1. ¿Ika tlake kuali tlamantli techchijki Jehová?

JEHOVÁ kichijtok ma timoyoliljuikaj uan kiampa ma tijkuamachilikaj tlen kiyolmatij sekinok maske amo techpanotok kej inijuantij. Nopa tlauel kuali (xijpoua Efesios 5:1 uan 2). ¿Kenijkatsa ika ni nojkia uelis tijchiuasej kej Jehová? ¿Uan kenke moneki kuali tijtekiuisej?

2. ¿Kenijkatsa kiyolmati Jehová kema kiita titlaijiyouiaj?

² Jehová kiijtoua se keskij itstosej nochipa ne iluikak. Uan nopa “sekinok tlakamej” itstosej nochipa ipan Tlaltipaktli. Kema tiitstosej nochipa amo tleno techtlaijiyouiltis (Juan 10:16; 17:3; 1 Cor. 15:53). ToTeotsij kimati titlaijiyouijtokej, uan nopa tlauel kiyolkokoua. Biblia kiijtoua tlauel kiyolkokok kema kiitak kintlaijiyouiltiyayaj israeleuanij ne Egipto (Is. 63:9). Uan teipa, kema israeleuanij kikualchijchiuayayaj nopa teokali, Jehová kimatiyaya kintlaijiyouiltijtoyaj ininkualankaitakauaj. Ya kiijtok kema se akajya kintlaijiyouiltiyaya itekipanojkauaj, tlauel kiyolkokouayaya uan eliskia kejuak kiitskiliskiaj iixtiyol (Zac. 2:8). Jehová tlauel techiknelia kej se siuatl kiiknelia ipilkone, yeka  techpaleuia (Is. 49:15). Tlaj timoyoliljuisej kenijkatsa tijyolmatiskiaj tlaj techtlaijiyouiltiskiaj, nojkia tijchiuasej kej Jehová (Sal. 103:13, 14).

3. ¿Kenke Jesús kinextik kiyolkokok tlen kinpanoyaya maseualmej uan kiniknelik?

³ Jesús kimatiyaya tlake kiyolmatiyayaj maseualmej kema tlaijiyouiyayaj maske ya amo kema kipanotoya nopa. Kimatiyaya katli tlayakanayayaj ipan religión judía tetlaijiyouiltiyayaj, tekajkayauayayaj uan kiijtouayayaj ma mochiua tlen toTeotsij amo tlanauatijtoya, yeka tlauel kinmakasiyayaj (Mat. 23:4; Mar. 7:1-5; Juan 7:13). Maske Jesús amo kinmakasiyaya uan amo kineltokayaya tlen ika tlakajkayauayayaj, kimajtoya tlake kiyolmatiyayaj uan tlauel kikuesouayaya kema kinitayaya tlaijiyouiyayaj. Yeka kiijtok eliyayaj kej pilborregojtsitsij katli amo kipixtoyaj inintlamokuitlauijka (Mat. 9:36). Jesús kichiua kej itata, yeka kiyolkokok tlen kinpanoyaya, kinitak eliyayaj teikneltsitsij uan kiniknelik (Sal. 103:8).

4. ¿Tlake kichiuayaya Jesús kema tlaijiyouiyayaj maseualmej?

⁴ Jesús techiknelia, yeka kinpaleuiyaya katli tlaijiyouiyayaj. Nopa kiyekok tlen iTata. Se tonali, Jesús iapóstoles tlajtolmoyauatoj uejka. Kema kuatitoyaj uan kitemouayayaj kanke mosiajketsasej, Jesús kiitak miakej kitemouayayaj pampa kinekiyayaj ma kinmachti, yeka “pejki kinmachtia miak tlamantli” (Mar. 6:30, 31, 34).

5, 6. ¿Tlake moneki tijchiuasej tlaj tijnekij tijnextisej titeikneliaj kej Jehová? Xikijto se neskayotl. (Xikita nopa achtoui tlaixkopinkayotl.)

⁵ Tlaj techtekipachos tlen kinpano sekinok titeiknelisej kej Jehová. Ma timoiljuikaj se telpokatl kiilnamiktok se toikni ueuentsi tlen ayokmo kuali tlachia uan kitekiuia se kuatopili. Nopa telpokatl kimati Jesús kiijtok moneki tikinchiuilisej sekinok tlen techpaktiskia ma techchiuilikaj (Luc. 6:31). Achtoui uelis moiljuia kipaktiskia ma kitlaneuikaj mauiltiti fútbol, uajka kiilnamiki nopa toikni katli ueuentsi. Yeka, kema moyoliljuia tlaj ya kipanotoskia kej ni toikni, motlajtlania: “¿Ika tlake nechpaktiskia ma nechpaleuikaj tlaj nechpanoskia kej ni toikni?”.

