1. ¿Tlake moiljuiaj miakej maseualmej ipan ni tonali?

IPAN ni tonali miakej amo kitlepanitaj toTeotsij itlanauatiljuaj. Moiljuiaj amo kenijki tlaj motekasej sansejko katli amo mosenkajtokej o tlaj se tlakatl motekaskia iuaya se tlakatl o se siuatl iuaya se siuatl. Ipan miak películas, amochtli, uikatl uan ipan televisión nesij katli kichiuaj ni (Sal. 12:8). Maske ipan Tlaltipaktli san tlemach tlachiuaj, Jehová uelis techpaleuis amo ma tijchiuakaj nopa (xijpoua 1 Tesalonicenses 4:3-5).

2, 3. 1) ¿Kenke moneki amo timoyoliljuisej tlen amo kuali? 2) ¿Tlake tikixtomasej ipan ni tlamachtili?

² Pampa nochi titlajtlakolejkej, uelis techyoltilanas se keski amo kuali tlamantli, kej michimej kinyoltilana tlen ika michtlajtlamaj. ¿Tlake moneki tijchiuasej tlaj timoiljuisej tlen amo kuali? Moneki nimantsi timosentlalisej amo tijchiuasej. Tlaj amo tijchiuasej ni, nojua tlauel techyoltilanas. Uan kema tijpantiskiaj tlen techyoltilana, ueliskia titlajtlakolchiuasej (xijpoua Santiago 1:14 uan 15). Yeka, tlaj tijnekij Jehová ma yolpakto moneki amo timoyoliljuisej tlen amo kuali.

 ³ Uajka, moneki kuali tikitasej tlake timoyoliljuiaj. Tlaj amo tijnekisej tijchiuasej tlen amo kuali tlen techyoltilana, amo titlaixpanosej tlen ika kichiuaj katli momekatiaj yon titlaijiyouisej ika nopa (Gál. 5:16). Ipan ni tlamachtili tikitasej eyi tlamantli tlen techpaleuis amo tijchiuasej tlen techyoltilana. Se. Timouampojchijtokej iuaya Jehová. Ome. Tlen Biblia techtlajtolmaka. Uan eyi. Toikniuaj katli ya uejkajtok kitekipanojtokej toTeotsij.

4. ¿Kenijkatsa techpaleuia pampa timouampojchijtokej iuaya toTeotsij?

⁴ Biblia kiniljuia katli kinekij mouampojchiuasej iuaya toTeotsij: “Xijkauakaj inmotlajtlakol” uan “ximoyolpajpakakaj” (Sant. 4:8). Ni kiijtosneki toTeotsij iuampoyouaj tijchiuaj uan timoyoliljuiaj tlen kipaktia. Uan pampa nojua tijnekij timouampojchijtosej iuaya, tijchiuaj kampeka amo tikixpanosej ika tlen tijchiuaj uan san timoyoliljuiaj tlen kuali (Sal. 24:3, 4; 51:6; Filip. 4:8). Jehová kimati titlajtlakolejkej uan kemantika techyoltilana tlen amo kuali. Uan pampa amo tijnekij tikixpanosej, timosentlalijtokej amo titlajtlakolchiuasej uan san timoyoliljuisej tlen amo sokiyo (Gén. 6:5, 6).

5, 6. ¿Kenijkatsa kema timomaijtouaj techpaleuia amo tijchiuasej tlen amo kuali tlen techyoltilana?

⁵ Tlaj nochipa timomaijtosej, Jehová techpaleuis amo tijchiuasej amo kuali tlamantli tlen techyoltilana. Ya techpaleuis ika itonal uan techmakas chikaualistli, kiampa nochipa tiitstosej amo tisokiyojkej. Kema timomaijtosej uelis tikiljuisej tijnekij timoyoliljuisej san tlen kipaktia (Sal. 19:14). Uan nojkia ueliskia tijtlajtlanisej ika nochi toyolo tlaj kiita se tlenijki tlen amo kuali katli ueliskia kichiuas ma titlajtlakolchiuakaj (Sal. 139:23, 24). Nojkia ueliskia tikiljuisej ma techpaleui amo timomekatisej. Uan tlauel moneki ma tikiljuikaj ma techpaleui kema techyoltilanas tlen amo kuali (Mat. 6:13).

