TLAMACHTILI TLEN IKA PEUA: ¿TLAKE UELIS MITSPALEUIS AMO TLAUEL TIMOTEKIPACHOS?
Ipan nochi Tlaltipaktli tlauel motekipachouaj
“Kema nijkouato tlakualistli, san galletas nikasito, ¡uan tlauel patiyo kinamakayayaj! Kema tonilik ayokmo tleno onkayaya.” (Paul, Zimbabue)
“Kema noueue nechiljuik techkauaskia, tlauel amo kuali nijyolmatki. Nimoiljuik kenijkatsa nikiniskaltiskia nokoneuaj.” (Janet, Estados Unidos)
“Kema kakistij sirenas, nimantsi nia kampa nimomanauia uan nimomajkaua tlalchi kema mototopotsaj. Teipa, maske ya panotok se keski horas nojua nimajmajtok.” (Alona, Israel)
Tiitstokej ipan tonali tlen “nelia fiero” pampa onka miak kuesoli (2 Tim. 3:1). Miakej motekipachouaj pampa amo kipiaj tomij, onka uejueyi tlauilankayotl, kokolistli, pampa kintlasojsoljuilia se akajya o se chikauak ajakatl uan tlen sejse maseuali kikuesoua. Sekij kintekipachoua tlaj se tepajtijketl kiniljuis kipiaj cáncer uan sekinok tlen ueliskia kinpanos teipa ininkoneuaj uan ininixuiuaj.
Tlaj mitstekipachos se tlamantli amo kenijki. Kemantika techtekipachoua kema moneki tijchiuasej se examen, tikamanaltisej kampa itstokej miakej o kema tiauij tijtemouaj se tekitl. Maske kema timotekipachouaj se kentsi techpaleuia ma tijmatikaj tlake tijchiuasej, tlaj nochipa timotekipachojtosej, uelis techtlanauis. Kema tlaixmatinij momachtijkej ika kipano 68,000 maseualmej kiitakej tlaj se akajya motekipachoskia se kentsi ueliskia kichiuas nima ma miki. Yeka Jesucristo tlajtlanki: “¿Ajkia tlen inmojuantij tlaj tlauel motekipachos uelis nojua uejkauas itstos?”. Ni nelia, pampa maske tlauel timotekipachoskiaj amo kichiuaskia ma tiitstokaj miak xiuitl. Yeka, Jesús kiijtok: “Amo ximokuesokaj” (Mat. 6:25, 27, TNM). ¿Tlake ueliskia techpaleuis amo tlauel timotekipachosej?
Moneki tijchiuasej tlen techpaleuis, timomaijtosej uan timotemachisej ika nochi toyolo ipan tlen toTeotsij kiijtoua kichiuas teipa. Ma tikitakaj kenijkatsa ni kinpaleuik Paul, Janet uan Alona ayokmo tlauel ma motekipachokaj. Maske nama amo tijpiaj yon se kuesoli, uelis teipa kena.
