Tlake moneki timosentlalijtosej tijchiuasej kema timomachtisej Biblia?

⁶ Kema timomachtiaj Biblia, tijmatij tlen ayokmo tijchiuasej uan kiampa kuali tijtekipanosej Jehová, tijmatij tlake kuajkuali tlamantli kinextia uan tlen kichiua pampa techiknelia. Kema tijmatij ni, tlauel tikikneliaj uan ya nojkia tlauel techiknelia. Uan nopa kichiua tlauel kuali ma timouampojchiuakaj iuaya (xijpoua 1 Corintios 8:3).

⁷ Tlaj tijnekij tijnechkauisej Jehová, tlauel moneki ma tijpouakaj Biblia pampa tijnekij tijchiuasej tlen kinamiki. Jesús kiijtok tlaj tijnekij  nochipa tiitstosej, moneki kuali tikixmatisej Jehová (Juan 17:3). Maske ipan Biblia tijyekouaj miak kuajkuali tlamantli, amo san ya nopa kichiua ma tijpouakaj. Timomachtiaj Biblia pampa timosentlalijtokej kuali tikixmatisej Jehová (xijpoua Éxodo 33:13; Sal. 25:4).

8. 1) ¿Tlake uelis moiljuiskiaj sekij kema kipouaskiaj tlen Jehová kichiuilik tlanauatijketl Azarías? 2) ¿Tlake temachtli tijmatij pampa kuali tikixmatij Jehová?

⁸ Tlaj tikitaj Jehová kej se nelnelia touampo, amo techtekipachos tlaj Biblia amo nochipa kiixtoma kenke toTeotsij kichijki se tlenijki. Ma timoiljuikaj ipan nopa tlapoualistli tlen nopa tlanauatijketl Azarías tlen Judá. Kema tekichiuayaya, maske maseualmej kinueyichiuayayaj teotsitsij tlen amo melauakej, ya amo kichijki nopa, yeka Biblia kiijtoua “kichijki tlen xitlauak iixtla toTeko” (2 Rey. 15:1-5). Maske kiampa kichijki, Jehová kitlatsakuiltik ika se ueyi kokolistli. ¿Kenke? Ni tlapoualistli amo kiijtoua. Sekij uelis moiljuiskiaj Jehová kichijki tlen amo xitlauak uan kitlatsakuiltik maske amo tlaixpanotoya. Tojuantij kuali tikixmatij Jehová uan timotemachiaj nochipa kichiua tlen xitlauak (Jer. 30:11). Yeka, maske amo tijmatij kenke kitlatsakuiltik, timotemachiaj toTeotsij kichijki tlen kinamikiyaya.

9. ¿Kenke Jehová kitlatsakuiltik tlanauatijketl Azarías?

⁹ Ipan sekinok textos nojkia kiijtoua tlen kichijki Azarías o Uzías (2 Rey. 15:7, 32). Ipan 2 Crónicas 26:3-5 uan 16-21 kiijtoua “kichijki tlen kuali iixpa toTeko” uan nojkia kiijtoua teipa pejki moueyimati. Se tonali kinejki kichiuas tlen san sacerdotes kinamikiyaya kichiuasej. Maske 81 sacerdotes kiiljuijkej amo kuali tlen kinekiyaya kichiuas, amo kinneltokak. Ni techpaleuia tijmatisej kenke kitlatsakuiltik Jehová.

10. 1) ¿Kenke amo moneki nochipa tijnekisej tijmatisej kenke kichiua Jehová se tlenijki? 2) ¿Kenijkatsa uelis timotemachisej Jehová nochipa kichiua tlen kinamiki?

¹⁰ Ni techmachtia tlen tlauel ipati. Maske nopa tlapoualistli tlen nopa tlanauatijketl Azarías kiijtoua miak tlamantli tlen techpaleuia tijmatisej kenke kitlatsakuiltik toTeotsij, ipan miak tlapoualistli amo kiijtoua miak tlamantli. Tlaj tikasiskiaj nopa, ¿kinamikiskia tikijtosej Jehová amo kichijki tlen kinamiki? ¿O timotemachisej toTeotsij nochipa kichiua tlen xitlauak? (Deut. 32:4.) Biblia techpaleuis kuali ma tikixmatikaj Jehová uan ma timotemachikaj ipan ya. Tlaj tikixmatisej uan tikiknelisej, amo nochipa tijnekisej tijmatisej kenke kichiua se tlenijki. Tlaj timomachtisej Biblia uelis timotemachisej Jehová nochipa kichiua tlen kinamiki. Kiampa uelis nelnelia timouampojchiuasej iuaya (Sal. 77:12, 13).

11-13. ¿Kenke tijmatij toTeotsij techtlakakilia kema timomaijtouaj? (Xikita nopa achtoui tlaixkopinkayotl.)