⁶ Uelis kema ayamo tijtekipanouayayaj Jehová techpaktiyaya tijchiuasej tlen amo kuali. Uan maske uelis kemantika nojua tijnekij tijchiuasej, Jehová uelis techpaleuis tijkauasej. Ya nopa kipanok David. Maske motejki iuaya se katli amo eliyaya isiua, teipa moyolkuepki uan kiiljuik Jehová ma kipaleui tlaneltokas uan kipias ‘iyolo tlapajpaktik’ (Sal. 51:10, 12). Yeka, tlaj amo tijneki tijchiuas tlen amo kuali tlen mitsyoltilana, xikiljui Jehová ma mitspaleui. Ya mitspaleuis tlauel tijnekis tijneltokas uan timosentlalis timoyoliljuis uan tijchiuas san tlen kuali (Sal. 119:133).

7. ¿Kenijkatsa techpaleuia Biblia amo tijchiuasej tlen amo kuali tlen techyoltilana?

⁷ Jehová uelis techpaleuis ika Biblia kema timomaijtosej. Nopaya tikasij toTeotsij itlalnamikilis tlen “senkistok kuali” (Sant. 3:17). Tlaj mojmostla tijpouasej Biblia, nochipa timoyoliljuisej san tlen amo sokiyo (Sal. 19:7, 11; 119:9, 11). Tlen techtlajtolmaka Biblia uan tlen kiijtoua kichijtokej sekinok techpaleuia amo tijchiuasej tlen amo kuali tlen techyoltilana.

8, 9. 1) ¿Kenke kiijtoua Proverbios 7 se telpokatl momekatik iuaya se katli tlakanemiyaya? 2) ¿Tlake tlamantli ueliskia kichiuas ma tijchiuakaj tlen amo kuali?

⁸ Ipan Proverbios 5:8, Biblia techiljuia amo ma tijnekikaj timomekatisej. Uan ipan Proverbios 7 kiijtoua se tlapoualistli tlen se telpokatl katli tlayoua yajki paxaloto nechka kampa itstoya se siuatl katli  tlakanemiyaya. Kej moyoyontijtoya teyoltilanayaya kampa ijkatoya. Kema kiitak nopa telpokatl, kinechkauito, kitsoponik uan kiiljuik tlen kichijki tlauel ma kineki motekas iuaya. Maske nopa telpokatl amo kiski pampa kinekiyaya tlajtlakolchiuas, kena tlaixpanok pampa amo kiijtok amo kichiuas tlen amo kuali tlen kiyoltilanki. Yeka tlaijiyouik. Tlaj moiljuijtoskia tlen ueliskia kipanos, amo yajtoskia kampa nopa siuatl (Prov. 7:6-27).

⁹ Tojuantij nojkia uelis amo kuali tijtlapejpenisej tlen tijchiuasej tlaj amo timoiljuisej ueliskia tijchiuasej tlen amo kuali. Tlaj ika tlayoua san tijpatilijtias canales nopa televisión pampa tijnekis tikitas tlake kinextijtokej, tlauel amo kuali. ¿Kenke? Pampa ueliskia tikitas kampa kinnextijtokej katli momekatiaj. Uan tlaj tijtekiuijtosej Internet, tlauel amo kuali eliskia tlaj tijtsonpechiliskiaj kampa amo tijmatij tlake nesis, o kampa kinnextiaj katli momekatiaj o kampa nesi pornografía. Ni ueliskia kichiuas ma tikitakaj tlen techyololiniskia tijnekisej tijchiuasej tlen amo kuali tlen techyoltilana uan ayokmo ma tijneltokakaj Jehová.

10. ¿Tlake uelis techpanos tlaj amo tijneltokasej tlen kiijtoua 1 Timoteo 5:2? (Xikita nopa achtoui tlaixkopinkayotl.)