⁶ Ni telpokatl moyoliljuia tlake kiyolmatiskia tlaj eliskia ueuentsi. Yeka kinejki itstos iuaya uan kuali kitlakakilik. Kema kichijki ni, kiitak kiouijmati kipouas Biblia uan amo ueli nejnemi miak kajkalpa. Kiampa kimatki tlen kipoloua ni toikni. Tlaj tijchiuasej kampeka tijmatisej tlake kiyolmatij sekinok uan tikiniknelisej, nojkia tijchiuasej kej Jehová (1 Cor. 12:26).

7. ¿Kenijkatsa uelis tikinpaleuisej toikniuaj katli tlaijiyouiaj?

 ⁷ Tlaj amo kema techpanotok tlen se akajya kiijiyouijtok, uelis ouij tijmatisej tlake kiyolmati. Miakej tlaijiyouiaj pampa kipiaj se kokolistli, moyolkokouaj, majmauij, mokokojkej, ueuejtixtokej o pampa kinchiuilijtokej tlen amo kuali. Sekij ininselti kiniskaltiaj ininkoneuaj o kitekipanouaj Jehová maske ininchampoyouaj amo kinkauaj. Pampa amo nochi tijpiaj sanse kuesoli, amo uelis techpaleuisej ika sanse tlamantli. Uajka, moneki tijchiuasej kampeka tikinpaleuisej katli tlaijiyouiaj uan tikiniknelisej. ¿Tlake uelis tijchiuasej? Kuali tikintlakakilisej, timoyoliljuisej tlake kiyolmatij, tijchiuasej kampeka tijkuamachilisej tlen kinpano, tikinilnamikilisej Jehová tlauel kitekipachoua tlen kipiaj uan kualtiaskia tikitasej kenijkatsa tikinpaleuisej, kiampa nojkia tijchiuasej kej Jehová (xijpoua Romanos 12:15 uan 1 Pedro 3:8).

8. ¿Tlake kipaleuiyaya Jesús kinchiuilis sekinok tlen kuali?

⁸ Jehová uan Jesús nochi kinchiuiliaj tlen kuali (Luc. 6:35). Jesús moyoliljuiyaya tlake kiyolmatiskiaj ika tlen kichiuaskia. Se tonali, se siuatl katli kichiuayaya miak amo kuali tlamantli kiitato Jesús. Kema tlauel mochokilik kiikxixolonik ika iixayo. Jesús kiitak nopa siuatl moyolkueptoya uan kimatiyaya tlaj kiajuaskia, tlauel moyolkokoskia. Yeka, kiiljuik tlauel kuali tlen kichijki uan kitlapojpoljuik. Maske se tlayakanketl tlen se religión amo kipaktik kema Jesús kitlapojpoljuik, Jesús nojkia kichiuilik tlen kuali nopa tlakatl (Luc. 7:36-48).

9. ¿Tlake moneki tijchiuasej tlaj tijnekij tikinchiuilisej sekinok tlen kuali kej kichiua Jehová? Xikijto se neskayotl.

⁹ ¿Kenijkatsa nojkia uelis titechiuilisej tlen kuali? Kema tikijtosej se tlenijki, moneki timoiljuisej tlake kiyolmatisej sekinok, kiampa tikinnojnotsasej ika tlatlepanitakayotl uan amo tikinyolkokosej. Pablo kiijtok se amo kinamiki “mokamaijixnamikis ika sekinok. Moneki ma kinchiuili nochi tlakamej tlen kuali” (2 Tim. 2:24). Ximoiljui: ¿Tlake tijchiuaskia tlaj katli tlayakana kampa titekiti amo kuali kitlapejpenik tlen kichijki? ¿Tlake tikiljuiskia se katli ya uejkajtoya ayokmo monechikouayaya uan sampa yajki ipan tlanechikoli? ¿Tlake tijchiuaskia tlaj kema titlajtolmoyaua se akajya mitsiljuiskia motekiuijtok? O, ¿tlake tijchiuaskia tlaj mosiua mitsiljuiskia kenke amo tikiljuik tlen timoiljuijtoya tijchiuas? Kema panos nopa moneki timoiljuisej kenijkatsa kiyolmatisej sekinok ika tlen tikiniljuisej, kiampa tikinnojnotsasej ika kuali uan tijchiuasej kej Jehová (xijpoua Proverbios 15:28).