¹¹ Kema timomaijtouaj, tijueyichiuaj Jehová, tijtlaskamatiliaj uan tikiljuiaj ma techpaleui. Kiampa tijnechkauiaj (Sal. 32:8). Uan tlaj tijnekij nelnelia timouampojchiuasej iuaya, moneki  timotemachijtosej ya techtlakakilia kema timomaijtouaj.

¹² Sekij kiijtouaj amo techtlakakilia, uan san kichiua kuali ma tijyolmatikaj. Moiljuiaj kema timomaijtouaj techpaleuia timoyoliljuisej ipan nopa kuesoli tlen tijpiaj uan toselti ma tijmatikaj kenijkatsa tijsenkauasej. Maske uelis kiampa techpaleuis, kema timomaijtouaj Jehová nelnelia techtlakakilia. ¿Kenke tijmatij nopa?

¹³ Kema Jesús ayamo ualajtoya ipan Tlaltipaktli, kiitak Jehová kintlakakiliyaya maseualmej. Uan kema ualajki ipan Tlaltipaktli, momaijtok uan kipouilik toTeotsij tlen moiljuiyaya uan tlen kiyolmatiyaya. Yeka, se tonali seyoual momaijtok (Luc. 6:12; 22:40-46). Uan kinmachtik itokilijkauaj kenijkatsa momaijtosej. ¿Kichijtoskia nopa Jesús tlaj kimajtoskia Jehová amo techtlakakilia? Amo. Ya kimatiyaya toTeotsij kena techtlakakilia kema timomaijtouaj, yeka kiiljuik: “Papá, nimitstlaskamati pampa tinechtlakakilijtok [...]. Nijmati nochipa tinechtlakakilia” (Juan 11:41, 42). Tojuantij nojkia timotemachiaj Jehová techtlakakilia (Sal. 65:2).

14, 15. 1) ¿Kenke kema timomaijtosej moneki xitlauak tikiljuisej Jehová tlake techpoloua? 2) ¿Kenijkatsa kipaleuik se tosiuaikni pampa momaijtouayaya?

¹⁴ Maske uelis kemantika amo tikitasej kuali kenijkatsa Jehová techpaleuia kema timomaijtouaj, tlaj xitlauak tikiljuisej tlake techpoloua, uelis kuali tikitasej kenijkatsa techpaleuia. Kiampa tlauel kuali mouampojchiuas touaya. Tlaj ika nochi toyolo tikiljuisej tlen techtekipachoua, ya technechkauis.

¹⁵ Ma tikitakaj tlen kipanok Kathy. * (Xikita nopa nota.) Ya kiijtoua kema nojua tekitiyaya maske yauiyaya tlajtolmoyaua, amo kipaktiyaya. Kema ayokmo tekitiyaya, se ueuejtlakatl kiiljuik ma mochiua precursora regular. Ya kichijki tlen ni toikni kiiljuik, uan mojmostla kiiljuiyaya Jehová ma kipaleui kipaktis tlajtolmoyauas. ¿Kitlakakilik toTeotsij? Nama Kathy ya kipia eyi xiuitl tlatekipanojtok kej precursora. Ya kiijtoua pampa tlajtolmoyaua miak uan  kipaleuiaj sekinok tosiuaikniuaj, nama kuali tlajtolmoyaua uan tlauel kipaktia. Kiijtoua nama tlauel kuali mouampojchijtok iuaya Jehová. Uajka, pampa momaijtouayaya kipaleuik nelnelia mouampojchiuas iuaya Jehová.

16, 17. 1) ¿Tlake moneki tijchiuasej uan kiampa tlauel kuali timouampojchijtiasej iuaya toTeotsij? 2) ¿Tlake tikixtomasej ipan nopa seyok tlamachtili?

¹⁶ Uelis nochipa tijnechkauijtiasej Jehová. Yeka, moneki kejuak tijtlakakilisej kema mojmostla timomachtisej Biblia, uan nochipa timonojnotsasej iuaya kema timomaijtosej. Kiampa, kej panotias sejse tonali tlauel kuali timouampojchijtiasej iuaya toTeotsij. Uan pampa techpaleuis uelis tikijiyouisej kuesoli.

¹⁷ Maske nochipa timomaijtosej, uelis nojua tijpiasej kuesoli. Uan nopa ueliskia kichiuas ayokmo ma timotemachikaj ipan Jehová. Uelis timoiljuiskiaj amo techtlakakilia kema timomaijtouaj uan ayokmo mouampojchijtok touaya. ¿Tlake ueliskia tijchiuasej tlaj kej nopa tijyolmatisej? Ni tikitasej ipan nopa seyok tlamachtili.