¹⁰ Biblia nojkia techiljuia kenijkatsa moneki mouikasej tlakamej uan siuamej (xijpoua 1 Timoteo 5:2). Se toikni kinextia tlauel kiiknelia san katli iuaya mosenkajtok. Uan se toikni katli nojua itstok iselti kinextia tlauel kiiknelia san katli iuaya kineki mosenkauas. Sekij moiljuiaj kema omej amo moitskiaj, amo kenijki tlaj kinextisej moixtokaj, moixuetskilisej o moojolinisej ininixpa. Kema omej kichiuaj  ni, uelis peuas kinekisej kichiuasej tlen amo kuali tlen kinyoltilana uan momekatisej. Sekij ya nopa kinpanotok, uan tojuantij nojkia ueliskia techpanos.

11. ¿Tlake techmachtia tlen kichijki José?

¹¹ Tlen kipanok José uelis tlauel techpaleuis. Iteko isiua kinejki kichiuas ma moteka iuaya. Maske José kiiljuik amo kinekiyaya, ya nochipa kiiljuiyaya nopa uan kiiljuiyaya ma mokauakaj ininseltitsitsij (Gén. 39:7, 8, 10). Se ixtlamatketl kiijtoua nopa siuatl moiljuiyaya tlaj mokauaskiaj ininseltitsitsij, José nimantsi kinekiskia motekas iuaya. Pampa José mosentlalijtoya amo kema kiixuetskiliskia yon kiixtokaskia, amo moyoliljuik kichiuas tlen amo kuali. Se tonali, nopa siuatl kiitskik José ipan iyoyo uan kinejki kichiualtis ma moteka iuaya. Uan ya “motlalojtejki uan kikajtejki iyoyo ipan ima” (Gén. 39:12).

12. ¿Kenke tijmatij tlen tijtlachiliaj uelis kichiuas ma tijnekikaj tijchiuasej tlen amo kuali?

¹² Tlen tijtlachiliaj uelis kichiuas ma tijnekikaj tijchiuasej tlen amo kuali. Jesús kiijtok tlaj se tlakatl kitlachiliskia se akajya katli amo isiua uan kinekis motekas iuaya, eliskia kejuak ya momekatik iuaya ipan iyolo (Mat. 5:28). Ya nopa kipanok David. Biblia kiijtoua ika “kalpani [...] kiitak se siuatl tlen maltiyaya” (2 Sam. 11:2). Maske nopa siuatl monamiktijtoya, David mokajki kitlachilijtoya uan san moyoliljuijtoya ipan ya, yeka teipa motejki iuaya.

13. 1) ¿Kenke tlauel moneki tijchiuasej “se tlajtol[senkaualistli]” ika toixtiyoljuaj? 2) ¿Tlake kiijtosneki kema tijchiuaj nopa?

¹³ Tlen kichijki Job nojkia uelis tlauel techpaleuis. Ya kiijtok: “Na nijchijki se tlajtol[senkaualistli] ika noixtiyol” (Job 31:1, 7, 9). Tojuantij nojkia tlauel moneki ma tijchiuakaj kej ya. ¿Kenke? Pampa nopa techpaleuis amo ma techyoltilana tijchiuasej tlen amo kuali. Uan, ¿tlake kiijtosneki tijchiuasej “se tlajtol[senkaualistli]” ika toixtiyoljuaj? Timosentlalisej amo kema tijtlachilisej se akajya pampa tijnekisej timomekatisej iuaya. Uan tlaj nesis kenijkatsa momekatiaj ipan televisión, ipan se amatl, se pilamochtsi o ipan seyok tlamantli, nimantsi titlachiasej oksejko.

14. ¿Tlake moneki tijchiuasej uan kiampa nochipa tiitstosej amo tisokiyojkej?

¹⁴ Tlen ika timomachtijkej uelis tikita moneki tijpatlas se keski tlamantli. Tlaj kena, nimantsi xijpatla. Tlaj tijneltokasej Jehová, amo titlaixpanosej ika tlen momekatiaj uan nochipa tiitstosej amo tisokiyojkej (xijpoua Santiago 1:21-25).

15. ¿Kenke tlauel moneki titlajtlanis ma mitspaleuikaj tlaj tijmati ouij amo tijchiuas tlen amo kuali?

