Uejkajkia maseualmej kipixtoyaj se metlatl kampa kitisiyayaj trigo. Nopa mojmostla kichiuayayaj siuamej o katli tlatekipanouayayaj techaj. Ya nopa mojmostla kakistiyaya kichiuayayaj (Éx. 11:5; Jer. 25:10).

Kiasitokej tlaixkopinkayomej uan tetl tlen uejkajkia kichijkej ne Egipto tlen kinextia kenijkatsa tisiyayaj. Ipan se patlauak tetl kitemayayaj nopa trigo uan ika se amo ueyi tetl kitisiyayaj. Katli tisiyaya motlankuaketsayaya iixpa nopa patlauak tetl uan ika ome ima kiitskiyaya nopa metlapili o tetl tlen ika tisiyaya. Teipa, ika chikaualistli kioliniyaya ika tlaixpa uan ika tlaika uan kiampa kitisiyaya nopa trigo. Ipan se amochtli kiijtoua nopa amo ueyi tetl ietika eliyaya se ome o naui kilos. Tlaj se akajya kimakiliskiaj ika nopa tetl ueliskia mikis (Juec. 9:50-54).

Tlauel monekiyaya nochi kipiaskiaj se metlatl. Yeka Biblia kiijtoua: “Axaka uelis tetlanejtis tomij uan tlajtlanis ma kiprendakauilikaj se molino o nopa tetl tlen ipan kitijtisij trigo para harina pampa axuelis kichiuasej pantsi. Nopa eliskia keja kitlajtlaniskia ma kimaka iyolis” (Deut. 24:6).

Biblia kiijtoua Jesucristo “mokaua inechka” iTata (Juan 1:18). Ni kiijtosneki Jesús uan iTata tlauel kuali mouikaj. Uejkajkia kema tlakuayayaj nesiyaya kejuak motekayayaj.

Kema itstoya Jesús, nopa judeaeuanij motekayayaj ipan tlen kitlalijtoyaj inechka mesa tlen eliyaya echkapantsi. Kema katli tlakuayayaj kinechkauiyayaj nopa mesa, kejuak motekayayaj uan momatoktiyayaj ipan se tsontetomitl. Kiampa ika ininmaanejma ueliskia kiitskisej tlen kikuaskiaj. Se amochtli kiijtoua: “Kema kiampa kinechkauiyayaj mesa, sejse tlakatl itsonteko mokauayaya nechka iyolixko katli itstoya ika iopoch”. Yeka kiijtouayayaj se akajya “mokaua inechka” seyok.

Se akajya tlauel kipatiitayaya kema katli kitlanejki tlakuayaya inechka. Yeka, kema Jesús tlakuajki ininuaya itokilijkauaj, nopa apóstol Juan ‘katli Jesús tlauel kiiknelik’ tlakuajki inechka. Uan Biblia kiijtoua Juan ‘moseuijtoya inechka’ pampa kinekiyaya kitlajtlanis se tlamantli (Juan 13:23-25; 21:20).