10, 11. ¿Kenijkatsa uelis tijnextisej titlalnamikij kej Jehová? Xikijto se neskayotl.

¹⁰ Jehová tlauel tlalnamiki uan kimati tlake panos teipa. Maske tojuantij amo tijmatij, uelis titlalnamikisej kej Jehová. Yeka, kema tijtlapejpenisej tlake tijchiuasej, moneki timoyoliljuisej kenijkatsa techpaleuis o tlake kiyolmatisej sekinok. Amo ma tijchiuakaj kej israeleuanij, katli amo moiljuijkej tlake kinpanoskia  tlaj amo kineltokaskiaj Jehová. Ayokmo kuali mouikakej iuaya yon kitlaskamatilijkej kema kinpaleuik. Pampa kichiuayayaj tlen amo kuali, Moisés kiniljuik uiuitikej uan tlaj kipiaskiaj kuali inintlalnamikilis, moiljuiskiaj tlake kinpanoskia ika tlen kichiuaskiaj (Deut. 31:29, 30; 32:28, 29).

¹¹ ¿Kenijkatsa uelis tijnextisej kuali tlalnamikilistli? Tlaj tijpia katli iuaya timosenkauas, xikilnamiki kemantika tijmatis ouij amo tijnextilis tlen tijyolmati uan tlauel tijnekis timotekas iuaya. Uajka, xijnexti titlalnamiki. Amo xijchiua tlen ika uelis titlaixpanos. Amo kema xijchiua tlen kichiuaskia ayokmo kuali ximouika iuaya Jehová. Uan amo xikilkaua ya kineki kuali xitlalnamiki, pampa tlaj amo tijchiuaskia tijpiaskia miak kuesoli (Prov. 22:3).

12. ¿Kenke moneki ma timoyoliljuikaj san tlen kuali?

¹² Tlaj kuali titlalnamikisej timoyoliljuisej san tlen kuali. Tlen timoyoliljuiaj kejuak tlitl. Tlaj kuali tijtekiuisej, uelis techpaleuis kema titlakualchiuasej, uan tlaj amo, uelis tijtlatisej tochaj uan timikisej. Yeka, tlaj timoyoliljuisej tlen Jehová techmachtia, kuali tiitstosej. Uan tlaj timoyoliljuisej tijchijtokej tlen ika momekatiaj uan san tlen amo kuali, nelia ueliskia tijchiuasej uan ayokmo kuali timouampojchijtosej iuaya Jehová (xijpoua Santiago 1:14 uan 15).

13. ¿Tlake moyoliljuik Eva?

¹³ Ma tikitakaj tlen kichijki Eva. Jehová kinnauatik Adán uan Eva amo ma kikuakaj itlajka nopa “kuauitl tlen temachiltia tlen kuali uan tlen axkuali” (Gén. 2:16, 17). Uan Satanás kiiljuik Eva: “Axinmikisej. Kuali kimati Dios intla inkikuasej itlajka nopa kuauitl elis keja inmechtlapouilis inmoixtiyol uan inmotlalnamikilis uan inkimatisej tlen kuali uan tlen axkuali. Keja nopa inelisej keja ya”. Kiiljuik Eva ueliskia kiijtos tlake kuali uan tlake amo kuali. Yeka moyoliljuik kiampa tlauel kuali itstoskia. Ya nochipa moyoliljuijtoya nopa, yeka tlauel kinejki kikuas nopa kuauitl itlajka. Teipa kikuajki uan nojkia kimakak iueue ma kikua (Gén. 3:1-6). Yeka, “tlajtlakoli pejki ipan Tlaltipaktli [...]. Uan [...] nojkia pejki mikistli” (Rom. 5:12). Ni kinextia Eva amo moyoliljuik san tlen kuali.

14. ¿Tlake kiijtoua Biblia katli tlajtlakolchiuaj ika tlen kichiuaj katli momekatiaj?

¹⁴ Maske Eva amo tlaixpanok ika tlen kichiuaj katli momekatiaj, Biblia kiijtoua amo kuali timoyoliljuisej nojkia tijchijtokej kej katli momekatiaj. Jesús kiijtok tlaj se tlakatl moyoliljuijtinemis kineki motekas iuaya se katli amo isiua, kejuak ya motektoskia iuaya pampa ya nopa moiljuijtok “ipan iyolo” (Mat. 5:28). Uan Pablo kiijtok amo ma timoiljuijtokaj kenijkatsa tijchiuaskiaj tlen amo kuali katli techyoltilana (Rom. 13:14).