¹⁵ Tlaj tijmati ouij amo tijchiuas tlen amo kuali tlen mitsyoltilana, xikiljui ma mitspaleui se toikni katli ya uejkajtok kitekipanojtok toTeotsij uan uelis kuali mitstlajtolmakas ika Biblia. Maske ouij tikiljuis se akajya, moneki tijchiuas (Prov. 18:1; Heb. 3:12, 13). ¿Kenke? Pampa nopa toikniuaj uelis mitspaleuisej ika Biblia tijmatis tlake moneki tijpatlas. Kiampa nojua timouampojchijtos iuaya Jehová.

16, 17. 1) Xikijto kenijkatsa ueuejtlakamej kinpaleuiaj katli kimatij ouij amo kichiuasej tlen amo kuali tlen kinyoltilana. 2) ¿Kenke katli kitlachiliaj pornografía tlauel moneki nimantsi tlajtlanisej ma kinpaleuikaj?

¹⁶ San ueuejtlakamej uelis tlauel kuali techpaleuisej (xijpoua Santiago 5:13-15). Se telpokatl katli eua Brasil kiijtoua uejkajki miak xiuitl kimatiyaya ouij  amo kichiuas tlen amo kuali tlen kiyoltilanayaya. Kiijtoua: “Maske nijmatiyaya Jehová amo kipaktiyaya tlen nimoyoliljuiyaya, tlauel nipinauayaya nikiljuis se akajya”. Se ueuejtlakatl kiitak nopa telpokatl monekiyaya kipaleuiskiaj, yeka kiiljuik ma kinnojnotsa ueuejtlakamej. Nopa telpokatl kiijtoua: “Ueuejtlakamej kinextijkej tlauel nechikneliyayaj uan kikuamachilijkej tlen nechpanoyaya. Nopa tlauel nechpaktik pampa nimoiljuiyaya amo kinamikiyaya nechnextilisej nopa. Kuali nechtlakakilijkej, kitekiuijkej Biblia kema nechilnamikilijkej Jehová nechiknelia uan nouaya momaijtojkej. Nopa nechpaleuik nijchiuas tlen nechtlajtolmakakej ika Biblia”. Nama ya panotok miak xiuitl uan kuali mouampojchijtok iuaya Jehová. Ya kiijtoua: “Nama nijmati tlauel kuali titlajtlanisej ma techpaleuikaj uan amo toselti tijtemolisej amo tijchiuasej tlen amo kuali tlen teyoltilana”.

¹⁷ Tlaj timomajtok tijtlachilia pornografía, tlauel moneki nimantsi xitlajtlani ma mitspaleuikaj. ¿Kenke? Pampa tlaj amo tijchiuas uelis titlajtlakolchiuas. Tlaj tijchiuas nopa, tlauel tikinyolkokos mochampoyouaj uan mouampoyouaj. Uan nojkia tijchiuas ma kitlaijiljuikaj toTeotsij. Miakej kiniljuijtokej ueuejtlakamej ma kinpaleuikaj uan kichijtokej tlen kintlajtolmakatokej. Yeka nojua mouampojchijtokej iuaya Jehová uan itstokej ipan tlanechikoli (Sal. 141:5; Heb. 12:5, 6; Sant. 1:15).

18. ¿Tlake nojua moneki tijchijtosej?

¹⁸ Maske ipan Tlaltipaktli tlen kinauatia Satanás kichijtiauij tlen tlauel sokiyo, toTeotsij itekipanojkauaj kichiuaj kampeka amo kichiuasej tlen amo kuali uan itstosej amo sokiyojkej. Uan nopa tlauel kipaktia Jehová. Yeka, ma tijkauakaj ma techpaleui nopa eyi tlamantli tlen tikitakej. Se. Timouampojchijtokej iuaya Jehová. Ome. Tlen Biblia techtlajtolmaka. Uan eyi. Toikniuaj katli ya uejkajtok kitekipanojtokej toTeotsij. Kiampa tiyolpakisej uan tijpiasej kuali totlalnamikilis (Sal. 119:5, 6). Teipa, Satanás kitsontlamiltisej uan tojuantij nochipa tiitstosej ipan se yankuik Tlaltipaktli tlen amo sokiyo.