TLAMACHTILI TLEN IKA PEUA: ¿UELIS SAMPA ITSTOSEJ MIJKATSITSIJ?
¿Kenke tijneltokaj nelia moyolkuisej mijkatsitsij?
Sekij moiljuiaj amo kinamiki tijneltokasej moyolkuisej mijkatsitsij. Apóstol Pablo amo kiampa moiljuiyaya, yeka kiijtok: “Intla san techpaleuia tojuantij tlen timotemachiaj ipan Cristo kema noja tiitstokej uan axtleno techpaleuiskia kema timikisej, uajka achi más titeikneltikej que nochi sekinok tlakamej. [...] Cristo nelia moyolkuik kema ya miktoya keja nopa achtoui pixkistli tlen tenextilia para teipa onkas se ueyi pixkistli. Kena, pampa moyolkuik ya, technextilia nochi sekinok tlen miktokej nojkia moyolkuisej teipa” (1 Cor. 15:19, 20). Pablo motemachiyaya nelia moyolkuiskiaj mijkatsitsij, pampa Jesús ya moyolkuitoya (Hech. 17:31). * Yeka, Pablo kiijtok Jesús eliyaya “nopa achtoui pixkistli” pampa yaya achtoui kiyolkuikej uan ueliskia itstos nochipa. Uajka, tlaj Jesús achtoui moyolkuik, nojkia moyolkuiskiaj sekinok.
Job kiiljuik toTeotsij: “Tlauel tijnekiskia tinechitas pampa ta tinechchijki”. (Job 14:14, 15, TNM)
Jehová “axueli istlakati”, yeka timotemachiaj nelia moyolkuisej mijkatsitsij (Tito 1:2). Ya amo kema techkajkayajtok uan amo kema techkajkayauas. Yeka, ¿timoiljuia toTeotsij san kiijtoskia uan kinextiskia kena uelis kinyolkuis mijkatsitsij, uan teipa amo kichiuaskia? Amo kinamiki kiampa timoiljuisej.
Jehová kineki kinyolkuis pampa kiniknelia. Job tlajtlanki: “Tlaj se tlakatl mikis, ¿uelis sampa itstos? [...] Ta tinechnojnotsas, uan na nimitsnankilis. Tlauel tijnekiskia tinechitas pampa ta tinechchijki” (Job 14:14, 15, TNM). Ya motemachijtoya toTeotsij tlauel kinekiskia kiyolkuis. ¿Nojua kinektok kichiuas nopa? Biblia kiijtoua: “NiinmoTeko [Jehová], axnimoyolpatla” (Mal. 3:6). ToTeotsij tlauel kineki kinyolkuis mijkatsitsij uan ma yolpakikaj, kej se tetaj kineki ma moyolkui ikone katli ya mijki. Uajka, toTeotsij tlauel kineki kinyolkuis, uan ya kena uelis kichiuas (Sal. 135:6).
Maske tlauel amo kuali kema se akajya miki toTeotsij uelis kiyolkuis
Jehová kichiuas iKone ma kinyolkui mijkatsitsij, yeka tlauel yolpakisej katli ya mijki se tlen ininchampoyouaj. Uan Jesús tlauel kipaktiskia kichiuas nopa. Kema nechka kiyolkuiskia iuampo Lázaro, “Jesús chokak” kema kinitak tlaijiyouijtoyaj Lázaro isiuaikniuaj uan iuampoyouaj (Juan 11:35). Kema se siuatl mijki iyojtsi ikone, Jesús “kitlasojtlak uan kiiljuik: Amo xichoka”. Uan nimantsi kiyolkuik ikone (Luc. 7:13). Uajka, Jesús kiyolkokoua kema kiita titlaijiyouiaj pampa miki se akajya. ¡Nelia tlauel yolpakis kema nochi yolpakisej pampa kinyolkuis mijkatsitsij!
¿Nojkia miktok se tlen mochampoyouaj? Maske uelis timoiljuia katli ya mijkej ayokmo uelis sampa itstosej, toTeotsij kinyolkuis uan ni kichiuas iKone. ToTeotsij kineki nopaya xiitsto uan kiampa uelis tikinselis mochampoyouaj. Ximoyoliljui kenijkatsa sansejko inmoiljuiaj tlake nochipa inkichiuasej, uan ayokmo kema inmikisej.
Lionel, katli tikijtojkej ipan achtoui tlamachtili, kiijtoua: “Kema nechiljuijkej moyolkuiskiaj mijkatsitsij, amo nijneltokayaya uan nimoiljuiyaya san nechkajkayauayayaj. Teipa nikitak Biblia nelia kiijtoua nopa. ¡Nelia tlauel nijneki sampa nikitas noueyitata!”.
¿Mitspaktia tijmatis sekinok tlamantli? Jehová itlajtoltemakauaj tlauel kinpaktiskia mitsnextilisej ika Biblia kenke kineltokaj nelia moyolkuisej mijkatsitsij. *
^ párr. 3 Ipan amochtli La Biblia... ¿la Palabra de Dios, o palabra del hombre? tlen kichijtokej Jehová itlajtoltemakauaj, ipan iamayo 78-86, nesi nelia moyolkuik Jesucristo.
^ párr. 9 Xikita tlamachtili 7 ipan amochtli, ¿Tlake nelnelia tlamachtia Biblia? tlen kichijtokej Jehová itlajtoltemakauaj.