15. 1) ¿Tlake tlen tlauel ipati moneki tijchiuasej? 2) ¿Kenke moneki ma tijchiuakaj kampeka tijchiuasej nopa?

¹⁵ Biblia nojkia kiijtoua ma tijchiuakaj tlen Jehová kineki uan amo san titlatominpiasej, pampa ni amo kema kichiuas ma tiyolpakikaj uan kuali ma tiitstokaj (Prov. 18:11). Jesús kiijtok uiuitik se tlakatl, tlaj kitemoliskia san kitlanis miak tomij uan teipa kitekipanos Jehová. Maske kipiaskia miak tomij, ‘axkipiaskia iricojyo iixtla toTeko’ (Luc. 12:16-21). Nelia tlauel ipati tlaj tijchiuasej tlen toTeotsij kineki, pampa kiampa kejuak ‘tikajokuisej tlen nelia ipati nepa iluikak’ (Mat. 6:20). Kiampa tiyolpakisej uan nojkia yolpakis Jehová (Prov. 27:11). Uajka, tlauel ipati timouampojchiuasej iuaya toTeotsij uan amo titlatominpiasej.

16. ¿Tlake uelis tijchiuas tlaj mitstekipachoua se tlenijki?

¹⁶ Tlaj tijtemolisej san titlatominpiasej tijpiasej miak kuesoli (Mat. 6:19). Jesús kiijtok tlaj nochipa san tomij tikilnamiktosej, tijmatisej ouij tijtekipanosej san Jehová (Mat. 13:18, 19, 22). Sekij nochipa motekipachojtokej pampa moiljuiaj kinpanos tlen amo kuali. Tlaj kej nopa timoyoliljuisej, uelis tijpiasej se kokolistli uan ayokmo timotemachisej ipan Jehová. Biblia kiijtoua katli tlauel motekipachoua moyolkokoua, uan se “kuali tlajtoli” uelis kichiuas ma yolpaki (Prov. 12:25). Tlaj mitstekipachoua se tlenijki, ximonojnotsa iuaya se katli kuali tikixmati. Uelis motata, monana, moueue, mosiua o se kuali mouampo. Inijuantij uelis mitspaleuisej ximotemachi ipan Jehová uan mitsyolchikauasej.

17. ¿Kenijkatsa techpaleuia Jehová kema timotekipachouaj?

¹⁷ San Jehová kikuamachilia tlen techtekipachoua uan uelis techpaleuis. Yeka, Pablo kiijkuilok: “Ayok ximotekipachokaj ika niyon se tlamantli. Más kuali ximomaijtokaj ika toTeko ika nochi tlen inmechpanotiuala. Xijtlajtlanikaj ma inmechmaka nochi tlen moneki uan xijtlaskamatikaj [...]. Intla keja nopa inkichiuaj, toTeko inmechmakas tlaseuilistli ipan inmoyolo [...]. Uan nopa tlaseuilistli kiyaualtsakuas inmoyolo uan inmotlalnamikilis” (Filip. 4:6, 7). Uajka, tlaj tlauel timotekipachojtok, xikilnamiki Jehová techpaleuia uan kiampa nochipa timouampojchijtos iuaya. Ya techpaleuia ika toikniuaj, ika ueuejtlakamej, ika nopa tlalnamijkatlatekipanojketl tlen nelia temachtli, ika iluikaeuanij uan ika Jesús.

18. ¿Kenijkatsa uelis tijtekiuisej totlalnamikilis?

¹⁸ Uajka, moneki tijtekiuisej totlalnamikilis uan kiampa nojkia tijchiuasej kej Jehová uan tijkuamachilisej tlake kiyolmatij sekinok (1 Tim. 1:11; 1 Juan 4:8). Nojkia tlauel tiyolpakisej tlaj tikiniknelisej sekinok, tikinchiuilisej tlen kuali, tlaj timoiljuisej tlake panoskia ika tlen tijchiuasej uan tlaj amo nochipa san timotekipachojtosej. Yeka, ma timoyoliljuikaj kenijkatsa elis nopa Xochimili uan kenijkatsa uelis tijchiuasej kej Jehová (Rom. 12:12).